Read Ese Ejja Marcos 16 Bible Online

Marcos 16 - Ese Ejja bible

Marcos 16

¹Jodioja epojja ejomishocajji jjayejjequiajo, sinecua Mania Madanena, Jacoboja enaese Mania bajjaniya, Sanomeya peaꞌai shiyeshiye iña jjeshe canaje Jesosa shicuijji nisho.

²Jamajjeya mecajjeahua nei jjajaꞌaꞌajjaqui jjimahuajo ebionei epojjajo, nomico pojjajo, oya cuana poquinaje jjani yasijje.

³Bañaqui jjimahuajo mimimiminaje jama baꞌa: —¿Aya shai mei quea quemo jeacajjajjajea cajeꞌyo ese dobiquijji? Quea quemo nee nee mei.

⁴Epona cuana jjani yasijje poe majje ba cañaquinaje jjani huejja ecapajeaꞌyo nequi.

⁵Jamajjeya jjani ai yasijje dobiquinaje. Dobiqui majje epona cuaa eshoꞌi ai ba canaje. Oja daqui quea oshe nee nee, quea ao nee. Jesosaja equipajaajji biajje ani ba canaje esohuidojojji ebianei mijijje ani. Jjeya ca ca Jesosa chamaꞌ. Ba majje epona cuana quea mete poanaje.

⁶Jamaya oya epona cuana nijje poanaje baꞌa: —¡Aꞌa quea mete pojji! Miya ecuea eba. Eꞌe, miyaya Jesosa ma Nasanenajo baꞌya poa saꞌajjaꞌyo poequi, ma acui ecueataꞌapeejo manoꞌyonaje. Chamaꞌ oya jjeya jiquiojo. Shequi oꞌoyanaje ca jja coma. ¡Eꞌe, quiaꞌo jiquio baꞌajjahuaꞌyo socue! Jiquiojo jaanaje.

⁷Jamajjeya ¡jjeyahua nei poquicuajicue oja epeejji huohuiya! ¡Jama huohuime acue baꞌa: “Jesosa pa shequiꞌyonaje” acue! “Oya jjeya nei Janinea meshi yasijje poquije miquiana poqui jjimahuajo” o shajjaꞌajjajji cuana huohuiquicue. ¡Peno oe huohuiñaquicue Jesosaja esohui ma ohuaya huohui canaje oe aꞌa pajeaꞌyojji! ¡Oya oe jocuama baquicue! —esohuidojojjiya epona cuana acanaje.

⁸Jamajjeya epona cuana jjani esecue yasijje cuayaquiꞌyo majje poquicuajicuajinaje. Quea mete neejo oya cuana piopionaje. Pea nijje mimi jjima Jesosajo. Cuajicuajinaje Jesosa shajjaꞌajjajji cuana esohuidojojjija esohui huohuiya.

⁹Eꞌe, ebionei epojjajo, nomico pojjajo, Jesosa shequi oꞌoya majje, jjanequijaꞌaquiꞌyo majje peaꞌai, Mania Madanenaa ebionei oya ba caꞌyonaje. Oya Maniaja yahuajo eshahua quea huiso dobiquiyajo, Jesosaa eshahua cuana huoojeacuayajea caꞌyonaje me oejje pea beca huisome.

¹⁰Majoya Jesosa ba majje Maniaa o shajjaꞌajjajji cuana huasijje poquicuajinaje huohuiya. Jesosa emanoꞌyo tii jaa posojo, oya cuana pa neinei aninaje quea yeno.

¹¹Jamajjeya Maniyaa oya cuana huohui cañaquinaje Jesosa eshe oꞌoya: —Eyaya oya banaje eꞌe jojo nei —acanaje Maniaa. Jamatii Maniaja esohui shajjaꞌajja majje oya cuana jama poanaje baꞌa: —Eꞌe pojjaꞌa. Chojja, siajje miya poani, Mania —acanaje cuaa, Jesosa shequi oꞌoya ajja poso acanaje.

¹²Majoya Jesosaja epeejji becanejjijji peaꞌai ejiojjijje poquijejo, Jesosa pea jayojjaya jjanequijaꞌaquinaje onijje. Jesosa ba jjima poanaje cuanaja.

¹³Quijje yejje nei oya eꞌe jojo nei Jesosa ba majje oya cuana poquinaje pea eshajjaꞌajjajji cuana huohuiya. Jamatii ojjaña jama poanaje baꞌa: —Eꞌe pojjaꞌa, de. Chojja de, oya manoꞌyo tii —ojjaña cuana poanaje, Jesosa shequi oꞌoya ajja poso acanaje. Jesosa ba canaje o shajjaꞌajjajji cuaa

¹⁴Quijje Jesosa shajjaꞌajjajji cuana 11 huisome oe equijo ojee ijjiaꞌijjia anijo Jesosa onijje jjanequijaꞌaquiꞌyonaje. Oya cuana tecuea canaje jama baꞌa: —¿Apiojji acuae quiana quea sapa caꞌa poani? ¿Apiojji shajjaꞌajja jjima onajaya ehuohuiꞌyo eya eshe oꞌoya ba majje? ¡Bacue eya eꞌe jojo nei eshequiꞌyo, jjabahuejjaquicue! —Jesosaa acanaje.

¹⁵Majoya Jesosaa oya cuana jama acanaje baꞌa: —¡Poquicue ojjaña cuana huasijje, ma ojjaña meshijo baꞌe yasijje! ¡Ecuea esohui quea pame nee ebaꞌe tiitiiꞌyojjijo ba meequicue! ¡Enijje jjapeequi meequicue! ¡Enijje jjapeequiyajo enajo besa meecue!

¹⁶Ojjaña joya enijje jjapeequiani Eyacuiñajjiya baꞌe tiitii mee cajeꞌyo. Enijje jjapeequiyajo, ¡ojjañaja ebajji onaaya oya cuana besa meequicue! Ojjaña joya enijje jjapeequiꞌyo ajja ca ca Eyacuiñajjiya quea nee nee po mee cajeꞌyo, quea mimishi poanajejojo. Jamajjeya Eyacuiñajjiya oya cuanaja mimishi cuanajo quea yeno po mee cajeꞌyo.

¹⁷—Ecuea epeejji cuana eyaya ameejeꞌyo ma dejjaa ajjima acani. Oya cuana eyaya quea caꞌa nee po meejeꞌyo, eshahua cuana dejjajo nequi huoojeacuayajea meejeꞌyo. Pea esohui ojaya cuanaja ba jjima mimi meeje peaꞌai.

¹⁸Peyo se najji ba jjima iña majje manoꞌyo jjima po meejeꞌyo eyaya. Ena pase nei nei paseꞌama poso ishijea majje, manoꞌyo jjima po meeje eyaya. Ecuea epeejji neiya emano biajje eme huana majje jiquio quea aja poaje; eyaya jjaajaqui meejeꞌyo, huaquia meejeꞌyo peaꞌai —Jesosaa o shajjaꞌajjajji cuana huohui canaje. Jesosa jjequisohua caꞌyonaje eyahuasijje

¹⁹Majoya Emeshi Mese nei Jesosa pea cuana nijje mimiajo, oja Chiiya, Eyacuiñajjiya jjequisohua caꞌyonaje eyahuasijje. Jomajo oya Jesosa anioquenaje oja Chii ebianei mijijje onijje ojjaña huoojeaꞌyojji epojji.

²⁰Majoya o shajjaꞌajjajji cuaa Jesosaja esohui huohuiqui canaje ojjaña cuana huasijje. Ojaya esohui jayojja jama Emeshi Mese nei Jesosaa oya cuana ameesahua canaje ma dejjaa ajjima acani ojjañaja ebajji ojaya esohui cuana eꞌe nei nei. Jamaya ojjaña ba mee canaje Jesosaa oya cuana huoojea canaje ojaya esohui huohuiya. Jesosaa eya Macoso bajjani jiquio esohui tehue mee canaje. Mahuiso. Apoa.