Read Ese Ejja Juan 1 Bible Online

Juan 1 - Ese Ejja bible

Juan 1

¹Yahuajo nei nei meshi, aquiana cuana, dejja peaꞌai pana jjimahuajo, Jesosa Quito yaña tiiya poa Eyacuiñajji nijje. Eꞌe, oya Eyacuiñajji nei neiya eꞌe jojo nei poa.

²Eꞌe, oya Eyacuiñajji nijje yaña poa yahuajo nei nei meshi cuana, ojjaña aquiana cuana pana jjimahuajo.

³Eyacuiñajjiya oya pana mee caꞌya poa aquiana, meshi cuanaya, dejja, epona peaꞌai, ojjaña pana caꞌya poa Jesosa Quitohua. Ojjaña aquiana pana jjima jjemo, chamaꞌ pome.

⁴Eꞌe, oya, Jesosa Quito, yaña tiitiia poa. Ohuaya eseya Eyacuiñajji ba mee cani. Jamajjeya ohuaya baꞌe tiitii mee cani eseya cuana. Eyacuiñajjijo quea jaꞌa jjashahuabaqui mee cani peaꞌai.

⁵Jamatii mecajje quea apo nee neejo cuaquijijiya jeajaꞌa cani. Jiquio ecua cuaquijiji mecajje jijinequiani jama jayojja Jesosaa dejja mimishi cuana quea jaꞌa nee jjashahuabaqui mee cani. Eshahuaa Jesosa Quito eseya jaahuana pajea mee sa acani. Chojja. Ohuaya ojaya epeejji cuana jaahuana tiitii cani. Eꞌe, oya cuaquijiji quijjoꞌyo ajja jama. Huani, Sacaniaja bacua ejja

⁶Oe dejja Jodea meshijo baꞌe Huani bajjani Eyacuiñajjiya huoojea canaje Jesosa Quitojo huohuiya.

⁷Eyacuiñajjiya Huani jama acanaje baꞌa: —¡Poquicue miya! Ojjaña huohuiquicue jama baꞌa: “Eyacuiñajjija huoojeaꞌyo ma cuaquijiji quijjoꞌyo ajja jayojja poeyani ojjaña cuana quea jaꞌa jjashahuabaqui meeya. Jamajjeya ¡onijje jjapeequicue!” Jamajjeya Eyacuiñajjiya Huani huoojea canaje.

⁸Oya Huani ma cuaquijiji jayojja jama pojjeama; oya ca ca oma oe poquinaje Jesosa Quitojo huohuiya, ma cuaquijiji jayojjajo huohuiya.

⁹Eyacuiñajjiya Jesosa huoojea canaje meshi yasijje. Ohuaya ojjaña cuana quea jaꞌa jjashahuabaqui mee caje Eyacuiñajjijo.

¹⁰Eꞌe, oya ma cuaquijiji jayojjaya poeyanaje dejja cuana nijje baꞌeya. Yahuajo ohuaya meshi cuana, dejja cuana peaꞌai pana caꞌya poa. Jamatii oya dejja cuanaja ba jjima ojjaña cuana panaꞌyojji epo.

¹¹Eꞌe, oya poeyanaje Jodea meshi yasijje, ojaya huapa pojjeama cuana huasijje. Jamatii oya cajaa acanaje beca cuaa: —¡Chojja, oya Eyacuiñajji bameejji pojjeama! —poso beca cuaa acanaje.

¹²Beca cuaa ca ca Jesosa Quitoja esohui shajjaꞌajja canaje. Ojo jama acanaje baꞌa: —Eꞌe jojo nei oya Eyacuiñajji ese bameejji poani —acanaje beca cuaa. Jamaya jjashahuabaquianijo, Jesosaa oya cuana Eyacuiñajjija bacua cuana po mee canaje jama baꞌa:

¹³Yahuajo eseja ejeajjiya eseya jea ca poa; eseja enaeseya eseya mejo ca poa. Jamajjeya eseya cuayani ese ejjaja bacua, Eyacuiñajjija bacua pojjeama. Eyacuiñajjiya ca ca eseya oja bacua a sa acanijo ohuaya ohuaye nei eseya oja bacua po mee cani. Esohui quea bihui nee Jesosa Quitojo

¹⁴Jamajjeya oya Eyacuiñajji ese ba meeya poeyanaje yamijji, ese cuana nijje baꞌeya. Ecuanaa oya banaje quea caꞌa nee nee. Oja Chiiya oya, oja Bacua Ejja oe nei quea caꞌa nee huoojea canaje meshi yasijje ese cuana jaahuana tiitiijji. Ohuaya ojjaña Eyacuiñajjija esohui eꞌe nei huohui canaje ojjaña huasijje peaꞌai.

¹⁵Huaniya ojo huohui canaje. Majoya oya ba majje taaanaje jama baꞌa: —¡Bacue! Jjeya nei pea dejja quea pame nee poeje. Yahuajo nei nei e cuaya jjimahuajo oya yaña tiitiia poa Eyacuiñajji nijje. Jamajjeya oya quea caꞌa nee nee; eya quea caꞌa pishana —poanaje Huani.

¹⁶Eꞌe, eseya shajjamaꞌ poani. Jamatii ohuaya ojjaña cuana quea jea nee nee atiitii cani quea pame nee nee.

¹⁷Yahuajo nei nei esohui huohuijji Moisesiya esohui Eyacuiñajjija ehuohuiꞌyo cuana tehue majje ba mee caꞌya poa. Jesosa Quitohua, ma Eyacuiñajjija huoojeaꞌyo ojjaña jaahuanajjiya ca ca ojjaña cuana ba mee canaje Eyacuiñajjiya eseya cuana quea jea nee nee acani, ojaya esohui eꞌe nei ba mee cani peaꞌai.

¹⁸Eyacuiñajji Echii Ai jjacojja ba meequi ajja tii. Jamatii oja Bacua Ejja oe nei Eyacuiñajji nei peaꞌai, Eyacuiñajji nijje nequi, oja Chii nijje tii. Ohuaya eseya Eyacuiñajji ba mee cani, oja Chii. Huaniya, ma ona besameejji poaniya huohui canaje Jesosa Quitojo

¹⁹Jamajjeya Jenosanena cuiñajjijo baꞌeya Jodio dejja etii cuaa Huani que huoojea canaje Eyacuiñajji nijje emimijji cuana, Eyacuiñajjija equi jaahuanajji cuana peaꞌai. Huani ba majje huohuiꞌajja canaje: —¿Aꞌya cuae mi soꞌo? ¿Aꞌa miya Eyacuiñajjija huoojeaꞌyo ojjaña jaahuanajji?

²⁰—Chojja —sajaꞌame acanaje Huaniya—, chojja, eya Eyacuiñajjija huoojeaꞌyo ojjaña jaahuanajji pojjeama. Eya ca ca iña Quito pojjeama —poanaje.

²¹—Jamajjeya ¿aꞌya cuae mi oe soꞌo? —huohuiꞌajja canaje—. ¿Aꞌa miya Enia, Eyacuiñajjija esohui huohuijji yahuajo baꞌya poa? —Chojja —sajaꞌame acanaje Huaniya—. Eya Enia pojjeama. Jamajjeya huohuiꞌajja ca oꞌoyanaje cuaa jama baꞌa: —Eꞌe. Yahuajo Moisesiya huohui ca poa Eyacuiñajjija pea esohui huohuijji nei poeje. ¿Aꞌa miya ma esohui huohuijji neiya? —Chojja —Huaniya acanaje.

²²Jamajjeya Jodio cuaa Huani huohuiꞌajja ca oꞌoyanaje: —¿Aꞌya cuae mi oe? ¿Aꞌya cuae mi poani soꞌo, de? ¡Huohuicue mo oe! Jodio etii cuaa ecuana huoojea canaje mi baa. ¿Yajja huohuiñaquiꞌyome acuae oe aje o que poqui oꞌoya majje soꞌo?

²³Jamajjeya Huaniya sajaꞌa canaje jama baꞌa: —Yahuajo nei nei Eyacuiñajjija esohui huohuijjiya Isaiaa ejo huohui ca poa jama baꞌa:“Quijje esohui huohuijji poeje esohui huohuiya. Meshi quimajo huohui huichaꞌa huichaꞌa caje jama baꞌa: “Emeshi mese nei poeje. ¡Jamajjeya oe apoa pocuajicue! ¡Jamajje o poeyajo, ojaya esohui quea jaꞌa nee shajjaꞌajja neineiꞌyocue!” Jamaya acaꞌya poa Isaiaa yahuajo —Huani poanaje.

²⁴Jamajoya ma Jodio dejja cuanaa Huani huohuiꞌajja ca oꞌoyanaje: —¿Aꞌa eꞌe jojo nei miya Eyacuiñajjija huoojeaꞌyo ojjaña jaahuanajji pojjeama? ¿Aꞌa cuae mi Enia pojjeama, ma Eyacuiñajjija esohui huohuijji yahuajo baꞌya poa pojjeama soꞌo? ¿Aꞌa cuae mi Eyacuiñajjija pea esohui huohuijji nei, ma ecuanaja etiiquiaa ishoaꞌajja caninaje pojjeama soꞌo? ¿Achajjajo acuaeya oe miyaya ecuana, Jodio cuana, besa meeaña Eyacuiñajjijo soꞌo? —poanaje cuana.

²⁵

²⁶Huaniya jama acanaje baꞌa: —Eyaya miquianaya Eyacuiñajjijo besa meeaña cuei enajo. Pea dejja jiquio tiijo nequi. Jjeya oya miquianajaya ba jjima.

²⁷Oya quijje pishana miquianajaya eba poaje Eyacuiñajjija huoojeaꞌyo ojjaña jaahuanajji. Oya ca ca oe nei quea caꞌa nee nee nequi. Eya ca iña quea caꞌa nee pishana. Jamajjeya aje oe eya Jesosa Quito cojja neijo nequi sa po ajja. Eya quea bicho, de.

²⁸Jamaya poanaje Huani Betaniajo, Jodana cuei ojje mijijje nequi, ojjaña cuana Eyacuiñajjijo besa mee canijo. Jesosa Quito Eyacuiñajjija huoojeaꞌyo ojjaña cuanaja mimishijo manoꞌyohua

²⁹Majoya mecahuajje Huaniya ojjaña huasijje esohui huohui ca oꞌoyanijo, Jesosa o que poeyanaje. Huaniya Jesosa ba majje ojjaña cuana huohui neinei canaje jama baꞌa: —¡Bacue oe, oya poeyani Jesosa, Eyacuiñajjija huoojeaꞌyo! Oya manojeꞌyo ojjaña cuanaja mimishi cuijeaꞌyojji. Eꞌe, Eyacuiñajji nijje emimijji cuaa ñajjajja cuia majje Eyacuiñajji yasijje dahua cani oya mimishi cuanajo queneꞌama epo meejji. Ñajjajja jayojja jama poajeꞌyo Jesosa; manojeꞌyo ojjaña cuanaja mimishi cuijea neineiꞌyojji —Huani poanaje—.

³⁰Eꞌe, yahuajo pishana eyaya miquianaya huohuinaje ojo jama baꞌa: Jjeya nei pea dejja quea pame nee nee poeje. Yahuajo nei nei e cuaya jjimahuajo oya yaña tiiya poa Eyacuiñajji nijje. Jamajjeya oya quea caꞌa nee nee; eya quea caꞌa pishana —Huani poanaje.

³¹—Eꞌe, yahuajo oya ecuea ba jjima poa. Jamatii Eyacuiñajjiya e huoojea jjimahuajo huohui canaje jama baꞌa: “¡Dejja cuana besa meecue enajje ejo! Besa meeañajo, miyaya baje oe dejja. Ecuea Edojjoshahua Pame huiaꞌ jama ma dejja sapa biajje cuabesa baꞌeje; jjapashineijje baꞌeoquejeꞌyo. Maya ecuea ecue Bacua Ejja, ecue huoojeaꞌyo. Ohuaya ojjaña miquiana que Edojjoshahua Pame dobiqui mee cajeꞌyo, miquiana quea jaꞌa nee nee ejjashahuabaqui meejji” eya acanaje Eyacuiñajjiya —Huani poanaje. —Eꞌe, eyaya eꞌe jojo nei banaje jama baꞌa: Eya Jesosa besa meeañajo, eyatahuatahua jjacaꞌapejoquinaje. Eyacuiñajjija Edojjoshahua Pame huiaꞌ jama o sapa biajje cuabesa baꞌenaje. Jjapashineijje baꞌeoquenaje. Jamajjeya jjeya oya ecuea eba nei nei, Jesosa. Yahuajo miquianajaya oya ba jjima. Jamajoya eya poeyanaje ojjaña Eyacuiñajjijo besa meeya. Miquianaya oya Eyacuiñajjija huoojeaꞌyo ojjaña jaahuanajji ba meeya eya poeyanaje peaꞌai.

³³

³⁴Jamajjeya eyaya miquianaya huohui neineiaña: Eꞌe jojo nei nei eyaya oya banaje. Jesosa ca ca oe eꞌe jojo nei Eyacuiñajjija Bacua Ejja oe nei —poanaje Huani Jodio cuana nijje. Jesosaa iyaa canaje beca dejja onijje eꞌani tiitiijji, o shajjaꞌajjajji

³⁵Majoya mecahuajje Huaniya, ma ona besameejji poaniya jomajo, Jodana cuei sahuajo nequiya esohui huohui canaje oja epeejji nijje, becanejjijji peaꞌai nijje.

³⁶Jesosa jjayejjequiani ba majje Huaniya oja epeejji cuana huohui canaje jama baꞌa: —¡Bacue Jesosa! Oya Eyacuiñajjija huoojeaꞌyo. Oya manojeꞌyo ojjaña cuanaja mimishi cuijeaꞌyojji.

³⁷Huanija esohui Jesosajo shajjaꞌajja majje oja epeejji becanejjijji peaꞌai Jesosa nijje poquinaje.

³⁸Jesosaa ejiojjijje poquijeya Huanija beca epeejji o quiquishijji poquije bajea canaje. Ba majje huohuiꞌajja canaje: —Epeejji cuana, ¿ajeo miya enijje poeyani? —Esohui huohuijji —sajaꞌa canaje—, ecuana poeyanaje mi baa; mi shajjaꞌajja sa poani. ¿Achejo baꞌe miya? —poanaje.

³⁹—Eꞌe —Jesosa poanaje—, ¡ocue poeꞌajja! ¡Cuaꞌa, enijje poꞌyocue! Jamajjeya Jesosa nijje poquinaje equi yasijje, o baꞌe yasijje. Onijje aninaje ma pojjajo, eshequi oquequiajo; o shajjaꞌajjajji poꞌyonaje oya cuana, ma bajjani baꞌa: Anesi oja epeejji nijje peaꞌai.

⁴⁰Eꞌe, Anesi pea dejja nijje Huanija ehuohui shajjaꞌajja majje Jesosa nijje poquinaje. Anesi ca ca Simohuija echahua mese, ma quijje bajjani canaje Penoja echahua mese.

⁴¹Jamajjeya mecajjeahua nei Anesiya oja oꞌi saꞌajja canaje. Ba majje huohui canaje: —Oꞌi, eyaya Eyacuiñajjija huoojeaꞌyo ese jaahuanajji banaje, Jesosa Quito.

⁴²Majoya Anesiya oja oꞌi Simohui bajjani Jesosa que dojo canaje. Simohui ba majje Jesosaa huohuiꞌajja canaje jama baꞌa: —Epeejji, miya ecuea eba. Miya Huanija bacua ejja, Simohui bajjani. Eyaya miya bajjanijeꞌyo ecuea esohuijo Sepa bajjani —poanaje. Jienoja esohuijo Peno bajjani canaje, Ese Ejjaja esohuijo Mei bajjani. Jesosaa iya canaje pea cuana onijje eꞌani tiitiijji, o shajjaꞌajjajji

⁴³Majoya mecahuajje, mecajjeahua nei Jesosa poquinaje Janinea meshi yasijje, Jodana cuei ojje miji yasijje. Poqui jeahuaa Penipe ba canaje. Ba majje iyaa canaje: —Penipe, ¡ocue poeꞌajja, enijje poꞌyocue; ecuea epeejji poꞌyocue! —Jesosaa acanaje; o que poquiajo ojaya epeejji pojji acaꞌyonaje.

⁴⁴Penipe, Peno, Anesi peaꞌai ca ca oe Betesaida cuiñajjijo baꞌe.

⁴⁵Jamajjeya Penipeya oja epeejji Natanaeni saꞌajjaqui canaje. Ba majje huohui canaje: —Ecuea epeejji, ecuanaa Eyacuiñajjija huoojeaꞌyo ese jaahuanajji banaje. Ojo Eyacuiñajjija esohui huohuijjiya yahuajo nei nei baꞌya poaa, Moisesiya peaꞌaiya tehue ca poa, ma ojjaña Jodio cuaa ishoaꞌajja caniya. Oya Jesosa bajjani, Joseja bacua ejja, ma Nasanena cuiñajjijo baꞌenaje. Eyaya maya banaje, de —poanaje Penipe.

⁴⁶—¿Aꞌa oya Nasanenajo baꞌenaje? Jomajo pa jjaja chamaꞌ dejja quea pame —poanaje Natanaeni. —Chojja —poanaje Penipe—, ¡poecue, oya bahuacue!

⁴⁷Jamajjeya oya cuana poquinaje Jesosa baa. Majoya Natanaeni poeje ba majje Jesosa onijje miminaje jama baꞌa: —Eꞌe Natanaeni, miya Jodio eꞌe jojo nei. Eyacuiñajji shajjaꞌajjajji poani. Miya ca ca oe siajje po ajja nei nei peaꞌai.

⁴⁸Ma shajjaꞌajja majje Natanaeni jama poanaje baꞌa: —¿Aꞌa eya miquea eba? ¿Ache shono acuaeya miyaya eya banaje soꞌo? —poanaje. —Natanaeni, miya ecuea eba yahuajo. Penipeja iyaa jjimahuajo, iquena acui yajjanajo ani eyaya miquea ejjashahuabaquijji banaje —Jesosa poanaje.

⁴⁹Jamajjeya Natanaeniya acanaje: —Esohui huohuijji, eꞌe jojo nei miya Eyacuiñajjija Bacua Ejja oe nei poani tii. Eꞌe, ¡miya Jodio cuanaja Emeshi Mese nei!

⁵⁰Jesosaa oya huohui canaje: —Eyaya miya huohuinaje jama baꞌa: “Eyaya miya banaje iquena acui yajjanajo ani”. Jamajjeya ecuea esohui shajjaꞌajja majje miya jjashahuabaquinaje jama baꞌa: “Eꞌe jojo nei miya Eyacuiñajjija Bacua Ejja”. Jamajoya miyaya baje Eyacuiñajjiya eya ma dejjaja ba jjima amee cajeꞌyo. Cuanaya Eyacuiñajjija esohuidojojji cuana nequioqueje e jaahuanaa, ojjañaja Edoe Mese jaahuanaa. Jamaya miyaya bajeꞌyo, Natanaeni, enijje jjapeequianijo —Jesosa poanaje.

⁵¹