Read Ekari IBERANI 4 Bible Online

IBERANI 4 - Ekari bible

IBERANI 4

¹Okai kouja, okaija kojáá touda wadoujo kai nijatogijawita mana kodo topa gaa, weda neegai, meena ikii jupi jamo togaa dani na kojoka.

²Ajii mana kodo nijawudita, okeepa maija jawudita kodo danite; kodeja okeija juwita mana kodo epaago eewii beu tita, okei juwii to tijake maakodo gai beu kouja.

³Inii maakodo gai bagee kede kojáá touda kodaa wadoujo kai, okaija enita kidi danite: Anija kumiidaiga baita taki atita mana kodo danite, Anija kojáá touda okei umina wadoujo te kaitai. Kei tai agijo kodo maki kabo makitaida make kei timakita kodeja.

⁴Mana mutoona pituwaago naago kodo maida make kii dani mana wegata kouja: Pituwaago naago kodaa Ugatameja kei tai agijo utoma maida make kojáá tou.

⁵Tijake jukuma ka manaida kodaa: Okei anija kojáá touda umina wadoujo te kaitai.

⁶Okai kouja me ino wadoujo kaitai kouja, daana mijaato ajii mana juwita bagee kede te juwe kouja wadoujo kai beu kouja,

⁷kigeena ma naagoona boko duwajawii, kii ko „ito kii naago kidi”, taun inoudo umimakijake Daud maidaiga kei teete mana kodo: Ito kii naago kidi okaija mana wuu kodo ikii ejuwipa, Ikiija kegepa bida te kai.

⁸Jusak kidaa kojáá touda jajaikai naako, Ugatameja wadoutouga joko ka naago mana kodo te wega-toja.

⁹Kojoka Ugatameja uguupuguu kojáá touda mana kodo tou to.

¹⁰Okaija kojáá touda wadoujo kita me kidi okaija ka kei tai agijo maida make kojáá tou, Ugatame maija kei tita danite.

¹¹Okai kouja, kojáá touda kodaa wadoujo kaine umina neekowa-motii, me idaana te juwe komouga epeepeidaiga bogi tidoke na kojoka.

¹²Ugatameja mana kou ko ajii bokouto kojoka, bida jago kodo; kataana aitaato jokoutaato emuu kodo ma ko umina emuu; woujo kijake dimi mana ma roh ma akawude tijawii; daana donigeida ma, mitoo bokáá ma; daana kegepa duba ka dimi dimiija igi jakii.

¹³Ugata agijo ena ma okaija pekaida make apumai beu tita; kodeja utoma agijo kebadaa tijake okaija pekaida ewaida, inii amo etija Me kidiipa.

¹⁴Okai kouja, iniija ka Ibo Imam topi kiija, epa kabuuda wo etigamakidokita me kidi, Jesus Ugatame Joka kidi, topi kijoka iniija godaatege mana kodo neejakimakai.

¹⁵Iniija ka debuudo kodo ipa beu ibo imam kidi beu topi kouja, kodeja kii takaa kou takaa egaado tita me, inii nigaado tita danite, okai peu beu kidija.

¹⁶Okai kouja kegepa goudaiga jikoo bokoutoudaapa neuwigoo to tai, inii ipa agijo domake-tita, daana gai peu gaa kodaa jikoo bokouto kodaa needade-tijake.