Read Ekari JAKUB 3 Bible Online

JAKUB 3 - Ekari bible

JAKUB 3

¹Ei, noogeimaido, ikii me wedaba kuduu te kai; inii me etope-tai bagee kede euga bida peu boko nijapetai kojoka gajake.

²Inii utoma agijo wedaba maida make peu. Me idaana mana wegajaida peu beu kipi okai boko duwajawita me, daana má idima munimakai epi.

³Mana nijuwe-tijake inii kuda ka ebeida pija jawatakijawipe, má idima eetikajawii.

⁴Kapal koma kodo maija gai. Ibo peguuto kodeja, daana ukija ibo ka dokina tija kodeja, mijo daba ka etikai agijo ka uwijawe-tai me kidi gataidaiga etikajawii.

⁵Kou dani etá ki mijo tine kidija ibo mana godai. Mijo bodija ka ibo buguwa weikogi ti-nai no!

⁶Etá kou ko bodija; iniija ka tineija utoma jupi etá kodo peu peguuto; má idima jimu anijawijake iniija umi-wogi touwogi jitu atii; okai kidi kadaga bodija ka jitu atita.

⁷E tuma te tuma jina ma, bedo ma, neemina te-tai agijo ma, maikai duba ka ma daba-daba etija, daana me ka daba-daba etijawita.

⁸Kodeja etá kou ko me idaana ma daba-daba te etimake; gabo te toja peu peguuto, tebé odijo awita.

⁹Etá kodaa Tuhan Iniitai kidi inii muta etuwai, daana etá kodaa inii me tuma ewidogai, Ugatame ijeidaiga eugajawita kidi.

¹⁰Ena ka etá kodaa ko muta etuwai mana ma, ewidogai mana ma godajawii. Kou dani te tija, ei, noogeimaido.

¹¹Uwo puduuda kodaa uwo puki ma enege uwo ma enaimo puduu tija, mee?

¹²Ei, noogeimaido, ara uti kodaa zaitun uta goja, mee? Juwa, buda kodaa ara uta goja, mee? Digauwo puduuda kodaa make uwo puki puduu te timake.

¹³Meime ikii jupi dimi boko jago kijake gamakai? Enaa takaidaiga ekowa-motii, kojáá peu ka dimi bokoutoudaiga.

¹⁴Kodeja ikii dagi akadoke ma, akaije ma kegepa duba awi-toojogo ko, kobidoke te tai, daana maakodo mana kodo beu puga te tai.

¹⁵Kou ka dimi boko kodo waikaato make ko beu, kodeja makiida make, kou ko me ijeida kibigi dimi epauto, daana Teege epauto.

¹⁶Digi akadoke ma, akaije ma te-taida kodaa tetepepe ma, e peu te peu ma ewaa kai.

¹⁷Kodeja waikaato ka dimi boko kodo edoga puki kidi jimubeu, tijake muka-muka ma, kojáá-kojáá ma; juwidoke, ipa ma enaa kei tai agijo ma ebetume, dimi takaida beu, matabe beu.

¹⁸Maakodo bokouto uta kodo muka-muka maidaiga pi kigii tita, dagi duwajawe-tai bagee ka.