Read En Ngixo 1 Juan 5 Bible Online

1 Juan 5 - En Ngixo bible

1 Juan 5

¹Nca³tsˀi³ xi³ ma³cjain¹-le⁴ nca³ Jesús je² Cristo, je²-vi⁴ qui³tsin³ tˀa³tsˀe⁴ Ni³na¹. To⁴ˀya³-ni³ve⁴ xi³ tjao²que³ xi³jcha¹-le⁴ cˀoa⁴-ti⁴ tjao²que³ nca³tsˀi³ xi³ qui³tsin³ tˀa³tsˀe⁴.

²Cˀoi⁴-sˀin² ˀya³-nia¹ nca³ tjao²cha³² ˀnti¹-le⁴ Ni³na¹, cˀia⁴ nca³ tjao²cha³² Ni³na¹, cˀoa⁴ ni²cji³tjo³soan² cjoa⁴te¹xo³ma³-le⁴.

³Cˀoa⁴-sˀin² tjao²cha³² Ni³na¹, nca³ ni²cji³tjo³soan² cjoa⁴te¹xo³ma³-le⁴. Je² cjoa⁴te¹xo³ma³-le⁴ a³li² ñˀain³-jin² tjin¹.

⁴Je² nca³tsˀi³ xi³ qui³tsin³ tˀa³tsˀe⁴ Ni³na¹, si¹qui³njen³-le⁴ son³ˀnte³-vi⁴. Coi³ cjoa⁴ nca³ ni²qui³njen³-le⁴² son³ˀnte³-vi⁴, nca⁴ ma³cjain¹-na¹.

⁵ˀya¹-ni³ xi³ si¹qui³njen³ son³ˀnte³-vi⁴. A³ tsi² tsa² je² xi³ ma³cjain¹-le⁴ nca³ Jesús je² ˀnti¹-le⁴ Ni³na¹. Je² Espíritu Santo xi³ si¹qui²xi⁴ya³ en¹

⁶Je² Jesucristo ja³ˀai³-ni³ cao⁴ na³nta¹ cao⁴ njin¹. A³li² tsa² to⁴cao⁴ na³nta¹-jin² ja³ˀai³-ni³, to⁴nca³ cao⁴ na³nta¹ cao⁴ njin¹. Cˀoa⁴ je² Espíritu Santo xi³ si¹qui²xi⁴ya³ en¹, nca⁴ je² Espíritu Santo je² xi³ cjoa⁴qui²xi⁴.

⁷Jan² ma³-ni³ xi³ si¹qui²xi⁴ya³ en¹ ya⁴ ncˀa³jmi³, je² Nˀai³-na¹, je² en¹ xi³ ti⁴je²-ni³ Cristo, cao⁴ je² Espíritu Santo. To⁴ña³qui³ jnco³ ma³ nca³ jan²-ve⁴.

⁸Cˀoa⁴-ti⁴ jan² ma³-ni³ xi³ si¹qui²xi⁴ya³ en¹ i⁴ son³ˀnte³-vi⁴, je² Espíritu, je² na³nta¹, cao⁴ njin¹. Je² nca³ jan²-vi⁴ ma³nco¹son² en¹-le⁴.

⁹Tsa² cˀoa⁴-sˀin² chjoe¹ en¹ xi³ si¹qui²xi⁴ya³ cho⁴ta⁴son³ˀnte³-vi⁴, je² en¹ xi³ si¹qui²xi⁴ya³ Ni³na¹ nqui²sa⁴ nta³ tjin¹. Je²-vi⁴ xi³ en¹-le⁴ Ni³na¹ xi³ qui³si³qui²xi⁴ya³ xi³ tˀa³tsˀe⁴ ˀnti¹-le⁴.

¹⁰Je² xi³ ma³cjain¹-le⁴ tˀa³tsˀe⁴ ˀnti¹-le⁴ Ni³na¹, je² cjoa⁴ xi³ qui³ni²qui²xi⁴ya³ ti¹jna³jin³ ni⁴ma⁴-le⁴. Je² xi³ tsi² ma³cjain¹-le⁴ tˀa³tsˀe⁴ Ni³na¹, tsa³cˀa³sje³ nti³so³ Ni³na¹, nca³ tsi²coi³ coan³cjain¹-le⁴ je² en¹ xi³ Ni³na¹ qui³si³qui²xi⁴ya³ xi³ tˀa³tsˀe⁴ ˀnti¹-le⁴.

¹¹Je²-vi⁴ xi³ en¹-le⁴: Nca³ Ni³na¹ qui³tsjoa³-na¹ je² cjoa⁴vi³jna³chon³ nca³ntsjai²-ve⁴, cˀoa⁴ je² cjoa⁴vi³jna³chon³-vi⁴ ti¹jna³jin³ je² ˀnti¹-le⁴.

¹²Je² xi³ tjin¹-le⁴ je² ˀnti¹-le⁴, cˀoa⁴-ti⁴ tjin¹-le⁴ je² cjoa⁴vi³jna³chon³-vi⁴. Je² xi³ tsin²-le⁴ ˀnti¹-le⁴ Ni³na¹, tsin²-le⁴ je² cjoa⁴vi³jna³chon³-vi⁴. Jo³-sˀin² nca³ ˀya³² jña³-le⁴ xi³ cjoa⁴vi³jna³chon³ nca³ntsjai²

¹³Je² nca³yi³je³ cjoa⁴-vi⁴ qui³squi³-no³ nca³ jon² xi³ ma³cjain¹-no³ xi³ tˀa³tsˀe⁴ jan³ˀain¹-le⁴ ˀnti¹-le⁴ Ni³na¹, jme¹-ni³ nca³ jcha⁴-si¹nio³ nca³ tjin¹-no³ je² cjoa⁴vi³jna³chon³ nca³ntsjai²-vi⁴, cˀoa⁴ jme¹-ni³ nca³ coan⁴cjain¹ntsjai²-si¹ni³no³ tˀa³tsˀe⁴ jan³ˀain¹-le⁴ ˀnti¹-le⁴ Ni³na¹.

¹⁴Cˀoa⁴-sˀin² nˀion¹tˀa³ta³coan³² ntˀai⁴ nqui³xcon⁴ nca³ je². Tsa² ni²je¹ to⁴jme³-ni³ cjoa⁴ jo³-sˀin² me³-le⁴ nca³ je², je² nčhˀoe¹-na¹.

¹⁵Cˀoa⁴ tsa² ˀya³² nca³ je² nčhˀoe¹-na¹, to⁴jme³-ni³ cjoa⁴ xi³ ni²je¹-le⁴², ˀya³-nia¹ nca³ tjin¹-na¹ je² cjoa⁴ xi³ qui³ni²je¹-le⁴².

¹⁶Tsa² jnco³ xi³ scoe⁴ nca³ ntsˀe⁴ ti¹va³jnqui³ je¹, a³li² tsa² je² je¹ xi³ va³quin²-le⁴ cjoa⁴vi³ya³, si⁴²je¹ tˀa³tsˀe⁴ ntsˀe⁴, cˀoa⁴ cˀoai⁴-le⁴ cjoa⁴vi³jna³chon³, tsa² je² je¹ xi³ ma³jnqui³ tsi² va³quin²-le⁴ cjoa⁴vi³ya³. Tjin¹ je¹ xi³ va³quin²-le⁴ cjoa⁴vi³ya³. A³li²coi³ cˀoa⁴xian³ nca³ cˀoe⁴²tsˀoa³ ja⁴tˀa³tsˀe⁴ je² je¹-vi⁴.

¹⁷Nca³yi³je³ xi³ li²coi³ nta³ tjin¹, je¹ ni¹, to⁴nca³ tjin¹ je¹ xi³ tsi² va³quin²-le⁴ cjoa⁴vi³ya³.

¹⁸ˀya³-nia¹ nca³ nca³tsˀi³ xi³ qui³tsin³ tˀa³tsˀe⁴ Ni³na¹, a³li²coi³ je¹ ma³jnqui³. To⁴nca³ je² xi³ qui³tsin³ tˀa³tsˀe⁴ Ni³na¹, je² Jesucristo si¹coi²nta⁴ nca³ je², cˀoa⁴ je² nai⁴² li²coi³ tsoa⁴.

¹⁹ˀya³-nia¹ nca³ ña¹ tsˀe⁴ Ni³na¹ nia¹, cˀoa⁴ i⁴ nca³qui³jnta² son³ˀnte³-vi⁴ ti¹jna³cao⁴ nai⁴².

²⁰ˀya³-nia¹ nca³ je² ˀnti¹-le⁴ Ni³na¹ ja³ˀai³-ni¹. Qui³si³cho⁴ya³-na¹ jme¹-ni³ nca³ jcha⁴-si¹nia³² je² xi³ ña³qui³ cjoa⁴qui²xi⁴. Ti³yo³coa⁴² nca³ je² xi³ ña³qui³ cjoa⁴qui²xi⁴, xi³ Jesucristo je² ˀnti¹-le⁴. Je²-vi⁴ xi³ Ni³na¹ cjoa⁴qui²xi⁴, cˀoa⁴ je²-vi⁴ xi³ cjoa⁴vi³jna³chon³ nca³ntsjai²-ve⁴.

²¹ˀnti¹xti³-na⁴, chja⁴ˀa²xin²-lao⁴³ yao³-no³ nca³yi³je³ xi³ xco¹son² cjoan³. Cˀoa⁴ ca²ta³ma³.