Read Ekari JAHUDA 1 Bible Online

JAHUDA 1 - Ekari bible

JAHUDA 1

¹Ani ki Jahuda kidi, Jesus Keristus jakei te-tai kidi, daana Jakub kenekame kidi; manaa-tita bageepa kapogeije kijamakii, Ugatame Iniitai kidi duba ei egata bagee kede, daana Jesus Keristus maida make jaemunita.

²Ipa bokouto ma, muka-muka bokouto ma, ei akaga dimi ma, ikeepa abuma ke-wado.

³Ei, ani ei kigata bagee kede, inii utoma ena kidi ajii bokouto nijaduwata mana kodo maida make kapogeije kijaebijaine kodaa ani umina ekowa-motijake, anija gai ko, umina beu kai peu kodo, maakodo gai mana kodo maida make umina woowii kitiine tijake kijaebijai, kigeena to jimubeu bageepa jaekegajawita mana kodo.

⁴Me wija wido gabouga tudu-tudu mejake kouja; peu kai mana kodo tika kodaa epeepi jatimakita; okei dijo beebu bagee kede Ugatameja jikoo bokouto kodo akabetoke tijawijake utoopa wo uwe; iniija ka ena to Ibo kidi, e boko te boko duwa-tai me Jesus Keristus kidi okei beu puga etai.

⁵Ani ga-kiniine, ikii kigeena epi keewita kodeja, Masir makiida make me uguupuguu epodomijawita me kidaa wadoutouga maakodo gai beu bagee kede peu eewii.

⁶Jaetigo-tai bagee kede maija okeija kei te-tai agijo aadaba tijawijake okeija to-taida jaikita daniido kede imo to togoo ka buda ka bunita duba egadimimakita, ibo ka boko petai putuuda to.

⁷Sodom ma Gomora ma, kou watija ka makijoudo maija danite, okei ma ena dani kodo utoopa wo uwe maida akaato ekegajawijake kikija epauto wo uwii; okei komuga menii, imo to togoo ka bodija gaduwaate.

⁸Kou ko kou kodeja, kei bagume dogoo te-tai kede má jato jimu anijawii; okei ibo daniido daba ejaikai, daana ajiipi jago daniido eduwai.

⁹Jaetigo-tai ka migougu me Michail kidi Musaja má jato maida make Teege ma akaije ootita gaa kodaa ibo manaida ewidogai uu ko beu, kodeja kii dani eteete mana, „Tuhan kidaa beu katii!”

¹⁰Kei bagee kede okeija gai beu agijoudo ewidogai; tijake dimibeu ka jina dani bukaa gaja daniido kouja akaato peu awii.

¹¹Peu kojoka, okei kede! okei Kainja ita wo eepeta bagee; okei bago kaine tijake Balhumja peu maida akaato ekegajawii; okei Korahja akaije duba peu kai.

¹²Kei bagee kede ikiija ipa akaga manaida naija gaa kodo jimu anijawii, enaimo ebaabaa tijake, ego beu kede akaato to gajake; okei uwo beuda ka tuku, ukija ka dokina tita; oo uwa ka dadago pija, wijaago bokata, epa badidoke;

¹³maikaida ka ibo ukija dokegaa dani bukaa, okei kede ego manaido wigime-wado; okei jawina te-tai ka ijapu; imo to togoo ka bunita egemugu mogomugu epeepi jatimakita.

¹⁴Kei bagee maida make Henoch kidaa maija, Adam make pituwaago kakade ka kidi, douja dojawita, eteete mana: Juwidou, Tuhan kidi medoke, okaija jimubeu bagee te gakimake [1] ma enaimo;

¹⁵me utoma boko japetajawiine tijake; daana dijo beebu bagee utoma okeija ka dijo beebuudaiga kei tita ka dijo beebuudo kegei-kegei jataine tijake; daana dijo beebu ka peu bagee kede bida manaido ewidogita kodo maija.

¹⁶Kei bagee kede kitigi motigi to tigoo; akaije dimi to; okei kede kibigi dimi to kei te-wo; ibo mana peijo godajake akaato enaa awiine deega-deega mana wegai.

¹⁷Kodeja ikii ke, kowaa kei, ani ei kigata bagee, iniija Tuhan Jesus Keristusja eti-awita bagee kedaa douja dota mana kodo gai:

¹⁸„Wiwitiida gaa kodaa ewidoge-widoge te-tai bagee ewaa kaitai, okei kede kibigi dimi kei te-wo bagee,” kitita ko.

¹⁹Kei bagee kede me akawude tijawii; okei makiida ka dimi to, Roh beuda.

²⁰Kodeja ikii ke, ei, noogeimaido, ikiija ka umina jimubeu maakodo gai kodo kabo maida akaato bo we-wado, Rohulkudus dubaiga sembahjang teete.

²¹Ugatameja ipa bokouto duba ikii akaato munimakai; iniija Tuhan Jesus Keristus kidi ipa bokouto kodo, ajii bokouto mejawii mana kodo, doutou.

²²Dimi wija bagee kede ipa egai;

²³me ino kede bodija duba make epitaki-motijake petii etijawii; me ino maija weda ma ipa egai, okeija ka peu kei tai agijo ka jimu anijawita kagaba maija nokii gajake.

²⁴Ikii jagii te te-tijake kimunai bida jago kidi, daana okaija ajiipi maida anaanibeu kidi ideide umina ma kimejawii bida jago kidi,

²⁵kii ke Ena to Ugatame, ajii bokouto nijaduwa-tai kidi, iniija Tuhan Jesus Keristus kidiidaiga, kii kidiipa ajiipi bokouto ma, ibo bokouto ma, bida bokouto ma, boko duwajawii ma, kii wagi kou wagi jawii beu gaa make ito to utuuja, kii kidi imo to togoo. Amin.