Read Ekari EWAIDA 18 Bible Online

EWAIDA 18 - Ekari bible

EWAIDA 18

¹Okai kou wadoutouga joko ka jaetigo-tai me epaawadoopa make mijouwe kai ani edou, ibo bida agijo jago; tijake okaija ajiipi kodaa makiida ganimakai.

²Okai ibo mana wuu teete mana, „Bogomeenii! bogomeenii! Babil peguuto! Enija to-taida kita, Nokii roh gakita awijaida; Nokii me be gaja ma bedo tojaida.

³Utoma bagee kede okaija kikija epauto enege uwo kodo nota kouja, daana makiida maki utoma jakimakita bageido okai ma mogai tita, daana makiida ka muna wega-tai bagee okaija tonawiido ka umina bago kita.”

⁴Tijake joko ka mana wuu epaawadoopa make ani juwii, kei teete mana, „Okai duba make podomiwei, ei, anija bagee, Okaija ka peudo ookei tidoke na kojoka, Daana peu eewija mana enaida kidoke na kojoka;

⁵Okaija peudo epaawadoopa wado kotuu kotuu kouja, Daana okaija dijo beebuudo Ugatameja jaga-tou to.

⁶Okaija kei tita danite abu japai, Daana okaija kei tita epeepe wijaago abu japai; Okaija takabaka tita uwaawe kigi wija takabaka jatai.

⁷Okai kobidoke tijake utoopa wo uwe tei tita danite Okai kou epeepeidaiga gaduwai ma jiijii ma menii. Okaija kegepa duba kei teete mana, ’Ani ibo, ani mijáá ko beu; Ani jiijii umina te taita,’ gai.

⁸Okai kouja agapeena duba to peu eewii manaido pagi taita; kou ko bokai ma, jiijii ma, naidi ma, daana bodijaida jookogai. Tuhan Ugatame boko petaate me kidi bida jago kouja.”

⁹Makiida maki utoma jakimake-tai bageido, okai ma mogai tei tita ma, utoopa wo uwe tei tita ma kede, jege ma jiijii ma etaitai, bodija jookogai nakagi kodo jadojake.

¹⁰Okei poto kodaa joonidaa taitai, okaija gaduwai weda gajake, kei teete mana, „Ipa no! ipa no! maki ibo kodo, Babil makijo peguuto! Djam ena duba to peu keege kouja.”

¹¹Daana makiida maki utoma ka muna wega-tai bagee kedaa jege ma jiijii ma etaitai, okeija kaa taine agijo me ka wado ko te jaedai kouja.

¹²Kou ko, mas ma, perak ma, agakato dani mogo ma, mutiara nipo ma, enauto kagaba ma, digijo ma, sutera ma, dege wuwuguuto ma, unu enaa pija ma, gading ka ebijata tapuja ma, ibo age pija ka ebijata tapuja ma, tembaga ka ma, besi ka ma, marmar mogo ka ma,

¹³kulit manis ma, unu enaa jeboo ma, unu enaa agijo ma, mur ma, dupa ma, utaadijo ma, zaitun ma, tepong jugee ma, gandum ma, sapi ma, domba ma, kuda ma, kuda koma ma, me tuma ka má ma dimi mana ma.

¹⁴Akija kegepa ka kibigi gata utaido kodo akeepa make beu kidaa, daana igi enaa ma agakato daniido ma akeepa make igadaa, umina wado te domakija.

¹⁵Kei agijoudo kaa te-tai bagee, okai maida make bago kita bageido kede, okaija gaduwai kodo weda gajake poto joonidaa taitai; jege ma jiijii ma taitai,

¹⁶kei teete mana, „Ipa no! ipa no! ibo makijo kodo, Enauto kagaba ma, digijo ma, dege wuwuguuto ma makita kodo, Mas ma, agakato dani mogo ma, pakooba ma, diiti tijawita kodo.

¹⁷Djam ena duba to kei tonawiido utoma wedege etikumita.” Tijake kapal koma uwijake-tai iboudo maija, maikaida uwetai bageido maija, kapal komaida kei te-taido maija, maikai maida kei te-tai bagee utoma, poto joonidaa tai,

¹⁸tijake emeeme tita, bodija jookogai kodo dojake, kei teete mana, „Kou makijo peguuto ma ko kawo ka makijo ma ena dani?”

¹⁹Okei kede dagi maida maki puugee gapi atii, jege ma jiijii ma teetigo, emeeme teete mana, „Ipa no! ipa no! ibo makijo kodo, Maikaida kapal koma jago bagee utoma Okaija tonawiido kouja bago kidaa tita! Djam ena duba to peepu tikumita kouja!”

²⁰Okai amida ideide tiwei, ei, epaawado, Ei, jimubeu bagee ma, eti-awitaido ma, Mana wudei titaido ma, Okai maida Ugatameja abu kijapai kouja.

²¹Tijake bida jago jaetigo-tai idaana ka ibo mogo, gandum jugee tija mogo dani dokijake maikai duba emigijake kei teete mana, „Okai kou dani tijake Babil makijo peguuto kodo Kuutaka umina kidi bogomidoke tai, Daana umina maa kou wado te domakija.

²²Tijake tekeuga ewii ma, ebetaataa ma, mitoopi ewii ma, Umina kidi aki duba wado te juwija. Daana uwo dinita kei tija agijo tumaana ma kei tija bagee Umina kidi aki duba wado te edomakija. Daana gandum jugee mana kodo Umina kidi aki duba wado te juwija.

²³Daana lampu awe kodo Umina kidi aki duba wado te ganimakija. Daana waka akabuke jame jagamo mana kodo Umina kidi aki duba wado te ejuwija. Akija muna wegai tita bagee kede makiida ka iboudo kouja, Daana akija kego tei tita kouja utoma bagee puja eukita.

²⁴Okai maida to mana wudita bagee ma, jimubeu bagee ma emo edomakita, daana makiida wagimakita bagee utoma ka emo kodo.”