Read Ese Ejja Marcos 8 Bible Online

Marcos 8 - Ese Ejja bible

Marcos 8

¹Majoya quijje pishana quea huiso nee nee cuana poeyanaje. Jesosa que jjachichaqui oꞌoyanaje. Onijje ani tiitii canaje esohui shajjaꞌajjaa. Bobimaꞌ poanaje. Jamajjeya Jesosaa o shajjaꞌajjajji cuana iyaa canaje.

²O que poeyajo, huohui canaje jama baꞌa: —Jiquio dejja cuana enijje nequi pea beca peejjima cahuime. Ojaya bobi oe poanaje. Jamajjeya eya ojo quea yeno jjashahuabaquiani, bobimajo.

³Oja equi yasijje huoojea sa poꞌyo ajja, quea shoe nee nee; ejiojjijje poquianijo bobi yasijje po chanaꞌ.

⁴O shajjaꞌajjajji cuanaa Jesosa sajaꞌa canaje: —Eꞌe. Jiquiojo chamaꞌ bobi, dejjamaꞌ. ¿Yajja yajji? Oya cuana quea huiso nee nee ebobiajji. ¿Achacua pahui ejjeshejji ojjaña bobiajji? —acanaje cuaa.

⁵—¿Ache huiso pahui miquea yani? —Jesosaa huohuiꞌajja canaje. —Me oejje becanejjijji peaꞌai, 7 pahui yani —poanaje.

⁶Jamajjeya Jesosaa ojjaña ejjaꞌanichichaquiꞌyo ani cuana jama acanaje baꞌa: —¡Meshijo anioquecue! —acanaje. Majoya Jesosa ma 7 pahui jjeshe majje Eyacuiñajji oja Chii bihuia canaje bobijo. Majoya pahui miji canaje. O shajjaꞌajjajji cuana quia canaje. Majoya oya cuanaa dejja cuana huasijje quia canaje. Quia capoquije quea huiso nee nee jjapanaquipoquinaje, bobi.

⁷Ojaya oe pojji nahuo sisi yaninaje peaꞌai. Oya jayojja Jesosaa nahuo sisi miji majje quia canaje o shajjaꞌajjajji cuana que ojjaña cuana huasijje equiajji.

⁸Jamajjeya ojjaña cuaa ijjia canaje; quea jejje poanaje.

⁹Ijjia majje, mi ijjiajeyo majje bio caꞌyonaje jjepai ai yasijje, o shajjaꞌajjajji cuaa. Mepe caꞌyo majje quea huiso poanaje, 7 jjepaime. Jamatii quea huiso nee nee dejja cuana bobia canaje, 4.000 dejja.

¹⁰Majoya Jesosaa ojjaña cuana huoojea canaje oja equi cuana huasijje. Jesosa ca ca bishe ai yasijje nequisohuaquinaje o shajjaꞌajjajji cuana nijje. Besapoquinaje ojje, pea meshi yasijje Majadana meshi yasijje, pea bajjani Namanota meshi yasijje, ma Ena Taꞌa Huoi bajjani yasijje. Jodio etiiya Jesosaa pana canijo huohuiꞌajja canaje

¹¹Majoya Paniseo cuana poeyanaje Jesosa que. Onijje mimicuiajeanobiajea sa poanijo jama anisho canaje baꞌa: —Esohui huohuijji Jesosa, ¿Aꞌa miya Eyacuiñajjija huoojeaꞌyo nei ojjaña jaahuanajji pojjaꞌa? ¡Ejjabaꞌajjaqui soꞌo! ¡Eyacuiñajjiya jayojja jama paname aꞌajjaꞌ eyajo ecuanaja ebajji! —huohui nisho canaje. Jamatii oya cuaa Jesosa Eyacuiñajjija huoojeaꞌyo pojjeama poso acanaje pea Paniseo cuana: —Chojja, Jesosa Eyacuiñajjija huoojeaꞌyo pojjeama. Jamajjeya Eyacuiñajjiya jayojja jama mi pana cajo, pajea cajeꞌyo cuaa.

¹²Paniseoja ejjashahuaba taiquijji Jesosaja eba poanaje. Jamajjeya quea yeno poanaje jama baꞌa: —Chojja. ¿Apiojji miquianaya Eyacuiñajjiya pana cani ba majamaja sa poani? Miquianaaya Eyacuiñajjija esohui cajaa aña. Jamajjeya miquea ba jjima ache shono ojaya ehuoojeaꞌyo ojjaña jaahuanajji poeyanaje. Jamajjeya Eyacuiñajjiya eya pea epana meeꞌyojji pojjeama miquea ebajji eya ojaya ehuoojeaꞌyo —Jesosaa acanaje.

¹³Paniseo cuana shajjamaꞌ poanijo, Jesosaa oya cuana jea canaꞌyonaje, jjabahuejjaqui ajjajojo. Besapoqui oꞌoyanaje ojje miji yasijje bishejje o shajjaꞌajjajji cuana nijje. Paniseoja esohuitai pahui shejjee meejji jayojja

¹⁴Majoya bae ojje miji yasijje besapoquije Jesosa shajjaꞌajjajji poani cuana jjashahuabaquinaje. Jama poanaje baꞌa: —Eꞌe de, ecuanaa bobi pajeaꞌyonaje.

¹⁵Majoya Jesosaa, Paniseoja ehuohui taijo jjashahuabaquianijo oya cuana huohui canaje: —¡Quea jaꞌa nee jjashahuabaquicue! Paniseoja, Enodeja epeejjija esohui pahui shejjee meejji jayojjajo miya quea tai po chanaꞌ.

¹⁶Oya cuana bobijo jjashahuabaquianijo Jesosaja esohui ejjashahuabaquimeejji onajaya quea quehua poanaje. Jamajjeya ojee mimimiminaje jama baꞌa: —Eꞌe pojjaꞌa Jesosa jama poanaje ecuanaja bobi ye jjimajo.

¹⁷Ojaya esohui Jesosaja eba poanaje. Jamajjeya oya cuana jama acanaje baꞌa: —¿Apiojji acuae jja nequiana ojee mimimimiani bobijo? ¿Aꞌa jja eya miquianajaya ba jjima quea caꞌa nee nee?

¹⁸¿Aꞌa jja nequiana ejo jjashahuabaqui jjima tii? ¿Aꞌa jja nequiaa pajeaꞌyonaje soꞌo?

¹⁹Eyaya me oejje pahui miji majje quea huiso dejja bobianaje, 5.000 dejja. Ijjiaꞌijjiajeyo majje acuae jjaya ¿ache jjepai huiso chichaꞌyonaje pahui? ¿Aꞌa ya pajeaꞌyonaje? —Jesosaa acanaje. —Quea huiso nee, 12 jjepaime —poanaje.

²⁰—Eꞌe. Oya jayojjaya me oejje beca pahui, 7 pahui, miji majje quea huiso dejja bobianaje, 4.000 dejja. ¿Majoya ojjañaa ijjiaꞌijjiajeyo majje miquianaaya ache jjepai huiso pahui chichaꞌyonaje soꞌo? —Quea huiso nee peaꞌai, 7 jjepaime quea cuio chichaꞌyonaje ecuaaya —sajaꞌame acanaje.

²¹—Eꞌe —Jesosa poanaje—. ¿Aꞌa jamatii miquianajaya ba jjima eya quea caꞌa nee nee mi bobiajji? ¿Aꞌa mi jjabahuejjaqui jjima? —Jesosa poanaje. Betesaidajo nequi Jesosaa cojjamaꞌ jjacojjapojjaqui mee caꞌyonaje

²²Majoya Jesosa o shajjaꞌajjajji cuana nijje Betesaida huasijje baꞌeñaqui oꞌoyanaje, Jai Jaajji cuiñajji yasijje. Jomajo pea cuanaa cojjamaꞌ ye canaje Jesosa que. Jesosa huohui neinei canaje jama baꞌa: —Jesosa, jiquio dejja cojjamaꞌ. ¡Che jja oma quea cojja jaꞌa po meeꞌyocue!

²³Jesosaa cojjamaꞌ me iña majje me pejjejea canaje cuiñajji esecue yasijje. Jomajo Jesosaa emeꞌ cuicho majje cojja iñapepa canaje cuichohua. Oya napaꞌajja canaje emeya peaꞌai. Jama poanaje baꞌa: —¿Achajja acuaeya miyaya baña soꞌo, cha? —Jesosa poanaje.

²⁴Bajea majje cojjamaꞌ jama poanaje baꞌa: —Eyaya dejja cuana jeojeoqui baña, acui jayojja de, quea jama pishana, de —acanaje.

²⁵Majoya Jesosaa ma dejja cojja napaꞌajja ca oꞌoyanaje emeya. Jesosaa cojja napaꞌajja ca oꞌoyajje, cojjamaa jjeyahua nei ba neinei canaje. Quea cojja jaꞌa nee nee poꞌyonaje.

²⁶Majoya Jesosaa oya huoojea canaje oja equi yasijje. Jama poanaje baꞌa: —¡Epeejji, quea jaji nee poquiꞌyocue miquea equi yasijje! ¡Aꞌa jjeya cuiñajji yasijje poqui oꞌoyajji! ¡Eyaya miya quea cojja jaꞌa po meeꞌyonaje aꞌa jocuama huohuijji! —Jesosaa acanaje. Penoja esohui quea pame Jesosajo

²⁷Majoya Jesosa o shajjaꞌajjajji cuana nijje Pinipo meshi yasijje poqui canaje. Sesanea huasijje poquijeya o shajjaꞌajjajji huohuiꞌajja canaje Jesosaa: —¿Dejja cuana acuae jja yajja poani ejo? —Jesosaa acanaje.

²⁸—Miya Huani, ma ona besameejji poa, shequi oꞌoyanaje poso ca jja mi ca acani beca cuaa. Pea cuana aje jja poani miya Enia, Eyacuiñajjija esohui huohuijji yahuajo nei nequia poa. Pea poani baꞌa miya pojjaꞌa pea esohui huohuijji yahuajo nei nequia poa pojjaꞌa. Oya cuana yahuajo nei manoꞌya poa shequi oꞌoyanaje poso ca jja mi ca acani cuaa —poanaje o shajjaꞌajjajji.

²⁹—¿Miya acuae yajja poani ejo? ¿Aꞌya cuae iña? —Jesosa poanaje. —Miya ca ca Eyacuiñajjija huoojeaꞌyo ojjaña jaahuanajji Quito bajjani —Simohuiya Jesosa sajaꞌa canaje.

³⁰Jamajjeya Jesosaa oya cuana jama acanaje baꞌa: —Eꞌe, eya Eyacuiñajjija huoojeaꞌyo ojjaña jaahuanajji. Jamatii ¡aꞌa jja oe jjeya huohuijji cuana! —Jesosa poanaje. O manoꞌyojjijo Jesosa miminaje

³¹Majoya Jesosaa o shajjaꞌajjajji cuana huohui coo canaje ojaya emanoꞌyojjijo: —Eya ojjañaja Edoe Mese quijje Jenosanena huasijje poquije. Jomajo Moisesija etehueꞌyo huohuijji cuaa, Jodio etii cuaa peaꞌai, Eyacuiñajji nijje emimijji etii cuaa peaꞌai eya quea huiso cuia cajeꞌyo. Quea nee nee poajeꞌyo eya. Quijje ya mo manojeꞌyo ohua meꞌ caca mee cajje. Jamatii pea beca peejjima cahuime po majje mo shequi mee caje oꞌoya ecue Chiiya —acanaje.

³²Jamajjeya Jesosaa jama huohui neineime acajje Peno quea yeno nee poanaje. Oya oe nei iyaa canaje, Penohua. Jama poanaje baꞌa: —Chojja, ecuea Emeshi Mese Jesosa, miya Eyacuiñajjiya jaahuana cajeꞌyo. Peaja aje mi oe ecuiajji pojjeama, peaja equecuaꞌyojji pojjeama jja mi, de.

³³Jamajjeya aje jja oe Jesosaa ojjaña o shajjaꞌajjajji cuana cojja ba neinei majje jama Peno tecueame acanaje baꞌa: —Peno, ¡aꞌa jamaya mimijji! Miya e dasiajji nisho epo jama mimiani. Miya Edosiquiana Satanasa jama mimiani. Jjashahuabaquiani quea tai, dejja jama; Eyacuiñajjija ejjashahuabaquiꞌyojji jama pojjeama —Jesosa poanaje.

³⁴Jamajjeya Jesosaa ojjaña o shajjaꞌajjajji, ojjaña pea cuana jomajo nequi peaꞌai iyaa canaje. Jama poanaje baꞌa: —¡Ojjaña joya enijje eꞌe jojo nei jjapeequiꞌyo sa poani Eyacuiñajjija ejjashahuabaquijji jayojja jama baꞌecue! E jayojjaya jja enijje capoquiahua, jamatii onaa napa cajje aje jja oe quea nee poajeꞌyo pojjaꞌa.

³⁵Eꞌe, ojjaña joya Eyacuiñajjija ejjashahuabaquijji jayojja jama baꞌeꞌyo sa po ajja baꞌe tiitii ajja enijje eyajo. Joya ecuea ejjashahuabaquijji jayojja jama baꞌeꞌyo sa poani ca ca baꞌe tiitiijeꞌyo enijje eyajo.

³⁶Eꞌe pojjaꞌa dejja cuaa quea huiso nee nee aquiana ojaya yajji chicha caje. Jamatii oya cuana cuaqui yasijje jeajea cajo ojjaña ojaya aquiana cuana edojojji pojjeama. ¿Aꞌa ojjaña ojaya aquiana cuana Eyacuiñajji yasijje quia cajo o cuaquijo ani cuayaqui mee cajeꞌyo? ¿Aꞌa Eyacuiñajjiya oya cuana onijje eyajo baꞌe mee cajeꞌyo ma aquiana quea huiso nee nee sosejje? Chojja.

³⁷Eyacuiñajji cajaa amajje eyajo ebaꞌejji pojjeama. Chojja, ejjeshejji pojjeama nequianajaya, aquiana quea huiso sosejje pojjeama, bejjo sosejje pojjeama ebaꞌe tiitiiꞌyojji.

³⁸Eꞌe jojo nei jjeya ojjaña cuana Eyacuiñajji nijje jjapeequi ajja, ojjaña quea mimishi poani peaꞌai. Ecuea esohuijo quea bicho poanijo jama acani cuaa baꞌa: “Cho, eya Jesosa Quitoja epeejji pojjeama”. Jamajjeya eya ojjañaja Edoe Mese esohuidojojji pame cuana nijje poe oꞌoya majje ecue Chii jayojja quea pame nee nee ojjaña huoojeaꞌyojji poajeꞌyo. Jamajjeya eyaya ecue Chii eyajo ani huohuije jama baꞌa: “Cho, oya cuana ecuea epeejji pojjeama. Cajaa” eyaya aje —Jesosa poanaje—. Eꞌe, jjeya ejo quea bicho poanijo quijje eya quea bicho poajeꞌyo ojo, de.