Read Ese Ejja Mateo 19 Bible Online

Mateo 19 - Ese Ejja bible

Mateo 19

¹Majoya esohui huohui majje Jesosa Janinea meshijo ani poꞌoquequinaje Jodea meshi yasijje, Jodana cuei ojje miji yasijje.

²Jomajo quea huiso dejja cuana onijje poquinaje. Ohuaya ojjaña jjaajaqui mee caꞌyonaje, huaquia mee caꞌyonaje.

³Paniseo cuana ca ca o que poeyanaje jjadasiaquiya nisho. Jamaya jjashahuabaquinaje baꞌa: —Eꞌe pojjaꞌa Jesosa Moisesija etehueꞌyo jayojja jama pojjeama mimije. Jamajjeya ecuaaya oya tecueaje. Jamajjeya Jesosa huohuiꞌajja canaje cuaa jama baꞌa: —Esohui huohuijji, ¿aꞌa acuae ehuanase huei cajji? ¿Yajjajo acuae ehuanase hueijea cajji soꞌo? ¿Achajja tehuemeya acuae oe Moisesiya aca poa?

⁴Sajaꞌa canaje Jesosaa: —¿Aꞌa miquea Moisesija etehueꞌyo ba jjima esohui? Yahuajo nei nei tehue ca poa Moisesiya jama baꞌa:“Yahuajo Eyacuiñajjiya pana coo ca poa yahue, epona peaꞌai.

⁵Huohui ca poa ohuaya: —Jamajjeya yahueya oja chii, ojaya enaese peaꞌai cajiñayiya caꞌyahua oja huanase nijje ebaꞌejji”.

⁶Oya cuana beca. Jamatii oe nei jayojja Eyacuiñajjiya oya ba cani, becanejjijji peaꞌai pojjeama, oe nei jayojjaya. Cuanaya Eyacuiñajjiya oe jayojja aca poa. Jamajjeya ¡aꞌa oe jea meejji! ¡Jama tii tii oe nei oe acue! —Jesosaa acanaje.

⁷Huohuiꞌajja oꞌoya canaje Paniseo cuaa: —Jamajjeya ¿yajjajo acuae Moisesiya tehueme aca poa? Jama baꞌa:“Hueiꞌyo majje yahueya ehueijeajji papeni etehueꞌyo caquia cahua oja huanase. Majoya cahuoojea cahua”.

⁸Sajaꞌa canaje Jesosaa: —Miquea etiiquiana quea mimishi nei jjejojoya Moisesiya huei meeꞌajja canaje. Quijje nei Moisesiya jamaya tehue ca poa; jamatii Eyacuiñajjiya jamaya pojjeama pana coo ca poa.

⁹Jamajjeya eyaya miya huohuiaña eꞌe jojo nei ehuanase pea dejjaja sii jjima huei ca ajja. Joya ehuanase hueijji epo pea epona ehuanaꞌyojji quea mimishi nee, epona siijji epo jama. Eyacuiñajjiya oya ba cani quea mimishi. Joya ma eponajo jjahuanaquiajo quea mimishi peaꞌai poani; onaja ehuanase nijje poani —Jesosa poanaje.

¹⁰—¡De! Jamajojoya eseya jjahuanaqui ca ajja. Jamatii shacuimaꞌ nequi cajji ojjaña eseya cuana. —o shajjaꞌajjajji poanaje.

¹¹—Cho, ojjaña pojjeama shacuimaꞌ nequi cajji —Jesosa poanaje—. Beca cuana Eyacuiñajjiya huoojea cajeꞌyo shacuimaꞌ tii enequijji.

¹²Beca cuana jjahuanaqui ajja, jamatii ejjahuanaquijji pojjeama. (Jamaya joya quibojjisha nei, biñajjajjamaꞌ cuana peaꞌai.) Beca cuana jjahuanaqui ajja jamatii yajjajje shai jjahuanaqui sa poꞌyo ajjajo. Beca cuana Eyacuiñajjija esohui ehuohui aiquijji, ojo echaco neinei cajji Eyacuiñajjiya huoojea canaje jjahuanaqui jjima tii tii enequijji. Jamatii Eyacuiñajjiya ojjaña huoojeaꞌyo ajja shacuimaꞌ tii enequijji. Jamajjeya ¡ojaya ejjashahuabaquiꞌyojji mijo jamaya acue, miyaya! —Jesosa poanaje. Eshoꞌiquianajo Eyacuiñajji nijje miminaje Jesosa

¹³Majoya Jesosa que eshoꞌi nei cuana jjequi canaje cuaa. Huohui canaje: —Jesosa, jiquio eshoꞌi nei sapa napaꞌajja majje ¡Eyacuiñajji nijje mimicue ojaya ejaahuanajji! —poanaje. Jesosa shajjaꞌajjajji cuaa oya cuana tecuea canaje: —¡Aꞌa jja oe Jesosa que jjequi majajji eshoꞌiquiana! ¡Esohui oe cahuohui cahua!

¹⁴Ma ba majje Jesosa poanaje: —¡Eshoꞌiquiana e que capoeꞌyahua! ¡Aꞌa quea huesha nequi meejji! Eꞌe, eshoꞌiquiana jjashahuabacuajiquiani; enijje jjapeecuajiquiani. Jamaya ecuea epeejji eshoꞌi jayojja eyaya jaahuana mee sa aña peaꞌai. Jamajjeya e que poquijeꞌyo, eya eyajo ojjaña huoojeaꞌyojji poaje —poanaje.

¹⁵Jamajjeya eshoꞌi cuana biajje emeꞌ huana majje Jesosa poquinaje. Edejja etii pishana quea aquiana huiso Jesosa nijje miminaje

¹⁶Majoya oe dejja Jesosa que poeyanaje. Huohuiꞌajja canaje jama baꞌa: —Emeshi Mese, ¿achajja po majje acuae mo eyahuasijje poqui caꞌyojji Eyacuiñajji nijje ebaꞌe tiitiiꞌyojji? ¿Achajja acuae baꞌe cajji quea pame nee epojji?

¹⁷—¿Apiojji miyaya eya huohuiꞌajjaña: “¿Ae quea pame nee epoꞌyojji?” Eyacuiñajji ca oe nei quea pame nee. Jamajjeya onijje baꞌe tiitiiꞌyo sa po majje ca oe ¡oya shajjaꞌajjacue! ¡Ojaya esohui etehueꞌyo jayojja jama oe baꞌecue! —Jesosa poanaje.

¹⁸—¿Ache esohui etehueꞌyo? —huohuiꞌajja canaje.

¹⁹Jesosaa sajaꞌa canaje: —Eyacuiñajjija esohui etehueꞌyo jama poani baꞌa:“¡Aꞌa pea quecuajji!¡Aꞌa sii pojji!¡Aꞌa siajje pojji!¡Aꞌa pea siijji!¡Mique chii, mique nae peaꞌai oe shajjaꞌajjacue!¡Pea cuana mi pejjejo baꞌe mique huapa pojjeama jayojja quea jea oe acue!”

²⁰—Eꞌe, eyaya jamaya aña, eshoꞌyahuaa jama tii tii sohuaqui eya. ¿Pea acuae yajja po cajji eyajo ebaꞌe tiitiiꞌyojji? —jiquio dejjaa Jesosa huohuiꞌajja canaje.

²¹—Eꞌe, miya quea pame nee nee Eyacuiñajji jayojjaya po sa po majje ¡poquicue, miquea aquiana cuana quiaquicue ejjeshejji sosejje! ¡Ejjeshejji quiaꞌyocue aemaꞌ cuana huasijje! ¡Majoya poecue, enijje epoꞌyojji! Jamajjeya eyajo Eyacuiñajjiya miya aquiana quea pame nee quea huiso quia cajeꞌyo quijje.

²²Jesosaja esohui shajjaꞌajja majje dejja etii pishana quea dejja tai jjejojo quea yeno poquinaje; ojaya aquiana quea huiso nee nee yani jojoya quia sa poꞌyo ajja.

²³Jamajjeya Jesosaa o shajjaꞌajjajji cuana huohui canaje: —Eꞌe, dejjaa quea mimishiya jjejojoya aquiana quea huiso, meshi quea quemo pojjaꞌa nahue canijo beshahua nei e que poqui ajja, eya eyajo ojjaña huoojeaꞌyojji poajeꞌyo.

²⁴—Eꞌe, eyaya huohuiaña peaꞌai jama baꞌa: Ahuoja quii huejjajje ino jeanobiaña jamaya, ¿aꞌa mapichi jeanobia cajji ahuoja quii huejjajje? Quea camaja coma. Jiquio ecua mapichi ahuoja quii huejjajje jeanobia cajji pome jamaya dejja quea aquiana huiso nee nee nahue cani eyahuasijje edobiquijji pojjeama.

²⁵O shajjaꞌajja majje jjashahuaba neineiquinaje o shajjaꞌajjajji. Ojee mimimiminaje: —Jamajjeya ¿aꞌya shai eyahuasijje dobiqui mee cajeꞌyo?

²⁶Cojja ba neinei canaje Jesosaa. Huohui canaje: —Dejjaa jamaya amee ajja tii. Eyacuiñajjiya oe neiya ojjaña acani. (Eyahuasijje dobiqui mee cani peaꞌai joya quea aquiana huiso nee) —Jesosa poanaje.

²⁷Jamajjeya Peno jjashahuabaquinaje ma dejja aquiana quea huiso nee nee jeanaꞌyo sa po ajjajo. Huohuiꞌajja canaje: —Jesosa, ecuaaya ojjaña aquiana jeanaꞌyonaje minijje epoquiꞌyojji. Jamajjeya ¿ae acuae ecuana quiaje soꞌo, de?

²⁸Jesosaa sajaꞌa canaje: —Eꞌe jojo nei quijje Eyacuiñajjiya ojjaña eyacua pana caꞌyajo eya eyajo nequijeꞌyo ojjaña huoojeaꞌyojji nei. Miquianaya, 12, e shajjaꞌajjajji poani enijje nequijeꞌyo, enijje ona huoojeaꞌyojji poajeꞌyo. Eꞌe, miquianaaya Jodio cuana, ecuea pea epeejji cuana peaꞌai huoojeajeꞌyo tii.

²⁹Eꞌe nei beca cuana ecuea esohui jama a sa poanijo aquiana cuana jeana caꞌyani: Ojaya equi, oja huapa pojjeama, oja chii, oja nae pojjaꞌa, oja bacua cuana pojjaꞌa, oja huanase pojjaꞌa jeana caꞌyani. Jamajjeya eꞌe jojo nei quijje Eyacuiñajjiya oya cuana quea huiso nee nee o jayojja quia cajeꞌyo; quea bihui nee nee baꞌe tiitii mee cajeꞌyo peaꞌai eyajo onijje.

³⁰Jamatii beca cuana jjeya ona huoojeajji poani eyajo ona huoojeaꞌyojji pojjeama poajeꞌyo. Joya jjeya ona huoojeaꞌyojji pojjeama ca ca eyajo ona huoojeaꞌyojji nei nei poajeꞌyo e jayojja —Jesosa poanaje.