Read Ekari JAKUB 5 Bible Online

JAKUB 5 - Ekari bible

JAKUB 5

¹Ei, ikii ginita bagee, jege ma, jiijii ma tiwei, ikii maida pagi taine ka gaagaa agijoudo maida make.

²Ikiija ka tonawi agijoudo peu kidaa tita, daana kagaba kodo jina ka nota.

³Ikiija mas ma, perak ma, tóó jakita, daana tóó kodaa akaije kitaita, daana ikiija tine kinaita, bodija dani bukaa. Wiwitiida gaa kodaa ikii edepede kotuu timakita.

⁴Dodou, akija uta kaaduwata me kidi kei tai ageja aki jabokomijake mana teete; daana uta duwata bagee ka mana kodo e boko te boko duwa-tai me kidaa gapa duba kita.

⁵Ikii makiida kiija diiti pagaadagaida ume-wo tijake ideide tita. Ogo duwai naago maida make kegepa mobu awita.

⁶Ikii enaa ka me kidi peu awijake wagimakai; okai akaije kitai beu.

⁷Okai kouja, ei, noogeimaido, Tuhanja meitagiida to kegepa mijaanimakai. Domidou, táí tai me kidi makiida ka enaa uta kodo kojáá peu kidi douto-tai, edoga pakamijawii edi ma, enáá kaine gaa edi ma wejake to.

⁸Ikii maija kojáá peu kidi doutojake kegepa mijaanimakai; Tuhanja meitagiida kapa keega kouja.

⁹Ei, noogeimaido, akawidoge te tai, peu kai na kojoka. Domidou, boko peta-tai kidi damoutoopa kodaa.

¹⁰Kojáá peu kidi didi gaduwagoo mana kodo tikauwa kodaa Tuhanja eka duba wegata bagee kede komouga kodo jaepei.

¹¹Kegepa kojáá peu animakita bagee kede ideide kojoka inii egai. Ajub kidi kojáá peu kegepa animakita mana kodo ikii juweetega; daana Tuhanja wo ewogijawii mana kodo, okai ipa umina ga-tai me kidi.

¹²Kodeja epauto mana kodo, ei, noogeimaido, baita te makii; epa maida juwa, maki maida juwa, joko ka manaida juwa; kodeja ikiija ka, „Ii” kodo ko „Ii” to tijawii, daana ikiija ka „Beu” kodo ko „Beu” tijawii; peu keewii na kojoka.

¹³Me idaana ikii jupi gaagaa, mee? Okai sembahjang tai enaa. Me idaana kegepa ideide topi, mee? Ugatame muta etuwaate ebetaataa tai enaa.

¹⁴Me idaana ikii jupi didi, mee? Maakodo gai uguupuguu douto-tai bagee kede manaa-tijake sembahjang jatai, Tuhan eka dubaiga jeboo widii jatijake.

¹⁵Maakodo gajake ka sembahjang kodaa didi me kidi beu kaipagi, daana Tuhan kidaa eenigojawiipagi; okai peu agijo kei ti-toojogo peu kodo ipa jajaikidokii.

¹⁶Okai kouja ikiija peu kei tita agijoudo akaodajake tai, daana sembahjang akajake, enaa ke-tijake. Enaa me kidi kegepa puki ka sembahjang kodo umina bida agijo.

¹⁷Elias kidi inii dani ijeida; okai bida peu kidi sembahjang tai, edi te we-tijake; tijake taun ebeebe ka wii makiida edi wei beu tita.

¹⁸Tijake okai kigeena ma sembahjang tijake epa maida make edi mijo wejake tai, daana makiida kodaa okaija ka uta pakamijawii.

¹⁹Ei, noogeimaido, ikii jupi ka me idaana enaida make wo keenidoke tipi, tijake me ino etedemijawipi,

²⁰gai, peu me kidi peu ita maida make joko emejawii me kidaa okaija dimi mana kodo bokaida make petii etijawii, daana peu agijo wedaba mijaapumimakai.