Read Ese Ejja Mateo 21 Bible Online

Mateo 21 - Ese Ejja bible

Mateo 21

¹Majoya Jesosa Mepajejo nequiñaquinananaje Jenosanena pejjejo, acui tiiꞌajja yiyejo, Onimo bajjani eyiyo pejjejo peaꞌai. Nequiñaquinana majje o shajjaꞌajjajji becanejjijji peaꞌai huoojea canaje Jesosaa.

²Jama poanaje baꞌa: —¡Poquicue Mepaje yasijje! ¡Dobiqui majje mapichi sisi, ebacua shoꞌi ai nijje ejeyo nequia nequi bañaquicue! ¡Ba majje, picho majje yecue e que!

³Onaa: “¿Apiojji acuaeya ecua mapichi sisi pichojeaña soꞌo?” acajje, “Ecuea Emeshi Mese sa poani” sajaꞌame acue. Jamajjeya: “Ee, ocue dojoꞌajja joya mapichi” acaje dejjaa Mepajejo baꞌeya —Jesosa poanaje.

⁴Eꞌe, jamaya acanaje Jesosaa, Eyacuiñajjija esohui huohuijji yahuajo nei nei ojo tehue ca poa jama baꞌa:

⁵“Ojjaña Jenosanenajo baꞌe huohuicue jama baꞌa: —¡Bacue oe! Mi huoojeaꞌyojji nei poeyani; oya quea bei nee. Jamajjeya mapichi sisija daasa biajje poeyani, mapichi sisija ebacuaja daasa biajje”. Jamaya yahuajo nei nei Jesosajo tehue ca poa Eyacuiñajjija esohui huohuijjiya.

⁶Jamajjeya Jesosaa huoojea cajje o shajjaꞌajjajji poquinaje.

⁷Mapichi sisi bacuajji dojo canaje. Daqui ao cuana mapichi sisija bacuaja daasaꞌ biajje iya canaje. Jesosa anisohuaquinaje mapichija bacua shoꞌi aija daasaꞌ biajje.

⁸Ojjaña cuana ejjachichaqui nequi canaje, quea huiso nee nee. Ojaya daqui ao cuana ejiojjijo jeapiihui canaje Jesosa jaꞌajjequijji. Pea cuaa acui iña jajasejja canaje. Huana yiyoyiyo canaje ejiojjijo. Jama yahuajo nei Jodio cuaa emeshi mese cuana jaꞌajjequi caninaje cuiñajji yasijje, jama jaꞌajjequimeya acaninaje ohua ba cahuajje.

⁹Ojjaña ehui dojojji poquije, Jesosa quishishijji poquije peaꞌai taaaca poquinaje quea bihui nee nee: —Eꞌe Jesosa, emeshi mese Dabi yahuajo baꞌe miquea etiiquiana. Mi poeyajo ecuana quea bihui nee nee. Quea pame nee nee miya, Jesosa. ¡Eyacuiñajji eyajo aniya miya cajaahuana cahua! ¡Eyacuiñajji cabihuia cahua, ojjañaa!

¹⁰Jamajjeya Jesosa Jenosanena huasijje dobiquianijo, ojjaña cuana jomajo baꞌe cuajicuajijebenaje jjachichaquiya, ojjaña. Huohuiꞌajja canaje: —¿Aꞌya shai poeje? —poanaje.

¹¹—Jesosa poeje, Eyacuiñajjija esohui huohuijji nei, ma Nasanenajo baꞌenaje —sajaꞌame acanaje cuaa. Aquiana quiajji poani Eyacuiñajjija equijo nequi cuana huoojeacuayajea canaje Jesosaa

¹²Quijje pishana Jesosa ojjaña cuana nijje Eyacuiñajjija equi yasijje poqui oꞌoyanaje. Dobiquinaje. Aquiana quiajji poani Eyacuiñajjija equijo nequi cuana huoojeacuayajea canaje Jesosaa, aquiana jjeshe poequi peaꞌai. Aquiana cuana jjahuojjojeajeaqui canaje; bejjo, pea bejjo sosejje quia cani cuanaja bejjo nequijji cuana jeapajjajea canaje; huiaꞌ quiajji peaꞌaija huiaꞌ nequijji cuana jeabichajea canaje:

¹³—¡Aꞌa jja oe Eyacuiñajjija equijo aquiana quiajji! —tecueame acanaje Jesosaa—. Eyacuiñajjija esohui jama poani baꞌa: “Ecuea equi ojjaña cuana enijje emimijji”. Miquianaaya ca ca siipojji nequijji jayojja amee aña Eyacuiñajjija equi.

¹⁴Majo tii aniya cojjamaꞌ cuana, jeoꞌajja cuana peaꞌai Jesosa que poeyanaje. Ojjaña cuana Jesosaa quea pame nee po mee caꞌyonaje.

¹⁵Jesosaja jjaajaqui meeꞌyo cuana quea pame nee ba canaje; eshoꞌiquiana majo tii ani sohuicuayanaje shajjaꞌajja canaje peaꞌai. Jamatii Jodio etii cuana aje oe Jesosa nijje quea quene poanaje. Jesosa Eyacuiñajjija Bacua Ejja pojjeama poso tecuea canaje Moisesija etehueꞌyo huohuijji poaniya, Eyacuiñajji nijje emimijji etii cuaa. Jama poanaje baꞌa:

¹⁶—¿Apiojji acuae jiquio eshoꞌiquiana sohuicuaya meeaña mi bihuiajji? ¿Aꞌa shajjaꞌajja jjima? —Eꞌe, shajjaꞌajjaña —Jesosa poanaje—. ¿Aꞌa miquea ba jjima Eyacuiñajjija esohui etehueꞌyo ejo? Jama poani baꞌa:“Joya eshoꞌi aiꞌai, eshoꞌi jjonajjona ai peaꞌai quea pame nee esohui cuaya meeꞌyojji mi bihuiaꞌyojji”. Jamaya Eyacuiñajjija esohui yahuajo nei ejo etehueꞌyo poani —Jesosa poanaje.

¹⁷Mimi majje Jesosa poquinaje. Jea canaꞌyonaje. Jenosanenajo ani poquinaje Betania huasijje cahuiya. Acui etona jjajja jayojja, iquena bajjani sajjai mee caꞌyonaje Jesosaa

¹⁸Mecajjeahua Jenosanena huasijje poe oꞌoyanaje; quea shoe poanaje Jesosa.

¹⁹Ba canaje ejiojji sahuajo nequi acui etona jjajja jayojja. Acuijjajja baꞌajjaqui canaje. Chamaꞌ poanaje ejjajja. Eña oo pana nequiꞌyo. Jamajjeya oya Jesosaa huohui canaje: —¡Jamajjeya jjajjamaꞌ tii capoꞌyahua acui! —Jesosaa jama acajje jjeya nei sajjainanaꞌyonaje acui.

²⁰Quijje pishana acui esajjaiꞌyo ba majje o shajjaꞌajjajji cuana jjajjasoaquinaje: —¡De! ¡Jjeya nei ca ca sajjaiꞌyonaje! —poanaje.

²¹—Eꞌe —Jesosa poanaje—. ¡Miya Eyacuiñajjijo quea jaꞌa nee jjashahuabaquicue! Aꞌa jjashahuabaquijji jama baꞌa: “Eꞌe pojjaꞌa Eyacuiñajjija eya shajjaꞌajjaꞌyo jjima”. Cho, jama jjashahuabaquicue baꞌa: “Eyacuiñajjiya eꞌe jojo nei nei eya sajaꞌa cajeꞌyo”. Jamaya miya jjashahuabaquiajo, Eyacuiñajjiya miquea esohui sajaꞌa caje. Eꞌe, Eyacuiñajjiya e jayojja jama ameesahua cajeꞌyo peaꞌai, ma dejjaa ajjima acani. ¿Aya acuae Jesosa huoojea canaje esohui huohuiya?

²²

²³Majoya Jesosa Eyacuiñajjija equi yasijje dobiqui oꞌoyanaje. Esohui huohui canijo, Jodio etii cuana, Eyacuiñajji nijje emimijji etii cuana peaꞌai o que poeyanaje. Jesosa ojaya ba jjimajo huohuiꞌajja canaje: —¿Aya acuae mi huoojea canaje? ¿Apiojji acuaeya esohui huohuiaña soꞌo? ¿Apiojji acuaeya aquiana quiajji poani huoojeacuayajeanaje oma mecajje? —acanaje Jodio etii cuaa.

²⁴Jesosaa oya cuana sajaꞌa canaje: —Eꞌe, eyaya miya ebionei huohuiꞌajjaje. ¿Aya Huani huoojea canaje ona besa meeya? ¿Aꞌa Eyacuiñajjiya? ¿Aꞌa dejja cuaa pojjaꞌa? ¡Huohuicue mo! Eyaya majoya huohuije e huoojeaꞌyojji epo.

²⁵

²⁶Shajjaꞌajja majje Jodio cuana ojee mimimiminaje: —¿Yajja sajaꞌame shai eseya aje soꞌo, de? Quea mete ojjaña dejja cuanajo. Ojjañaa ba cani Huani Eyacuiñajjiya huoojea canaje esohui huohuiya. Jamajjeya: “Dejjaa Huani huoojea canaje” eseya ajje se jajahuejjajea ca chanaꞌ meiya. “Eyacuiñajjiya Huani huoojea canaje” eseya ajje aje se oe jama acaje baꞌa: “Jamajje, ¿apiojji miyaya Huani shajjaꞌajja jjima aña?” Jesosaa acaje.

²⁷Jamajjeya jjashahuabaqui majje Jesosa huohui canaje Jodio cuaa: —Cuaꞌa, de. Ecuanaja ba jjima —anisho canaje. —Jamajjeya ecuea miya ehuohuijji pojjeama e huoojeaꞌyojji epo —Jesosaa acanaje Jodio esohui huohuijji cuana, etii cuana peaꞌai. Esohui ejjashahuabaqui meejji beca ebacua ejjajo

²⁸Jesosaa oya Jodio cuana huohui canaje peaꞌai jama baꞌa: —Shajjaꞌajjacue oe ecue sohui ejjashahuabaqui meejji jama baꞌa: Oe dejjaja becanejjijji peaꞌai ebacua ejja yaninaje, shacuimaꞌ nequi cuana. Ejeajjiya oja bacua ejja etii huohui canaje: “Cha, ¡che oe jjeya que chacoquicue!”

²⁹“Cho, cajaa. Mijo chaco sa poꞌyo ajja ca iña” poanaje. Jamatii, jjashahuabaqui majje “Cachacoquiahua” poanaje. Poquinaje que yasijje.

³⁰—Ejeajjiya oja pea ebacua ejja, echahua mese huohui canaje peaꞌai: “Cha, ¡che oe que chacoquicue jjeya!” poanaje. “Eꞌe ecue Chii, jaaya chacoquije aje ca eya” poanaje. Jamatii poqui jjima poanaje, de.

³¹—Jamajjeya ¿ache eshoꞌi oja chiija ehuohui jama poanaje? ¿Achajja acuae miña jjashahuabaquiani? —Eꞌoꞌi mese —acanaje cuaa. —Eꞌe —Jesosa poanaje—. Eyaya miya eꞌe nei huohuiaña jama baꞌa: Jiquio ecua eꞌoꞌi mese jjashahuabaqui majje oja chiiya huohui canaje jayojja jama acanaje jama jayojja dejja mimishi cuana, epona pea cojjojji poani peaꞌai. Eyacuiñajji nijje jjapeecuajiquiani oja ejaahuanajji. Miquiana ca mi ca oe, cho. Eyacuiñajji nijje jjapeequi jjima.

³²Eꞌe, Huani, ma ona besameejji poa yahuajo nei poeya poa miquiana ba meesahuaa. Huohui ca poa jama baꞌa: “¡Miquea mimishijo quea yeno pocue! ¡Mimishi cuana pajeaꞌyocue Eyacuiñajjija esohui jama ebaꞌejji, onijje ejjapeequijji!” Huani poa. Miquianaya aje oe Huani shajjaꞌajja sa po ajja poanaje. Dejja mimishi cuana, epona quea mimishi cuanaya ca ca shajjaꞌajja majje: “Eꞌe, ¡Eyacuiñajji nijje ejjapeequi, mimishi cuana ejjapajeaquiꞌyo!” poanaje. Ma ba majje jamatii miquianaya jjashahuabaqui jjima, Eyacuiñajjija esohui jama a sa po ajja tii poanaje —Jesosaa acanaje Jodio etii cuana. Pea esohui ejjashahuabaqui meejji jjonojjajja yiyejo

³³—¡Jiquio shajjaꞌajjacue pea esohui ejjashahuabaqui meejji! —Jesosa poanaje—. Oe dejjaa emeshi meseya que quea quemo nee neejo bana canaje jjonojjajja oo pana, uva. Que peeyi canaje meija peeyi. Majoya que yiyesamajo equishipashajji iya canaje, mei cueehue iñaca canaje jjonojjajja na quishipashajeajji. Majoya mei iyasohua aoꞌao majje peehuana canaje que jaahuanajji quea huesha nee ojaya ebajji. Pea echacojji cuana iyaa canaje. Huohui canaje emeshi meseya: “¡Ecuea que jaahuanacue! Jaahuana sosejje quiajeꞌyo oya jjonojjajja quea huiso nee” poanaje. Majoya emeshi mese quea huesha poquinaje.

³⁴Quijje jjonojjajja jahuajo emeshi meseya pea o chacosahuajji poani beca huoojea canaje que jaahuanajji que, jjonojjajja jjequiya. Que jaahuanajji bañaqui majje huohui canaje jama baꞌa: “¡Che mo jjonojjajja joya ecuea emeshi meseya pa cadojoꞌyahua, de!” poanaje.

³⁵—Que jaahuanajji cuana quea mimishi poanaje. Jjonojjajja quia sa po ajja, joya emeshi meseja iya tepe mee. Jamajjeya o chacosahuajji cuana iña canaje, cuiajea canaje, pea quecua canaje, pea jajahuejjajea canaje meiya.

³⁶Emeshi meseya pea huoojea ca oꞌoyanaje huacuaya o chacosahuajji poani quea huiso pishana. Jamatii yahuajo jama acanaje que jaahuanajji cuaa. Cuiajea ca oꞌoyanaje peaꞌai.

³⁷Quijje yejje nei oja bacua ejja oe nei huoojea canaje que jaahuanajji baa: “Eꞌe, ohuaya ecuea ebacua ejja shajjaꞌajja caje” poanaje emeshi mese.

³⁸Cho, oja bacua ejja poeje ba majje jama poanaje baꞌa: “Joya emeshi meseja bacua ejja poeje. Jiquio meshi quijje ojaya poaje, ejeajji manoꞌyajo. ¡Cuaꞌa, ejjaquecuajeaqui oya eque mesenaꞌyojji! Jamajjeya meshi esejaya tii poajeꞌyo, de” poanaje que jaahuanajji quea mimishi cuana.

³⁹—Jamajjeya aje oe ebacua ejja iña canaje, quecuajea canaje, jeaqui canaje quea huesha nee, que jaahuanajji cuaa. Mahuiso esohui.

⁴⁰—Jamajjeya emeshi meseya poe oꞌoya majje ¿yajja acuae acajeꞌyo jiquio que jaahuanajji quea mimishi cuana? —Jesosaa huohuiꞌajja canaje Jodio cuana.

⁴¹—Oya quea quene nee nee poajeꞌyo. Ma que jaahuanajji quea mimishi cuana quecuajea cajeꞌyo, de. Que cuiña meequi cajeꞌyo pea cuana, joya ojjaña jjonojjajja shejo jjasosequiaquijji cuana —acanaje Jodio cuaa.

⁴²—Eꞌe —Jesosa poanaje—. ¿Aꞌa miquea eba Eyacuiñajjija esohui etehueꞌyo yahuajo nei? jama baꞌa:“Oe equi yamajjana equi iyajji cajaa aca poa cuaa. Jamatii Eyacuiñajjiya ma eyamajjana equi yamajjana quea caꞌa nee nequi mee ca poa. Jamajoya ojjaña ojaya epeejji cuanaa Eyacuiñajji bihuia cani”. Jamaya yahuajo nei tehue ca poa ejo; eya ma eyamajjana equi iyajji jayojja jama quea caꞌa nee nee nequi —Jesosaa acanaje.

⁴³—Eꞌe, jiquio esohui eba meesahuajji jayojja jama Eyacuiñajjiya acajeꞌyo —Jesosa poanaje—. Ohuaya yahuajo nei miquianaya babaca caꞌya poa ojo echacoꞌyojji, onijje ebaꞌe tiitiiꞌyojji. Jjeya ca ca Eyacuiñajjiya miquianaya, Jodio cuana, cajaa acajeꞌyo shajjamaꞌ jojoya. Pea cuana babaca cajeꞌyo ojo echacojji, onijje ebaꞌe tiitiiꞌyojji peaꞌai, joya eꞌe jojo nei ojo jjashahuabaquiani.

⁴⁴—Jiquio ecua eyamajjana cajaa aca poa cuaa jjeya quea caꞌa nee nequi jama eya miquianaaya cajaaya anaje; jjeya ca ca iña quea caꞌa nee eya nequiꞌyo. Ojjaña joya e ba jjima e cajaa amajje quea yeno poaje, de. E cajaa tiitii amajje ca ca quea nee nee po tiitiijeꞌyo —Jesosa poanaje.

⁴⁵Jesosaja esohui shajjaꞌajja majje Moisesija etehueꞌyo huohuijji cuana, Eyacuiñajji nijje emimijji etii cuana peaꞌai quea quene nee poanaje: —¡De! Ecuanajo oya mimiani, equi yamajjanajo pojjeama. Eseya que jaahuanajji quea mimishi jayojja peaꞌai ohuaya acani —poanaje Jodio cuana.

⁴⁶Jamajjeya Jesosa iña sa acanaje ejeanobiajeajji. Jamatii iña jjima; quea mete poanaje. Ojjaña dejja echichaꞌyo nequicaꞌyo cuaa Jesosa Eyacuiñajjija esohui huohuijji nei nei ba cani. Onajaya quea nahue nee nee Jesosa eꞌiñajji.