Read En Ngixo San Juan 21 Bible Online

San Juan 21 - En Ngixo bible

San Juan 21

¹Nqui²jnco³ cˀa² Jesús tsa³ca³co¹son²tsen³-le⁴ yao³-le⁴ cho⁴ta⁴-le⁴ ya⁴ntai³ nta¹chi³con³ Tiberias. Cˀoi⁴-sˀin² tsa³ca³co¹son²tsen³ yao³-le⁴.

²Tjio¹ Simón Pedro cao⁴ Tomás xi³ Dídimo ˀmi², cao⁴ Natanael, je² xi³ tsˀe⁴ Caná xi³ nchja⁴-ni³ Galilea, cao⁴ xti³-le⁴ Zebedeo, cao⁴ nqui²jao²-sa³ cho⁴ta⁴-le⁴ Jesús.

³Simón Pedro qui³tso²-le⁴: Jti⁴ ti²fi³ si³cˀen³. Cˀoa⁴-ti⁴ ti³ma³nquin¹cao⁴-lai²⁴jin⁴, qui³tso² xi³cˀa³. Ji³tjo³, cˀoa⁴ qui³sˀen³ jnco³ chi³tso³. Je² ni⁴tjen⁴-ve⁴ ni⁴to⁴jme³-jin² xi³ qui³tjoe¹-le⁴.

⁴Cˀia⁴ nca³ qui³sˀe³sen¹ Jesús tsa³cˀe²jna³ntai³ na³nta¹, to⁴nca³ je² cho⁴ta⁴-le⁴ li²coi³ tsen³ coan³-le⁴ tsa² je² Jesús.

⁵Jesús qui³tso²-le⁴: Xti³, a³ cje³ sa³co¹-jin²no³ jti⁴. Mai³, qui³tso²-le⁴.

⁶Jesús cˀoi⁴qui³tso²-le⁴: Chjoao¹³ na⁴ˀya³, cha⁴ni²jin³ntao¹³ ya⁴ nca³qui²xi⁴-le⁴ chi³tso³, cˀoa⁴ sa⁴co²-no³. Cˀia⁴ qui³sca³-ni¹jin³nta¹ na⁴ˀya³-le⁴, li²coi³ coan³ qui³tjoe¹mi³-ni³le⁴ nca³ cˀoa⁴-sˀin² to⁴ncjin² ma³-ni³ jti⁴ xi³ qui³si³ncha³.

⁷Cˀia⁴ je² cho⁴ta⁴-le⁴ xi³ Jesús cjai¹nca³ tsjoa³que³, qui³tso²-le⁴ Pedro: Je² ni¹ Nai³-na¹. Cˀia⁴ nca³ qui³nčhˀoe¹ Simón Pedro nca³ je² Nai³-na¹, tsa³cˀe¹cja¹ na³jño³-le⁴ nca³ tsi² tsa² coi³ na³jño³ yˀa³cja¹. Qui³sca³ni¹jin³nta¹ yao³-le⁴.

⁸Je² xi³cˀa³ cho⁴ta⁴-le⁴ ja³ˀai³cao⁴ chi³tso³ (nca³ tsi² tsa² coi³ cjin³ tjio¹jin³nta¹, čhian³ na³nqui³ ni¹, to⁴tjin¹-la⁴le⁴ tsa² jnco³ ciento metro). Tsa³ca¹jve³jin³ na³nta¹ na⁴ˀya³ jti⁴-le⁴ xi³ nˀion¹ qui³tse³ jti⁴.

⁹Cˀia⁴ nca³ je³ji³tjo³jen³-ni³ chi³tso³ ja⁴tˀa³ na³nqui³, tsa³ve³ nca³ ncha³ xo¹lˀi¹, jnco³ jti⁴ cji³chjan¹, cˀoa⁴ tsa³ve³ nio⁴xti²la⁴.

¹⁰Jesús qui³tso²-le⁴: Nčhoa¹cao⁴³ je² jti⁴ xi³ ca²tjoe¹-no³ ntˀai⁴-vi⁴.

¹¹Cˀia⁴ qui³sˀen³ chi³tso³ Simón Pedro. Tsa³cˀe¹jve³ na⁴ˀya³-le⁴ tˀa³na³nqui³. Jo³ ncjin² jti⁴ xi³ yˀai³ cjoan³ cjio³ya³, jnco³ ciento va³sen³ cao⁴-ni³ jan² ma³-ni³, to⁴nca³ nta³ tsa² ncjin² ma³-ni³, li²coi³ qui³xi³jnta² na⁴ˀya³.

¹²Jesús qui³tso²-le⁴: Nčhoao¹³, ti⁴cho³. Ni⁴ˀya³-jin² cho⁴ta⁴-le⁴ xi³ coan³nˀion¹con³ nca³ scoi⁴na³nqui³-le⁴: ˀya¹-ni³ ji³. Tsen³ coan³-le⁴ nca³ je² Nai³-na¹.

¹³Ji³nčhoa³ Jesús, qui³scoe¹ nio⁴xti²la⁴, qui³tsjoa³-le⁴. Ti⁴cˀoa⁴qui³sˀin³-ni³ cao⁴ jti⁴-ve⁴.

¹⁴Je²-vi⁴ coan³jan²cˀa³-ni³ nca³ Jesús tsa³ca³co¹son²tsen³-le⁴ yao³-le⁴ cho⁴ta⁴-le⁴, cˀia⁴ nca³ je³ja³ˀa³ya²jin³-ni³le⁴ cˀen³. Jesús tso²: Ti⁴coi²ntai⁴ va³rre²-na⁴

¹⁵Cˀia⁴ nca³ je³tsa³cjen², Jesús qui³tso²-le⁴ Simón Pedro: Simón, ˀnti¹-le⁴ Jonás, a³ nqui²sa⁴ tsjoa³cha³-nai¹³ cao⁴-ni³ tsa² je²-vi⁴. Pedro qui³tso²-le⁴: Jaon³, Señor, ji³ ˀyai³ nca³ tsjoa³que⁴-le²³. Jesús qui³tso²-le⁴: Ti⁴coi²ntai⁴ va³rre²ˀnti¹-na⁴.

¹⁶Jesús cˀoa⁴qui³tso²-nca¹ni³le⁴ nca³ ma³jao²cˀa²-ni³: Simón, ˀnti¹-le⁴ Jonás, a³ tsjoa³cha³-nai¹³. Pedro qui³tso²-le⁴: Jaon³, Señor, ji³ ˀyai³ nca³ tsjoa³que⁴-le²³. Jesús qui³tso²-le⁴: Ti⁴coi²ntai⁴ va³rre²-na⁴.

¹⁷Cˀia⁴ cˀoi⁴qui³tso²-le⁴ xi³ coan³jan²cˀa²-ni³: Simón, ˀnti¹-le⁴ Jonás, a³ tsjoa³cha³-nai¹³. Coan³va³-le⁴ Pedro nca³ coan³jan²cˀa²-ni³ cˀoa⁴qui³tso²-le⁴: A³ tsjoa³cha³-nai¹³. Qui³tso²-le⁴: Señor, ji³ xi³ ˀyai³ nca³yi³je³ cjoa⁴, ji³ ˀyai³ nca³ tsjoa³que⁴-le²³. Jesús qui³tso²-le⁴: Ti⁴coi²ntai⁴ va³rre²-na⁴.

¹⁸Ña³qui³ cjoa⁴qui²xi⁴ ña³qui³ cjoa⁴qui²xi⁴ xi³ xin³-le²³: Cˀia⁴ nca³ nqui²sa⁴-sa³ xti³ ti³soi³, ti⁴ji³ qui³chˀa²cja¹-ni³ na³jño³-li⁴, cˀin³ jña³ nca³ coan³me³-li². To⁴nca³ cˀia⁴ nca³ coan⁴jchi¹ncai³ cjoe¹ncˀai³ ntsai⁴, cja⁴ˀai¹ xi³ si⁴²cˀa³cja¹-li² na³jño³-li⁴, coai⁴cao⁴-li² jña³ nca³ li²coi³ coan⁴me³-li².

¹⁹Coi³ cˀoi⁴qui³tso²-ni³ Jesús, nca³ cˀoa⁴-sˀin² qui³si³cho⁴ya³-le⁴ jo³-sˀin² nca³ coi⁴ya¹, nca³ cˀoa⁴sje³je³ya³ Ni³na¹. Cˀia⁴ nca³ je³cˀoa⁴qui³tso², tˀin³tjen⁴nqui³-nai¹³, qui³tso²-le⁴ Pedro. Je² cho⁴ta⁴-le⁴ xi³ Jesús cjai¹nca³ tsjoa³que³

²⁰Qui³si³cˀo¹fa³ Pedro, qui³sco²tsen³-le⁴ nca³ ti¹fi²tjen⁴nqui³-le⁴ je² cho⁴ta⁴-le⁴ xi³ Jesús cjai¹nca³ tsjoa³que³, xi³ tsa³cˀe²jna³tˀa³-le⁴ Jesús cˀia⁴ nca³ tsa³cjen² nca³ njion², xi³ cˀoi⁴qui³tso²-le⁴: Señor, ˀya¹-ni³ xi³ sca⁴ni²tˀa³-li².

²¹Cˀia⁴ nca³ Pedro tsa³ve³ je² cho⁴ta⁴-vi⁴, cˀoi⁴qui³tso²-le⁴ Jesús: Señor, cˀoa⁴ je²-vi⁴, jme¹ xi³ coan⁴-le⁴.

²²Jesús cˀoi⁴qui³tso²-le⁴: Tsa² me³-na³ nca³ je² cˀoe¹jna³ jo³ sa³ˀnta³ nca³ cjoe²ˀe⁴, jme¹ coi²nta⁴-li⁴. Tˀin³tjen⁴nqui³-nai¹³ nca³ ji³.

²³Ji³tjo³jin³-le⁴ ntsˀe⁴ jnco³ en¹ xi³ tso² nca³ je² cho⁴ta⁴-le⁴ve⁴ li²coi³ coi⁴ya¹. To⁴nca³ Jesús li²coi³ cˀoa⁴qui³tso² nca³ li²coi³ coi⁴ya¹, to⁴nca³ qui³tso² tsa² me³-na³ nca³ je² cˀoe¹jna³ jo³ sa³ˀnta³ nca³ cjoe²ˀe⁴, jme¹ coi²nta⁴-li⁴.

²⁴Je²-vi⁴ je² cho⁴ta⁴-le⁴ Jesús xi³ cˀoa⁴-sˀin² tsjoa¹ en¹ xi³ tˀa³tsˀe⁴ nca³yi³je³ cjoa⁴-vi⁴. Je² qui³squi³ je² cjoa⁴-vi⁴, cˀoa⁴ ˀya³-nia¹ nca³ en¹-le⁴ cjoa⁴qui²xi⁴-ni¹.

²⁵Cˀoa⁴-ti⁴ cjai¹nca³ to⁴ncjin²-sa³ cjoa⁴ xi³ qui³sˀin³ Jesús. Tsa² tji¹tˀa³-la²sa³ xon⁴ nca³ jnco¹jnco¹, an³ xian³ nca³ ni⁴ˀi⁴-jin²la⁴ son³ˀnte³ coan⁴ jcho¹ya³ je² libro xi³ cˀoa⁴-sˀin² sˀe⁴tˀa³. Cˀoa⁴ ca²ta³ma³.