Read Ekari 2 TIMOTIUS 1 Bible Online

2 TIMOTIUS 1 - Ekari bible

2 TIMOTIUS 1

¹Ani ki Paulus kidi Keristus Jesus eti-awita me kidi, Ugatameja gata dimiidaiga, Keristus Jesus duba ka ajii bokouto togijawita mana epeepeidaiga,

²ani joka didé Timotius kidiipa kaamakii. Iniitai Ugatame ma, e boko te boko nijaduwa-tai me Keristus Jesus kidaa ma jikoo bokouto ma, ipa bokouto ma, muka-muka bokouto ma kaaduwajawii.

³Anija dimi jimubeudaiga Ugatame jakei te-tai kidi, ani aijaane muumaane na kei tei tita danite, ani muta etuwai. Wanee agapi ani te duwajake sembahjang duba kajaki-tou to,

⁴akija jege kodo kagajake; ani kogaa umina kadoune tijake ani ideide taine kodaa.

⁵Aki duba ka maakodo gai puki kodo kaga-tou to, edoga kidi akooka Lois duba tota dimi kodo, daana akuukai Eunike duba maija; daana aki duba topa maija kagai.

⁶Okai kouja Ugatameja aki duba kaawita agijo, anija gane aki maida kaamakita gaa ka kodo, pakamijawe-tijake ga-kanii.

⁷Ugatameja weda dimi niimijawii ko beu kouja, kodeja bida ma, ipa ma, akaato domakai ma dimi kodo.

⁸Okai kouja iniija Tuhan kidi maida make mana jawegai ko ego te neegai; daana ani ki Tuhan maida make buda nagadimimakijake topa ko ego te gai kodeja aki ki ajii mana maida make enaimo neegaduwajawii to, Ugatameja bidaidaiga.

⁹Okai ajii bokouto nijaduwajawita me kidi; daana jimubeudaiga mana nitita, iniija kei tita agijo epeepeidaiga ko beu, kodeja okai kidaa dimiidaiga, daana Keristus Jesus duba ka jikoo bokouto nijaduwajawitaidaiga, kii wagi kou wagi jawii beu gaa kodaa make.

¹⁰Kodeja ito kou ewaa tapa awita, ajii bokouto nijaduwa-tai me Keristus Jesus metaida kodaa; okai boka dabapigu tijawijake, peu te kija takaa kodo ajii manaidaiga wigimijawita.

¹¹Okai kou mana kodaa ani ki wude-tai ma, eti-awita me ma, me etope-tai ma najaikita.

¹²Okai kouja ani kei manaido didi gaduwagoo to. Kodeja ani ego beu, ani maakodo egata me kidi ani epi kouja, daana anija ka okai maida jadokijawita mana ko putu naagouda to naajakimakaitagi kodo ko ani epaapa timakai.

¹³Maakodo mana utoma komuga motii ko, aneepa make juweetege mana kodo. Keristus Jesus duba ka maakodo gai ma, ipa dimi ma enaimo.

¹⁴Akeepa kaadokijawita maakodo mana kodo jaki-tou to, Rohulkudus inii duba tojake kodaa.

¹⁵Asia makijo ka bagee utoma jamo najaikita mana aki epi, daana okei jupi Pigelus ma Hermogenes ma.

¹⁶Onesiporus uguwo Tuhan kidaa ipa egai, okai kigi wedaba dimi mobu naawita kouja; daana ani pute buda nagadimimakita maija ego beu.

¹⁷Kodeja Rum makijo dakii tita gaa umina naubajake nadomakeemegi.

¹⁸Tuhan kidaa putu naagouda ipa egai; daana okai Epesus makiida naadadita mana kodo aki epi.