Read Ekari 1 JAHJA 5 Bible Online

1 JAHJA 5 - Ekari bible

1 JAHJA 5

¹Meija Jesus ki Keristus kidi ki mana maakodo egapi, okai Ugatame joka, daana ewaa awita me ei egaja me kidaa okaija ekebata bagee maija ei egai.

²Okai kou dani tijake inii Ugatame jokaane ei egai mana kodo inii epi, inii Ugatame ei egajake okaija enimakita manaido jakimaki-toojogo ko.

³Kou dou Ugatame ei egai mana kodo; kou ko, enimakita manaido jakimakai ko; daana enimakita manaido ko udo ko beu.

⁴Epauto ko Ugatameepa make ka agijo kodaa makiida kiija daba ejaikai. Kou dou makiida daba ejaikija petee bokouto kodo: kou ko, iniija ka maakodo gai kodo.

⁵Meija makiida kiija daba ejaikija? kodeja Jesus ki Ugatame Joka maakodo egata bagee to.

⁶Kii dei uwo ka ma, emo ka ma, meta kidi, Jesus Keristus kidi, uwo ka to ko beu, kodeja uwo ka ma, emo ka ma. Daana Roh kodaa mana jawegai, Roh kodo maakodo bokouto kouja.

⁷Okei wido epaawado mana jawega-tai; kii ke Nakame ma, Tota Mana ma, Rohulkudus ma, daana okei wido ena kidi.

⁸Daana okei wido makiida mana jawega-tai; kou ko Roh ma, uwo ma, emo ma. Kou wido kodo ena manaidaiga.

⁹Inii me ka wega-tai kodo inii jakimaki-toojogo ko, Ugatameja wega-tai ko ibo. Kou dou Ugatameja mana wega-tai kodo, Jokame maida make mana jawegai kodo.

¹⁰Ugatame Jokame maakodo egata me kidi jawega-tai mana kodo okai duba tou. Meija Ugatame maakodo te egapi, okai puja ejaikai, Ugatameja Jokame maida make jawegata mana kodo maakodo jagai beu kouja.

¹¹Kou dou jawega-tai mana kodo; kou ko, Ugatameja ajii tai imo to togoo bokouto nijaduwajawita, daana ajii bokouto kodo Jokame kidi duba.

¹²Meija Jokame kidi okai ipuwe awipi, ajii tai. Ugatame Joka okai ipuwe awii beu me kidi ajii tai beu.

¹³Ikii Ugatame Joka eka maakodo egata bagee kedeepa kei manaido utoma kijaebijajawii, ikii ajii tai imo to togoo mana kodo ikii epaapa timake-tita.

¹⁴Kou dou iniija ka okai jumaapa kegepa tipinimakai mana kodo; kou ko, iniija gaja agijo okaija gata dimi epeepeidaiga ediimi-toojogo ko, okai nijuwai.

¹⁵Daana iniija ediimija agijo nijuwai kodo inii epaapa timaki-toojogo ko, inii epi, iniija ediimita agijo motii to.

¹⁶Me idaana ka kenekame te bokajawija peu agijo kei teete edopi ko, okaija ediimijake Ugatameja ajii ti-menii; kii ke te bokajawija peu agijo kei tai bagee utoma. Bokajawija peu agijo maija ewaa. Okai kou maida make sembahjang jatai kitii beu.

¹⁷Ekagumai mana utoma ko peu, daana te bokajawija peu agijo na ewaa.

¹⁸Inii epi epauto ko Ugatameepa make ka bagee peu te kei te-wo, kodeja ko Ugatameepa make ka kidaa emadagajawii, daana peu bokouto kidaa ewiniki tai beu.

¹⁹Inii epi inii epauto ko Ugatameepa make ka bagee, daana makiida maki utoma peu bokouto bidaidaiga tou to.

²⁰Kodeja inii epi Ugatame Joka meta kidi, daana dimi niimijawita, maakodo bokouto jago kidi inii egamake-tita. Daana inii ke maakodo bokouto jago kidi duba tou to, kii ke Jokame Jesus Keristus kidi duba. Kii dei Ugatame uki, daana ajii tai imo to togoo bokouto kodo.

²¹Ei, ani jokaaneido, utoopa migaakobe te-tai agijo maida make ikii akaato munimakai.