Read Ekari EWAIDA 3 Bible Online

EWAIDA 3 - Ekari bible

EWAIDA 3

¹Sardis maakodo gai uguupuguu jaetigo-tai me kidiipa kii dani jaebijai: Ugatameja Roh pituwo ma, ijapu pituwo ma jago me kidaa mana: Akija kei tai agijo ani epi. Aki ija kagaigai, bokata kodeja.

²Anigodou, bokaine ijeida ka abu kitaija bida awii; akija kei tai agijo anija Ugatame pekaida boko duwadoke tita kadomakai beu kouja.

³Okai kouja aki juwijake jakimakita mana kodo gai; aki kou jakimakijake tedemai. Kou danite aki te doutope ko, ani oma me dani bukaa jawiita, daana ani kawi gaa ki pagi taita juwa aki ewo.

⁴Kodeja akeepa maija Sardis makiida me ida wija wido kagaba jimu taanija bagee; ani ma enaimo pokadeidaiga neuwina taitai, okei edou enaa kouja.

⁵Petee kija me kidi kou danite pokade kagaba jamakijawii, daana okaaka ko ajii kapogeije maida make ani umina te jawudaita; okaaka Naitai jumaapa gee tijawiita, daana jaetigo-tai bagee jumaapa.

⁶Meija gapa jago kipi Roh ka maakodo gai uguupuguudo jawegata mana kodo juwii.

⁷Filadelfia maakodo gai uguupuguu jaetigo-tai me kidiipa kii dani jaebijai: Jimubeu bokouto jago me kidaa mana, kii ke maakodo bokouto jago me kidi, Daudja kebajawii agijo jago me kidi; kii ke kebajawijake me idaana ka ma te munija, daana munijake ko me idaana ka ma te kebaja.

⁸Akija kei tai agijo ani epi. Dodou, ita kawadijawita, me idaana ka ma te idijawija; ani epi akija bida agijo ko mijo gaa to kodeja anija mana najakimakijake aneeka beu puga natai beu.

⁹Dododou, Teege uguupuguu kei ke inii Jahudi wegaigai, beu kodeja, puja mana wegai, dodowei, kei bagee aki jumaapa migaakobe te-tijake ejaikaita; ani ipa kagai mana okei epi ke-tita.

¹⁰Kegepa mijaanimakijake anija mana aki najakimakeege kojoka, makiida maki utoma gaado mana maida make kapipikajawiita, makiida maki utoma egaado taine mana kodo.

¹¹Ani egaa kodo jawiita; akeepa ka agijo jaki-tou to, akija petege me ka kamotidoke na kojoka.

¹²Petee kija me kidi anija Ugatameja owaa duba kemoma ejaikaita; okai umina te podomijake okai maida anija Ugatame eka jaebijaita, daana anija Ugatameja makijo eka kodo; kou ko ija Jerusalim kodo, anija Ugatame kidiipa make mijo meete maki kodo, epaawadoopa make, daana anija ija eka maija.

¹³Meija gapa jago kipi, Roh ka maakodo gai uguupuguudo jawegata mana kodo juwii.

¹⁴Laodikea maakodo gai uguupuguu jaetigo-tai me kidiipa kii dani jaebijai: Eka ki Amin kidaa mana; kii ko enanauto kidi maakodo mana wega-tai kidi, Ugatameja eugajawita agijoudo epauto kidi.

¹⁵Akija kei tai agijo ani epi. Aki geijo na beu, tani na beu. Aki geijo juwa, tani juwa, kou ani ide kodaa.

¹⁶Kou danite aki utuujaida kouja, geijo na beu, tani na beu, kojoka ani ebe duba make kaedijawiita.

¹⁷Aki kii dani wegai kouja „Ani tonawi, ani agijo ewaga, tijake aneepa agijo beu kai beu,” wegaige. Aki ewo kodeja, aki me peuda ma, ipa kagaja me kidi ma, daba ma, peka wanee ma, emi to poupou ma.

¹⁸Kojoka ani kati-kanii, mas bodija ka gaado tita kodo naaedai, aki tonawi ke tita, daana pokade kagaba, makijawe-tita, aki emi to poupou ka ego kodo ewaida te ke-tita, daana peka maida widii tija agijo, widii tijake aki peka domake-tita.

¹⁹Ani ipa egata bagee ani beu, beu etijake bida peu kidi etopai; kojoka ena enaa kijake tedemai.

²⁰Dodou, ani damoutoopa joonidoke tijake tokoo tigoo; kou danite me idaana anija mana wuu najuwijake damo naakebajawipi, ani okaapa woujo kijake inai wija enaimo aanai.

²¹Petee kija me kidi, anija jegeenaka animakaida animakai etiita; ani na petee kijake Naitaija jegeenaka animakaida ooanimakeetega danite.

²²Meija gapa jago kipi, Roh ka maakodo gai uguupuguudo jawegata mana kodo juwii.