Read Ekari IBERANI 10 Bible Online

IBERANI 10 - Ekari bible

IBERANI 10

¹Musaja dijo douja mana kou ko meitai ka enaa manaido ajá kodo to, mana puki ko beu. Okai kouja, okeija ka taun gakita jo-menigoo to tei tita manaidaiga meete bagee kede boko te jaduwamake.

²Boko duwajawii naako, beu, mee? jo-meneete kou ko jaikitoja. Migaakobe teete bagee kede peu maida make witogikumii naako, peu agijo wado te ga-toja.

³Kodeja kou jo-menigoo tei tita kodoudaiga taun gakita peu agijo wado gai-gai.

⁴Sapi emo ma, kamigi emo ka ma peu agijo kodo te wunamake.

⁵Okai kouja, Keristus makiida mijouwe kita gaa kodo kei tita mana ko: Jo-kanii ma, ekega-kanii ma aki ide beu kodeja Má jato epeepi natijaweetege;

⁶Jookogai agijo ma, peu maida make kanii ma Aki juma dege-dege beu.

⁷Tijake anija katii ko: Dodou, akija dimi wo ekowaine meega, ei, Ugatame. Ugata kapogeije duba ani maida make ebijamakita mana kodo.

⁸Wadouwe ka mana wegata gaa kodaa, kou ko „Jo-kanii ma, ekega-kanii ma, jookogai ma, peu maida make kanii ma aki ide gai beu tijake juma dege-dege beu” (Musaja dijo douja manaidaiga kei te-tai agijoudo kodo);

⁹nemouga wegata mana ko: Dodou, akija dimi wo ekowaine meega mana kodo. Kou dani edoga ka kodo beu awii, wijaago kodo boko duwajawiine tijake.

¹⁰Okai kou dimiidaiga inii jimubeu bokouto nijaduwajawita, Jesus Keristus má jato kodo kigeena to eutoma maida make ekegajawita manaidaiga.

¹¹Imam gakita kidi naago gakita kei te-taida joonidoke tijake kigi inoudo kii kidi ekega-menigoo to tai, peu agijo te wunamakija manaida ko.

¹²Kodeja kii kidaa eutoma maida make kigeena to peu maida make ekega-menijake Ugatameja etikaato gebo animakita;

¹³doutoote, be egata bagee kede okaija bado makijaida jajaikaida to.

¹⁴Ena to ekega-menii agijo maidaiga kodaa jimubeu bagee utoma boko jaduwajawii, kii kidi imo to togoo.

¹⁵Rohulkudus kidaa maija kou maida make mana niwegai, kii mana tiga wegajake ko:

¹⁶Kii ka mana ani jatogijawiita, kou naagoudo wadouto, Tuhanja mana. Anija dijo douja mana kodo okeija kegepa duba amoujo jaawiita, Daana okeija dimi duba jaebijaita.

¹⁷Tijake kei teete mana ko: Okeija ka peu ma, peepu titaido ma wado te jagaita, mana kodo.

¹⁸Kei agijoudo ipa jajaikijake ko peu maida make wado ekega-menii agijo ko beu.

¹⁹Okai kouja, ei, noogeimaido, Jesusja emo maidaiga iniija kegepa goudaiga dáida kodaa wadoujo kai kouja,

²⁰okaija ka nijawadita ka ija ma, ajii ka ma itaidaiga, bedee duwajawita kodo wouto, kou ko má jatouga no te,

²¹daana Ugatameja uguupuguu maida make iniija Ibo Imam puki topi kouja,

²²kegepa doodoo kidi neeuwigoo, maakodo gaidaiga epaapa timakijake, peu dimi maida make kegepa gapii nitita, daana má jato kodo pogee uwo ka niwitogita.

²³Iniija kotopijawita dimi wegaige kodo dimi takaida te kijake neejakimakai; mana nijatogijawita me kidi enanauto kouja.

²⁴Daana ipa manaida enaa agijo kei taine mabiki akaate taine tijake dimi neegai;

²⁵enaimo kotuu te-tai ko aadaba te tijake, me ino kei teigai kodo danite, kodeja bo akawe, kou kodo umina te-wo, putu naago kodo kaine ijeida dojake ko.

²⁶Maakodo bokouto mana kodo epi kijake inii dimi ka peu kei te-wo tipe, kou wado peu maida make ekega-menii agijo beu topa.

²⁷Kodeja boko petai kodo totome ma doutou to, daana wei kogi wai kogi bodija wii kodo akaije bagee gakigoo tai.

²⁸Musaja dijo douja mana kodo ekagumita me kidi ipa te egajake me ida wija wido ka mana maida make ebokajawii.

²⁹Gaadodowei, umina peu eewija mana kodo, Ugatame Joka ekonai me kidi, daana togijawita mana ka emo kodo, koudaiga jimubeu eewita kidija jimu ejaikai me kidi, daana jikoo bokouto Roh kodo ewidogai me kidi.

³⁰Kii dani mana wegata me kidi inii epi kouja: Abu pai mana kodo ani ipuwe. Ani abu paita, wegata me kidi. Daana kigeena ma: Tuhan kidaa okaija uguwo boko japetaitagi.

³¹Ajii bokouto jago Ugatame kidaa gane duba kai ko toto me pigi-pigi no!

³²Mijaato ka wagiida ga-tou, ikii awe kadee kidaa tijake ikii akaije kitai manaida gaduwagootega;

³³kigeena wageena ewaida kiwidogijake peepu kitai; daana kigeena wageena kou dani etita bagee ma enaida kita.

³⁴Buda egadimimakita bagee kede ikii ipa egai kouja, daana ikiija ka agijoudo wegedege kitijake ideide tai, ikiija ka agijo ketago imo to togoo topa kojoka gajake.

³⁵Okai kouja ikiija ka epaapa timakai kodo te emigai, ibo petege kijawejawii mana kodo.

³⁶Ikii bo wemakai beu kai peu, Ugatameja dimi kei tijawijake togijawita mana kodo gowa-tita.

³⁷Mijo gaa to tijake meitagi ka kidi Kuuto te tijake meitagi kijoka;

³⁸Anija enaa ka kidi maakodo gaidaiga ajii taitagi, Tijake okai wouga kipi ko Anija dimi mana kodaa juma dege-dege te etai.

³⁹Kodeja inii ke wouga kijake peu kai ka kede ke beu, kodeja maakodo gamakijake dimi mana madagajawii ka kede.