Read Ekari IBERANI 7 Bible Online

IBERANI 7 - Ekari bible

IBERANI 7

¹Malkisedik kii ke Salem maki jakimake-tai me, daana monika me Ugatame kidi imam kidi. Ibrahim kidi maki jakimake-tai bageido wagei iitijake joko meetigo Malkisedik okai ma akado aatijake mobu bokouto jaduwajawii.

²Kii kidiipa Ibrahim gaatijago didee menii. Malkisedik eka kidi boko petajake ko, edoga kidi maakodo bokouto jago jakimake-tai me kidi, daana wijaago maija, Salem maki jakimake-tai kidi, kou ko, muka-muka bokouto kidi.

³Okai nakame na beu, ukame na beu, epa na beu; ume-wo kodo go-motiida na beu, momogiida na beu, kodeja Ugatame Joka danite imam tou to kii kidi imo to togoo.

⁴Me kidi ibo no! gai. Iniija aijame Ibrahim kidi motita agijoudo gaatijako didee ko menita me kidi.

⁵Lewi epaida ka bagee imam mana jadokijawita daniido kede meidoopa make gaatijago didee motii etita, Musaja dijo douja manaidaiga; kii ke, okeija kenekaaneepa make, okei maija Ibrahim mijo ekebata bagee kodeja.

⁶Kodeja kii ke okeija epaida beu me kidi Ibrahimpa make gaatijago didee motii, daana togijawita mana menita me kidi mobu bokouto jaduwajawii.

⁷Beu ma ko beu, ibo kidaa mijo ka kidi mobu bokouto jaduwajawija.

⁸Kii jago gaatijago didee motita bagee kede bokaine me tuma; kodeja okai kouda kodaa ija tou to jawegata me kidaa.

⁹Kou dani wegaja maija, gaatijago didee motei tita me Lewi kidaa Ibrahim dubaiga gaatijago didee menita,

¹⁰aijame Ibrahim duba tota kiija, Malkisedik ma akado tita gaa kodaa.

¹¹Lewi imam manaidaiga boko duwajawii naako, (kou manaidaiga Musaja dijo douja mana kodo meidoopa menita kouja), magijo taine tijake joko ka imam Malkisedik jaidaiga ewaa kija, daana Harun jaidaiga ko beu kou ko?

¹²Imam mana kodo akapaka ti-toojogo ko, dijo douja mana kodo maija akapaka tija.

¹³Kei manaido jawegata me kidi joko ka epaidaiga ka me kiija, jo-menijaida te kei tei tita bagee kede.

¹⁴Ewaida topa kouja, iniija Tuhan kidi Jahuda epaidaiga ka me kidi, daana kou epa maida make Musaja imam mana wegai beu tita.

¹⁵Tijake umina ewaida kodaa, joko ka imam kidi ewaa kijake, Malkisedik jaida epeepeidaiga,

¹⁶imam ejaikita kii ke, ebaidaiga ka manaidaiga ko beu, me epa maida tawadoke beu no te, kodeja peu te kija ka ajii tai bidaidaiga.

¹⁷Kou dani mana jawegata kouja: Aki ki imam kii kidi imo to togoo Malkisedik jaida epeepeidaiga.

¹⁸Kou dani tijake mijaato ka etimakita mana kodo jamo jaikita, debuu ma epa beu ma kouja.

¹⁹(Musaja dijo douja mana kodaa ena ma boko duwajawii beu kouja.) Kodeja euga enaa ka kotopijawita dimi kodo nijamejawijake inii kou maidaiga Ugatameepa jawii.

²⁰Baita mana beuda ko beu. (Mijaato imam kita bagee kede baita beuda.)

²¹Kodeja kii ke baita jamakijake kei teete mana ko: Tuhan kidaa baita makijake dimi akapaka te tija, Aki ki imam kii kidi imo to togoo.

²²Kojoka Jesus kidaa euga enaa ka togijawita mana kodo boko duwajawita me kidi.

²³Mijaato ka imam kede me wedaba, bokajake imam kei tai agijo kei te-wo beu kouja.

²⁴Kodeja kii ko imo to togoo kouja, me ino maida te jajaikijake imam kidi tou to.

²⁵Okai kouja okai maidaiga Ugatameepa jawii bagee utoma umina kidi ajii ti-mene-tijake bida jago kidi, sembahjang jaediimeete tou to kouja.

²⁶Inii kou dani ka Ibo Imam kidi gai peu, kii ke jimubeu kidi, anaani beu, jakega beu, peu bagee maida make okainiinii, epa kabuudo wado etige etijawita.

²⁷Joko ka ibo imam kei tei tita danite kei tai ko beu; kou ko naago gakita jo-menii kodo, akaato peu maida make tiga, tijake meido maida make; okai kigeena to eutoma maida make kei tita, akaato ekegajawita gaa kodaa.

²⁸Musaja dijo douja mana kodaa me debuu tuma ibo imam ejaikai, kodeja Musaja dijo douja mana wadoutouga ko, baita makita mana kodaa Joka kidi imam ejaikai, imo to togoo boko jaduwajawita me kidi.