Read Ese Ejja Mateo 4 Bible Online

Mateo 4 - Ese Ejja bible

Mateo 4

¹Jjeyahua nei Edojjoshahua Pameya Jesosa quima huasijje meshi jabo huasijje huoojea canaje. Majoya Edosiquiaa Jesosa quea mimishi po mee sa acanaje.

²Jesosa jomajo nequinaje peaja ejiojji cahui huisome, 40 cahuime. Mahuiso epojja, mecajje peaꞌai nequinaje quimajo bobimaꞌ nei nei. Majoya quea shoe poanaje.

³Majoya aje Edosiquiana poeyanaje Jesosa que; miminequinaje jama baꞌa: —Miya Eyacuiñajjija Bacua Ejja jjabaqui majje ¡miyaya jiquio mei cuana pahui jayojja acue, miquea eꞌijjiajji!

⁴—Chojja de. ¡Bacue Eyacuiñajjija esohui etehueꞌyo! Jama poani baꞌa:“Dejja cuana bobijo caꞌa po majje pojjeama baꞌe tiitiijeꞌyo. Ojjaña Eyacuiñajjija esohui jayojja jama añajo ca se ca quea pame nee baꞌe tiitiijeꞌyo”. Jamaya aca poa —jamaya Jesosa poanaje.

⁵Majoya Edosiquiaa Jesosa dojo canaje Jenosanena huasijje. Jomajo Eyacuiñajjija equi quea ao nee nee yasijje nequisohuaqui mee canaje; equi jamacoo biajje nequi mee canaje. Jama acanaje baꞌa:

⁶—Miya Eyacuiñajjija Bacua Ejja jjabaqui majje ¡tohuaacue meshi yasijje! Jamajjeya Eyacuiñajjija esohui jama etehueꞌyo jaa baꞌa:“Eyacuiñajjiya esohuidojojji cuana huoojea caje mi yasijje, mi jaahuanaa. Oquequiajo ojaya emeya miya iñajjequisohua cajeꞌyo, ohuaya. Jamajjeya miya ejjajiojji quecuasajaqui jjima poaje meijo”.

⁷Jesosa onijje miminaje jama baꞌa: —Chojja. Yahuajo jama Eyacuiñajjija esohui etehueꞌyo peaꞌai baꞌa:“Aꞌa jama ajji baꞌa: —¿Aꞌa eꞌe jojo nei Eyacuiñajjiya oja sohui acajeꞌyo pojjaꞌa? ¿Aꞌa eya Eyacuiñajjiya jaahuana nei cajeꞌyo? ¡Cabaꞌajjasahua! —aꞌa pojji”. Jamaya yahuajo nei Moisesiya tehue ca poa —Jesosaa acanaje.

⁸Majoya Edosiquiaa Jesosa dojosohuaqui canaje eyiyo ao huasijje. O shajjaꞌajjajji nisho jamaya Edosiquiaa Jesosa huohui canaje: —¡Bacue ojjaña meshi cuana, emeshi mese cuana peaꞌai, cuiñajji cuana, aquiana quea nahue cuana peaꞌai! Ojjaña quea pame nee nee.

⁹Ojjaña jiquio aquiana cuana, dejja cuana peaꞌai miquea poajeꞌyo; miya Emeshi Mese nei nei eyaya po meejeꞌyo jjeya nei ca miyaya eya bihuiaꞌyajo ecuiꞌoshajjajo nequi majje —jama siajje ameya acanaje Edosiquiaa Jesosa.

¹⁰Jamajjeya Jesosaa jama huoojeajeame acanaje baꞌa: —¡Chojja Edosiquiana! Eyaya miya bihuia ajja, de. ¡Poquicue miya! Jamaya Eyacuiñajjija esohui etehueꞌyo yahuajo peaꞌai baꞌa:“¡Eyacuiñajji oe nei bihuiacue! Oya oe nei ojjañaja Emeshi Mese nei nequi. ¡Ojaya esohui jama oe acue!”

¹¹Jamajjeya Jesosaa huoojea cajje Edosiquiana, Satanasa poquiꞌyonaje. Majoya Eyacuiñajjija esohuidojojji cuana quea huiso poeyanaje Jesosa jaahuanaa, bobiaa peaꞌai. Jesosaa esohui huohui canaje Janinea meshijo

¹²Quijje pea cuaa Huani, ma ona besameejji poa jeanobiajea canaje. Shajjaꞌajja majje Jesosa posohuaqui oꞌoyanaje oja meshi yasijje, Janinea meshi yasijje.

¹³Oya nequiñaqui jjima Nasanenajo. Pea cuiñajji yasijje, Capenaoma huasijje poquinaje baꞌeya. Janinea bae sahuajo, Samononi meshi, Netani meshi peaꞌai pejjejo baꞌenaje.

¹⁴Yahuajo nei nei Eyacuiñajjija esohui huohuijjiya Isaiaa huohui ca poa jama baꞌa:

¹⁵“Ojjaña cuana quea mimishijo, esohui ba jjimajo quea apo baꞌyani. Eyacuiñajji ba majje oya cuana quea jaꞌa nee baꞌe mee cajeꞌyo. Eyacuiñajji ojaya ba jjimajo quea yeno nee baꞌyani. Jjeya ca ca quea jaji nee baꞌe mee cajeꞌyo. Eꞌe, Samononi meshijo, Netani meshi peaꞌaijo, Janinea bae sahuajo baꞌeca cuana, Cueji Pashi ma Jodana cuei bajjani sahuajo, ojje baꞌeca cuana, Janinea meshijo, pea bajjani Ese Ejja sohuijo baꞌa: Eyacuiñajji ba po jjimaja meshijo baꞌeca cuana peaꞌai quea mimishi poanaje. Jjeya ca ca quea jaꞌa nee baꞌe mee cajeꞌyo”. Jamaya Isaiaa huohui ca poa yahuajo nei nei Jesosaja epoejjijo.

¹⁷Majoya Jesosaa esohui huohui canaje jama baꞌa: —Jjeyahua nei Eyacuiñajji miquea Emeshi Mese nei poeje. Jamajjeya ¡miquea mimishijo quea yeno pocue! ¡Mimishi cuana pajeaꞌyocue miquiaaya! —acanaje. Jesosaa nahuoo cuiashajajji iyaa canaje onijje epoꞌyojji

¹⁸Majoya Jesosa poquinaje Janinea bae sahua huasijje. Jomajo ohuaya Anesi, Anesija oꞌi Peno bajjani, ma Simohui peaꞌai bajjani ba canaje. Oya cuana nahuoo cuiashajajji nei nei bajio. Nahuoo cuiashaja cani.

¹⁹Jesosaa oya cuana iyaa canaje: —¡Enijje poꞌyocue! Eyaya miya dejja cuana jjequi meesahuaꞌyojji ajeꞌyo e que.

²⁰Jjeyahua nei nei oya cuana ojaya eshajajji cuana jeanaꞌyo majje onijje poquiꞌyonaje.

²¹Majoya Jesosaa poqui pishana majje pea cuana ba canaje. Semeneoja bacua ejja Jacobo ba canaje ojaya echahua mese nijje, Huani nijje. Bishe aijo eshajajji jeꞌeꞌyo poꞌani ba canaje. Jjeyahua nei Jesosaa oya cuana iyaa canaje.

²²Jamajjeya Jesosaa iyaa cajje oja chii Semeneo bishejo ani tii jiña caꞌya poa cuaa Jesosa nijje epoquiꞌyojji. Jesosaa pea esohui huohui canaje emanojaa cuana huaquia mee caꞌyonaje

²³Jesosa poquinaje ojjaña cuiñajji cuana huasijje Janinea meshijo. Jodio dejja cuanaja equi ojee ejjachichaquijji yasijje dobiquinaje esohui huohuiya. Jama poanaje baꞌa: —Eya ojjañaja Emeshi Mese poajeꞌyo. Ohuaya quea huiso emanojaa cuana jjaajaqui mee caꞌyonaje, huaquia mee caꞌyonaje peaꞌai.

²⁴Quea huiso Sinia meshijo baꞌeca cuaa Jesosaa huaquia mee caꞌyoqui shajjaꞌajja canaje peaꞌai. Jamajjeya o que jjequi canaje quea huiso emanojaa cuana. Eꞌe, ojjaña cuana quea nee poani, pea cuana niñepoqui cuana, jjequiꞌihuicajaa cuana peaꞌai, jiojjijjajja cuana peaꞌai o que jjequi canaje. Ojjaña cuana huaquia mee caꞌyonaje, jjaaja meequi caꞌyonaje, Jesosaa.

²⁵Jamajjeya Jesosa poquianijo, quea huiso nee nee cuana ojee poquinaje onijje. Eꞌe, dejja cuana quea huiso nee, ponaponaña peaꞌai Janinea meshijo baꞌe cuana, Jenosanenajo baꞌe cuana, Jodea meshijo baꞌe cuana, pea Ome miji peaꞌai Cuiñajjijo baꞌe cuana, Cuei Cueji Pashijo Jodana cuei ojje mijijje baꞌe cuana peaꞌai; quea huiso nee nee Jesosa nijje poquinaje.