Read En Ngixo Apocalipsis 17 Bible Online

Apocalipsis 17 - En Ngixo bible

Apocalipsis 17

¹Ja³ˀai³ jnco³ xi³ ña³to³ ma³-ni³ a²ncje⁴ xi³ yˀa³ ña³to³ cho⁴tsin¹, qui³nchja⁴cao⁴-na³: Nčhoai¹³ i⁴-vi⁴, cˀoa⁴ coa³co³-le²³ je² cjoa⁴ñˀain³-le⁴ je² chjon⁴²cha³jnqui³ xi³ nˀion¹ sca¹-le⁴, xi³ ti¹jna³son² xi³ nˀion¹ ncjin² cˀa³ na³nta¹.

²Je² chjon⁴²-ve⁴ xi³ cho⁴ta⁴ti¹tjon² son³ˀnte³ qui³si³cha³jnqui³cao⁴, cˀoa⁴ je² xi³ tjio¹ son³ˀnte³ cji³ma³chˀi⁴-ni³ cao⁴ je² vino xi³ tsˀe⁴ cjoa⁴cha³jnqui³-le⁴.

³Cˀoa⁴ qui³cao⁴-na³ ya⁴ ˀnte³ tˀa³xin²tˀa³ nca³ ti¹jna³cao⁴-na³ je² Espíritu Santo. Tsa³ˀve³jncoa³ chjon⁴² xi³ ti¹jna³son² jnco³ cho⁴ xi³ ni² cji³, xi³ qui³tse³jon³ jan³ˀain¹ xi³ nchja⁴ˀaon³, cˀoa⁴ ña³to³ ma³ jco⁴, cˀoa⁴ te³ nčha⁴ tjin¹-le⁴.

⁴Je² chjon⁴²-ve⁴ yˀa³cja¹ ña³jño³ xi³ jco³ cji³ cao⁴ xi³ ni² cji³. Coan³nta³jon³-ni³ cao⁴ taon⁴si³ne², cao⁴ la⁴jao⁴ xi³ na⁴sca¹ cjoan³ cao⁴ to³fa³nqui³ xi³ čhoa³ cjoan³. Cjia³ ntsja³ jnco³ cho⁴tsin¹ xi³ taon⁴si³ne², tji¹qui³tse³-ni³ cjoa⁴nai⁴², cao⁴ cjoa⁴jnti¹ xi³ tsˀe⁴ cjoa⁴cha³jnqui³-le⁴.

⁵Ya⁴ tjen³ tji¹tˀa³ jnco³ jan³ˀain¹, jnco³ cjoa⁴ˀma³: Babilonia xi³ nˀion¹ je³, xi³ na⁴-le⁴ cho⁴ta⁴cha³jnqui³ cao⁴ cjoa⁴nai⁴² xi³ tsˀe⁴ son³ˀnte³.

⁶Tsa³ˀve³ chjon⁴²-ve⁴ nca³ chˀi⁴ cao⁴ njin¹-le⁴ cho⁴ta⁴-le⁴ Cristo, cao⁴ njin¹-le⁴ je² xi³ cˀen³ xi³ tˀa³tsˀe Jesús. Cˀia⁴ nca³ tsa³ˀve³ jo³ to⁴coan³xcon¹-na³.

⁷Cˀoa⁴ je² a²ncje⁴ qui³tso²-na³: A¹-ni³ nca³ ma³xcon¹-si¹ni³li². An³ cˀoa⁴xin¹-le²³ je² cjoa⁴ˀma³ xi³ tˀa³tsˀe⁴ chjon⁴²-vi⁴, cˀoa⁴ xi³ tˀa³tsˀe⁴ cho⁴ xi³ ti¹jna³son², xi³ ña³to³ ma³ jco⁴ cˀoa⁴ te³ nčha⁴ tjin¹-le⁴.

⁸Je² cho⁴ xi³ ca²ˀyai³ tsa³cˀe²jna³, cˀoa⁴ li²coi³ ti⁴ti¹jna³-ni³. Ya⁴ cjoi⁴nčhoa³mi³-ni³ nti⁴tjan⁴ jña³ nca³ ti⁴xˀa⁴jin³sen¹, cˀoa⁴ coai⁴ cha⁴. Je² xi³ tjio¹ son³ˀnte³ xi³ jan³ˀain¹-le⁴ li²coi³ tjio¹tˀa³ ya⁴ xon⁴ xi³ tsˀe⁴ cjoa⁴vi³jna³chon³ sa³ˀnta³ nca³ qui³sˀe³nta³ son³ˀnte³, coan⁴xcon¹-le⁴ cˀia⁴ nca scoe⁴ cho⁴-ve⁴ xi³ tsa³cˀe²jna³, cˀoa⁴ li²coi³ ti⁴ti¹jna³-ni³, cˀoa⁴ cjoa⁴ˀai¹-nca¹ni³.

⁹Cˀoa⁴-sˀin² ma³chjen¹ cjoa⁴fa³ˀai³tsjen³ xi³ tjin¹-le⁴ cjoa⁴ˀi³sen³ta³con². Je² xi³ ña³to³ ma³ jco⁴, coi³ xi³ ña³to³ ni³nto³, xi³ chjon⁴²-ve⁴ ti¹jna³ne².

¹⁰Cˀoa⁴-ti⁴ ña³to³ ma³-ni³ cho⁴ta⁴ti¹tjon². Aon² ma³-ni³ xi³ qui³tsao³nqui³. Jnco³ ti¹jna³, je² xi³ nqui²jnco³ cje³ fa³ˀai³-jin². Cˀia⁴ nca³ cjoa⁴ˀai¹, tjin¹ne²-le⁴ nca³ to⁴choa³ ni⁴čhjin³ cˀoe¹jna³.

¹¹Cˀoa⁴ je² cho⁴ xi³ tsa³cˀe²jna³, cˀoa⁴ li²coi³ ti⁴ti¹jna³-ni³, je² xi³ ma³jin³-ni³. Cˀoa⁴-ti⁴ tsˀe⁴ xi³ ña³to³ ma³-ni³, cˀoa⁴-ti⁴ coai⁴ cha⁴.

¹²Cˀoa⁴ je² xi³ te³ ma³ nčha⁴ xi³ ca²ˀyai³, je² xi³ te³ cho⁴ta⁴ti¹tjon² xi³ cje³ tjin¹-jin²le⁴ cjoa⁴te¹xo³ma³, to⁴nca³ sˀe⁴-le⁴ cjoa⁴te¹xo³ma³ xi³ to⁴jnco³ hora jo³-ni³ cho⁴ta⁴ti¹tjon², cao⁴ je² cho⁴.

¹³Je²-vi⁴ xi³ to⁴jnco³ cjoa⁴fa³ˀai³tsjen³ tjin¹-le⁴, cˀoa⁴ tsjoa¹-le⁴ cho⁴-ve⁴ je² nca³nˀion¹-le⁴ cao⁴ cjoa⁴te¹xo³ma³-le⁴.

¹⁴Je² xi³ cˀoa⁴-sˀin² scan³cao⁴ je² Va³rre², cˀoa⁴ je² Va³rre² si⁴²qui³njen³. Je² ni¹ je² Nai³ti¹tjon²-le⁴ xi³ nai³ ma³, cˀoa⁴ nca³jco⁴-le⁴ je² xi³ cho⁴ta⁴ti¹tjon². Je² xi³ tjio¹cao⁴ cˀoa⁴-sˀin² qui³no²cjoa⁴-le⁴, cˀoa⁴-sˀin² qui³tjo³jin³, cˀoa⁴ nˀion¹tˀa³con³.

¹⁵Je² qui³tso²-na³: Je² na³nta¹ xi³ ca²ˀyai³-vi⁴, jña³ nca³ chjon⁴²cha³jnqui³-ve⁴ ti¹jna³son², coi³ na⁴xi⁴na³nta¹, cˀoa⁴ cho⁴ta⁴ncjin², cˀoa⁴ ˀnte³, cˀoa⁴ en¹.

¹⁶Je² nčha⁴ xi³ te³ ma³-ni³ xi³ ca²ˀyai³ cao⁴ cho⁴-ve⁴, je²-vi⁴ xi³ ma³jti³que³ chjon⁴²cha³jnqui³-ve⁴. Cjoa⁴ˀa³-le⁴ nca³yi³je³, cˀoa⁴ si⁴²ca¹jna³jti², cˀoa⁴ squi⁴ne⁴ je² yao³-le⁴, cˀoa⁴ coa⁴ca²jin³ lˀi¹.

¹⁷Ni³na¹ cˀoa⁴-sˀin² qui³tsjoa³-le⁴ cho⁴ta⁴-ve⁴ ni⁴ma⁴ xi³ cˀoa⁴-sˀin² si⁴²tjo³son²-le⁴ jo³-sˀin² me³-le⁴ Ni³na¹, nca³ cˀoa⁴-sˀin² tjio¹jnco³con³ nca³ tsjoa¹-le⁴ cjoa⁴te¹xo³ma³-le⁴ je² cho⁴-ve⁴ jo³ sa³ˀnta³ coi⁴tjo³son² je² en¹-le⁴ Ni³na¹.

¹⁸Je² chjon⁴² xi³ ca²ˀyai³ je² na⁴xi⁴na³nta¹je³ xi³ va³te¹xo³ma³ cho⁴ta⁴ti¹tjon² xi³ tjio¹ son³ˀnte³.