Read En Ngixo San Mateo 24 Bible Online

San Mateo 24 - En Ngixo bible

San Mateo 24

¹Cˀia⁴ nca³ Jesús ji³tjo³-ni³ yo⁴nco⁴, cˀoa⁴ ti¹fi²-ni³, cho⁴ta⁴-le⁴ ji³cho²con³-le⁴, nca³ tsa³ca³co¹-le⁴ jo³ tjin¹ ma³-ni³ ntˀia³-le⁴ yo⁴nco⁴.

²Jesús qui³tso²-le⁴: A³ ti³ˀya³-nio¹³ nca³yi³je³ je²-vi⁴. Xi³ cjoa⁴qui²xi⁴ xi³ xin³-no³, nca³ li²coi³ ti⁴sa⁴tio²son²-ni³le⁴ xi¹ncjin¹ la⁴jao⁴, tsao⁴nqui³ nca³yi³je³. Choa⁴ xi³ sˀe⁴ cˀia⁴ nca³ cjoe⁴tˀa³ son³ˀnte³-vi⁴

³Cˀia⁴ nca³ Jesús tsa³cˀe²jna³jon³ ya⁴ ni³nto³ xi³ ˀmi² Olivos, cho⁴ta⁴-le⁴ ji³cho²con³ tˀa³xin²-le⁴, qui³tso²: Cˀoa⁴tˀin²-na³jin⁴, cˀia¹-ni³ve⁴ nca³ cˀoa⁴ coan⁴ je² cjoa⁴-vi⁴. Jme¹ choa⁴ xi³ sˀe⁴ cˀia⁴ nca³ cjoa²ˀai⁴, cˀoa⁴ nca³ cjoe⁴tˀa³ son³ˀnte³-vi⁴.

⁴Jesús qui³tso²-le⁴: Ti⁴coi²ntao⁴³ yao³-no³ nca³ tsi² tsa² ˀya³ xi³ cˀoa⁴na⁴cha⁴-no³.

⁵Ncjin² xi³ cjoa⁴ˀai¹ xi³ jan³ˀain¹-na⁴ yˀa³, xi³ cˀoa⁴coi⁴tso⁴: An³ nia¹³ Cristo, cˀoa⁴ ncjin² xi³ cˀoa⁴na⁴cha⁴-le⁴.

⁶Coi⁴no¹ˀya²-lao⁴³ tˀa³tsˀe⁴ cjoa⁴jchan¹, cˀoa⁴ en¹ xi³ cˀoa¹mjen³ tˀa³tsˀe⁴ cjoa⁴jchan¹. Ti⁴coi²ntao⁴³ yao³-no³, a³li² vi³yo³xcon¹-jion²³. Ma³chjen¹ nca³ cˀoa⁴coan⁴ nca³yi³je³ je² cjoa⁴-vi⁴, to⁴nca³ cje³ fe³tˀa³-jin².

⁷Coi⁴so¹tjen⁴ne² na⁴xi⁴na³nta¹ co²ntran⁴-le⁴ xi³ cja⁴ˀai¹ na⁴xi⁴na³nta¹, cˀoa⁴ cjoa⁴te¹xo³ma³ coi⁴so¹tjen⁴ne² xi³ cja⁴ˀai¹ cjoa⁴te¹xo³ma³. Sˀe⁴ chˀin³, cˀoa⁴ sˀe⁴ cji³nčha¹, cˀoa⁴ chaon¹ cjoa⁴ˀa³ ncjin² ˀnte³.

⁸Nca³yi³je³ je² cjoa⁴-vi⁴ to⁴vˀe¹tsˀia⁴ cjoa⁴ñˀain³.

⁹Cˀia⁴ sca⁴ni²tˀa³-no³ nca³ cˀoa⁴-sˀin² si⁴²cja³ˀa¹-no³ cjoa⁴ñˀain³, si⁴²cˀen³-no³, chˀao³ scoe⁴con³-no³ nca³tsˀi³ na⁴xi⁴-na³nta¹ xi³ tˀa³tsˀan⁴.

¹⁰Cˀia⁴ ncjin² xi³ coa⁴tio⁴ tˀa³xin², cˀoa⁴ tsjoa¹tˀa³ xi¹-ncjin¹, cˀoa⁴ chˀao³ scoe⁴con³ xi¹ncjin¹.

¹¹Ncjin² cho⁴ta⁴nti³so³ xi³ coi⁴nchja⁴ya³ xi³ coi⁴so¹tjen⁴, cˀoa⁴ ncjin² xi³ cˀoa⁴na⁴cha⁴-le⁴.

¹²Cˀia⁴ nca³ coan⁴ncjin²ya³ cjoa⁴tsˀen⁴, je² cjoa⁴tjao²cha³-le⁴ ncjin² cho⁴ta⁴ sa⁴te¹nchˀan¹jin³.

¹³Je² xi³ jcho¹cjoa⁴-le⁴ sa³ˀnta³ nca³ cjoe⁴tˀa³-ni³, je²-vi⁴ coi⁴tjo³ntjai².

¹⁴Cˀoa⁴ je² en¹nta³ xi³ tˀa³tsˀe⁴ je² cjoa⁴te¹xo³ma³-le⁴ ncˀa³jmi³ coi⁴no²cjoa⁴ya³-ni³ nca³qui³jnta² son³ˀnte³, nca³ si⁴²qui²xi⁴ya³nta³-le⁴ nca³tsˀi³ na⁴xi⁴na³nta¹. Cˀia⁴ cjoa⁴ˀai¹ xi³ cjoe⁴tˀa³.

¹⁵Cˀia⁴ nca³ jchao⁴³ nca³ cˀoe¹jna³ ya⁴ ˀnte³ jña³ tsje³ je² xi³ chˀao³ cjoan³ xi³ si¹qui³xo²ya³ nca³yi³je³, xi³ cˀoa⁴qui³tso² Daniel xi³ qui³nchja⁴ya³ tˀa³tsˀe⁴ Ni³na¹ (je² xi³ vˀe¹xquia⁴, ca²ta³ma³cho⁴ya³-le⁴),

¹⁶cˀia⁴ je² xi³ tjio¹ ya⁴ ˀnte³ Judea, ca²ta³ma³nca³ ya⁴ jin³jña¹ jan¹.

¹⁷Cˀoa⁴ je² xi³ ti¹jna³son² ntˀia³-le⁴, li²coi³ ca²ta³vi³tjo³jen³ nca³ scoe¹ jme³-ni³ ya⁴ ntˀia³-le⁴.

¹⁸Je² xi³ ya⁴ jin³jña¹ ti¹si¹xa¹, li²coi³ si⁴²cˀo¹fa³ya³-ni³ nca³ scoe¹ tso⁴nca⁴-le⁴.

¹⁹To⁴nca³ ma⁴xo¹ni³ je² xi³ yˀa³ ˀnti¹, cˀoa⁴ je² xi³ si¹ca³qui³ coi³ ni⁴čhjin³-ve⁴.

²⁰Tˀe²tsˀoao³ tso²cˀoa⁴, nca³ tsi² coi⁴yo¹³ cˀia⁴ nca³ chan⁴ nchˀan¹, ni⁴ ni⁴čhjin³ ni²cja¹ya³-jin².

²¹Nca⁴ cˀia⁴ nˀion¹ tse³ sˀe⁴ cjoa⁴ñˀain³ xi³ tsi² tsa² cˀoa⁴coan³ sa³ˀnta³ nca³ to²tsˀin³-le⁴ cjoa⁴, sa³ˀnta³ ntˀai⁴, ni⁴cˀia³-jin² cˀoa⁴coan⁴-nca¹ni³.

²²Cˀoa⁴ tsa² je² ni⁴čhjin³-ve⁴ tsi² tsa² cjoi⁴nčhoa¹jen³, ni⁴jnco³-jin² cho⁴ta⁴ xi³ coi⁴tjo³ntjai², to⁴nca³ xi³ tˀa³tsˀe⁴ je² xi³ qui³tjo³jin³ je² ni⁴čhjin³-ve⁴ cjoi⁴nčhoa¹jen³.

²³Cˀia⁴ tsa² jnco³ cho⁴ta⁴ coi⁴tso⁴-no³: Coe⁴-ni³ i⁴ ti¹jna³-vi⁴ Cristo, a³xo⁴ tsa² coi⁴tso⁴: Ya⁴ ti¹jna³-ve⁴, a³li² ma³cjain¹-jin²no³,

²⁴nca⁴ cˀoa⁴-sˀin² coi⁴so¹tjen⁴ cho⁴ta⁴nti³so³ xi³ Cristo coi⁴tso⁴-le⁴ yao³-le⁴, cˀoa⁴ cho⁴ta⁴nti³so³ xi³ coi⁴nchja⁴ya³, tse³ choa⁴ cao⁴ cjoa⁴xcon¹ xi³ tsjoa¹. Cˀoa⁴-sˀin² cˀoa⁴na⁴cha⁴-le⁴ nta³ tsa² je² xi³ Ni³na¹ tsa³cja³ˀa¹jin³, tsa² coan⁴-le⁴.

²⁵Coe⁴-ni³ to⁴nqui³-ni³ cˀoa⁴ca²xin³-no³.

²⁶Tsa² coi⁴tso⁴-no³: Coe⁴-ni³ ˀnte³tˀa³xin²tˀa³ ti¹jna³, a³li² vi²tjo⁴-jion²³ ya⁴-ve⁴. Tsa² coi⁴tso⁴-no³: Coe⁴-ni³ ti¹jna³ˀya³, a³li² ma³cjain¹-jin²no³.

²⁷Jo³-ni³ lˀi¹chˀaon⁴ xi³ vi³tjo³-ni³ jña³ nca³ vi³tjo³ tsˀoi¹, cˀoa⁴ nca³ ma³tsen³ sa³ˀnta³ jña³ nca³ ca³ntjai²-ni³ tsˀoi¹, cˀoa⁴-ti⁴sˀin² coan⁴ cˀia⁴ nca³ cjoa⁴ˀai¹ je² ˀnti¹-le⁴ cho⁴ta⁴.

²⁸To⁴jña³-ni³ nca³ ti¹jna³ yao³cˀen³, ya⁴² coa⁴tio⁴jtin¹ ni¹que¹. Je² ˀnti¹-le⁴ cho⁴ta⁴ cjoa⁴ˀai¹jin³ yo³jvi³

²⁹Xi³ cjoe⁴tˀa³ je² cjoa⁴ñˀain³ xi³ tsˀe⁴ coi³ ni⁴čhjin³-ve⁴, nti⁴ton⁴ tsˀoi¹ sˀe⁴njion²-ni³, cˀoa⁴ sa¹ li²coi³ ti⁴si⁴²ˀi³sen³-ni³, cˀoa⁴ ni³ño³ coi⁴xo⁴jen³-ni³ ncˀa³jmi³, cˀoa⁴ je² lˀi¹ xi³ tjin¹-le⁴ ncˀa³jmi³ jtin¹ya³-ni¹.

³⁰Cˀia⁴² coan⁴tsen³ choa⁴-le⁴ ˀnti¹-le⁴ cho⁴ta⁴ ya⁴ ncˀa³-jmi³. Cˀia⁴² squi¹ˀntia¹va³ nca³tsˀi³ nca³yi³je³ ntje⁴-le⁴ son³ˀnte³, cˀoa⁴ scoe⁴ je² ˀnti¹-le⁴ cho⁴ta⁴ xi³ cjoa⁴ˀai¹jin³-ni³ yo³jvi³ ya⁴ ncˀa³jmi³ cao⁴ tse³ nca³nˀion¹, cˀoa⁴ cao⁴ tse³ cjoa⁴je³ya³.

³¹Cˀia⁴ nca³ si⁴²ca³sen¹ a²ncje⁴-le⁴ nˀion¹ squi¹ˀntia¹ čhjao³, cˀoa⁴ a²ncje⁴-le⁴ cˀoe⁴²xco¹ je² xi³ qui³tjo³jin³. Cˀoe⁴²xco¹-ni³ nca³ ño³ xi⁴nqui⁴-le⁴ son³ˀnte³, cˀoa⁴ sa³ˀnta³ jnco³ ncoa³ ncˀa³jmi³, sa³ˀnta³ xi³ nqui²jnco³ ncoa³.

³²Cho¹tˀa³yao³ jnco³ cjoa⁴xco¹son² xi³ tsˀe⁴ ya¹ higo: Cˀia⁴ nca³ ya¹ntsja³ cˀoe⁴²jtsˀen¹, cˀia⁴ xca⁴ nčhoa¹-le⁴, ˀya³-nio¹³ nca³ je³ti¹jna³čhian³ chan⁴jtsi¹.

³³Cˀoa⁴-ti⁴sˀin²ni³ nca³ jon², cˀia⁴ nca³ jchao⁴³ nca³ cˀoa⁴cji³ma³ je² cjoa⁴-vi⁴, ca²ta³ˀyao³ nca³ je² ˀnti¹-le⁴ cho⁴ta⁴ je³ti¹jna³čhian³ ja⁴jčho³ xo⁴ntjoa⁴.

³⁴Xi³ cjoa⁴qui²xi⁴ xi³ xin³-no³, nca³ tsi² tsa² coi⁴ya¹ cho⁴ta⁴ xi³ tjio¹ ntˀai⁴-vi⁴ sa³ˀnta³ nca³ nca³yi³je³ je² cjoa⁴-vi⁴ cˀoa⁴coan⁴.

³⁵Ncˀa³jmi³ cao⁴ son³ˀnte³ cjoe⁴tˀa³-ni³, to⁴nca³ je² en¹-na⁴ li²coi³ cjoe⁴tˀa³.

³⁶To⁴nca³ xi³ cjoi⁴cho²ca³ je² ni⁴čhjin³-ve⁴, cˀoa⁴ je² hora-ve⁴ nca³ cˀoa⁴coan⁴, li²ˀya³ xi³ ve³, ni⁴je²-jin² a²ncje⁴ xi³ tsˀe⁴ ncˀa³jmi³, to⁴jnco³ je² Nˀai³-na¹ xi³ ve³.

³⁷To⁴nca³ jo³ coan³chon³ ni⁴čhjin³-le⁴ Noé, cˀoa⁴-ti⁴sˀin² coan⁴ cˀia⁴ nca³ cjoa⁴ˀai¹ je² ˀnti¹-le⁴ cho⁴ta⁴.

³⁸Jo³ coan³chon³ je² ni⁴čhjin³-ve⁴ to⁴nqui³-ni³ je² jtsi¹nˀion¹, nca³ tjio¹cjen², tjio¹ˀvi³, tjio¹vi³xan³, cˀoa⁴ tjio¹si¹qui³xan³, sa³ˀnta³ nca³ je² ni⁴čhjin³ nca³ Noé ja³ˀa³sˀen³ je² chi³tso³yˀai³.

³⁹Cho⁴ta⁴ li²coi³ tsa³ve³ sa³ˀnta³ nca³ ja³ˀai³ je² jtsi¹nˀion¹-ve⁴ xi³ qui³cao⁴ nca³tsˀi³. Cˀoa⁴-ti⁴sˀin² coan⁴chon³ cˀia⁴ nca³ cjoa⁴ˀai¹ je² ˀnti¹-le⁴ cho⁴ta⁴.

⁴⁰Cˀia⁴² coa⁴tio⁴ jao² ya⁴ nqui³chao³. Jnco³ xi³ tjo¹ve¹, cˀoa⁴ xi³ nqui²jnco³ sˀe⁴jna³-ni¹.

⁴¹Jao² ya¹nchjin¹ xi³ tjio¹vˀao³ nca³ si¹cˀa³tji³. Jnco³ xi³ tjo¹ve¹, cˀoa⁴ xi³ nqui²jnco³ sˀe⁴jna³-ni¹.

⁴²Tjen⁴ya³-ta³con²³ ti⁴yo³, nca⁴ tsi² tsa² ˀyao³ jme³ hora nca³ cjoa⁴ˀai¹ Nai³-no³.

⁴³To⁴nca³ ca²ta³ˀyao³ je²-vi⁴, tsa² je² nai³-le⁴ ntˀia³ tsa³ve³ jo³ chon³ nca³ cjoa⁴ˀai¹ cho⁴ta⁴che¹, tsa³cˀe²jna³con³ˀnta³ tsa²cai³, cˀoa⁴ li²coi³ qui³tsjoa³ˀnte³ nca³ tsa³ca³cjan¹jčho³ xjao¹ ni³ˀya³ nca³ ja³ˀa³sˀen³che¹.

⁴⁴To⁴coi³ cˀoa⁴-ti⁴ nca³ jon² cjia³-ta³con²³ ti⁴yo³, nca⁴ je² ˀnti¹-le⁴ cho⁴ta⁴ cjoa⁴ˀai¹ coi³ hora cˀia⁴ nca³ tsi² tjin¹jin³-no³.

⁴⁵ˀya¹ ni¹³ tso²cˀoa⁴ je² cho⁴ˀnta³ xi³ nˀion¹tˀa³con³, xi³ nta³ ve³ xa¹, xi³ je² nai³-le⁴ qui³si³cˀe¹jna³ˀnta³ xi³cˀa³ cho⁴ˀnta³-le⁴, jme¹-ni³ nca³ tsjoa¹-si¹ni³le⁴ xi³ coa⁴cjen⁴-ni³ nca³ fi³cho² choa⁴-le⁴.

⁴⁶Jo¹ to⁴nta³-le⁴ je² cho⁴ˀnta³-ve⁴, xi³ nai³-le⁴ coan⁴sjai³-le⁴ cˀia⁴ nca³ cjoa⁴ˀai¹ nca³ cˀoa⁴ti¹sˀin¹.

⁴⁷Xi³ cjoa⁴qui²xi⁴ xi³ xin³-no³, nca³ je² nai³-le⁴ si⁴²cˀe¹jna³ˀnta³-le⁴ nca³yi³je³ tso³jmi²-le⁴.

⁴⁸To⁴nca³ tsa² je² cho⁴ˀnta³ xi³ tsˀen⁴ coi⁴tso⁴jin³ ni⁴ma⁴-le⁴: Nai³-na⁴ cˀoa⁴čhjin³-le⁴ nca³ cjoa⁴ˀai¹.

⁴⁹Cˀoa⁴ cˀoe⁴²tsˀia⁴cao⁴ nca³ si⁴²qui²ˀaon³ je² xi³ to⁴nco¹son² cho⁴ˀnta³cao⁴, cˀoa⁴ coa⁴cjen⁴cao⁴ scˀoi¹cao⁴ je² xi³ chˀi⁴.

⁵⁰Cjoa⁴ˀai¹ nai³-le⁴ je² cho⁴ˀnta³-ve⁴, cˀia⁴ ni⁴čhjin³ nca³ tsi² ti¹co³ya³-le⁴, cˀoa⁴ hora nca³ tsi² tsa² ve³.

⁵¹Coa³te³nca³ yao³-le⁴, cˀoa⁴ sca⁴ni²jin³-le⁴ xi³ jao² ncjain¹. Ya⁴ squi¹ˀntia¹, cˀoa⁴ ya⁴ tsao⁴cjao² ni⁴ˀño⁴.