Read Ekari 1 TIMOTIUS 6 Bible Online

1 TIMOTIUS 6 - Ekari bible

1 TIMOTIUS 6

¹Me ka umina ejakimakita daniido okeija ka ibo kede umina ibo ejaikija dimi to egai; Ugatameja eka ma, iniija ka me etopija mana ma ewidogidoke na kojoka.

²Maakodo gai ka ibo jago kidaa okaija ibo kidi kenekame kidoke kouja daba te ejaikai; kodeja umina juwidoke to, kii ke enaa agijo jaekowaate kidi, okai na maakodo gai me kouja, daana ei egata. Kei manaido etopai ma, pitokai ma.

³Joko ka mana me idaana etopi-toojogo, kou ko iniija Tuhan Jesus Keristus maakodo mana ma, Ugatame dijo dou mana ma, dimi akagadime beu mana ko,

⁴kii me kidi ibo puga gajake tumaana ma gai beu, kodeja mana eneene jago, akaije akaije, kou ko kumi mejawii manaido, daana akawage ma, me eduwai ma, kipa gaji, mee? tijake peu kodo.

⁵Dimi ko peu kita bagee; maakodo mana gata dimi kodo jamo igadoke tijake akaije akaije to tigoo; okeija ka gai ko, Ugatame dijo doudaiga bago kija mana no! gai.

⁶Ugatame dijo dou kou ko, maakodo ibo bago kija, kou danite kegepa ideide ki-toojogo ko.

⁷Inii tumaana agijo makiida kiija doke-mei beu kouja, daana maa kou, tumaana agijo ma te doke-uwii.

⁸Kodeja ineepa naija agijo juwa, makija agijo juwa, makitoojogo ko tiki no! neegai.

⁹Tonawi kaine no! gaja bagee kede gaado tapa bogi atii; bokeida ejakimakita, dimi beu ka peu eewija kibigi dimi duba; me tumaija gibu tijake kigikuwa tijake peu kidaa tai.

¹⁰Mege kibigi dimi kou ko peu utoma ka epauto mana; kou mana pitakita bagee me ino ke maakodo gai maida make wo keenidaa tijake okei kede kegepa gaagaa ka nokogai to tigoo.

¹¹Kodeja aki ki, ei, Ugatame jakei te-tai kidi, kei manaido maida make okii to tai; maakodo bokouto ma, dijo dou ma, maakodo gai ma, ipa ma, bo wemakai ma, debee kegepa ma, kei manaido juma doodoo.

¹²Maakodo gaidaiga jape ka ko umina maa kou ekowai to jape moteete. Ajii tai kodo jakimakai, mana katita ka kodo, me wedaba pekaida aki godajaweetege ka kodo.

¹³Ugatame utoma agijo ija boko duwajawe-tai kidi pekaida, daana Keristus Jesus, Pontius Pilatus jumaapa enaa mana godajawita me kidi pekaida, ani bida peu katii,

¹⁴anaanibeu jimubeu kidi okaija nitimakita mana kodo jakimakai to, iniija Tuhan Jesus Keristus ewaa kaitagiida to.

¹⁵Putuuda gaa ewaa kaita mana kodo, muta etuwaja ena to bida bokouto jago kidi, ajii tai epauto jago kidaa; kii ke maki jakimake-tai utoma ejakimakita me kidi, daana boko duwajawetai utoma boko jaduwajawita me kidi.

¹⁶Okai kidi to tou to me, daana me ko te begoo tija aweida to-tai kidi; akado te tijake te edomakija me; imo to togoo ajiipi ma bida ma okai ipuwe. Amin.

¹⁷Kii makiida ka tonawi daniido ibo puga te te-tijake etimenii, daana igadaa tija tonawiido maida dimi te kotopijawii, kodeja Ugatame kidi maida, inii ideide te-tita utoma agijo utoma abuma nijadegijawita kidi.

¹⁸Daana enaa agijo kei tai eti-menii, okei enaa kei tai agijo ko tonawi kidaa tai kodo, bunu enaa ma jowee ma.

¹⁹Kou danite enaa kabo akaato makijawii, wadaato maakodoudaiga ume-wo te-tita.

²⁰Ei, Timotius, aki maida kaadokijawita mana kodo epeepite munimakai, daana me ka wogidaa wegaa-wegaa mana jamo jaikai; daana epi mana maida akaije akaije mana, puja manaidaiga „epi” wegaigai mana kodo.

²¹Kou manaido me wija wido wegajawijake maakodo gai maida make wo keenidaa tita. Ugatameja jikoo bokouto kijaduwajawii.