Read Ekari IBERANI 13 Bible Online

IBERANI 13 - Ekari bible

IBERANI 13

¹Enakeneka bagee ipa akaga mana kodo ga-wo tai.

²Edou beu bagee ebukai mana kodo aadaba te tai; kou dani tijake me ino ewoudaiga jaetigo-tai bagee ootodokita kouja.

³Wanee owaa duba ejakigoo amaawita bagee kede enaimo kijakigoo amo keewita danite ega-tou; daana peepu etita bagee kede maija egai, ikii maija me má topa kouja.

⁴Waka akabuke kou ko utoma bagee ka ibo jaikai, daana aatou mana kodo jimu taanijawii; utoopa wo uwe ma, mogai jago ma, Ugatame kidaa boko petaitagi kouja.

⁵Mege kibigi maida make akaato munii, daana akeepa topa ka agijoudo kou tiki no! gai; okaija ka enita kouja: Ani umina ena peu te kijake te kajaikaita, enita.

⁶Okai kouja iniija ka uu peu kidi wegai ko: Tuhan kidaa naadade-tai me kidi; Ani weda te gaita; Me ka magijo nakei timakija?

⁷Migougu kijamakita bagee kede ega-tou, Ugatameja mana kitopita bagee kede; okeija ka umita momogi ko gajake okeija ka maakodo gai kodo wo eepei.

⁸Jesus Keristus kii kidi tou to, geto maija, ito naago maija, kii kidi imo to togoo.

⁹Kii ka mana, kou ka mana ka ti kidokina tai. Bo wemakai mana kou ko Ugatameja jikoo bokouto maida kodaa enaa, naija agijo maida ko beu, ejakimakita bagee kede epaago eewii beu mana kodo.

¹⁰Iniija ka ekega-menijaida tope, kagaba owaa maida make kei te-tai bagee kedaa te nojaida kodaa.

¹¹Ogo duwata agijo kodo emo jato ko peu maida make ekegamenita kodo ibo imam kidaa dáida doke-uwijake ko, má jato kodo tapo jato ka makiida jookogata.

¹²Kou dani Jesus kidi maija tapo jato makiida didi gaduwagota, okai kidaa emo kodaa meido kede jimubeu eewiine tijake.

¹³Okai kouja, inii maija tapo jato kodaa okaapa neeuwii, okai maida make peepu oogaduwaate.

¹⁴Inii jakai tou to makijo ko beu tope kouja, kodeja meita ka kodo inii juma doodoo.

¹⁵Kojoka okai maidaiga muta etuwai mana Ugatameepa neekega-menii, ebe ka gojawii uta kodo, okaija eka kodo gee etita bagee ka.

¹⁶Enaa agijo kei tai ma, oowudii ma aadaba te tai; kou dani ka ekega-menii agijo kou ko Ugatame juma dege-dege kouja.

¹⁷Migougu kijamakita bagee kede ejuwidoke tijake ibo ejaikai; ikiija dimi mana kodo kijamune-tai kouja, amo etiitai bagee danite; okei ideide ma kei te-tijake ko ejaikai, gaagaa ma ko beu; kou dani epaago keewii beu kouja.

¹⁸Inii sembahjang nijakimakai, inii dimi enaa kouja, utoma agijo kei tija danite kei taine tijake.

¹⁹Sembahjang ko umina kidiimai, ikeepa egaa kodo jawiine tijake.

²⁰Domba ooto-tai Ibo kidi, kii ke iniija Tuhan Jesus kidi bokata bagee jupi make eenigojawita me kidaa, kii ke muka-muka bokouto jago Ugatame kidaa imo to togoo ka nijatogijawita emo kodaa

²¹utoma enaa agijo boko kijaduwajawii, okaija dimi wo ekowa-tijake, okaija pekaida enaa agijo ikii duba kijakei tijawijake, Jesus Keristus kidi maidaiga; ajiipi bokouto okai ipuwe kii kidi imo to togoo. Amin.

²²Ani kidiimai, ei, noogeimaido, anija kiti-kinii mana kodo jakimakai, ani pini gaa to kijaebijaaga kouja.

²³Iniija noogei Timotius kidi epipikajawita kidi gai; okai egaa mepi ko okai ma enaimo inai kidou jawiitage.

²⁴Migougu kijamakita bagee ma, jimubeu bagee utoma kojáá tou kiteegi naaetii. Italia makijo make meta ka kede kojáá tou kiteegai.

²⁵Jikoo bokouto kodo ikii utoma keetou to.