Read Ese Ejja Mateo 1 Bible Online

Mateo 1 - Ese Ejja bible

Mateo 1

¹Jiquio esohui etehueꞌyo Jesosa Quitoja etiiquiana. Yahuajo jama poa baꞌa: Dabi Jesosaja etiiquiana poa, Amajama peaꞌai.

²Eꞌe, jamaya poa: Amajamaja bacua ejja Isaaca bajjani poa. Isaacaja bacua ejja Jacobo bajjani poa. Jacoboja bacua Joda bajjani poa; echahua mese cuana enequia poa peaꞌai.

³Jodaja bacua cuana Panesi bajjani, pea Sana bajjani poa, Tamaja mejo poa. Panesija bacua Esomo bajjani poa. Esomoja bacua Anami bajjani poa.

⁴Anamija bacua Aminanami bajjani poa. Aminanamija bacua Nasoni bajjani poa. Nasonija bacua Sanamo bajjani poa.

⁵Sanamoja bacua Bosi bajjani poa, Shajamija mejo poa. Bosija bacua Obeda bajjani poa, Shotija mejo poa. Obedaja bacua Isaiꞌ bajjani poa.

⁶Isaija bacua emeshi mese Dabi poa. Dabija bacua Sanomoni bajjani poa. Sanomonija enaese eꞌahuemano poa, Oniaja quijjojea, Dabija huanaꞌyo poa.

⁷Sanomonija bacua Shobiami bajjani poa. Shobiamija bacua Abiase bajjani poa. Abiaseja bacua Asa bajjani poa.

⁸Asaja bacua Josapati bajjani poa. Josapatija bacua Jonami bajjani poa. Jonamija bacua Osia bajjani poa.

⁹Osiaja bacua Jotami bajjani poa. Jotamija bacua Acasi bajjani poa. Acasija bacua Esequia bajjani poa.

¹⁰Esequiaja bacua Manase bajjani poa. Manaseja bacua Amoni bajjani poa. Amonija bacua Josia bajjani poa.

¹¹Josiaja bacua Jeconia bajjani poa; echahua mese cuana enequia poa peaꞌai. Jeconia nequinajejo, Babinonia dejja cuaa Isaeni cuana iña majje dojo ca poa oja meshi yasijje sosemaꞌ chaco meeya.

¹²Majoya Babinonia meshi yasijje dojo majje Jeconiaja bacua Sanati cuaya poa. Sanatija bacua Sonomame bajjani poa.

¹³Sonomameja bacua Amioni bajjani poa. Amionija bacua Eniaqui bajjani poa. Eniaquija bacua Asoni bajjani poa.

¹⁴Asonija bacua Sanoco bajjani poa. Sanocoja bacua Aquimi bajjani poa. Aquimija bacua Eniodi bajjani poa.

¹⁵Eniodija bacua Eneasa bajjani poa. Eneasaja bacua Matani bajjani poa. Matanija bacua Jacobo bajjani poa.

¹⁶Jacoboja bacua Jose bajjani poa. Oya Maniaja yahue poa. Maniaja bacua Jesosa bajjani aca poa, Quito bajjani peaꞌai poa, Eyacuiñajjija huoojeaꞌyo ojjaña cuana jaahuanajji.

¹⁷Jamajjeya Amajamaja bacua ejja tii majje jea ca poa pea. Majoya tii majje ohuaya pea jea ca poa. Jamaya aca poquiapoquia poa. Quijje nei etiiquiana Dabi cuaya poa. Etiiquiana Amajamaja jeaja osecua cuana 14 poa Dabi cuaya jjimahuajo. Majoya oya jayojja Dabija bacua ejja tii majje jea ca poa pea. Tii majje ohuaya pea jea ca poa. Quijje nei Dabija osecuaja jeaja osecua cuana 14 po majje, dejja mase cuaa etiiquiana cuana Babinonia meshi yasijje dojo ca poa. Majoya Babinonia meshi yasijje poqui majje oya jayojja aca poquiapoquia poa. Majoya quijje nei Jesosa Quito cuaya poa Joseja tii mee. Ma etiiquinaja jeaja osecua cuana 14 poa Jesosa Quito cuaya jjimahuajo. Eꞌe, jamaya poa. Ebacua Jesosa Quito cuaya poa

¹⁸Jesosa Quitoja ecuayaꞌyo jama poa baꞌa: Joseja Mania emese na poa. Mania bii ania poa; dejja cuana ba jjima poa. Jamatii oꞌejji poa. Eyacuiñajjija Edojjoshahua Pameya ebacua baꞌe mee ca poa, Maniaja ebacua.

¹⁹Jose quea pame nee poa. Jamajjeya Mania oꞌejji poajo jjahuanaqui sa po ajja poa. Jjashahuabaquia poa jama baꞌa: —Eꞌe pojjaꞌa Mania pea cojjojji poanaje. Jamajjeya oya jjamejoquinaje. Eyaya oya cajaa aje. Quehuajje cajaa aje Mania, pea cuanaja ba jjima. Jamajjeya pea cuana Maniajo maimai ajja poaje.

²⁰Jamaya jjashahuabaquianijo Joseya cahuiba ca poa. Oe Eyacuiñajjija esohuidojojji miminaje onijje. Jama poanaje baꞌa: —Jose, ¡aꞌa Mania cajaa ajji! ¡Oya huanacue! Oja bacua Eyacuiñajjija Edojjoshahua Pameja baꞌe mee.

²¹Ojaya ebacua cuayaje. Jamajjeya jiquio ebacua tii majje ojaya epeejji cuanaja mimishi cuijeaꞌyojji poaje. Jamajjeya ojaya ebajjani poaje Jesosa.

²²Eꞌe, Eyacuiñajjija esohui huohuijjija esohui yahuajo nei nei jayojjaya jjeya nei jamaya poani. Jamaya yahuajo poa baꞌa:

²³“Epona shoꞌi bii ani jamatii oꞌejji poanaje. Cuayajo oja bacua bajjani acaje Emanuel. Ese Ejjaja esohuijo ca jama baꞌa: Eyacuiñajji ecuana nijje nequi”. Jamaya Joseya cahuiba ca poa.

²⁴Majoya shequiꞌyo majje Eyacuiñajjija esohuidojojjija esohuijo Mania huana canaje, Joseya.

²⁵Jamatii ebacua cuaya jjimajo, Joseja Mania napa jjima poa. Ebacua cuayajo Jesosa bajjani acanaje.