Read Ese Ejja Mateo 16 Bible Online

Mateo 16 - Ese Ejja bible

Mateo 16

¹Majoya Paniseo cuana, Sanoseo cuana peaꞌai poeyanaje Jesosa que. Oya cuaa Jesosa Eyacuiñajjija huoojeaꞌyo pojjeama poso acanaje. Jamajjeya jama anisho canaje baꞌa: —Esohui huohuijji Jesosa, ¿aꞌa miya Eyacuiñajjija huoojeaꞌyo nei ojjaña jaahuanajji pojjaꞌa? ¡Ejjabaꞌajjaqui soꞌo! ¡Eyacuiñajjiya jayojja jama acue ecuanaja ebajji! ¡Eyajo oe panacue! —acanaje Paniseo cuaa. Jamatii Paniseo cuaa Jesosa Eyacuiñajjija huoojeaꞌyo pojjeama poso acanaje. Jamajjeya pea Paniseo cuana nijje jama poanaje baꞌa: —Chojja, Jesosa Eyacuiñajjija huoojea pojjeama. Jamajjeya Eyacuiñajjiya jama pojjeama mi pana cajo, capajea caꞌyahua.

²Jesosaa oya cuana sajaꞌa canaje: —Eshequi oquequiajo bo huoꞌohuoꞌo poanijo miquianaaya huohuiaña: “Eꞌe, de, mecahuajje quea jea poaje eshequi, ena epojji pojjeama”.

³Mecajjeahua ca ca quea apo nee nee poanijo miquianaya jama poani baꞌa: “Eꞌe de, quea apo; jjeya ena poaje”. Eꞌe —Jesosa poanaje—, eyahuasijje bo ba majje miquianaaya huohuiaña ena chamaꞌ pojjaꞌa, ena poaje pojjaꞌa. Jamatii Eyacuiñajjija esohuijo miquianajaya ba jjima ache shono ojjaña jaahuanajji poeje. ¿Apiojji miquea ba jjima?

⁴Miquianaaya Eyacuiñajjija esohui pajea yaña. Jamajjeya Eyacuiñajjiya pana cani ba majamaja sa poani. Jamatii Eyacuiñajjiya Jjona yahuajo nei nei aca poa jayojja jama ohuaya jjeyahua acaje miquea ebajji. Jamajjeya Jesosaa oya cuana jea canaꞌyonaje jjabahuejjaqui ajjajojo. Paniseoja esohui tai pahui shejjee meejji jayojja

⁵Majoya bae ojje miji yasijje besapoquianijo Jesosa shajjaꞌajjajji cuana jjashahuabaquinaje. Jama poanaje baꞌa: —Eꞌe de, ecuanaa bobi pajeaꞌyonaje.

⁶Jamajjeya Jesosaa oya cuana huohui canaje: —¡Quea jaꞌa nee jjashahuabaquicue! Paniseo cuana, Sanoseo cuana peaꞌaija pahui shejjee meejjijo miya quea tai poaje.

⁷Jamajjeya o shajjaꞌajjajji cuana ojee mimimiminaje: —Eꞌe pojjaꞌa oya jama poanaje ecuanaja pahui ye jjimajo.

⁸Ojaya ejjashahuabaquiꞌyojji Jesosaja eba poanaje. Jamajjeya oya cuana acanaje: —¿Apiojji acuae jja nequiana ojee mimimimiani pahuijo? ¿Aꞌa jja nequianajaya eya ba jjima quea caꞌa nee nee?

⁹¿Aꞌa jja quiana ejo jjashahuabaqui jjima tii? Eyaya me oejje pahui miji majje quea huiso dejja bobianaje, 5.000 dejja. ¿Aꞌa jja miyaya maya pajeaꞌyonaje? Ijjiaꞌijjiajeyo majje acuae jjaya ¿ache jjepai huiso chichaꞌyonaje pahui?

¹⁰Oya jayojjaya me oejje beca pahui, 7 pahui miji majje quea huiso dejja bobianaje, 4.000 dejja. Majoya miyaya pahui ¿ache jjepai huiso chichaꞌyonaje soꞌo? ¿Aꞌa ya pajeaꞌyonaje?

¹¹Eyaya miquianaya huohuinaje jama baꞌa: “Paniseo, Sanoseo peaꞌaija pahui shejjee meejjijo quea tai miya poaje” —Jesosa poanaje.

¹²Jamajjeya o shajjaꞌajjajji cuana jjabahuejjaquinaje Jesosaa huohui cajje: —Eꞌe, Paniseo, Sanoseo peaꞌaija ehuohui taijo se quea tai poaje; pahui shejjee meejjijo pojjeama Jesosaa huohui canaje —poanaje. Penoja esohui quea pame Jesosajo

¹³Majoya Jesosa Pinipo meshi yasijje poquinaje. Sesanea huasijje poquijeya o shajjaꞌajjajji huohuiꞌajja canaje Jesosaa: —Dejja cuana acuae jja ¿yajja poani ejo, ojjañaja Edoe Mesejo? ¿Aꞌya cuae eya?

¹⁴Oya cuaa sajaꞌa canaje: —Beca cuana jja jama poani baꞌa: Miya Huani, ma ona besameejji poa shequi oꞌoyanaje poso ca jja mi ca acani. Pea cuana aje jja oe jama poani: Miya Enia, Eyacuiñajjija esohui huohuijji yahuajo nei nequia poa. Pea poani jama baꞌa: Miya Jenemia pojjaꞌa pea esohui huohuijji yahuajo nei nequia poa pojjaꞌa. Oya cuana yahuajo nei manoꞌya poa shequi oꞌoyanaje poso ca jja mi ca acani cuaa —poanaje o shajjaꞌajjajji.

¹⁵Jamajjeya Jesosaa oya cuana huohuiꞌajja canaje: —¿Miya acuae yajja poani ejo? ¿Aꞌya cuae eya?

¹⁶—¡Miya ca ca Eyacuiñajjija Bacua Ejja oe nei, oja huoojeaꞌyo ojjaña jaahuanajji! —Simohuiya Jesosa sajaꞌa canaje.

¹⁷Jamajjeya Jesosaa oya jama acanaje baꞌa: —Simohui, Jjonaja bacua, ¡quea bihui nee pocue! Ecue Chii eyajo aniya miya ba meesahua cani eya oja huoojeaꞌyo ojjaña jaahuanajji. Dejjaa pojjeama miya ba meesahua cani, de.

¹⁸Jamajjeya eyaya miya huohuiaña miya bajjani aje Peno, esejaya esohuijo Mei bajjani. Eyacuiñajjija esohui eꞌe jojo nei ejo eyaya miya huohui meesahuajeꞌyo ecuea epeejji cuana quea caꞌa nee epoꞌyojji. Equi mei jiyo nei jayojja jama quea caꞌa nee nequi tii jayojja jama ecuea epeejji cuana quea caꞌa nee nequi tiitiijeꞌyo; ejeabichajeaꞌyojji pojjeama Edosiquianaja, eshahua cuanaja peaꞌai.

¹⁹—Eya Emeshi Mese nei jiquio meshijo poajeꞌyo. Jamajjeya aje miya huoojeaña ecue sohui huohuiya. Ecuea esohui esecue caꞌapejojji jayojja jama eyahuasijje edobiqui meeꞌyojji. Jamajjeya ecuea esohui ba majje miyaya huohuije ache ebaꞌejji quea mimishi Eyacuiñajjija botiꞌama. Miyaya huohuije peaꞌai ache ebaꞌejji quea pame nee Eyacuiñajjija eyajo anija quea boti nee.

²⁰Majoya Jesosaa o shajjaꞌajjajji cuana huohui neinei canaje jama baꞌa: —Eꞌe, eya Eyacuiñajjija huoojeaꞌyo ojjaña jaahuanajji. Jamatii ¡aꞌa oe jihuohuijji soꞌo! —poanaje. Ojaya emanoꞌyojjijo Jesosa miminaje

²¹Majoya Jesosaa o shajjaꞌajjajji cuana huohui coo canaje ojaya emanoꞌyojjijo: —Eya quijje Jenosanena huasijje poquije. Jomajo Moisesija etehueꞌyo huohuijji cuaa, Jodio etii bajjani cuaa peaꞌai, Eyacuiñajji nijje emimijji etii cuaa peaꞌai eya quea huiso cuia cajeꞌyo. Quea nee nee poajeꞌyo eya. Quijje ya mo manojeꞌyo ohua me caca mee cajje. Jamatii beca cahuime po majje mo shequi mee caje oꞌoya ecue Chiiya —acanaje.

²²Jamajjeya Peno quea yeno nee poanaje Jesosajo. Oya oe nei iyaa canaje, Penohua. Jama poanaje baꞌa: —Chojja, ecuea Emeshi Mese, miya Eyacuiñajjiya jaahuana cajeꞌyo. Peaa aje oe miya enapajji pojjeama, equecuaꞌyojji pojjeama jja mi, de.

²³Jamajjeya aje jja oe Jesosaa oya Peno cojja ba neinei cani jama tecueame acanaje baꞌa: —Peno, ¡aꞌa jamaya mimijji! Miya e dasiajji nisho epo jayojja mimiani. Miya Edosiquiana Satanasa jama mimiani. Jjashahuabaquiani quea tai, dejja jama; Eyacuiñajjija ejjashahuabaquiꞌyojji jama pojjeama —poanaje.

²⁴Jamajjeya Jesosa ojjaña o shajjaꞌajjajji nijje jama miminaje baꞌa: —¡Ojjaña joya enijje eꞌe jojo nei jjapeequiꞌyo sa poani Eyacuiñajjija esohui jayojja jama baꞌecue! Eꞌe, e jayojjaya jja enijje capoquiahua, jamatii onaa napa cajje aje jja oe quea nee poajeꞌyo pojjaꞌa.

²⁵Eꞌe, ojjaña joya Eyacuiñajjija esohui jayojja jama baꞌe sa po ajja aje oe baꞌe tiitii ajja enijje. Joya ecuea esohui jayojja jama baꞌe sa poani ca ca baꞌe tiitiijeꞌyo enijje eyajo.

²⁶Eꞌe pojjaꞌa dejjaa quea huiso nee nee aquiana ojaya yajji chicha caje. Jamatii oya cuana cuaqui yasijje jeajea cajo, ojjaña ojaya aquiana cuana edojojji pojjeama. ¿Aꞌa ojjaña ojaya aquiana cuana Eyacuiñajji yasijje quia cajo, oya cuana cuaquijo ani cuayaqui mee cajeꞌyo? ¿Aꞌa Eyacuiñajjiya oya cuana onijje eyajo baꞌe mee cajeꞌyo ma aquiana quea huiso nee nee sosejje? Chojja.

²⁷Eꞌe jojo nei eya ojjañaja Edoe Mese poeje oꞌoya. Quea jeajahua nee nee, quea caꞌa nee nee poejeꞌyo. Eya esohuidojojji quea huiso nee nijje poejeꞌyo. Poe majje eyaya ojjaña cuana sosequiajeꞌyo. Ojjaña baꞌenaje jayojja eyaya sosequiajeꞌyo.

²⁸Eꞌe jojo nei eya ojjañaja Edoe Mese ojjaña huoojeaꞌyojji quea caꞌa nee nee poajeꞌyo. Beca cuaa jiquiojo nequiya jjaja mo jamaya ba caje manoꞌyo jjimahuaa —Jesosaa o shajjaꞌajjajji cuana acanaje.