Read En Ngixo San Juan 11 Bible Online

San Juan 11 - En Ngixo bible

San Juan 11

¹Cˀia⁴ jnco³ xi³ ti¹mˀen³ xi³ Lázaro ˀmi², ya⁴ Betania tsˀe⁴, ya⁴ na⁴xi⁴na³nta¹-le⁴ María cao⁴ Marta nti³chja³.

²(Je² María je² xi³ qui³si³ca³jon³ je² Señor cao⁴ jnco³ xqui³xi¹ne¹. Ntsja⁴-le⁴ qui³si³xi²-ni³ ntso⁴co⁴. Je² ntsˀe⁴ xi³ Lázaro ˀmi², xi³ ti¹mˀen³.)

³Nti³chja³ Lázaro qui³si³ca³sen¹cjoa⁴-le⁴ Jesús, cˀoi⁴qui³tso²-le⁴: Señor, coe⁴-ni³ je² xi³ tjao²chai³ ti¹mˀen³-ni¹.

⁴Cˀia⁴ nca³ Jesús qui³nčhˀoe¹-le⁴, cˀoi⁴qui³tso²: Je² chˀin³-vi⁴ li²coi³ coi⁴ya¹-ni³, to⁴nca³ tˀa³tsˀe⁴ cjoa⁴je³ya³-le⁴ Ni³na¹, jme¹-ni³ nca³ je² ˀnti¹-le⁴ Ni³na¹ coi⁴tjo³je³ya³-si¹ni³.

⁵Jesús cjai¹nca³ tjao²que³ Marta cao⁴ nti³chja³ cao⁴ Lázaro.

⁶Cˀia⁴ nca³ qui³nčhˀoe¹ nca³ ti¹mˀen³ nqui²jao² ni⁴čhjin³ tsa³cˀe²jna³ ya⁴ ˀnte³ jña³ nca³ ti¹jna³.

⁷Xi³ je³coan³ je²-vi⁴, cˀia⁴ cˀoi⁴qui³tso²-le⁴ cho⁴ta⁴-le⁴: Tjin³-la²nca¹nia³² ya⁴ Judea.

⁸Cho⁴ta⁴-le⁴ cˀoi⁴qui³tso²-le⁴ Jesús: Rabí, la⁴jao⁴-na¹ me³-le⁴ va³sen¹-li² cho⁴ta⁴ judíos. A³ nqui²ntia³ ti⁴cˀoin¹-nca¹ni³ ya⁴-ve⁴.

⁹Qui³nchja⁴ Jesús: A³ tsi² te³jao² hora tjin¹-le⁴ ni⁴čhjin³. Je² xi³ tso²ˀva³ nca³ ni⁴čhjin³ li²coi³ sa⁴te¹nqui³, nca⁴ ma³tsen³-ni³le⁴ je² lˀi¹ xi³ si¹ˀi³sen³ son³ˀnte³.

¹⁰To⁴nca³ je² xi³ tso²ˀva³ nca³ njion², sa⁴te¹nqui³-ni¹, nca⁴ tsi² tsa² i³sen³-le⁴.

¹¹Cˀia⁴ nca³ je³cˀoa⁴qui³tso², cˀia⁴ Jesús cˀoi⁴qui³tso²-le⁴ cho⁴ta⁴-le⁴: Lázaro je² mi²yo⁴-na¹ ti¹qui³jna³fe²-ni¹, to⁴nca³ cjoi¹ si³cja³ˀa¹-ni³le⁴.

¹²Cˀia⁴ qui³tso² cho⁴ta⁴-le⁴: Señor, tsa² qui³jna³fe², coan⁴nta³-ni¹.

¹³Cˀoi⁴qui³tso² Jesús tˀa³tsˀe⁴ cjoa⁴vi³ya³-le⁴ Lázaro. Cˀoa⁴ je² cho⁴ta⁴-le⁴ cja⁴ˀai¹-sˀin² coan³cho⁴ya³-le⁴ xi³ Jesús ca²nchja⁴. Qui³si³cja³ˀai³tsjen³ nca³ to⁴ti¹si¹cja¹ya³ Lázaro nca³ ti¹qui³jna³fe².

¹⁴Cˀia⁴ Jesús qui³nchja⁴tsen³: Lázaro ti¹qui³jna³cˀen³-ni¹.

¹⁵Ma³tsjoa³-na³ xi³ tˀa³tsaon⁴³ nca³ tsi² ya⁴ ti²jna⁴, jme¹-ni³ nca³ coan⁴cjain¹-si¹ni³no³. To⁴nca³ tjin³chon¹-le⁴².

¹⁶Cˀia⁴ Tomás, je² xi³ Dídimo ˀmi², cˀoi⁴qui³tso²-le⁴ xi³cˀa³ cho⁴ta⁴-le⁴ Jesús: Cˀoa⁴-ti⁴ tjian¹ nca³ ña¹, jme¹-ni³ nca³ ya⁴ coi⁴ya²cao⁴-si¹nia³². Jesús xi³ si¹cja³ˀa¹ya³, cˀoa⁴ Jesús xi³ cjoa⁴vi³jna³chon³

¹⁷Cˀia⁴ ji³nčhoa³ Jesús, qui³sˀe³jin³-le⁴ nca³ je³coan³ ño³ ni⁴čhjin³ nca³ qui³sˀe³ñai³ Lázaro.

¹⁸Betania ti¹jna³ čhian³-ni³le⁴ Jerusalén, jo³-ni³ tsa² va³sen³ hora-la⁴.

¹⁹Cjai¹nca³ to⁴ncjin² cho⁴ta⁴ judíos ja³ˀai³nčhˀoe² Marta cao⁴ María. Ja³ˀai³ si¹je³con³ nca³ cˀen³ ntsˀe⁴.

²⁰Cˀia⁴ nca³ Marta qui³nčhˀoe¹ nca³ Jesús ti¹nčhoa¹ ya⁴³ ntia⁴², qui³ cja³ˀa¹, to⁴nca³ je² María ya⁴ tsa³cˀe²jna³ ya⁴³ ni³ˀya³.

²¹Marta qui³tso²-le⁴ Jesús: Señor, tsa² i⁴-la²sa³ ti³jnai³ tsa²cai³, je² ntsˀe³ li²coi³ cˀen³.

²²To⁴nca³ cˀoa⁴-ti⁴ ˀve³-nia¹³ ntˀai⁴-vi⁴, to⁴jme³-ni³ xi³ ni²je¹-lai⁴ Ni³na¹, Ni³na¹ tsjoa¹-li².

²³Jesús qui³tso²-le⁴: Cjoa⁴ˀa¹ya³-ni³le⁴ ntsˀai⁴.

²⁴Marta cˀoi⁴qui³tso²-le⁴: ˀve³-nia¹³ nca³ cjoa⁴ˀa¹ya³-ni³le⁴ cˀia⁴ nca³ coi⁴cho³cje³tˀa³ ni⁴čhjin³.

²⁵Jesús qui³tso²-le⁴: An³ nia¹³ xi³ si³cja³ˀa¹ya³, cˀoa⁴ an³ nia¹³ xi³ cjoa⁴vi³jna³chon³. Je² xi³ ma³cjain¹-le⁴ tˀa³tsˀan⁴, nta³ tsa² cˀen³, cˀoe¹jna³con³-ni¹.

²⁶Cˀoa⁴ to⁴ˀya³-ni³ve⁴ xi³ ti¹jna³con³, xi³ ma³cjain¹-le⁴ tˀa³tsˀan⁴, li²coi³ ntia³ coi⁴ya¹. A³ ma³cjain¹-li² je²-vi⁴.

²⁷Marta qui³tso²-le⁴ Jesús: Jaon³, Señor, je³coan³cjain¹-na³ nca³ ji³ ni¹³ Cristo, je² ˀnti¹-le⁴ Ni³na¹, xi³ ja²ˀai⁴ son³ˀnte³. Jesús qui³squi³ˀnta¹ ya⁴ tˀa³tsjo¹-le⁴ Lázaro

²⁸Cˀia⁴ nca³ je³cˀoa⁴qui³tso² Marta, qui³ qui³nchja⁴ˀma³-le⁴ María xi³ nti³chja³, cˀoi⁴qui³tso²-le⁴: I⁴ ti¹jna³-vi⁴ Maestro, ti¹nchja⁴-li².

²⁹Cˀia⁴ nca³ María qui³nčhˀoe¹-le⁴, nti⁴ton⁴ tsa³qui³so²tjen⁴ ji³nčhoa³nčhˀoe² Jesús.

³⁰Cje³-sa³ fi³cho¹-jin² Jesús ya⁴ na⁴xi⁴na³nta¹, to⁴ya⁴ ti¹jna³ ya⁴ ˀnte³ jña³ nca³ Marta qui³sa³te³cjao³.

³¹Cˀia⁴ je² cho⁴ta⁴ judíos xi³ tjio¹cao⁴ María ya⁴³ ni³ˀya³-le⁴, xi³ si¹je³con³, tsa³ve³ nca³ María tsa³qui³so²tjen⁴ nti⁴ton⁴ cˀoa⁴ ji³tjo³, qui³tjen⁴nqui³-le⁴, cˀoi⁴qui³tso²: Ya⁴-la⁴ coai⁴ cji³ˀnta¹ ya⁴ tˀa³tsjo¹-le⁴.

³²María ji³cho² ya⁴ jña³ nca³ ti¹jna³ Jesús, tsa³ve³ tsa³ca³sen²xco¹nchˀin³tˀa³-le⁴, cˀoi⁴qui³tso²-le⁴: Señor, tsa² i⁴-la²sa³ ti³jnai³ tsa²cai³, je² ntsˀe³ li²coi³ cˀen³.

³³Cˀia⁴ nca³ Jesús tsa³ve³ nca³ ti¹cji³ˀnta¹ María cˀoa⁴ti⁴ tjio¹cji³ˀnta¹ je² cho⁴ta⁴ judíos xi³ tjen⁴cao⁴, cˀia⁴ aon³ coan³-le⁴ Jesús, coan³fao¹-le⁴.

³⁴Cˀoi⁴qui³tso²: Jña¹ tsa³cˀe²ñao³. Qui³tso²-le⁴: Señor, nčhoai¹³ cho¹tsain³.

³⁵Qui³squi³ˀnta¹ Jesús.

³⁶Cˀia⁴ qui³nchja⁴ cho⁴ta⁴ judíos: Coe⁴-ni³ jo³ nca³ tjao²que³ coan³ Lázaro.

³⁷Tjin¹ cˀa³ cho⁴ta⁴ judíos xi³ cˀoi⁴qui³tso²: Ne³ qui³sco³ˀai²nqui³ xcon⁴ xi³ xca⁴ cji³. A³ tsi² tsa² coan³-le⁴ je²-vi⁴ nca³ qui³sˀin³ cjoa⁴nta³ nca³ tsi² tsa² cˀen³ Lázaro. Qui³ni²cja³ˀa¹ya³-le⁴ Lázaro

³⁸Aon³ coan³-nca¹ni³le⁴ Jesús. Ja³ˀai³ ja⁴tsjo¹-ve⁴, jnco³ nqui³jao³ jña³ nca³ qui³jna³jčho³ jnco³ la⁴jao⁴te³.

³⁹Cˀoi⁴qui³tso² Jesús: Cha³ˀa²xion²³ la⁴jao⁴. Marta, nti³chja³ Lázaro, cˀoi⁴qui³tso²-le⁴: Señor, je³njen⁴, nca⁴ je³ño³-le⁴ ni⁴čhjin³ nca³ qui³sˀe³ñai³.

⁴⁰Jesús qui³tso²-le⁴ Marta: A³ tsi² tsa² cˀoa⁴qui³xin³-le²³, tsa² coan⁴cjain¹-li², jcha⁴-ni¹³ cjoa⁴je³ya³-le⁴ Ni³na¹.

⁴¹Cˀia⁴ tsa³cja³ˀa¹xin² la⁴jao⁴ jña³ nca³ qui³sˀe³ñai³ cˀen³. Jesús qui³sco²tsen³ncˀa¹ qui³tso²: Nˀai³-na⁴, tsjoa³-le²³ cjoa⁴nta³ nca³ cˀoa⁴-sˀin² ca²no²ˀya²-nai¹³.

⁴²An³ tsa³ˀve³-nia¹³ nca³ no²ˀya²-nai¹³ nca³ntsjai². To⁴coi³ nca³ ncjin² cho⁴ta⁴ tjio¹ntai³, cˀoa⁴ca²xin³-nia³, jme¹-ni³ nca³ cˀoa⁴-sˀin² ca²ta³ma³cjain¹-si¹ni³le⁴ nca³ ji³ qui³ni²ca³sen¹-nai¹³.

⁴³Cˀia⁴ nca³ je³cˀoa⁴qui³tso² nca³yi³je³ en¹-vi⁴, nˀion¹ qui³nchja⁴: Lázaro, nčhoai¹³ nti³tsin³-vi⁴.

⁴⁴Je² xi³ qui³jna³cˀen³ ji³tjo³. Ntsja³ cao⁴ ntso⁴co⁴ tji¹nˀion¹-ni³ na³jño³. Je² ncjain¹ jnco³ na³jño³ ti¹jte¹jin³. Jesús qui³tso²-le⁴ cho⁴ta⁴: Cho¹jnta¹-nio³, ca²ta³fi². Cho⁴ta⁴ judíos fao¹ya³ co²ntran⁴-ni³ Jesús

⁴⁵Cjai¹nca³ ncjin² cho⁴ta⁴ judíos xi³ ja³ˀai³nčhˀoe² María. Tsa³ve³ nca³yi³je³ jo³ qui³sˀin³ Jesús, coan³cjain¹-le⁴ xi³ tˀa³tsˀe⁴.

⁴⁶To⁴nca³ tjin¹ cˀa³ cho⁴ta⁴ judíos xi³ qui³con³-le⁴ cho⁴ta⁴ fariseos, cˀoa⁴qui³tso²-le⁴ jo³ qui³sˀin³ Jesús.

⁴⁷Cˀia⁴ cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴ fariseos qui³sˀin³ junta qui³tso²: Jme¹ xi³ nˀian², nca³ ncjin² choa⁴ xi³ tsjoa¹ je² cho⁴ta⁴-vi⁴.

⁴⁸Tsa² to⁴cˀoa⁴-sˀin² si⁴cˀe¹jna³², ña³qui³ nca³tsˀi³ coan⁴cjain¹-le⁴ xi³ tˀa³tsˀe⁴. Cjoa⁴ˀai¹ cho⁴ta⁴ romanos, cjoa⁴ˀa²xin²-na¹ ˀnte³-na¹ cao⁴ na⁴xi⁴na³nta¹-na¹.

⁴⁹Je² Caifás jnco³ xi³ ya⁴ tjio¹, je² xi³ na⁴ˀmi³ti¹tjon² coi³ no¹-ve⁴, cˀoi⁴qui³tso²-le⁴: Jon² li²jme³ xi³ ma³-no³.

⁵⁰Sa³ˀnta³ li²coi³ ni²cja³ˀai³tsjaon³ nca³ ma³chjen¹-na¹ nca³ jnco³ cho⁴ta⁴ coi⁴ya¹ntjai² na⁴xi⁴na³nta¹-na¹, cˀoa⁴ li²coi³ nta³ nca³ ña³qui³ si⁴cha³² nca³tsˀi³ cho⁴ta⁴.

⁵¹Je²-vi⁴ a³li² to⁴je² xi³ cˀoa⁴qui³tso². To⁴coi³ nca³ xa¹-le⁴ na⁴ˀmi³ti¹tjon² vˀa³ je² no¹-ve⁴, cˀoa⁴-sˀin² tsa³ca¹ya³con³ nca³ Jesús coi⁴ya¹ntjai² na⁴xi⁴na³nta¹.

⁵²A³li² tsa² to⁴je² na⁴xi⁴na³nta¹-ve⁴ xi³ coi⁴ya¹ntjai² Jesús, cˀoa⁴²-ti⁴ cˀoe⁴²xco¹ nca³tsˀi³ ˀnti¹-le⁴ Ni³na¹ xi³ tjio¹tsao³va³ son³ˀnte³.

⁵³Sa³ˀnta³ coi³ ni⁴čhjin³-ve⁴ cˀoa⁴-sˀin² tsa³cjao¹ya³-ni³ jo³-sˀin² nca³ si⁴²cˀen³.

⁵⁴To⁴coi³ cjoa⁴-vi⁴ Jesús li²coi³ ti⁴tsa³cˀa³mjen³ va³sen³jin³-ni³le⁴ cho⁴ta⁴ judíos. Qui³-ni³ ya⁴-ve⁴, qui³ jnco³ na⁴xi⁴na³nta¹ xi³ Efraín ˀmi², xi³ ti¹jna³čhian³-le⁴ ˀnte³tˀa³xin²tˀa³. Ya⁴ tsa³cˀe²jna³cao⁴ cho⁴ta⁴-le⁴.

⁵⁵Je³nčhoa¹čhian³ sˀoi¹ pa²xco⁴ xi³ tsˀe⁴ cho⁴ta⁴ judíos. Cjai¹nca³ ncjin² xi³ qui³-ni³ ya⁴ ˀnte³-ve⁴. Qui³mi³ Jerusalén, nca³ cje³ vi³tjo³-jin²sa³ pa²xco⁴, jme¹-ni³ nca³ si⁴²tsje³-si¹ni³ yao³-le⁴.

⁵⁶Tsa³ca¹sjai³ Jesús. Nca³ˀi⁴ nca³jan¹ tsa³cja¹cao⁴ xi¹-ncjin¹ nca³ tjio¹ ya⁴³ yo⁴nco⁴: Jo¹ vi³xon¹³, a³ tsi² cjoa⁴ˀai¹ sˀoi¹-vi⁴.

⁵⁷Je² cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴ fariseos cˀoa⁴-sˀin² tsa³ca³te¹xo³ma³, tsa² ˀya³-ve⁴ xi³ ve³ jña³ nca³ ti¹jna³ Jesús, cˀoa⁴ca²ta³tso², jme¹-ni³ nca³ coi⁴ntoa⁴-si¹ni³.