Read Ekari IBERANI 3 Bible Online

IBERANI 3 - Ekari bible

IBERANI 3

¹Okai kouja, ei, jimubeu noogeima, daana epaawado make mana kitita daniido, Jesus kidi egaadodowei, iniija jakimakita mana kodo Eti-awita me kidi ma, Ibo Imam kidi ma.

²Boko jaduwajawita me kidiipa okai enanauto, Musa kidi maija Ugatameja uguwo duba enanauto kidi danite.

³Kii kidi Musa ma ko ibo ejaikija, owaa ma ko owaa migita me kidi ki ibo kodo danite.

⁴Owaa gakita me ka migita, kodeja utoma agijo utoma migijawita me kidi Ugatame.

⁵Musa kidi eedade-tai me kidi Ugatameja uguwo duba enanauto, wadaato ewaa kaitai manaido kodo mana wegajake.

⁶Kodeja Keristus kidi Jokame kijoka Ugatameja uguwo maida bida; inii ke okaija uguwo kodo, inii dimi kotopijawijake ideide ma epaapa timakai dimi kodo jakimakipe ko, kii kidi momogiida to.

⁷Okai kouja, Rohulkudus ka wegata kodo danite: Ito kii naago kidi, okaija mana wuu kodo ikii ejuwipa ko

⁸Ikiija kegepa bida te kai, mana eneene tei tita gaa kodo danite; Geeta-gaata makijo nagaado tei tita gaa kodaa.

⁹Ikiija aijaane kede nagaado tijake anija kei tai agijoudo Taun mepiija nadoogoo tita.

¹⁰Okai kouja ani kou me kakade kodo kumi egajake Kei teete mana, Okeija kegepa keenidaa to te-wo, Anija dimi takaa takaija kodo okei ewo.

¹¹Tijake ani kumi egajake baita taki jaatita mana ko, Anija kojáá touda okei umina wadoujo te kaitai.

¹²Epeepite gai, ei, noogeima, me idaana ikii jupi peu kegepa dimi takaida kijake ajii bokouto jago Ugatame kidiipa make wouga kidoke tai na kojoka.

¹³Kodeja naago gakita ikii kede mana akaate tai, „ito kii naago kidi” wegaja gaa kodaa, peu ka puja kiukai maida make kegepa bida kidoke na kojoka.

¹⁴Inii Keristus maida akagadime tai ko, inii edoga kodo epaapa timakita dimi kodo wo jakimakipe to, kii kidi momogiida to.

¹⁵Kou mana kei teete gaa kodaa: Ito kii naago kidi, okaija mana wuu kodo ikii ejuwipa ko Ikiija kegepa bida te kai, mana eneene tei tita gaa kodo danite.

¹⁶Okei kawe ka bagee kede mana juwijake kodeja eneene tei tita? Beu, mee? Masir makiida make podomita bagee kede, Musaja migougu jamakijake.

¹⁷Okai kawe ka bagee kede taun mepiija kumi ega-wo to? Beu, mee? peu kei tita bagee kede, tijake geeta-gaata makijo kii bokai kou bokai tita.

¹⁸Daana kawe ka bagee kede kumiidaiga baita taki jaatita? okaija kojáá touda okei umina wadoujo te kaitai baita kodo. Kou ko te juwe bagee kede to.

¹⁹Kojoka inii gai, okei maakodo gai beu kouja wadoujo kai beu tita.