Read En Ngixo Romanos 9 Bible Online

Romanos 9 - En Ngixo bible

Romanos 9

¹Xi³ cjoa⁴qui²xi⁴ xi³ xian³ nca⁴ ti²jna⁴coa⁴ Cristo, li²coi³ vˀe³nti³soa³. Je² cjoa⁴fa³ˀai³tsjen³-na⁴ to⁴jnco³ tsjoa¹ cjoa⁴qui²xi⁴ xi³ tˀa³tsˀan⁴ cao⁴ je² Espíritu Santo.

²Cjai¹nca³ tse³ cjoa⁴va³ xi³ tjin¹-na³, cˀoa⁴ nca³ntsjai² nˀion¹ cji³ne³ ni⁴ma⁴-na⁴.

³Ti⁴ˀan³-nia³ me³-na³ ntia³coa²sen⁴tˀa³xin²-le⁴ Cristo, tsa² coan⁴-na³, xi³ tˀa³tsˀe⁴ ntsˀe³, xi³ xi²nquia⁴ xi³ to⁴nco¹son² yao³-na⁴jin⁴,

⁴xi³ coi³ cho⁴ta⁴ israelita ni¹, je² xi³ tsa³cˀin²-le⁴ nca³ ˀnti¹-le⁴ Ni³na¹ coan³, cˀoa⁴ tsˀe⁴ cjoa⁴je³ya³, cao⁴ cjoa⁴ xi³ qui³sˀe³nˀion¹, cao⁴ je² cjoa⁴te¹xo³ma³ xi³ qui³tsˀai²-le⁴, cao⁴ cjoa⁴ xi³ ve³xcon¹, cao⁴ xi³ qui³ni²sˀe³nqui³-le⁴.

⁵Je² xi³ nˀai³jcha¹cjin³ tsˀe⁴ ni¹, cˀoa⁴²-ti⁴ je² Cristo jo³ cjoan³ yao³-le⁴ ji³nčhoa³-ni³ ntje⁴-le⁴. Je² xi³ Ni³na¹ xi³ va³te¹xo³ma³-le⁴ nca³yi³je³ cjoa⁴, ca²ta³chi³con³tˀain³ nca³ntsjai² ni⁴čhjin³. Cˀoa⁴ ca²ta³ma³.

⁶To⁴nca³ en¹-le⁴ Ni³na¹ ni⁴jme³-jin² xi³ qui³cha³-le⁴. Nca⁴ tsi² tsa² to⁴nca³tsˀi³-jin² xi³ nčhoa¹-ni³ ntje⁴-le⁴ Israel xi³ cho⁴ta⁴ israelita ni¹.

⁷Ni⁴coi³-jin² nca³ ntje⁴-le⁴ Abraham nca³ ˀnti¹-le⁴ coan³ nca³tsˀi³, to⁴nca³ je² xi³ tsˀe⁴ Isaac, je² xi³ ntje⁴-li⁴ cˀoin¹.

⁸Coi³ xi³ tso²-ni³: A³li² je²-jin² xi³ ˀnti¹-le⁴ jo³ cjoan³ yao³-le⁴ xi³ ˀnti¹-le⁴ Ni³na¹, to⁴nca³ je² xi³ ˀnti¹-le⁴ jo³-sˀin² nca³ qui³si³sˀe³nqui³-le⁴, je² ni¹ xi³ coan³xqui⁴cao⁴ nca³ ntje⁴-le⁴.

⁹Je² en¹ xi³ Ni³na¹ qui³si³sˀe³nqui³-le⁴ Abraham, coi³ je²-vi⁴: I⁴-cjoan²sˀin² ni⁴čhjin³ no¹ xi³jnco³ cjoe²ˀe⁴, cˀoa⁴ sˀe⁴-le⁴ Sara jnco³ ˀnti¹.

¹⁰A³li² tsa² to⁴coi³ je²-vi⁴, to⁴nca³ cˀoa⁴²-ti⁴ Rebeca, cˀia⁴ nca³ qui³sa³co³-le⁴ ˀnti¹ xi³ tsˀe⁴ jnco³ xˀin⁴ Isaac, nˀai³-na⁴jin⁴,

¹¹(cˀia⁴ nca³ cje³-sa³ tsin³-jin², cˀoa⁴ cˀia⁴ nca³ ni⁴sa³jme³-jin² xi³ sˀin¹, ni⁴ xi³ nta³ tjin¹, ni⁴ xi³ chˀao³ tjin¹, jme¹-ni³ nca³ sˀe⁴jna³ntsjai²-ni³ jo³-sˀin² xa¹ tsa³cˀe¹nta³-ni³ Ni³na¹ nca³ tsa³cja³ˀa¹jin³, a³li² to⁴tˀa³tsˀe⁴ xa¹-le⁴jin², to⁴-nca³ to⁴tˀa³tsˀe⁴ jo³-sˀin² me³-le⁴ je² xi³ nchja⁴),

¹²cˀoa⁴tsa³cˀin²-le⁴ Rebeca nca³ je² xi³ ma³jchi¹nca³ cho⁴ˀnta³ coan⁴-le⁴ xi³ ma³ˀnti¹.

¹³Jo³-sˀin² nca³ tji¹tˀa³: Je² Jacobo xi³ coan³tsjoa³que⁴, to⁴nca³ Esaú chˀao³que⁴ coan³.

¹⁴Jme¹ xi³ coi⁴xoan¹-ˀni³. Ni³na¹, a³ tjin¹ xi³ tsi² cjoa⁴qui²xi⁴ xi³ sˀin¹. Ma³jain². Ni⁴ˀi⁴tse¹-jin² cˀoa⁴tjin¹.

¹⁵To⁴nca³ Ni³na¹ qui³tso²-le⁴ Moisés: Coan⁴ma⁴que⁴ to⁴ˀya³-ni³ve⁴ xi³ me³-na³ nca³ coan⁴ma⁴que⁴, cˀoa⁴ aon³ coan⁴-na³ to⁴ˀya³-ni³ve⁴ xi³ tˀa³tsˀe⁴ aon³ coan⁴-na³.

¹⁶Cˀoa⁴-sˀin² nca³ tsi² tsa² coi³ nca³ cˀoa⁴-sˀin² me³-le⁴ cho⁴ta⁴, ni⁴coi³-jin² nca³ nˀion¹ si¹xa¹, to⁴nca³ coi³ nca³ Ni³na¹ xi³ tjin¹-le⁴ cjoa⁴ma⁴ta³con².

¹⁷Nca⁴ je² xon⁴ Escritura cˀoa⁴tso²-le⁴ Faraón: Coi³ je²-vi⁴ nca³ qui³sco³mi³tjen⁴-le²³, jme¹-ni³ nca³ coa³co³-si¹nia³ nca³nˀion¹-na⁴ xi³ to⁴tˀa³tsi⁴, cˀoa⁴ jme¹-ni³ nca³ jan³ˀain¹-na⁴ coi⁴no²cjoa⁴ya³-si¹ni³ nca³qui³jnta² son³ˀnte³.

¹⁸Cˀoa⁴-sˀin² Ni³na¹ tjin¹-le⁴ cjoa⁴ma⁴ta³con² tˀa³tsˀe⁴ cho⁴ta⁴ to⁴ˀya³-ni³ve⁴ xi³ me³-le⁴. Cˀoa⁴-ti⁴ Ni³na¹ si¹ta²ja³ ni⁴ma⁴-le⁴ cho⁴ta⁴ to⁴ˀya³-ni³ve⁴ xi³ me³-le⁴.

¹⁹Cˀoa⁴cˀoin¹-nai¹ˀni³. A¹-ni³ nca³ Ni³na¹ va¹ne²-si¹ni³ je¹ cho⁴ta⁴, nca⁴ ˀya¹ xi³ coan⁴ cˀoe⁴²jna³ta²ja³-le⁴ xi³ me³-le⁴ Ni³na¹.

²⁰To⁴nca³ ji³ cho⁴ta⁴, ˀya¹ ni¹³ ji³ nca³ coa⁴te²cjao³ˀa²cao⁴-si¹ni³ Ni³na¹. A³ coi⁴nchja⁴cao⁴ ti⁴²ˀnte³ je² xi³ ca²si¹nta³: A¹-ni³ nca³ cˀoa⁴ca²ni²ca¹-si¹ni³nai¹³.

²¹A³ tsin²-le⁴ ˀnte³-jin² je² xi³ si¹nta³ ti⁴² nca³ si⁴²nta³-ni³ xi³ ti⁴coi³-ni³ nta¹si³ jnco³ xi³ nˀion¹ nta³ cji³ cˀoa⁴ nqui²jnco³ xi³ to⁴ti⁴²yo⁴ma⁴.

²²To⁴nca³ Ni³na¹, nta³ tsa² me³-le⁴ nca³ coa⁴co² cjoa⁴jti³-le⁴, cˀoa⁴ nta³ tsa² me³-le⁴ nca³ jcha⁴-le⁴ nca³nˀion¹-le⁴, cˀoa⁴-sˀin² qui³cho¹cjoa⁴-le⁴ cao⁴ cjoa⁴tse³jta³-le⁴ je² ti⁴² xi³ xa¹ coan³nta³-ni³ tˀa³tsˀe⁴ cjoa⁴jti³-le⁴. Je² ti⁴² xa¹ coan³nta³-ni³ nca³ coi⁴xo⁴ya³.

²³Coi³ xi³ cˀoa⁴qui³sˀin³ jme¹-ni³ nca³ jcha⁴-si¹ni³le⁴ jo³ nca³ nˀion¹ tse³ tjin¹ cjoa⁴je³ya³-le⁴ xi³ tˀa³tsˀe⁴ ti⁴² xi³ xa¹ coan³nta³-ni³ tˀa³tsˀe⁴ cjoa⁴ma⁴ta³con²-le⁴. Je² ti⁴² xi³ Ni³na¹ to⁴nqui³-ni³ tsa³cˀe¹jna³nta³ tˀa³tsˀe⁴ cjoa⁴je³ya³.

²⁴Xi³ coi³ ña¹-vi⁴ nca³ cˀoa⁴-ti⁴ Ni³na¹ qui³nchja⁴-na¹, a³li² tsa² to⁴je²-jin² xi³ tsˀe⁴ cho⁴ta⁴ judío, to⁴nca³ cˀoa⁴²-ti⁴ cho⁴ta⁴ xi³ tsˀe⁴ xi³ li² judío-jin².

²⁵Jo³-sˀin² nca³ Ni³na¹ cˀoa⁴-ti⁴ tso² ya⁴ tsˀe⁴ Oseas: Coi³nchja²³-le⁴ na⁴xi⁴na³nta¹-na⁴, je² xi³ tsi² tsa² coi³ tsˀan⁴ na⁴xi⁴na³nta¹. Cˀoa⁴-ti⁴ coi³nchja²³-le⁴ xi³ tjao²que⁴, je² xi³ tsi² tsa² coi³ coan³tjao²que⁴.

²⁶Cˀoa⁴ coan⁴ ya⁴ ˀnte³ jña³ nca³ cˀoa⁴tsa³cˀin²-le⁴ve⁴, jon²-vi⁴ a³li² na⁴xi⁴na³nta¹-na⁴jin², ya⁴ coi⁴no²cjoa⁴-le⁴ ˀnti¹-le⁴ Ni³na¹ xi³ ti¹jna³con³.

²⁷Cˀoa⁴-ti⁴ Isaías nchja⁴ya³ xi³ tˀa³tsˀe⁴ Israel: Nta³ tsa² cˀoa⁴tjin¹ ma³-ni³ ˀnti¹-le⁴ Israel jo³ cji³ ma³-ni³ tso³mi¹-le⁴ nta¹chi³con³, to⁴je² xi³ cˀoa⁴nqui³ coi³tjo³ntjai²-ni¹.

²⁸Nca⁴ je² Nai³-na¹ si⁴²jnco³ cjoa⁴qui²xi⁴-le⁴ xi³ tjin¹ne²-le⁴ son³ˀnte³ nca³ ña³qui³ cˀoa⁴tjin¹, cˀoa⁴ nti⁴ton⁴ cˀoa⁴coan⁴.

²⁹Jo³-sˀin² nca³ to⁴nqui³-ni³ cˀoa⁴qui³tso² Isaías: Tsa² je² Nai³-na¹ xi³ Nai³-le⁴ so³nta²do⁴ tsa² tsi² qui³si³ca³tio²con³-na¹ ntje⁴, cˀoa⁴-ti⁴sˀin² cˀoa⁴coan³² jo³ coan³ Sodoma, cˀoa⁴-ti⁴sˀin² cˀoa⁴coan³ cjoan³² jo³ cjoan³ Gomorra. Je² cjoa⁴qui²xi⁴ xi³ to⁴tˀa³tsˀe⁴ nca³ ma³cjain¹-na¹

³⁰Jme¹ xi³ coi⁴xoan¹-ˀni³: Je² cho⁴ta⁴ xi³ li² judío-jin², xi³ tsi² qui³tjen⁴nqui³-le⁴ cjoa⁴qui²xi⁴-le⁴ Ni³na¹, ji³cho²tjen⁴nqui³ xi³ cjoa⁴qui²xi⁴, xi³ coi³ cjoa⁴qui²xi⁴ tjoe¹-na¹ xi³ to⁴tˀa³tsˀe⁴ nca³ ma³cjain¹-na¹,

³¹to⁴nca³ cho⁴ta⁴ Israel xi³ qui³tjen⁴nqui³-le⁴ je² cjoa⁴te¹xo³ma³ xi³ vˀe¹ne² xi³ cjoa⁴qui²xi⁴ li²coi³ ji³cho²tjen⁴nqui³-le⁴ nca³ qui³si³jnco³ cjoa⁴te¹xo³ma³ xi³ vˀe¹ne² xi³ cjoa⁴qui²xi⁴.

³²A¹-ni³. To⁴coi³ nca³ li²coi³ qui³tjen⁴nqui³-le⁴ xi³ cjoa⁴qui²xi⁴ xi³ to⁴tˀa³tsˀe⁴ nca³ coan³cjain¹-le⁴, to⁴nca³ cˀoa⁴-sˀin² qui³tjen⁴nqui³-le⁴ xi³ cjoa⁴qui²xi⁴ xi³ to⁴tˀa³tsˀe⁴ nca³ qui³si³xa¹-le⁴ cjoa⁴te¹xo³ma³. Ya⁴ qui³sa³te³nqui³-ni³ ya⁴ la⁴jao⁴ xi³ qui³jna³chjoa².

³³Jo³-sˀin² tji¹tˀa³: Coe⁴-ni³ i⁴ cˀoe³jna²³ ya⁴ Sión la⁴jao⁴ xi³ qui³jna³chjoa², cˀoa⁴ la⁴jao⁴ xi³ sa³te¹nquia³². Je² xi³ coan⁴cjain¹-le⁴ tˀa³tsˀe⁴ li²coi³ coan⁴soa³-le⁴.