Read Ekari 1 PETERUS 2 Bible Online

1 PETERUS 2 - Ekari bible

1 PETERUS 2

¹Okai kouja peu agijo utoma, puja eukai ma, matabe ma, digi edokai ma, me eduwai ma, kei ke jamo jaikai.

²Ito kou pamakita ajejoka danite, mana kodo amauwo puki kodo naine no! gai, ajii manaida ikii maduwa-tita.

³Tuhan kidi ki enauto kidi ikii gajake kouja.

⁴Okaapa mewei, ajii mogouto kodoopa, me ka ekonita, kodeja Ugatameja pekaida ewitokijake agakato dani kodo.

⁵Tijake ikii ke ajii mogoudo kodo danite kikotope-wado tijake ajii ka owaa kai, daana jimubeu ka imam tuma, ajii ka ekega-menii agijoudo Ugatameepa ekega-mene-tita, okaija juma dege-dege kitijawijake Jesus Keristus kidi maidaiga.

⁶Ugata mana kou dani ebijata kouja: Domidowei, ani Zion makiida butu jato kabo mogo makijawii, Witokijake agakato dani ka; Daana maakodo egaitagi me kidi ego te gaitagi.

⁷Ikii maakodo egai bagee ka ko okai agakato dani egai, kodeja okei maakodo egai beu bagee ka ko: Owaa mige-tai bagee ka jamo jaikita mogo kodo Owaa butu ka kabo makita mogo pigu tijawita;

⁸tijake: Kipo tokuu tai mogo kodo, daana taku tuwaja. Okei kipo tokuu kodo okei Ugatameja mana jakimakai beu kouja; okei kou dani boko jaduwajawita kojoka.

⁹Kodeja ikii ke kiwitokita bagee, jakimakita makiida ka imam tuma, jimubeu bagee, Ugatame ipuwe uguupuguu; bunita duba make okaija agakato dani aweidaapa mana kitita me kidi ajiipi agijo ikii wo wegakume-tita.

¹⁰Ikii tika kodaa „uguupuguu beu”, kodeja ito kou Ugatameja uguupuguu; ikii tika kodaa ipa kigata beu, kodeja ito kou ipa kigata.

¹¹Ei, ani ei kigata bagee, ojaa bagee duwa jawe dani bukaa ani kidiimai, me ijeida kibigi dimi maida make ikii akaato munii, dimi mana ma jape mana kodo.

¹²Ojaa bagee jupi enaa agijo kei te-wo, ikii peu dani bukaa kiwidogi-toojogo ko, ikiija ka enaa kei tai agijo kijadojake Ugatame muta etuwa-tita, okai edogoutagi naago.

¹³Me ka boko duwajawita bagee utoma ejuwidoke tai, Tuhan maida make; maki jakimake-tai kipi maija, kii ke wado etige ka kidi;

¹⁴gubernur kipai maija, okaija ka boko duwajawita bagee kede, peu bagee abu japa-tijake, daana enaa agijo kei tai bagee muta etuwa-tita.

¹⁵Kou dani Ugatameja dimi kojoka, ikiija enaa kei tai agijo kodaa dimi beu bagee ka ewo manaido kodo mana tagu etijawe-tijake.

¹⁶Pipikadoke tita bagee dani bukaa; peu kei taine tijake pipikadoke beu, kodeja Ugatame jakei te-tai bagee dani bukaa ume-wo.

¹⁷Me utoma ibo ejaikai. Enakeneka bagee ipa egai. Ugatame weda egai. Maki jakimake-tai kidi ibo ejaikai.

¹⁸Ikii me ka kijakimakita bagee, ikiija ibo kidiipa ejuwidoke tai, ibo ejaikijake, jikoo me kidiipa to ko beu, kodeja boko peu meepa maija.

¹⁹Kii dani juma dege-dege etija kouja, me idaana Ugatame wado egajake enaa kidija me ka peu egajake didi gaduwai mana kodo.

²⁰Kawo ko enaa kija, aki peu agijo kei tijake kojáá peu kidi didi gaduwai. Kodeja aki enaa agijo kei tijake kou maida make kojáá peu kidi didi gaduwa-toojogo ko, kou ko Ugatameja juma dege-dege katija.

²¹Okai kou maida make mana kitita kouja, Keristus maija ikii maida make didi gaduwata kouja, komuga kinijake, okaija nenoo ikii eepe-tijake.

²²Okai peu agijo kei tai beu; puja mana ena ma okaija ebeida jadomakai beu tita.

²³Me ka ewidogijake okai amo ewidogai beu; okai didi gaduwajake wedaago etai beu; kodeja boko peta-tai meepa okai akaato ekegajawii.

²⁴Okai kidaa iniija peudo okaija má maida nijadokii, pija boko maida kodaa, inii peu maida make bokajake maakodo bokouto maida make ume-wo te-tita. Okaija jati ewajake tita kouja kijaojawii.

²⁵Ikii domba máitaiga dani bukaa kidaa tita kouja, kodeja ito kou keeto-tai meepa joko meta, ikiija dimi mana kijamune-tai kidiipa.