Read Ekari 1 JAHJA 3 Bible Online

1 JAHJA 3 - Ekari bible

1 JAHJA 3

¹Iniitaija ipa nigata kodo ibo no! gaadodou, inii ke Ugatame jokaane neebatita kouja; inii okai kou kodo. Makiida maki utoma ewo nigai kou ko, okai na ewo egata kouja.

²Ei, ani ei kigata bageido, ito kou inii Ugatame jokaaneido; inii kawe dani kidaa taitage juwa ko ito kou ewaa tapa kai beu, kodeja inii epi, okai ewaa kaitagiida inii okai dani kidaa taitage, okai topi danite edoutage kouja.

³Daana meija kou dani okai maida dimi ekotopijawipi, akaato jimubeu awii, okai na jimubeu kidi danite.

⁴Meija peu kei tipi, mana dijo beebu teete; peu kei tai kou ko mana dijo beebu mana.

⁵Ikii epi Keristus ewaa tapa awita, peu agijo igajawiine tijake; okai duba peu ena ma beu.

⁶Meija okai duba topi peu te kei te-tai. Peu kei te-tai me kidi edou beu tijake okai kidi ewo.

⁷Ei, ani jokaaneido, me ka puja kiukai na kojoka gai. Maakodo bokouto ke te-tai kidi maakodo bokouto jago me, okai na maakodo bokouto jago kidi danite.

⁸Meija peu kei te-tai kipi epauto Teegeepa make; Teege kidi edoga pukipaki kidi make peu kei tei tita kouja. Ugatame Joka ewaa tapa kita kidi, Teege kei titaido jaigajawiine tijake.

⁹Ugatameepa make epamakita bagee peu te kei te-tai; okaija ijoo okai duba tou kouja, daana peu te kei timake, Ugatameepa make epamakita kouja.

¹⁰Okai kou daniidaiga Ugatame jokaane ma, Teege jokaane ma, ewaa tapa awita; meija enaa agijo ke kei tipi, epauto Ugatameepa make ko beu; daana kou dani maija kenekame ipa egai beu bagee.

¹¹Kou dou ikii edoga kidi make juweetega mana kouja, inii ipa akaga dimi kodo.

¹²Kain dani bukaa ko beu, epauto peu bokouto kodoopa make ka kidi, tijake kenekame wagimakita. Magijo ka wagimakita? Okaija ka kei te-tai peu kouja, daana kenekameja ka ko enaa kodo.

¹³Ego takuu-takuu te tai, ei, noogeimaido, makiida ka kedaa be kigai mana kodo maida make.

¹⁴Inii bokawouda make ajii tai maida wadouwe kidaa mana inii epi, inii enakeneka bagee ipa akaga kouja. Meija ipa te egapi, bokawouda tou to.

¹⁵Meija kenekame be egapi, okai me wage-tai me kidi; daana ikii epi, me wage-tai me kidi duba ajii bokouto beu topa.

¹⁶Okai kou dani tijake inii ipa puki kodo epi, inii maida make okai akaato ekegajawita kouja; daana enakeneka bagee maida make inii akaato ekegajawii beu kai peu.

¹⁷Meija makiida ka agijo makijake kenekame gai peu mana jadomakijake kegepa bunu peu kipi, kawe dani tijake Ugatameja ipa dimi okai duba toja?

¹⁸Ei, ani jokaaneido, mana ka to juwa, ebe ka to juwa, ipa te neegai kodeja kei tijaida ma, maakodo ma.

¹⁹Okai kou dani tijake inii maakodo bokouto jato ka kede inii epi, daana okai jumaapa kegepa tipinimakai,

²⁰kou danite kegepa ko kegei-kegei niti-toojogo ko; iniija kegepa ma ko Ugatame ki ibo kouja, daana utoma agijo utoma epi.

²¹Ei, ani ei kigata bageido, kou danite kegepa kegei-kegei ti niti-toojogo ko, inii Ugatame jumaapa kegepa tipinimakai.

²²Tijake iniija ka ediimija agijo go-motii, okaija enimakita manaido dijo jadomakai kouja, daana juma dege-dege nitija agijo kei tijawii.

²³Daana kou dou okaija enimakita mana kodo; kou ko, Jokame Jesus Keristus eka maakodo egai ko, daana inii kede ipa akaga tai, okaija enimakita danite.

²⁴Okaija enimakita manaido dijo jado-tai bagee utoma okai duba tou to, daana Tuhan okai duba. Okai kou dani tijake okai inii duba topi mana inii epaapa timakai, okaija Roh niimijawita kodoudaiga.