Read En Ngixo Gálatas 6 Bible Online

Gálatas 6 - En Ngixo bible

Gálatas 6

¹ˀnti¹ntsˀe³, tsa² jnco³ xi³ to⁴ca²ca³jin³sca¹ je¹, jon² xi³ je³nta³ ma³nquin¹cao⁴³ je² Espíritu Santo, ti⁴nta³cho⁴ta⁴ nqui²jnco³cˀao² cao⁴ cjoa⁴ˀi³nta³jin³ta³con²-no³. Nta³ ti⁴cja³ˀai³tsjen³-lao⁴³ yao³-no³ nca³ ti⁴jon²-nio³, jme¹-ni³ nca³ tsi² tsa² cˀoa⁴-ti⁴ jon² si⁴²cao⁴-si¹ni³no³.

²Ti⁴ncha³cao⁴ nca³ñao¹³ cjoa⁴ xi³ jo³ chˀa¹-sˀin² cji³ne²-le⁴ xi²nquio⁴³. Cˀoa⁴-sˀin² si⁴tjo³son²³ je² cjoa⁴te¹xo³ma³-le⁴ Cristo.

³Je² xi³ si¹cja³ˀai³tsjen³ nca³ to⁴je² xi³ chji¹-le⁴, cˀoa⁴ nca³ tsi² tsa² jme³-ni³ chji¹-le⁴, to⁴yao³-le⁴ vˀa³na⁴cha⁴-le⁴.

⁴Cˀoa⁴-sˀin² jnco¹jnco¹ ca²ta³co³tˀa³ xi³ ti⁴tsˀe⁴-ni³ xa¹. Cˀia⁴² sˀe⁴-le⁴ cjoa⁴je³ya³ xi³ to⁴tˀa³tsˀe⁴ xa¹le⁴ˀni³. A³li² to⁴tˀa³tsˀe⁴ xa¹-le⁴ xi³cˀa³-jin² vˀa³sje³je³ya³-ni³ yao³-le⁴.

⁵Nca³ jnco¹jnco¹ ca²ta³vˀa³mi³ chˀa¹ xi³ ti⁴tsˀe⁴-ni³.

⁶Je² xi³ je³qui³sco²tˀa³ya³ je² en¹ xi³ tˀa³tsˀe⁴ Cristo, ca²ta³tsjoa¹ nca³ña¹-le⁴ je² xi³ qui³tso²ya³-le⁴. Ca²ta³tsjoa¹ jña³-le⁴ nca³yi³je³ xi³ nta³ tjin¹.

⁷A³li² chˀa²na⁴cha⁴-jin²sa³lao⁴³ yao³-no³. Ni³na¹ a³li²coi³ taon³ ˀya³. Je² nca³yi³je³ xi³ cˀoe⁴²ntje², cho⁴ta⁴ cˀoa⁴ti⁴-sˀin² ti⁴coi³ cˀoe⁴²xco¹-ni³.

⁸Je² xi³ tˀa³tsˀe⁴ yao³-le⁴ vˀe¹ntje², cˀoa⁴-ti⁴sˀin² tsˀe⁴ yao³-le⁴ cˀoe⁴²xco¹-ni³ xi³ chi³tson³ya³. To⁴nca³ je² xi³ tˀa³-tsˀe⁴ Espíritu Santo vˀe¹ntje², cˀoa⁴-ti⁴sˀin² tsˀe⁴ Espíritu Santo cˀoe⁴²xco¹-ni³ je² xi³ tsjoa¹-le⁴ cjoa⁴vi³jna³chon³ nca³ntsjai².

⁹A³li² cho¹ve³-jin²na¹ nca³ nta³ sˀian⁴². Cˀia⁴ choa⁴-le⁴ cˀoe¹xcoa¹, tsa² tsi² coi⁴jta³-na¹.

¹⁰Tjen⁴ nca³ sˀe⁴-sa³na¹ ˀnte³, nta³ si⁴xa¹ tˀa³tsˀe⁴ nca³tsˀi³. To⁴sa³ nˀion¹ si⁴xa¹ tˀa³tsˀe⁴ je² xi³ cˀoa⁴-ti⁴ ma³cjain¹-le⁴. To⁴je² cro²-le⁴ Jesucristo xi³ Pablo vˀa³sje³je³ya³-ni³ yao³-le⁴

¹¹Ne³⁴-si³ cjoan³ yˀai³ letra xi³ ntsa⁴ ca²cji³-ni³no³.

¹²Je² nca³tsˀi³ xi³ to⁴me³-le⁴ nca³ nta³ vˀa³sje³ yao³-le⁴ nqui³xcon⁴ xi³cˀa³, je²-vi⁴ xi³ nˀion¹ vˀe¹ne²-no³ nca³ cjoa⁴circuncisión coan⁴-no³, jme¹-ni³ nca³ tsi² tsa² cjoa⁴ˀa²-si¹ni³le⁴ cjoa⁴ñˀain³ xi³ to⁴tˀa³tsˀe⁴ cro²-le⁴ Cristo.

¹³Li²coi³ si¹qui³tjo³son² cjoa⁴te¹xo³ma³, ni⁴nta³ tsa² ti⁴je²-ni³ xi³ cjoa⁴circuncisión coan³-le⁴. To⁴nca³ me³-le⁴ nca³ jon² cjoa⁴circuncisión coan⁴-no³, jme¹-ni³ nca³ cˀoa⁴-sˀin² cˀoa⁴sje³je³ya³-si¹ni³ yao³-le⁴ xi³ to⁴tˀa³tsˀe⁴ yao³-no³ nca³ jon².

¹⁴To⁴nca³ an³ cjai¹nca³ to⁴xin² ti¹jna³-na³ nca³ cˀoa³sje³je³ya³ yao³-na⁴. Ni⁴jme³-jin² xi³ cja⁴ˀai¹ xi³ vˀa³sje³je³ya³-nia³ yao³-na⁴, to⁴je² cro²-le⁴ Nai³-na¹ Jesucristo. Son³ˀnte³ ya⁴ je³tˀa³-na³ nca³ an³ ya⁴tˀa³ cro², cˀoa⁴ an³ je³tˀa³-le⁴ son³ˀnte³ ya⁴tˀa³ cro².

¹⁵Nca⁴ ti³yo³coa⁴² Cristo Jesús, ni⁴je²-jin² cjoa⁴circuncisión chji¹-le⁴, ni⁴je²-jin² xi³ tsi² cjoa⁴circuncisión, to⁴je² xi³ sˀe³nta³ cho⁴tse⁴ xi³ chji¹-le⁴.

¹⁶Ca²ta³njen³nchˀan¹jin³ ni⁴ma⁴-le⁴, cˀoa⁴ cjoa⁴ma⁴ta³con² ca²ta³sa³co¹-le⁴ nca³tsˀi³ xi³ cˀoa⁴-sˀin² tjio¹ma³ jo³ tso² en¹ je²-vi⁴, cˀoa⁴ je² cho⁴ta⁴ Israel xi³ tsˀe⁴ Ni³na¹.

¹⁷Xi³ fi²-sa³ni³, ni⁴ˀya³-jin² xi³ si⁴²jti³-na³, nca⁴ an³ yˀa³ yao³-na⁴ je² choa⁴ xi³ tˀa³tsˀe⁴ je² Nai³-na¹ Jesús.

¹⁸ˀnti¹ntsˀe³, je² cjoa⁴nta³-le⁴ Nai³-na¹ Jesucristo ca²ta³sˀe³-le⁴ ni⁴ma⁴-no³. Cˀoa⁴ ca²ta³ma³.