Read Ekari 1 JAHJA 4 Bible Online

1 JAHJA 4 - Ekari bible

1 JAHJA 4

¹Ei, ani ei kigata bageido, roh utoma maakodo te egai, kodeja roh daniido egaado tai, epauto ko Ugatameepa make, mee? tijake. Puja mana wega-tai bagee wedaba makiida maki utoma wo gamei joko gamei tita kouja.

²Okai kou dani tijake Ugatameja Roh kodo ikii gaja: Jesus Keristus me kijake meta mana wega-tai roh utoma epauto ko Ugatameepa make.

³Daana Jesus mana te wegaja roh utoma epauto ko Ugatameepa make ko beu. Kou ko Keristus ma akaije bokouto roh kodo; meitagi mana ikii juweetega, daana ito kou maija makiida kiija tou.

⁴Ei, ani jokaaneido, ikii ke Ugatameja epauto ka kede, tijake kei bagee daba ejaikeetega; makiida ka kodo ma ko ikii duba topa ka ko ibo kouja.

⁵Okei ke makiida kaido kede. Okai kouja okeija ka wega-tai mana ko makiida ka, daana makiida kaido kedaa ejuwai.

⁶Inii ke epauto ko Ugatameepa make ka kede. Daana Ugatame epi bagee nijuwai. Epauto ko Ugatameepa make beu bagee kede ti nijuwai. Okai kou dani tijake maakodo bokouto roh ma, puja bokouto roh ma inii gaja.

⁷Ei, ani ei kigata bageido, inii ipa akaga neetiwei; ipa dimi epauto ko Ugatameepa make kouja, daana ipa gaja me kidi Ugatameepa make epamakita, daana Ugatame epi.

⁸Ipa dimi beu me kidi Ugatame ewo me; Ugatame kidi ipa bokouto kouja.

⁹Okai kou dani tijake Ugatameja ipa dimi ewaa tapa nimuwakita, Ugatame Enaago Joka makiida ebadikumita kouja, inii ke okai maidaiga ajii te-tita.

¹⁰Kou dou ipa bokouto kodo, inii Ugatame ei egata kouja ko beu, kodeja Ugatameja ipa nigajake iniija peudo maida make dagi nijaduwajawe-tita tijake Jokame ebadikumita.

¹¹Ei, noogeimaido, Ugatameja kou dani umina ipa niga-toojogo ko, inii kede ipa akaga kodo beu kai peu.

¹²Me idaana ma Ugatame edou beu; inii ipa akaga tipe ko Ugatame inii duba tou, daana okaija ipa dimi kodo inii duba boko duwajawii.

¹³Okai kou dani tijake inii okai duba tope mana kodo inii epi, daana okai inii duba, okai kidaa Roh niimijawita kouja.

¹⁴Daana inii jadomakai ma, mana jawegai ma, Nakame kidaa Jokame ebadikumita, makiida maki utoma ajii bokouto jaduwajawiine tijake.

¹⁵Meija Jesus ki Ugatame Joka kidi mana godajawipi, Ugatame okai duba tou, daana okai kidi Ugatame duba.

¹⁶Daana Ugatameja ipa nigata mana kodo inii epi kijake maakodo gai, Ugatame kidi ki ipa bokouto kodo, daana ipa dimi duba tou to me kidi Ugatame duba tou, daana Ugatame okai duba.

¹⁷Okai kou dani tijake ipa dimi kodo inii duba boko duwajawita, boko petai putuuda inii kegepa tipinimake-tita, okai danite inii ke kii makiida tope kouja.

¹⁸Ipa dimi duba weda dimi beu, kodeja boko duwajawita ka ipa dimi kodaa weda dimi igajawii. Weda dimi ko peu kai maida make kouja, daana weda gaja bagee kede ipa dimi boko duwajawii beu tita.

¹⁹Inii ke ipa akaga tai, okai tiga ipa nigata kouja.

²⁰Me idaana ka „Anii Ugatame ei egai” mana wegajake kenekame be egapi, okai puja; okaija ka edota ka kenekame kidi be egapi ko, te edoja ka Ugatame kidi ei te egamake.

²¹Daana kou dou okaapa make ka enimakita mana kodo; kou ko Ugatame ei egaja me kidaa kenekame maija ipa egai.