Read Ekari 2 PETERUS 2 Bible Online

2 PETERUS 2 - Ekari bible

2 PETERUS 2

¹Kodeja puja mana douja do-tai bagee maija me jupi ewaa kita, ikii jupi ewaa kaitai danite; okei gaboudaiga me peu eewii manaido ewaa awiitai; Tuhan kidi, kii ke eedata me kidi beu puga etijake kou gootoki okei akaato maida peu mejawii.

²Me wedaba okeija ka utoopa ijee wo eepejake okai kou maida make maakodo ka ita kodo me ka ewidogaitai.

³Okeija kibigi gaijaidaiga matabe mana ka kijabokomaitai; tika kodaa make peu eewii mana muto kodo kuuto tai beu, daana okeija ka peu kai kodo uno umii beu.

⁴Peu kei tita ka jaetigo-tai bagee maija Ugatameja ejaikai beu tijake kadaga bodija duba eemigimakijake boko petai putuuda to bunita komo duba ejakigoo amaawii.

⁵Daana tikauwa ka bagee ejaikai beu, kodeja maakodo bokouto mana pitokita me Nu kidi me ida pituwo ma enaimo emunai, dijo beebu tei tita makiida uwo pegemijawijake.

⁶Sodom ma Gomora ma gako ko jaikijake umina peu awii; kou dani dijo beebu te-tai bagee kede komuga menii.

⁷Enaa me Lut kidi okai epipikajawii; peu bageeja ka utoopa wo uwe maida make gaagaa umina tita me kidi;

⁸(kii enaa me kidi okei jupi umijake okeija ka dijo beebu tei tita manaido maida make naago gakita kegepa gaagaa tigoo tita.)

⁹Kou dani keetigo ko, dijo do-tai bagee kede gaado tapa make epipikajawii ko Tuhan epi; daana peu bagee kede peu eewii putuuda to peuda ejakimakai epi.

¹⁰Epauto ko, me ka utoopa ijeida kibigi dimi ga-wo bagee, daana boko duwajawii mana jimu jaikai. Okei kegepa ibo gajake uu peu kidi ajiipi jago daniido eduwai ko weda beu.

¹¹Jaetigo-tai bagee kipai maija, bida agijo kodo wo etige kodeja Tuhan jumaapa kei manaido eduwai beu.

¹²Kei bagee kede dimi beu jina dani bukaa, me ka emugajake wage-tita tijake ewaa kita agijoudo; okei ewo manaido ewidoge-widoge; okei kede peu kei tita maida make peu kaitai;

¹³okeija peu kei tai ageja motii. Okei agapi gaa utoopa wo uwe ideide; jimu ma, anaani jago ma, ikii ma enaimo noja gaa peuda wo kikeenijawii.

¹⁴Okei mogai peka jago; peu kibigi ga-wo. Bo wemakai beu bagee okei monoo etai. Kibigi dimi topita bagee. Peu kugouto dokeenii.

¹⁵Doodoo ita jaikidokijake wo keenidaa tita: Beor jokame Balhum kidi ita wo eepeta bagee; peu agijo maida make bago kai ide.

¹⁶Kodeja kii me kidi peu agijo kodo ewidogita; kou ko, manaawo keledai kodaa me ka mana wuu mana godajake douja do-tai me kidi ka dimi beu kodo wo egojawii.

¹⁷Kei ke uwo beuda komo dani bukaa; tuku kodo ukija ka amo dokii joko dokii tina tita; bunita egemugu mogomugu epeepi jakimakita.

¹⁸Dimibeu ka mana ibo kobidoke tijake peu kei te-tai bagee maida make pipikadoke tita bagee kede monoo etai, okeija ka me ijeida ka kikija epauto ka.

¹⁹Pipikaanii mana jatogijawii kodeja okei kede peu kai ka bida peu ejakimakita. Me maida petee kai agijo kodaa bida peu ejakimakai kouja.

²⁰Okei makiida ka peu ijeida maida make petii tidoke tijake iniija Tuhan Jesus Keristus kidi, kii ke ajii bokouto nijaduwa-tai me kidi epi kijake, kou wadouto kigeena ma gadi tidoke tijake peu ka ejakimaki-toojogo ko, edoga ka kodo ma ko momogiida ko peu.

²¹Kou danite epi kijake jaekegajawita ka jimubeu mana kodo maida make wouga kai ma ko, maakodo ita ewo naako enaa.

²²Maakodo ka ena dani awe-tai mana kodo okei maida kobadoke tita: „Dodi kidaa edipi agijo wo nai;” daana „Witogita ekina kidi titi duba patai wo gekee joko gekee.”