Read En Ngixo Filipenses 1 Bible Online

Filipenses 1 - En Ngixo bible

Filipenses 1

¹Jin⁴ ni¹⁴-jin⁴ Pablo cao⁴ Timoteo, cho⁴ˀnta³-le⁴ Jesucristo. Ti³chji³-lai²⁴jin⁴ nca³tsˀio³ xi³ cho⁴ta⁴-le⁴ Cristo ya⁴ Filipos. Ti³yo³cao⁴³ Cristo Jesús. Cˀoa⁴-ti⁴ ti³chji³-lai²⁴jin⁴ nca³ jon² xi³ ni²coi²ntao⁴³ cho⁴ta⁴-le⁴ Cristo, cao⁴ jon² xi³ ni²sin³-lao⁴³.

²Ca²ta³tsjoa¹-no³ cjoa⁴nta³, ca²ta³si¹qui³njen³nchˀan¹jin³ ni⁴ma⁴-no³ Ni³na¹ Nˀai³-na¹ cao⁴ Nai³-na¹ Jesucristo. Pablo vˀe¹tsˀoa³ xi³ tˀa³tsˀe⁴ cho⁴ta⁴-le⁴ Cristo xi³ tjio¹ ya⁴ Filipos

³Tsjoa³-le⁴ cjoa⁴nta³ Ni³na¹-na⁴ xi³ tˀa³tsˀe⁴ nca³yi³je³ xi³ fa³ˀai³tsjen³-na³ xi³ tˀa³tsaon⁴³.

⁴Nca³ntsjai² cˀia⁴ nca³ vˀe³tsˀoa²³-le⁴ Ni³na¹, tsjoa¹ vˀe³tsˀoa²ntjai²³-no³ nca³tsˀio³.

⁵Tsjoa³-le⁴ cjoa⁴nta³ Ni³na¹-na⁴ nca³ nta³ ti³mai¹cao⁴-nao¹³ xi³ tˀa³tsˀe⁴ je² en¹nta³ tˀa³tsˀe⁴ Cristo sa³ˀnta³ ni⁴čhjin³ nca³ qui³no²ˀya² ti¹tjon²³ sa³ˀnta³ ntˀai⁴-vi⁴ ntai⁴.

⁶Nta³ ˀve³-coan³ nca³ Ni³na¹ xi³ cˀoa⁴-sˀin² tsa³cˀe¹tsˀia⁴cao⁴jin³ ni⁴ma⁴-no³ je² xa¹ xi³ nta³-ve⁴, to⁴sin³ to⁴nta³ si⁴²jnco³ sa³ˀnta³ ni⁴čhjin³ nca³ cjoa⁴ˀai¹ Jesucristo.

⁷Tjin¹-na³ cjoa⁴qui²xi⁴ nca³ cˀoa⁴-sˀin² si³cja³ˀai³tsjen³ tˀa³tsaon⁴³ nca³tsˀio³, nca⁴ si³cjao¹que³-no³. Jon² nio¹³ xi³ to⁴jnco³ ti³chjoe¹cao⁴-nao¹³ cjoa⁴nta³-le⁴ Ni³na¹, nca³ ti²jna⁴ cjoa⁴ñˀain³, cˀoa⁴ nca³ nchja²ntje²³ nca³ si³qui²xi⁴ya³nta³ je² en¹nta³ xi³ tˀa³tsˀe⁴ Cristo.

⁸Ni³na¹ je² ni¹ xi³ testigo-na⁴ jo³-sˀin² nca³ cjoa⁴qui²xi⁴ nˀion¹ tjao²que⁴-no³ cao⁴ cjoa⁴tjao²cha³-le⁴ Jesucristo.

⁹Je²-vi⁴ xi³ vˀe³tsˀoa²ntjai²³-no³, nca³ je² cjoa⁴tjao²cha³-no³ coan⁴ncjin²ya³-ni³ cao⁴ cjoa⁴chji⁴ne⁴ cao⁴ cjoa⁴ˀi³sen³ta³con²,

¹⁰jme¹-ni³ nca³ jcha⁴-si¹nio³ xi³ nta³ tjin¹, cˀoa⁴ jme¹-ni³ nca³ tsje³ coan⁴-si¹nio³, nca³ ni⁴jme³-jin² je¹ sˀe⁴-no³ cˀia⁴ ni⁴čhjin³ nca³ cjoa⁴ˀai¹ Cristo.

¹¹Vˀe³tsˀoa²ntjai²³-no³ nca³ nˀion¹ nta³ cˀoa⁴sˀiaon⁴³ je² cjoa⁴qui²xi⁴ xi³ nčhoa¹-ni³ Jesucristo. Cˀoa⁴-sˀin² chˀa⁴sje³je³yao³, cˀoa⁴ nta³ chˀa⁴sjao³ Ni³na¹. Pablo qui³ to⁴jnco³ ntia⁴²-le⁴ Cristo

¹²ˀnti¹ntsˀe³², me³-na³ nca³ ca²ta³ˀyao³ nca³ to⁴tˀa³tsˀe⁴ je² cjoa⁴ xi³ cji³ma³tˀen³ nca³ an³, nqui²sa⁴-sa³ to⁴ncjin² cˀa³ qui³sca³son² je² en¹nta³ xi³ tˀa³tsˀe⁴ Cristo.

¹³Je³ve³ nca³tsˀi³ xi³ tjio¹ i⁴ cuartel, cao⁴ nca³tsˀi³ xi³cˀa³, nca³ je¹ntjai²-le⁴ Cristo ti²jna⁴-nia¹³ cjoa⁴ñˀain³.

¹⁴Ncjin² ma³-ni³ xi³ ntsˀe³² cho⁴va² nca³ ti³yo³coa⁴² Nai³-na¹. Coi³ cjoa⁴ tjio¹cjoe¹ cjoa⁴nˀion¹ta³con² nca³ cjoa⁴ñˀain³ ti²jna⁴ nca³ an³. To⁴nqui²sa⁴-sa³ ma³nˀion¹con³ nca³ nchja⁴ je² en¹-le⁴ Ni³na¹, nca³ tsin²-le⁴ cjoa⁴jcon³-jin².

¹⁵Tjin¹ cˀa³ cho⁴ta⁴ xi³ cjoa⁴qui²xi⁴ nchja⁴ya³ tˀa³tsˀe⁴ Cristo nca³ ma³xin²con³, cˀoa⁴ nca³ cjan¹cao⁴ xi³cˀa³. To⁴nca³ cˀoa⁴-ti⁴ tjin¹ cˀa³ cho⁴ta⁴ xi³ ña³qui³ cao⁴ cjoa⁴nta³-le⁴ nchja⁴ya³-ni³.

¹⁶Je² xi³cˀa³ nchja⁴ya³ en¹ tˀa³tsˀe⁴ Cristo, to⁴nca³ to⁴xo⁴cˀoa⁴ tjio¹sˀin¹ nca³ me³-le⁴ nca³ nqui²sa⁴ tse³ cjoa⁴ñˀain³ sca⁴ne²-na³.

¹⁷To⁴nca³ je² xi³cˀa³ ña³qui³ cao⁴ cjoa⁴tjao²cha³ nchja⁴ya³-ni³, nca³ ve³-ni³ nca³ coi³ xa¹ qui³sˀe³ne²-na³ nca³ coi³nchja²ntje²³ je² en¹nta³ tˀa³tsˀe⁴ Cristo.

¹⁸Jme¹ ni¹-ˀni³. To⁴jo³ tjio¹nchja⁴ya³ tˀa³tsˀe⁴ Cristo, nta³ tsa² tjin¹ cˀa³ xi³ to⁴xo⁴cˀoa⁴ tjio¹sˀin¹, cˀoa⁴ nta³ tsa² tjin¹ cˀa³ xi³ cao⁴ cjoa⁴qui²xi⁴ nchja⁴ya³-ni³. Coi³ ma³tsjoa³-na³, to⁴jo³ coan⁴tsjoa³-na³.

¹⁹ˀve³-nia¹³ nca³ je²-vi⁴ cˀoa⁴-sˀin² cjoe⁴tˀain³-na³, coi²-tjo⁴ntjai²³-nia¹³ nca³ ti³vˀe²tsˀoa³ntjai²-nao¹³. Cˀoa⁴-ti⁴ je² Espíritu Santo-le⁴ Jesucristo ti¹va³sen¹cao⁴-na³.

²⁰Cˀoa⁴-sˀin² nˀion¹ me³-na³, cˀoa⁴ ti²co³ya³-le⁴ nca³ ni⁴to⁴jme³-jin² xi³ coan⁴soa³-ni³na³. To⁴sa³ cao⁴ nca³yi³je³ cjoa⁴nˀion¹ta³con² jo³-ni³ nca³ntsjai² cˀoa⁴-ti⁴ ntˀai⁴-vi⁴, nqui²sa⁴-sa³ coi⁴tjo³je³ya³ Cristo xi³ to⁴tˀa³tsˀan⁴, nta³ tsa² coa²te⁴jna³coan³, nta³ tsa² coi³ya¹³.

²¹To⁴jnco³ ntia⁴²-le⁴ Cristo ti²fia³ nca³ ti²jna⁴coan³, cˀia⁴ tsa² mˀen³, coi⁴njen⁴-na³.

²²To⁴nca³ tsa² coa²te⁴jna³coan³, cˀia⁴² nta³ coi⁴tjo³ xa¹-na⁴. Li²coi³ ˀve³ an³-vi⁴ jña³-le⁴ xi³ cjoa³ˀa³jian³.

²³Je² nca³ jao² cjoa⁴-ve⁴ ti²jna⁴jin³ va³sen³-le⁴. Cjai¹nca³ tso²³-coan³ an³-vi⁴ nca³ coi²tjo⁴jian³ i⁴-vi⁴, nca³ coa²te⁴jna³coa⁴ Cristo, coi³ xi³ nqui²sa⁴ nˀion¹ nta³ tjin¹.

²⁴To⁴nca³ tsa² coa²te⁴jna³coan³, coi³ xi³ nqui²sa⁴ ma³chjen¹ xi³ tˀa³tsaon⁴³.

²⁵Nta³ ˀve³-coan³ je²-vi⁴. ˀve³-nia¹³ nca³ coa²te⁴jna³-sa³, nca³ to⁴jo³ coa²te⁴jna³jin³-sa³no³ nca³tsˀio³, jme¹-ni³ nca³ sˀe⁴-sa³ni³no³ cjoa⁴tsjoa³, cˀoa⁴ jme¹-ni³ nca³ coa⁴nquin¹ti¹tjon² cao⁴ nqui²sao⁴³ jo³-sˀin² ma³cjain¹-no³.

²⁶Nqui²ntia³ cjoi¹con³-no³, jme¹-ni³ nca³ nqui²sa⁴ nˀion¹ coi⁴nˀo⁴sje³je³yao³ Cristo to⁴tˀa³tsˀan⁴.

²⁷Nta³ ta³nquin¹cao⁴³ yao³-no³, jo³-sˀin² va³quin²-le⁴ je² en¹nta³ xi³ tˀa³tsˀe⁴ Cristo, jme¹-ni³ nca³ tsa² coan⁴ cjoi¹con³-no³, cˀoa⁴ tsa² tsi² tsa² cjoia¹³, cjoi³nčhˀoe³-nia¹³ xi³ tˀa³tsaon⁴³ nca³ nta³ coi⁴yo³ nca³ to⁴jnco³ cjoa⁴fa³ˀai³tsjen³ sˀe⁴-no³, cˀoa⁴ nca³ cˀoai⁴-lao⁴³ nca³nˀion¹ xi²nquio⁴³ xi³ tˀa³tsˀe⁴ en¹nta³ xi³ ma³cjain¹-na¹.

²⁸Ni⁴to⁴jme³-jin² xi³ vi³jcon³-lao⁴³ xi³ chˀao³ ve³con³-no³. Coi³ xi³ ña³qui³ cˀoa⁴-sˀin² va³co¹son²tsen³-le⁴ nca³ coai⁴cha³, to⁴nca³ jon² coi²tjo⁴ntjai²-nio¹³. Je² Ni³na¹ xi³ cˀoa⁴-sˀin² va³co¹son²tsen³.

²⁹Jon² tsa³cˀai²-no³ xi³ to⁴tˀa³tsˀe⁴ Cristo, a³li² tsa² to⁴coi³ cjoan² nca³ ma³cjain¹-no³, to⁴nca³ cˀoa⁴-ti⁴ coan⁴-no³ je¹ntjai²-le⁴ xi³ tsˀe⁴.

³⁰Cˀoa⁴-ti⁴sˀin² jon² ti³yo³jion³ cjoa⁴si³, jo³-sˀin² nca³ tsa³ˀyao³ nca³ tsa³ca²te⁴jna³jian³. Cˀoa⁴-ti⁴ ntˀai⁴-vi⁴ no²ˀya²-nio³ jme³ cjoa⁴ xi³ ti²jna⁴jian³.