Read Ekari IBERANI 5 Bible Online

IBERANI 5 - Ekari bible

IBERANI 5

¹Me jupi make ewitokita ka ibo imam kidi me gakita Ugatameja kei tai agijo maida make boko jaduwajawita, me maida make kei te-tita, Ugatame agijo meniine tijake, daana peu maida make jo-menii.

²Okai ewo bagee ma, wo keenidaa bagee ma kojáá etai, okai na me tuma debuu kouja.

³Okai kouja, peu maida make jo-menii kou ko, meido kede maida make to ko beu, kodeja akaato maida make maija.

⁴Daana kou ibo mana kodo me idaana akaato motii ko beu, kodeja Ugatameja manaa-tita me kidi, Harun kidi danite.

⁵Kou dani Keristus maija Ibo Imam kaine akaato ibo awii beu, kodeja kou manaida boko jaduwajawita, kii dani mana etita me kidaa: Ani ki ani Joka didé; Ani ito naago kawowijawii.

⁶Dedaana joko kaida kei teete mana ko: Aki ki imam kii kidi imo to togoo, Malkisedik jaida epeepeidaiga.

⁷Jesus me má tota gaa kodaa emeemeidaiga jege ma sembahjang ediimita, bokai maida make epipikajawii bida jago kidiipa; okai Ugatame weda egata kouja, sembahjang jajuwita.

⁸Okai Jokame kidija, didi gaduwai manaidaiga juwidoke tai topi-motita.

⁹Tijake boko duwajawijake ko ajii tai imo to togoo epauto kita, ejuwe-tai bagee utoma maida make.

¹⁰Ugatameja Ibo Imam boko jaduwajawijake, Malkisedik jaida epeepeidaiga.

¹¹Kou mana maida make mana wedaba kitiine kodeja, boko peta-kinii ko gaagaa, ikii gapa daba kouja.

¹²Kou dani umii wedaba tijake ikii me etope-tai kai naako enaa, kodeja Ugatameja epauto manaido ikii tiga kigeena ma kitopai beu kai peu. Ikii amauwo beu kai peu, naija agijo ko beu.

¹³Amauwo no-tai me kidi maakodo bokouto mana kodo ewo, okai joka kouja.

¹⁴Kodeja naija agijo kodo maduwata bagee ipuwe; okei dimi wado gai-gai timakijake kouja kii ko enaa, kii ko peu gamakija.