Read En Ngixo Hebreos 13 Bible Online

Hebreos 13 - En Ngixo bible

Hebreos 13

¹Ca²ta³ma³tsjoa³cha³ntsjao²³ ntsˀao³.

²A³li² ni²cha³jin³-jion²³ nca³ cˀoai⁴ˀnte³-lao⁴³ je² xi³ fi³cho¹con³-no³. Cˀoa⁴-sˀin² tjin¹ cˀa³ xi³ cˀoa⁴-sˀin² qui³tsjoa³ˀnte³-le⁴ a²ncje⁴, nta³ tsa² tsi² tsa³ve³.

³Ti⁴cja³ˀai³tsjen³jion³ je² xi³ cjoa⁴ñˀain³ tjio¹, jo³-ni³ tsa² cˀoa⁴-ti⁴ to⁴jnco³ ti³yo³ cjoa³ñˀain³ cao⁴ je², cˀoa⁴ ti⁴cja³ˀai³tsjen³jion³ je² xi³ chˀao³ ˀya³ta³con² jo³-ni³ nca³ cˀoa⁴-ti⁴ jon² ti³yo³jin³-sa³lao⁴³ yao³-no³.

⁴Nca³tsˀi³ ca²ta³ve³xcon¹ je² cjoa⁴vi³xan³, cˀoa⁴ je² cjoa⁴-le⁴ a³li² chˀao³-jin² ma³, to⁴nca³ je² xi³ si¹cha³jnqui³, cˀoa⁴ je² xi³ si¹cha³jnqui³tˀa³-le⁴ chjon⁴²-le⁴ a³xo⁴ xˀin⁴-le⁴, Ni³na¹ tsjoa¹-le⁴ cjoa⁴ñˀain³.

⁵Cˀoa⁴-sˀin² ti⁴yo³ a³li² cjoa⁴nchi⁴na¹-jin² ni²me³-ta³con²³. Tˀe²jnco³-ta³con²³ cao⁴ xi³ je³tjin¹-no³, nca⁴ Ni³na¹ cˀoa⁴qui³tso²: Li²coi³ xin² coa²te⁴jna³-le²³, ni⁴tsjion³con³-jin²le²³.

⁶Cˀoa⁴-sˀin² nca³ cˀoa⁴coi⁴xon¹-nia¹ nca³ nˀion¹-ta³coan³²: Je² Nai³-na¹ xi³ va³sen¹cao⁴-na³, li²coi³ tsa³cjon³-nia¹³. Jme¹ xi³ coan⁴ si⁴²cao⁴-na³ cho⁴ta⁴.

⁷Ti⁴cja³ˀai³tsjen³jin³-nio³ je² xi³ va¹ntia⁴²-no³, je² xi³ qui³nchja⁴ya³-no³ je² en¹-le⁴ Ni³na¹. Chjen¹nqui³-lao⁴³ jo³-sˀin² ma³cjain¹-le⁴, nta³ ti⁴cja³ˀai³tsjen³jion³ jme³ xi³ qui³sa³co³-le⁴ jo³-sˀin² qui³cao⁴ yao³-le⁴.

⁸Jesucristo to⁴nco¹son²-le⁴ nco²jña⁴, cˀoa⁴ ntˀai⁴, cˀoa⁴ nca³ntsjai² ni⁴čhjin³.

⁹A³li² vˀai²ˀnte³-jin²lao⁴³ cjoa⁴fa³ˀai³tsjen³ xi³ ncjin² ma³-ni³, xi³ cja⁴ˀai¹nca¹ nca³ xin² fi²cao⁴-no³. Nta³ tjin¹ cjoa⁴ nca³ cao⁴ cjoa⁴nta³ vˀai²nca³nˀion¹-le⁴ ni⁴ma⁴-na¹. Li²coi³ vˀai²nca³nˀion¹-le⁴ ni⁴ma⁴-na¹ cao⁴ tso³jmi² xi³ chi³ne³, xi³ tsi² tsa² jme³ chji¹-le⁴ je² xi³ to⁴coi³ tjio¹-ni³.

¹⁰Tjin¹-na¹ jnco³ son²xta². Je² xi³ si¹xa¹ ya⁴³ ntˀia³na³jño³ li²coi³ tjin¹-le⁴ ˀnte³ nca³ squi⁴ne⁴ je² xi³ tsˀe⁴ son²xta²-ve⁴.

¹¹Je² njin¹-le⁴ cho⁴-ve⁴ xi³ vˀai²tˀa³ tˀa³tsˀe⁴ je¹ fi²cao⁴sˀen³ ya⁴ ˀnte³tsje³ xi³ to⁴tˀa³tsˀe⁴ na⁴ˀmi³ti¹tjon², to⁴nca³ je² yao³-le⁴ cho⁴-ve⁴ ti² tˀa³xin²-le⁴ ya⁴ ˀnte³-ve⁴.

¹²To⁴coi³ cˀoa⁴-ti⁴ Jesús tsa³cja³ˀa¹ cjoa⁴ñˀain³ nti³tsin³ xo⁴ntjoa⁴-le⁴ na⁴xi⁴na³nta¹, jme¹-ni³ nca³ qui³si³tsje³-si¹ni³ je² cho⁴ta⁴na⁴xi⁴na³nta¹ cao⁴ xi³ ti⁴tsˀe⁴-ni³ njin¹.

¹³Cjoin³chon¹-le⁴² tso²cˀoa⁴ nca³ je² ya⁴ ˀnte³tˀa³xin²-ve⁴, cˀoa⁴ chˀa⁴² cjoa⁴ˀaon³ta³con² xi³ tˀa³tsˀe⁴.

¹⁴Nca⁴ tsi² tsa² i⁴ ti¹jna³-na¹ na⁴xi⁴na³nta¹ xi³ ti¹jna³ntsjai², to⁴nca³ fa³sjai³-nia¹ je² xi³ cjoa⁴ˀai¹.

¹⁵Xi³ to⁴tˀa³tsˀe⁴ Jesucristo cˀoai⁴tˀa³ntsjai²-le⁴² Ni³na¹ coi³ cjoa⁴tjao² xi³ jo³-ni³ njin¹ xi³ sˀe³tjen⁴, nca³ nta³ chˀa³sje³-nia¹ Ni³na¹, xi³ tso²-ni³, en¹-le⁴ ntso⁴ˀva³² xi³ si¹qui²xi⁴ya³ tˀa³tsˀe⁴.

¹⁶A³li² ni²cha³jin³-jion²³ nca³ nta³ sˀiaon⁴³, cˀoa⁴ nca³ coi⁴ncha³cao⁴³ xi³cˀa³, nca⁴ coi³ cjoa⁴tjao² xi³ sa³sen¹-le⁴ Ni³na¹.

¹⁷Ti⁴tjo³son²-lao⁴³ je² xi³ va¹ntia⁴²-no³, cˀoa⁴ na³nqui³ ti⁴yo³-lao⁴³ nca³ je², nca⁴ ti⁴je²-ni³ va³tio²con²tˀain³ xi³ tˀa³-tsˀe⁴ ni⁴ma⁴-no³, nca⁴ tjin¹ne²-le⁴ nca³ tsjoa¹ coi²nta⁴. Ti⁴tjo³son²-lao⁴³ jme¹-ni³ nca³ cˀoa⁴sˀin⁴²-si¹ni³ cao⁴ cjoa⁴tsjoa³, nca³ tsi² tsa² cao⁴ cjoa⁴fao¹, nca⁴ je²-vi⁴ li²coi³ jo³-sˀin² coan⁴chjen¹-no³.

¹⁸Tˀe²tsˀoa³ntjai²-na³jin⁴, nca⁴ nta³ ˀya³-ta³coin²jin⁴ nca³ nta³ cjoa⁴fa³ˀai³tsjen³ tjin¹-na³jin⁴, nca⁴ me³-na³jin⁴ nca³ nta³ coa⁴nquin¹coai⁴-jin⁴ yao³-na⁴jin⁴ nca³yi³je³ cjoa⁴.

¹⁹Cˀoa⁴ nqui²sa⁴ vˀe³tsˀoa²³-no³ nca³ cˀoa⁴-sˀin² sˀiaon⁴³, jme¹-ni³ nca³ an³ nqui²sa⁴ nti⁴ton⁴ coa²te⁴jna³cao⁴ nqui²jnco³cˀa²-si¹ni³no³. Cjoa⁴ni²ti²ˀnta³ xi³ fe³tˀa³

²⁰Je² Ni³na¹ xi³ tsjoa¹ cjoa⁴ xi³ nchˀan¹ tjin¹, xi³ tsa³cˀa³sje³jin³-ni³le⁴ cˀen³ Nai³-na¹ Jesucristo, xi³ to⁴tˀa³tsˀe⁴ njin¹ xi³ tsˀe⁴ cjoa⁴ xi³ qui³sˀe³nˀion¹ nca³ntsjai². Cjai¹nca³ nta³ co³ˀnta³ va³rre² Jesucristo xi³ nˀion¹ je³ya³.

²¹Ni³na¹ ca²ta³si¹jnco³cao⁴-no³ nca³yi³je³ xi³ nta³, jme¹-ni³ nca³ cˀoa⁴sˀian⁴-si¹nio³ jo³-sˀin² nca³ me³-le⁴ nca³ je², nca³ si¹xa¹jin³-no³ je² cjoa⁴ xi³ nqui²sa⁴ nta³ sa³sen¹-le⁴ nqui³xcon⁴ nca³ je², xi³ to⁴tˀa³tsˀe⁴ Jesucristo. Je²-vi⁴ xi³ ca²ta³sˀe³-le⁴ cjoa⁴je³ya³ xi³ nca³ntsjai² nca³ntsjai². Cˀoa⁴ ca²ta³ma³.

²²To⁴nca³ vˀe³tsˀoa²³-no³ ntsˀe³, nca³ ca²ta³jcho¹cjoa⁴cao⁴-no³ je² en¹ xi³ vˀe³ne²³-no³, nca⁴ to⁴choa³ qui³squi³-no³.

²³Ca²ta³ˀyao³ nca³ je² ntsˀe³ Timoteo coan³xan⁴-ni³le⁴ cjoa⁴ñˀain³. Tsa² je² nti⁴ton⁴ cjoa⁴ˀai¹, an³ cjoi¹co³tsen³-no³ cao⁴ je².

²⁴Ti⁴ti²ˀntao³ nca³tsˀi³ xi³ va¹ntia⁴²-no³, cˀoa⁴ nca³tsˀi³ cho⁴ta⁴-le⁴ Cristo. Je² xi³ tsˀe⁴ Italia si¹ti²ˀnta³-no³.

²⁵Cjoa⁴nta³ ca²ta³sˀe³-no³ nca³tsˀio³ nca³ jon². Cˀoa⁴ ca²ta³ma³.