Read En Ngixo 1 Timoteo 4 Bible Online

1 Timoteo 4 - En Ngixo bible

1 Timoteo 4

¹To⁴nca³ je² Espíritu Santo nchja⁴tsen³-ni¹ nca³ je² ni⁴čhjin³ xi³ nčhoa¹, tjin¹ cˀa³ xi³ to⁴xin² ntia⁴² coai⁴-le⁴ en¹ xi³ ma³cjain¹-na¹, cjoi⁴nčhˀoe¹-le⁴ espíritu xi³ vˀa³na⁴cha⁴-le⁴, cao⁴ cjoa⁴fa³ˀai³tsjen³-le⁴ nai⁴² xi³ nta³jin³.

²Jao² coai⁴-ni³ nca³ coi⁴nchja⁴ en¹nti³so³, nca³ xi¹jin³ cjoa⁴fa³ˀai³tsjen³-le⁴, jo³-ni³ xi³ qui³ti²jma²jon³.

³Li²coi³ tsjoa¹ˀnte³ nca³ coi⁴xan³ cho⁴ta⁴. Cˀoa⁴-sˀin² cˀoe⁴²ne² nca³ tsi² tsa² coan⁴ chi⁴ne⁴ tso³jmi² xi³ Ni³na¹ tsa³cˀe¹nta³. Ni³na¹ tsa³cˀe¹nta³ tso³jmi² jme¹-ni³ nca³ scoe¹-si¹ni³ je² xi³ nta³ fi²tˀa³-le⁴ Ni³na¹ cao⁴ je² xi³ ve³ xi³ cjoa⁴qui²xi⁴, cˀoa⁴ tsjoa¹ cjoa⁴nta³ nca³ scoe¹.

⁴Je² nca³yi³je³ xi³ Ni³na¹ tsa³cˀe¹nta³ nta³-ni¹. Ni⁴to⁴jme³-jin² xi³ chja⁴ˀa²xian². Coan⁴² chi⁴ne⁴² tsa² cˀoe⁴² cjoa⁴nta³.

⁵Nca⁴ je² en¹-le⁴ Ni³na¹ cao⁴ xi³ vˀe²tsˀoa² si¹tsje³-ni³ tso³jmi²-ve⁴. Cjoa⁴ xi³ ma³chjen¹-le⁴ jnco³ xi³ nta³ si¹xa¹-le⁴ Cristo

⁶Tsa² je² cjoa⁴-vi⁴ cˀoa⁴cˀoin¹-lai⁴ ntsˀe³², cjai¹nca³ nta³ si⁴xa¹-lai⁴ Jesucristo. Coan³jcha¹coai⁴ en¹ xi³ ma³cjain¹-na¹ cao⁴ xi³ nta³ cjoa⁴fa³ˀai³tsjen³ xi³ ji³cho²tjen⁴nqui³-lai⁴.

⁷To⁴nca³ je² xi³ to⁴xquia⁴ en¹ xi³ vˀa³sje³nqui³ cjoa⁴-le⁴ Ni³na¹, xi³ tsi²jme³ chji¹-le⁴, ti⁴sen⁴xin²-lai⁴. Chˀa⁴sjai³ nca³nˀion¹-li⁴ xi³ tˀa³tsˀe⁴ nca³ jcha⁴xcoin¹³ Ni³na¹.

⁸Je² nca³nˀion¹ xi³ vˀa³sje³ yao³-na¹ to⁴choa³ chji¹-le⁴, to⁴nca³ cˀia⁴ nca³ ˀya³xcoan¹ Ni³na¹ chji¹-le⁴ ni¹ nca³yi³je³. A³li² to⁴cˀoa⁴²cji³ chji¹-le⁴ tˀa³tsˀe⁴ je² cjoa⁴vi³jna³chon³ xi³ qui³ni²sˀe³nqui³-na¹ ntˀai⁴-vi⁴ cao⁴ xi³ sˀa⁴ nčhoa¹.

⁹Je² en¹-vi⁴ xi³ ña³qui³ cˀoa⁴tjin¹, xi³ va³quin²-le⁴ nca³ chjo¹ve¹.

¹⁰Coi³ je²-vi⁴ ni²xa¹ntje². Cˀoa⁴-ti⁴ chja⁴ˀa²-le⁴² cjoa⁴ñˀain³ xi³ nchja⁴ˀaon³-na¹, nca⁴ cˀoa⁴-sˀin² nˀion¹ cho³ya²-le⁴² Ni³na¹ xi³ ti¹jna³con³, xi³ ma³-le⁴ vˀa³sje³ntjai² nca³tsˀi³ cho⁴ta⁴, va³sen²tsˀia³-cjoan²ni³ xi³ ma³cjain¹-le⁴. Timoteo va¹ntia⁴²-le⁴ cho⁴ta⁴-le⁴ Cristo

¹¹Tˀe²nai²³, cˀoa⁴ ta⁴co²yai³ coi³ cjoa⁴-vi⁴.

¹²Ni⁴to⁴ˀya³-jin² xi³ taon³ ca²ta³ve³-li², nta³ tsa² xti³-sai³, to⁴nca³ cˀoa⁴-sˀin² tja³ntia⁴²-lai⁴ je² cho⁴ta⁴ xi³ ma³cjain¹-le⁴ cao⁴ je² en¹-li⁴, cao⁴ jo³-sˀin² ˀmi³coai⁴ yao³-li⁴, cao⁴ jo³-sˀin² tsjoa³chai³, cao⁴ espíritu-li⁴, cao⁴ jo³-sˀin² nca³ ma³cjain¹-li², cao⁴ jo³-sˀin² nca³ tsjai³.

¹³Cˀia⁴ ˀnta³ nca³ cjoi⁴choa³, cˀoa⁴-sˀin² tˀe²xquiai⁴, tˀe²nai²³, ta⁴co²yai³.

¹⁴A³li² njion²-ta³con²jin²³ je² cjoa⁴tjao² xi³ ti¹jna³-li², xi³ tsa³cˀai²-li², jo³-sˀin² tsa³cja³ya³ta³con²-li² cˀia⁴ nca³ cho⁴ta⁴jchi¹nca³-le⁴ cho⁴ta⁴-le⁴ Cristo tsa³ca¹son²-li² ntsja³.

¹⁵Cho¹tˀa³ya³coai⁴ je² cjoa⁴-vi⁴, to⁴coi³ xa¹ tˀiain⁴, jme¹-ni³ nca³ scoe⁴-si¹ni³ nca³tsˀi³ jo³-sˀin² nca³ ˀmi³ti¹tjoin²³.

¹⁶Ti⁴coi²ntai⁴ yao³-li⁴, cˀoa⁴ ti⁴coi²ntai⁴ je² xi³ ti³va³co²yai³. Ña³qui³ cˀoa⁴-sˀin² nta³ tˀin³cao⁴-sai³. Cˀia⁴ nca³ cˀoa⁴nˀiain²³ nca³yi³je³ je²-vi⁴, cˀoa⁴sˀin² coi²tjo⁴ntjai²³ nca³ ti⁴ji³-ni³, cˀoa⁴-ti⁴ je² xi³ nčhˀoe¹-li².