Read En Ngixo Romanos 4 Bible Online

Romanos 4 - En Ngixo bible

Romanos 4

¹Jme¹ xi³ coi⁴xoan¹-ˀni³, jme¹ xi³ qui³sa³co³-le⁴ Abraham je² nˀai³-na¹ jo³ cjoan³ yao³-na¹.

²Tsa² je¹-le⁴ Abraham je³tˀa³-le⁴ xi³ to⁴tˀa³tsˀe⁴ xi³ qui³sˀin³, tjin¹-le⁴ jo³-sˀin² nca³ vˀa³sje³je³ya³-ni³ yao³-le⁴, to⁴nca³ li²coi³ nqui³xcon⁴ Ni³na¹.

³Jo¹ tso² xon⁴ Escritura. Abraham coan³cjain¹-le⁴ tˀa³tsˀe⁴ Ni³na¹. Cˀoa⁴-sˀin² Ni³na¹ cho⁴ta⁴cjoa⁴qui²xi⁴ qui³tso²-le⁴.

⁴Tˀa³tsˀe⁴ je² xi³ si¹xa¹, je² chji¹-le⁴ li²coi³ ma³xqui⁴cao⁴ jo³-ni³ tsa² xi³ to⁴cjoa⁴tjao², to⁴nca³ jo³-ni³ tsa² xi³ qui³tjen⁴ xi³ tˀa³tsˀe⁴.

⁵To⁴nca³ tˀa³tsˀe⁴ je² xi³ tsi² si¹xa¹, to⁴nca³ ma³cjain¹-le⁴ tˀa³tsˀe⁴ Ni³na¹ xi³ si¹cje³tˀa³ je¹-le⁴ cho⁴ta⁴ xi³ tsi² ve³xcon¹ nca³ je², to⁴coi³ tsa² nca³ ma³cjain¹-le⁴, cho⁴ta⁴cjoa⁴qui²xi⁴ tso²-le⁴.

⁶Jo³-sˀin² cˀoa⁴-ti⁴ je² David qui³tso²: Jo¹ to⁴nta³-le⁴ je² cho⁴ta⁴ xi³ Ni³na¹ cho⁴ta⁴cjoa⁴qui²xi⁴ tso²-le⁴, tˀa³xin² xa¹-le⁴.

⁷Qui³tso²: Jo¹ to⁴nta³-le⁴ je²-ve⁴ xi³ cjoa⁴tsˀa³ntjai²cjoa⁴-le⁴ qui³cha³tˀa³, cˀoa⁴ xi³ je¹-le⁴ qui³sˀe³ˀma³.

⁸Jo¹ to⁴nta³-le⁴ je² cho⁴ta⁴ xi³ Nai³-na¹ li²coi³ si¹cˀa³xqui⁴cao⁴ je¹-le⁴.

⁹Je² cjoa⁴nta³ je²-vi⁴ a³ to⁴jnco³ tsˀe⁴ xi³ tjin¹-le⁴ cjoa⁴circuncisión, a³xo⁴ cˀoa⁴²-ti⁴ tsˀe⁴ xi³ tsin²-le⁴ cjoa⁴circuncisión-jin². Nca⁴ vi³xon¹-nia¹ nca³ Abraham cho⁴ta⁴cjoa⁴qui²xi⁴ qui³tso²-le⁴ nca³ coan³cjain¹-le⁴.

¹⁰Jo¹-sˀin²ni³ nca³ cho⁴ta⁴cjoa⁴qui²xi⁴ qui³tso²-le⁴. A³ cˀia⁴² nca³ je³qui³sˀe³-le⁴ cjoa⁴circuncisión a³xo⁴ cˀia⁴ nca³ cje³ tjin¹-jin²le⁴. A³li² cˀia⁴ nca³ je³qui³sˀe³-le⁴ cjoa⁴circuncisión, to⁴nca³ cˀia⁴ nca³ cje³ tjin¹-jin²le⁴.

¹¹Cˀoa⁴ cjoa⁴circuncisión coan³-le⁴ jo³-ni³ tsa² choa⁴, cˀoa⁴ sello xi³ coi³ cjoa⁴qui²xi⁴ xi³ qui³sˀe³-le⁴ nca³ coan³cjain¹-le⁴ cˀia⁴ nca³ cje³ tjin¹-jin²le⁴ cjoa⁴circuncisión. Coi³ cˀoa⁴-sˀin² nca³ nˀai³-le⁴ nca³tsˀi³ cho⁴ta⁴ coan⁴-si¹ni³ xi³ ma³cjain¹-le⁴ nca³ tsin²-le⁴ cjoa⁴circuncisión, jme¹-ni³ nca³ cho⁴ta⁴cjoa⁴qui²xi⁴ coi⁴tso⁴-si¹ni³le⁴ nta³ tsa² je².

¹²Cˀoa⁴-ti⁴sˀin² nˀai³-le⁴ coan³ xi³ tjin¹-le⁴ cjoa⁴circuncisión. A³li² tsa² to⁴jnco³ je²-jin² xi³ tjin¹-le⁴ cjoa⁴circuncisión, to⁴nca³ cˀoa⁴²-ti⁴ je² xi³ fi²tjen⁴nqui³-le⁴ ntia⁴²-le⁴ Abraham, jo³-sˀin² coan³cjain¹-le⁴ nca³ cje³ tjin¹-jin²le⁴ cjoa⁴circuncisión. Ni³na¹ qui³si³sˀe³nqui³-le⁴ Abraham cjoa⁴tjao² xi³ to⁴tˀa³tsˀe⁴ nca³ coan³cjain¹-le⁴

¹³Nca⁴ Ni³na¹ qui³si³sˀe³nqui³-le⁴ Abraham cao⁴ ntje⁴-le⁴ nca³ sˀe⁴-le⁴ cjoa⁴tjao² son³ˀnte³-vi⁴, a³li² to⁴tˀa³tsˀe⁴-jin² cjoa⁴te¹xo³ma³, to⁴nca³ to⁴tˀa³tsˀe⁴ je² cjoa⁴qui²xi⁴ xi³ qui³sˀe³-le⁴ nca³ coan³cjain¹-le⁴.

¹⁴Tsa² je² cho⁴ta⁴ xi³ tsˀe⁴ cjoa⁴te¹xo³ma³ sˀe⁴-le⁴ cjoa⁴tjao², li²jme³-jin² chji¹-le⁴ xi³ ma³cjain¹-na¹ˀni³, cˀoa⁴ qui³cha³ xi³ Ni³na¹ qui³tsjoa³ tsˀoa³.

¹⁵Je² cjoa⁴te¹xo³ma³ si¹cˀe¹jna³ne² cjoa⁴ñˀain³, to⁴nca³ ya⁴ jña³ nca³ tsin² cjoa⁴te¹xo³ma³-jin², cˀoa⁴²-ti⁴ tsin² xi³ fa³ˀa³to³ntjai²-le⁴.

¹⁶Coi³ nca³ cˀoa⁴ma³ xi³ to⁴tˀa³tsˀe⁴ nca³ ma³cjain¹-na¹, jme¹-ni³ nca³ cˀoa⁴ma³-si¹ni³ to⁴cao⁴ cjoa⁴nta³-le⁴ Ni³na¹, cˀoa⁴ jme¹-ni³ nca³ je² xi³ Ni³na¹ qui³tsjoa³-ni³ tsˀoa³ ña³qui³ tjin¹qui²xi⁴-ni¹ tˀa³tsˀe⁴ nca³tsˀi³ ntje⁴-le⁴, a³li² to⁴je²-jin² xi³ tsˀe⁴ cjoa⁴te¹xo³ma³, to⁴nca³ cˀoa⁴²-ti⁴ je² xi³ ma³cjain¹-le⁴ jo³-sˀin² coan³cjain¹-le⁴ Abraham xi³ nˀai³-na¹ nca³tsˀia³².

¹⁷(Jo³-sˀin² tji¹tˀa³: Nˀai³-le⁴ xi³ ncjin² na⁴xi⁴na³nta¹ qui³si³cˀe¹jna³-le²³.) Cˀoa⁴coan³ nqui³xcon⁴ Ni³na¹. Abraham coan³cjain¹-le⁴ tˀa³tsˀe⁴ Ni³na¹, je² xi³ tsjoa¹-le⁴ cjoa⁴vi³jna³chon³ xi³ cˀen³, cˀoa⁴ nchja⁴-le⁴ cjoa⁴ xi³ tsin² jo³-ni³ tsa² xi³ tjin¹.

¹⁸Cˀia⁴ nca³ li²jme³ ti⁴tjin¹-ni³le⁴ cjoa⁴cho³ya²cao⁴cjoa⁴, to⁴jo³ cao⁴ cjoa⁴cho³ya²cao⁴cjoa⁴ coan³cjain¹-ni³le⁴ Abraham, nca³ coan⁴ nˀai³-le⁴ ncjin² na⁴xi⁴na³nta¹, jo³-sˀin² nca³ tsa³cˀin²-le⁴: Cˀoa⁴²-sˀin² coan⁴ ntje⁴-li⁴.

¹⁹Li²coi³ coan³ˀi³nta³jin³ jo³-sˀin² coan³cjain¹-le⁴, cˀia⁴ nca³ qui³si³cja³ˀai³tsjen³ jo³-ni³ tsa² je³cˀen³ yao³-le⁴ (nca³ je³me³ jnco³ ciento no¹-le⁴), cˀoa⁴ cˀia⁴ nca³ qui³si³cja³ˀai³tsjen³ nca³ ˀnti⁴ Sara.

²⁰To⁴nca³ nta³ coan³cjain¹-le⁴. Li²coi³ jao² tsa³cˀe¹-con³ xi³ tˀa³tsˀe⁴ xi³ Ni³na¹ qui³tsjoa³-le⁴ tsˀoa³. To⁴sa³ nqui²sa⁴ nˀion¹ nta³ coan³cjain¹-le⁴, tsˀa³sje³je³ya³ Ni³na¹,

²¹cˀoa⁴ nˀion¹ nta³ tsa³cˀe¹-le⁴con³ nca³ nca³yi³je³ xi³ Ni³na¹ qui³tsjoa³-le⁴ tsˀoa³, cˀoa⁴-ti⁴ Ni³na¹ tjin¹-le⁴ nca³nˀion¹ nca³ cˀoa⁴sˀin⁴².

²²Coi³ nca³ Ni³na¹ cho⁴ta⁴cjoa⁴qui²xi⁴ qui³tso²-le⁴.

²³A³li² tsa² to⁴je²-jin² tˀa³tsˀe⁴ nca³ qui³chji³-ni³ nca³ cho⁴ta⁴cjoa⁴qui²xi⁴ qui³tso²le⁴,

²⁴to⁴nca³ cˀoa⁴-ti⁴ tˀa³tsan⁴² xi³ cho⁴ta⁴cjoa⁴qui²xi⁴ coi⁴tso⁴-na¹, ña¹ xi³ ma³cjain¹-na¹ tˀa³tsˀe⁴ Ni³na¹ xi³ qui³si³cja³ˀa¹ya³-ni³le⁴ Jesús, Nai³-na¹, ya⁴jin³-le⁴ cˀen³.

²⁵Je² xi³ qui³ni²cˀen³ tˀa³tsˀe⁴ cjoa⁴tsˀen⁴-na¹, cˀoa⁴ xi³ ja³ˀa²ya³-le⁴ jme¹-ni³ nca³ cjoe⁴tˀa³-si¹ni³ je¹-na¹.