Read Ekari IBERANI 8 Bible Online

IBERANI 8 - Ekari bible

IBERANI 8

¹Inii wegaate mana kodo epauto mana ko kou dani: Iniija kii dani ka Ibo Imam topi, monika me etikaato gebo animakita epaawado.

²Dáida kei te-tai kidi, daana kagada owaaa puki kodaa, Tuhanja migijawita; me ka ko beu.

³Ibo Imam me gakita kidi ekega-menii agijo ma, jo-menii agijo ma mene-tijake boko jaduwajawita; kojoka kii imam kidi maija meniine agijo beu kai peu.

⁴Okai makiida naako, imam beu ki-toja, Musaja dijo douja manaidaiga ekega-menii agijo mene-tai bagee topai kouja.

⁵Kei bagee kede epaawado ka agijoudo kodo ebijaabija ma, ajá ma kei te-tai; Musa kagaba owaa kodo migiine jato Ugatameja etita kidi danite: Epeepite gai, bagouda make ebijaabija kamuwakita kodo danite to utoma agijo utoma kei tijawii.

⁶Keristus kidaa wo etige ka manaida kei te-tai kidi; wo etige ka akatogijake mana kodo boko duwajawii me kiija, wo etige ka togijawita manaida kabo makita kouja.

⁷Edoga ka togijawita mana kodo anaanibeu naako, wijaago kodo ewaa te kija.

⁸Okai peu jadomakai kouja, kei teete mana ko: Putu naago kaita, Tuhanja mana kodaa, Ija ka jatogijawii mana kodo Israil uguupuguu ma boko jaduwajawiita, Daana Jahuda uguupuguu maija.

⁹Okeija aijaane kedeepa jatogijawita mana kodo danite ko beu, Ani ganeuto egota naago kodaa, Masir makiida make epodomijawiine tijake; Anija jatogijawita mana duba ko okei bo wemakai beu kouja, Tijake ani aadaba etita, Tuhanja mana kodaa.

¹⁰Kou ka mana kodo ani Israil uguupuguu jatogijawiita Okai kou wagi wadouto, Tuhanja mana kodaa; Anija dijo douja manaido okeija dimi duba amoujo jaawiita, Daana okeija kegepa maida jaebijaita, Tijake ani okei ipuwe me kidi kaita, Daana okei ke anija uguupuguu kodo.

¹¹Okei me gakita aki-bagee-bagee Daana aki-keneka-keneka te etopaita kouja, Tuhan kidi egai mana kodo; Okei utoma kede ani nagaitai kouja, Mijo daba kidi maija, ibo ka kidi maija.

¹²Okeija ka peu kei titaido ani ipa egaita kouja, Daana okeija ka inipipeu kodo wado te jagaita.

¹³Ija togijawii mana kodo mana wegajake okai edoga ka kodo doga jaikai. Doga kijake peu kita agijo kodo beu kaine ijeida.