Read En Ngixo Gálatas 2 Bible Online

Gálatas 2 - En Ngixo bible

Gálatas 2

¹Cˀia⁴ nca³ je³coan³-ni³ te³ño³ no¹, qui³mi³ nqui²ntia³-nca¹nia³ cao⁴ Bernabé ya⁴ Jerusalén. Cˀoa⁴-ti⁴ qui³-coa⁴ Tito-je⁴.

²To⁴coi³ nca³ Ni³na¹ qui³si³cˀa³tsen³jin³-na³ nca³ qui³-si¹nia³. Qui³ ca³co³-le⁴ je² en¹nta³ xi³ tˀa³tsˀe⁴ Cristo xi³ nchja²ya³jin³-le⁴ cho⁴ta⁴ xi³ li² judío-jin². Tˀa³xin² tsa³ca³co³-le⁴ je² xi³ tsen³ cjoan³ nca³ ncˀa³ xa¹-le⁴, jme¹-ni³ nca³ tsi² tsa² to¹ca³-si¹nia³ xi³ to⁴cjoa⁴tjao², cˀoa⁴ jme¹-ni³ nca³ tsi² tsa² qui³to²ca³-si¹nia³ xi³ to⁴cjoa⁴tjao².

³Ni⁴je²-jin² Tito xi³ ya⁴ tsa³cˀe²jna³cao⁴-na³, li²coi³ cjoa⁴nˀion¹ qui³nˀian²-le⁴ nca³ cjoa⁴circuncisión coan³-le⁴, nta³ tsa² cho⁴ta⁴ griego ni¹.

⁴To⁴nca³ tjin¹ cˀa³ xi³ to⁴ntsˀe⁴nti³so³ xi³ qui³chja³ˀa²sˀen³cao⁴ˀma³. Ja³ˀa³sˀen³cao⁴ˀma³ jme¹-ni³ nca³ scoe⁴che¹-si¹ni³ jo³-sˀin² nca³ ntai¹ ti³yo³coa⁴² Cristo Jesús, cˀoa⁴ jme¹-ni³ nca³ si⁴²ca³tio²nˀion¹-si¹ni³na¹ jo³-ni³ tsa² cho⁴ˀnta³.

⁵Xi³ coi³ ni⁴jnco³-jin² hora tsa³cˀai²ˀnte³-lai⁴jin⁴ nca³ na³nqui³ tsa³qui³yoi³⁴-jin⁴, jme¹-ni³ nca³ je² cjoa⁴qui²xi⁴ xi³ tsˀe⁴ je² en¹nta³ xi³ tˀa³tsˀe⁴ Cristo cˀoe¹jna³ntsjai²-si¹ni³ xi³ tˀa³tsaon⁴³.

⁶To⁴nca³ je² xi³ tsen³ cjoan³ nca³ ncˀa³ xa¹ tjin¹-le⁴, (jo³-sˀin² tsa³ca³tio² nca³sˀa⁴ li²jme³ coi²nta⁴-na³, nca⁴ Ni³na¹ li²coi³ fa³ˀa¹jin³ jo³ cjoan³ cho⁴ta⁴) cjoa⁴qui²xi⁴ ni¹ je² xi³ ncˀa³ xa¹-le⁴ ni⁴jme³-jin²sa³ xi³ qui³tsjoa³-na³ nca³ an³.

⁷To⁴sa³ cˀia⁴ tsa³ve³ jo³-sˀin² nca³ Pedro qui³sˀe³ne²-le⁴ xa¹ nca³ tsjoa¹-le⁴ je² cho⁴ta⁴ xi³ tsˀe⁴ cjoa⁴circuncisión je² en¹nta³ xi³ tˀa³tsˀe⁴ Cristo. Ti⁴cˀoa⁴-sˀin²ni³ qui³sˀe³ne²-na³ xa¹ nca³ an³ tsjoa³-le⁴ je² cho⁴ta⁴ xi³ tsi² tsˀe⁴ cjoa⁴circuncisión je² en¹nta³ xi³ tˀa³tsˀe⁴ Cristo.

⁸(Je² xi³ qui³tsjoa³ nca³nˀion¹-le⁴ Pedro nca³ pa²stro⁴ coan³ xi³ tˀa³tsˀe⁴ cho⁴ta⁴ xi³ tsˀe⁴ cjoa⁴circuncisión, cˀoa⁴-ti⁴sˀin² qui³tsjoa³ nca³nˀion¹-na³ nca³ an³ nca³ pa²stro⁴ coan³ xi³ tˀa³tsˀe⁴ cho⁴ta⁴ xi³ li² judío-jin².)

⁹Cˀia⁴ nca³ tsa³ve³ je² cjoa⁴nta³ xi³ an³ tsa³cˀai²-na³, Jacobo, cao⁴ Cefas, cao⁴ Juan, xi³ jo³-ni³ cho⁴ta⁴ti¹tjon² nca⁴ cˀoa⁴-sˀin² tjin¹-le⁴ nca³nˀion¹, qui³tsjoa³-na³jin⁴ ntsja³ nca³ tsa³qui³mai³coai⁴-jin⁴ xi²nqui⁴-jin⁴ Bernabé cao⁴ an³, jme¹-ni³ nca³ jin⁴ coa³nquin¹nčhˀoe²-si¹ni³jin⁴ cho⁴ta⁴ xi³ li² judío-jin², cˀoa⁴ je² coai⁴nčhˀoe² cho⁴ta⁴ xi³ tsˀe⁴ cjoa⁴circuncisión.

¹⁰To⁴coi³ qui³si³je¹-na³jin⁴ nca³ li²coi³ cha³jin³-na³jin⁴ xi³ cho⁴ta⁴yo⁴ma⁴. Xi³ to⁴coi³ cˀoa⁴-ti⁴ an³ cjai¹nca³ nta³ qui³si³xi¹ti¹ya³-le⁴ yao³-na⁴. Pablo nchja⁴ti³cao⁴ Pedro ya⁴ Antioquía

¹¹To⁴nca³ cˀia⁴ nca³ ja³ˀai³ Pedro ya⁴ Antioquía, tsa³ca²te⁴jna³ta²ja³-le⁴ nca³ qui³cho³va²ˀai³⁴-jin⁴, nca⁴ je² tjin¹-le⁴ je¹.

¹²Cˀia⁴ nca³ cje³ fa³ˀai³-jin² cˀa³ xi³ ji³nčhoa³tˀa³-ni³le⁴ Jacobo, Pedro tsa³cjen²cao⁴ cho⁴ta⁴ xi³ li² judío-jin², to⁴-nca³ coan³scan³-ni³, nca³ ja³ˀai³, qui³si³cˀo¹fa³ya³jton³-le⁴, to⁴tsa³ca³sen²xin²-ni³, nca⁴ qui³tsa³cjon¹-le⁴ cho⁴ta⁴ xi³ tsˀe⁴ cjoa⁴circuncisión.

¹³Cˀoa⁴-ti⁴ xi³cˀa³-sa³ cho⁴ta⁴ judíos cho⁴ta⁴jao²ncjain¹ coan³ cao⁴ je². Cˀoa⁴-ti⁴sˀin² nta³ tsa² Bernabé qui³tˀa³-le⁴ cjoa⁴jao²ncjain¹-le⁴.

¹⁴To⁴nca³ cˀia⁴ nca³ tsa³ˀve³ nca³ tsi²-ni³ tsa² cao⁴ cjoa⁴qui²xi⁴ xi³ tjio¹ma³-ni³ xi³ tˀa³tsˀe⁴ je² en¹nta³ xi³ tˀa³tsˀe⁴ Cristo, cˀoi⁴qui³xin³-le⁴ Pedro nqui³xcon⁴ nca³tsˀi³: Tsa² ji³, nca³ cho⁴ta⁴ judío ˀmi²-li², cˀoa⁴-ti⁴sˀin² ˀmi³coai⁴ yao³-li⁴ jo³-ni³ cho⁴ta⁴ xi³ li² judío-jin², a³li²coi³ cˀoa⁴-sˀin² jo³-ni³ cho⁴ta⁴ judío, jo¹-sˀin²ni³ nca³ cjoa⁴nˀion¹ nˀian²-ni³lai⁴ cho⁴ta⁴ xi³ li² judío-jin², nca³ cˀoe¹yo³ jo³-ni³ cho⁴ta⁴ judío.

¹⁵Ña¹ xi³ qui³tsin³jin³-le⁴² cho⁴ta⁴ judíos, a³li² tsa² cho⁴ta⁴je¹-jian² xi³ tsˀe⁴ cho⁴ta⁴ xi³ li² judío-jin².

¹⁶ˀya³-nia¹ nca³ cho⁴ta⁴son³ˀnte³ li²coi³ fe³tˀa³ je¹-le⁴ nca⁴ cˀoa⁴sˀin¹ jo³ tso² cjoa⁴te¹xo³ma³, to⁴nca³ coi³ nca³ ma³cjain¹-le⁴ tˀa³tsˀe⁴ Jesucristo. Cˀoa⁴-ti⁴ ña¹ coan³cjain¹-na¹ tˀa³tsˀe⁴ Jesucristo, jme¹-ni³ nca³ cjoe⁴tˀa³-si¹ni³ je¹-na¹ nca⁴ ma³cjain¹-na¹ tˀa³tsˀe⁴ Cristo, a³li² tsa² coi³ nca³ cˀoa⁴nˀian² jo³ tso² cjoa⁴te¹xo³ma³. Ni⁴ˀya³-jin² xi³ cˀoa⁴-sˀin² fe³tˀa³ je¹-le⁴ nca⁴ cˀoa⁴sˀin¹ jo³ tso² cjoa⁴te¹xo³ma³.

¹⁷Tsa² cˀoa⁴-ti⁴ ña¹ coan⁴sjai³ nca³ cho⁴ta⁴je¹ ˀmi²-na¹, nca³ coi⁴jnchi¹sje² nca³ cjoe⁴tˀa³ je¹-na¹ xi³ to⁴tˀa³tsˀe⁴ Cristo, a³ si¹xa¹-le⁴ je¹ Cristo. Ni⁴ˀi⁴tse¹-jin².

¹⁸Tsa² je² cjoa⁴ xi³ an³ qui³si³cji³tsoan²³, ti⁴coi³ cˀoe³nta³ya³ nqui²jnco³cˀa²-nia³, a³ tsi² coa³coa³ yao³-na⁴ nca³ cho⁴ta⁴je¹ coan³.

¹⁹An³ ti²jna⁴cˀen³ xi³ to⁴tˀa³tsˀe⁴ cjoa⁴te¹xo³ma³. Je³ti²jna⁴cˀen³ xi³ tˀa³tsˀe⁴ cjoa⁴te¹xo³ma³, jme¹-ni³ nca³ coa²te⁴jna³con³-si¹nia³ xi³ tˀa³tsˀe⁴ Ni³na¹.

²⁰Cˀia⁴ nca³ Cristo tsa³cˀe²jna³ cˀen³ ya⁴tˀa³ cro², cˀoa⁴-ti⁴ an³ to⁴jo³ cˀoa⁴-sˀin² tsa³ca²te⁴jna³ cˀen³, to⁴nca³ ti²jna⁴coan³, li²coi³ ti⁴ˀan³-nia³, to⁴nca³ Cristo ti¹jna³con³ ja⁴jin³ ni⁴ma⁴-na⁴. Je² cjoa⁴vi³jna³chon³ xi³ ntˀai⁴-vi⁴ ti²jna⁴con³-nia³ yao³-na⁴, ti²jna⁴coan³ nca⁴ ma³cjain¹-na³ tˀa³tsˀe⁴ je² ˀnti¹-le⁴ Ni³na¹, xi³ coan³tsjoa³que³-na³, xi³ qui³tsjoa³ntjai² yao³-le⁴ xi³ tˀa³tsˀan⁴.

²¹Li²coi³ si³qui³tson¹ya³ je² cjoa⁴nta³-le⁴ Ni³na¹. Tsa² to⁴tˀa³tsˀe⁴ cjoa⁴te¹xo³ma³ fe³tˀa³ je¹-na¹, cˀoa⁴ cˀia⁴² to⁴cjoa⁴tjao²-ni³ˀni³ cˀen³ Cristo.