Read En Ngixo 1 Tesalonicenses 4 Bible Online

1 Tesalonicenses 4 - En Ngixo bible

1 Tesalonicenses 4

¹Je² xi³ fe³tˀa³-sa³ni³, ntsˀe³², nca³ vˀe²tsˀoa³-lai²⁴jin⁴ vˀe²ne²-lai²⁴jin⁴ nca³ ti³yo³coa⁴² Nai³-na¹ Jesús. Jo³-sˀin² nca³ tsa³cˀin²ya³-lai²⁴jin⁴, jo³-sˀin² ma³chjen¹ nca³ coi⁴mao³ jo³-sˀin² sa³sen¹-le⁴ Ni³na¹, cˀoa⁴-sˀin² ca²ta³ma³ncjin²yao³.

²Je³ˀyao³ jme³ cjoa⁴te¹xo³ma³ tsa³cˀai²-lai²⁴jin⁴ xi³ tˀa³-tsˀe⁴ Nai³-na¹ Jesús.

³Cˀoa⁴-sˀin² me³-le⁴ Ni³na¹ nca³ coan⁴tsjao³, nca³ chja⁴ˀa²xin²-lao⁴³ yao³-no³ cjoa⁴cha³jnqui³.

⁴Jnco¹jnco¹ nca³ jon² tsje³ ti⁴yo³cao⁴³ ya¹nchjin¹-no³, jcha⁴xcon¹³.

⁵A³li² to⁴coi³-jin² cjoa⁴chi⁴nca⁴ xi³ nˀian²-ni³lao⁴³, jo³-ni³ tsa² cho⁴ta⁴ xi³ li² judío-jin² xi³ tsi²coi³ ve³ Ni³na¹.

⁶Ni⁴ˀya³-jin² xi³ vˀa³ntjai²cjoa⁴, xi³ vˀa³na⁴cha⁴-le⁴ ntsˀe⁴ je² cjoa⁴-vi⁴, nca⁴ je² Nai³-na¹ xi³ si⁴²jnta³-ni³ nca³yi³je³ cjoa⁴ je²-vi⁴, jo³-sˀin² nca³ je³cˀoa⁴tsa³cˀin²-lai²⁴jin⁴ tsa³cˀe²ne²-lai²⁴jin⁴.

⁷Ni³na¹ li²coi³ qui³nchja⁴-na¹ jme¹-ni³ nca³ jnti¹ coan⁴-si¹nia³², to⁴nca³ ña³qui³ tsje³ coi⁴yoa³².

⁸Je² xi³ taon³ ve³, li²coi³ taon³ ve³ cho⁴ta⁴son³ˀnte³, to⁴je² Ni³na¹ xi³ taon³ ve³, je² xi³ cˀoa⁴-ti⁴ qui³tsjoa³-na¹ Espíritu Santo-le⁴.

⁹Li²coi³ ma³chjen¹ nca³ squi³-no³ xi³ tˀa³tsˀe⁴ cjoa⁴tjao²cha³ jo³-sˀin² nca³ ma³tsjoa³chao³ xi²nquio⁴³. Ti⁴jon²-nio³ je³cˀoa⁴-sˀin² qui³cho²tˀa³yao³ tsˀe⁴ Ni³na¹ jo³-sˀin² nca³ ma³tsjoa³chao³ xi²nquio⁴³.

¹⁰Cˀoa⁴-ti⁴sˀin² tsjoa³chao³ ntsˀe³² jo³ tjin¹ ma³-ni³ xi³ tjio¹ ya⁴ nca³qui³jnta² Macedonia. To⁴nca³ ti³vˀe²tsˀoa³-lai²⁴jin⁴, ntsˀe³², nca³ nqui²sa⁴-sa³ tsjoa³chao³ xi²nquio⁴³.

¹¹Ti⁴xi¹ti¹ya³-lao⁴³ yao³-no³ nca³ nchˀan¹ coi⁴yo³, cˀoa⁴ ti⁴sin³-lao⁴³ cjoa⁴ma⁴-no³ xi³ ti⁴tsaon⁴³-nio³. Ti⁴xao¹³ cao⁴ ntsao⁴³ jo³-sˀin² nca³ tsa³cˀe²ne²-lai²⁴jin⁴,

¹²jme¹-ni³ nca³ scoe⁴xˀin⁴-si¹ni³no³ cho⁴ta⁴ xi³ tsi² ma³cjain¹-le⁴, cˀoa⁴ jme¹-ni³ nca³ tsi² tsa² jme³ xi³ cha⁴-no³. Jo³-sˀin² cjoa⁴ˀai¹ Nai³-na¹

¹³Ntsˀe³², cˀoa⁴-ti⁴ li²coi³ me³-na³jin⁴ nca³ tsi² sˀe⁴jin³-no³ xi³ tˀa³tsˀe⁴ xi³ cjio³fe², jme¹-ni³ nca³ tsi² tsa² coan⁴va³-si¹ni³no³, jo³-ni³ tsa² xi³cˀa³ xi³ tsi² tsa² jme³ co³ya³-le⁴.

¹⁴Cˀia⁴ tsa² ma³cjain¹-na¹ nca³ Jesús cˀen³, cˀoa⁴ ja³ˀa²ya³-ni³le⁴, cˀoa⁴-ti⁴sˀin² ma³cjain¹-na¹ nca³ Ni³na¹ si⁴²cji³nčhoa¹cao⁴ Jesús je² xi³ cjio³fe² nca³ tjio¹cao⁴ Jesús.

¹⁵Coi³ cjoa⁴ cˀoa⁴ˀmi²ya³-lai²⁴jin⁴ je²-vi⁴ xi³ qui³tso² je² Nai³-na¹: Ña¹ xi³ ti³yo³choan³² xi³ to⁴jo³ ti³yoa³² sa³ˀnta³ cjoa⁴ˀai¹ Nai³-na¹, a³li² ña¹ coa⁴nquin¹ti¹tjon²-le⁴² xi³ je³-tsa³cja³yo³fe².

¹⁶Je² soa³ Nai³-na¹ cjoa⁴ˀai¹jen³-ni³ ncˀa³jmi³ nca³ squi¹ˀntia¹xa¹, cao⁴ jta⁴-le⁴ a²ncje⁴ nca³jco⁴, cao⁴ čhjao³-le⁴ Ni³na¹. Cˀoa⁴ je² xi³ cˀen³ xi³ tsˀe⁴ Cristo cjoa⁴ˀa¹ya³ti¹tjon²-le⁴.

¹⁷Cˀia⁴ ña¹ xi³ ti³yo³choan³², xi³ to⁴jo³ ti³yoa³², cˀoa⁴-sˀin² coan⁴jncoa³² tjoe¹mi³ncˀa³jian³² yo³jvi³ cao⁴ je², nca³ coa⁴nquin¹ chˀa² Nai³-na¹ jin³sen¹. Cˀoa⁴-sˀin² coi⁴yo³coa⁴² nca³ntsjai² Nai³-na¹.

¹⁸Cˀoa⁴-sˀin² nca³ˀi⁴ nca³jan¹ ti⁴je³ta³con²³ xi²nquio⁴³ cao⁴ je² en¹-vi⁴.