Read Ese Ejja Juan 18 Bible Online

Juan 18 - Ese Ejja bible

Juan 18

¹Majoya oja Chii nijje mimi majje Jesosa ecuana nijje poquinaje. Etaꞌa namaꞌ Senono bajjani ojje miji yasijje poqui majje onimo acui yiye yasijje poquinaje.

²Yahuajo Jesosa ma acui yiye yasijje poqui majamajanaje ecuana nijje. Jamajjeya jiquio acui yiye Jodasaja eba neinei poanaje, ma Jesosa iña meesahuajji epojjija eba neinei poanaje.

³Jamajjeya mecajje onimo yiye yasijje Jodasa poeyanaje Jesosa que, sohuinano cuana nijje. Jodio etii cuaa, Paniseo cuaa peaꞌai sohuinano cuana, Eyacuiñajjija equi cuiñajji cuana peaꞌai huoojea canaje Jodasa nijje, Jesosa iñaa. Ojjaña poeyanaje baajji, cuaquijijijji peaꞌai.

⁴Jesosaja ojjañaja ejjashahuabaquijji cuana ojaya eba poanaje. Jamatii oya cuana que poqui majje huohuiꞌajja canaje jama baꞌa: —¿Ajeo a nequiana ca poeyanaje? ¿Ae saꞌajjaꞌyohua?

⁵—Jesosa ma Nasanenajo baꞌenaje saꞌajjaña ecuaaya —poanaje cuana. —Eꞌe, eya jiquio Jesosa bajjani —Jesosa poanaje. Jodasa aje oe sohuinano cuana nijje nequinaje, Jesosa iña meeya poe.

⁶Jesosaja esohui shajjaꞌajja majje sohuinano cuana, Eyacuiñajjija equi cuiñajji cuana peaꞌai edaasajje tii jaabichaquinaje, oquequinaje meshi yasijje mete majje.

⁷Jamajjeya Jesosaa oya cuana huohuiꞌajja ca oꞌoyanaje: —¿Ae saꞌajjaña? —Ecuaaya Jesosa saꞌajjaña, ma Nasanenajo baꞌenaje —poanaje.

⁸—Eꞌe, eya jiquio Jesosa bajjani —Jesosa poanaje—. Miquianaaya eya oe nei saꞌajjañajo, ¡ecuea epeejji enijje nequi capoquiahua! —Jesosa jamaya poanaje ojaya epeejji cuana nahuejji.

⁹Eꞌe, yahuajo Jesosa oja Chii nijje jama poanaje baꞌa: “Ojjaña joya miya enijje jjapeequi meesahuanaje eyaya jaahuananaje” jamaya poanaje Jesosa oja Chii nijje yahuajo.

¹⁰Eyacuiñajji nijje emimijji etiija echacojji Manico bajjani sohuinano nijje nequinaje. Majoya Simohui Penohua baa iña majje Manico shajja jajasejjajea caꞌyonaje; esapa jajapojojeajji nisho acanaje. Eshajja ebianei mijijje jajasejjajea caꞌyonaje, Manicoja.

¹¹—Peno, ¡miquea baa jja oe ejee yasijje nequiaꞌyocue! ¡Ecue Chiija ejjashahuabaquijji ejo jayojja jama capoahua eya, jamatii quea nee nee poaje! —Jesosa poanaje. Jesosa iña majje dojo canaje Anasi que

¹²Majoya esohuinano huoojeajjiya ojaya sohuinano cuana nijjeya, Jodio etii cuanaja huoojeaꞌyo sohuinano cuana nijjeya peaꞌaiya Jesosa iña caꞌyonaje. Me jeyo majje dojo canaje.

¹³Anasija equi yasijje ebionei dojo canaje, ma Caipaja babaja equi yasijje.

¹⁴Caipa aje oe ma shequiajajo Eyacuiñajji nijje emimijji etii poanaje. Ohuaya yahuajo pishana Jodio etii cuana huohui canaje jama baꞌa: —¡Oe dejja camanoquiꞌyahua ojjaña cuanajo! Jamaya quea pame nee poajeꞌyo esejo —poanaje. Peno siajje poanaje Jesosajo

¹⁵Jesosa dojo canaje cuaa, Peno enijje quea huesha pishana ocuenaje achajja Jesosa onaa acaje baa. Eya jiquio esohui tehuejji Huani bajjani. Eya Anasija eba. Jamajjeya eya dobiqui mee canaje ojaya equi yasijje, ma ojjaña Eyacuiñajji nijje emimijji cuana ojee mimiani yasijje.

¹⁶Peno ca ca esecuejo nequinaje, dobiqui mee jjima jjejojo. Jamajjeya eya Anasija eba neineijo cuayaqui oꞌoyanaje. Esecue jaahuanajji nijje epona nijje e mimiajo, ohuaya Peno dobiqui mee canaje.

¹⁷Ma eponaa esecue jaahuanajjiya Peno huohuiꞌajja canaje: —¿Aꞌa miya peaꞌai Jesosa nijje poani, o shajjaꞌajjajji? —Chojja. Jesosa shajjaꞌajjajji pojjeama ca ca iña —siajje poanaje Peno quea mete jjejojo.

¹⁸Quea huoejo echacojji cuana, esohuinano mese cuana peaꞌai cuaqui pejje nei yasijje poeyanaje. Cuaqui pejjejo jjayoqui nequinaje. Jamajjeya Peno jjanequichipiqui majje cuaquijo ejjayoquijji nequinaje ona nijje. Anasiya Jesosa huohuiꞌajja canaje ojaya esohuijo

¹⁹Majoya Anasiya Jesosa huohuiꞌajja canaje ojaya esohuijo, o shajjaꞌajjajji cuana peaꞌaijo.

²⁰Jesosaa sajaꞌa canaje: —Eyaya esohui huohuinaje ojjaña cuana huasijje. Esohui huohuinaje Eyacuiñajjija equijo, equi ojee ejjachichaquijjijo peaꞌai ojjaña Jodio cuanaja eshajjaꞌajjajji. Quehuajje esohui huohui jjima.

²¹Jamajjeya ¿apiojji acuae jja oe miyaya eya huohuiꞌajjaña ecuea ehuohui cuanajo soꞌo? Ojjañaa eya shajjaꞌajja canaje. ¡Jamajjeya oya cuana huohuiꞌajja socue! —Jesosa poanaje.

²²Jesosa shajjaꞌajja majje sohuinanohua oya shemo cuiasejjajea canaje emeya. Huohui canaje: —¡Aꞌa jamaya mimijji Eyacuiñajji nijje emimijji etii nijje! —tecuea canaje.

²³—¿Aꞌa jjaya eya esohui quea tai aña? ¡Eyaya esohui quea tai añajoya jja ca iña oe huohuicue! Ecuea siajje ajjima cuana. Jamajjeya ¿apiojji acuae iña emeya cuiaña? —Jesosa poanaje.

²⁴Majoya Anasiya Jesosa huoojea canaje Caipaja equi yasijje. Eme jeyo tii, pichojea jjima. Ma Caipa ca ca oe Eyacuiñajji nijje emimijji etii ma shequiajajo poa. Peno siajje po oꞌoyanaje

²⁵Peno aje oe cuaqui pejjejo tii nequinaje ejjayoquijji. Jamajjeya pea cuaa oya huohui canaje: —Eꞌe, miya eꞌe jojo nei Jesosa shajjaꞌajjajji poani peaꞌai —poanaje. —Chojja. Eya ojaya epeejji pojjeama —Peno siajje poanaje.

²⁶Jamajjeya Peno nijje nequinaje Eyacuiñajji nijje emimijjija echacojji Manicoja huapa pojjeama, ma Penohua shajja jajasejjajea canajeja huapa pojjeama. Ohuaya Peno jama acanaje baꞌa: —Eyaya miya banaje Jesosa nijje Onimo yiyejo, de —poanaje.

²⁷—Chojja, de, Jesosa ecuea ba jjima —nisho po oꞌoyanaje quea mete jjejojo. Peno mimianijo tii cachina yahue taaanaje. Eꞌe, ma ecua Jesosaa oya huohui canaje jamaya Penohua acanaje. Shomano emeshi mese Pinato bajjani yasijje Jesosa dojo canaje cuaa

²⁸Majoya mecajjeahua nei onaaya Caipaja equijo nequi Jesosa huoojea canaje Shomano emeshi mese Pinato bajjani yasijje. Jomajo Pinatohua ojjaña huoojea cani equi yasijje Jesosa dojodobiaqui canaje sohuinano cuaa. Pinato ca ca Jodio pojjeama, Shomano dejja. Jamajjeya Jodio etii cuana ojaya equi yasijje dobiqui sa po ajja. Eꞌe, Jodioja etiiquianaja etehueꞌyo jama poani baꞌa: “Jodio pojjeamaja equi yasijje dobiquiajo, esohuidojojjiya Jodioja bacua cuana cuia ajja shejo ojee ijjia meemee ajja pea Jodio cuana nijje Eyacuiñajji bihuiajji”.

²⁹Jamajjeya Pinato Jesosa ba majje esecue yasijje cuayaquinaje Jodio etii nijje mimiya. Cuayaqui majje huohuiꞌajja canaje Pinatohua: —¿Ajeo shai miquianaaya jiquio dejja tecueaña soꞌo? ¿Yajja acuae oya poanaje? ¡Huohuicue mo!

³⁰—Oya aje oe quea tai pojjeama jojjemo ye jjima pome mi que —Jodio etii cuana Jesosajo siajje poanaje.

³¹—¡Miquianaaya jja oe oya dojoꞌyocue! ¡Miquea etiiquianaja etehueꞌyo jayojja jama oya acue! —Pinato poanaje. —Chojja Pinato, Shomano emeshi mese neiya Sesaa ecuana dejja mimishi caca meeꞌyo jjima acani acui ecueataꞌapeejo. ¡Miquea esohuijo oe mano meeꞌyocue! —poanaje Jodio etii cuana.

³²Eꞌe, jamaya Jodio etii cuaa acanaje ma ecua Jesosaa huohui canaje jayojjaya yajji. Eꞌe, yahuajo Jesosa jama poanaje baꞌa: “Quijje eya baꞌehuanasohuajea cajeꞌyo cuaa acui ecueataꞌapeejo” poanaje.

³³Majoya Pinato equi yasijje dobiqui oꞌoyanaje Jesosa nijje mimiya. Sohuinano huohui canaje: —¡Jesosa e que jjequicue! Sohuinano cuaa Jesosa jjequi cajo, Pinatohua huohuiꞌajja canaje: —Jesosa, ¿aꞌa miya eꞌe jojo nei Jodioja Emeshi Mese? ¡Huohuicue mo oe! —poanaje.

³⁴—Pinato, ¿aꞌa miya jamatii jjashahuabaquiani eya Emeshi Mese poani? ¿Aꞌa pea cuaa miya ejo jamaya huohui canaje pojjaꞌa? —Jesosa poanaje.

³⁵—Eya ca ca iña Jodio pojjeama. Jamajjeya miya ecuea eba pojjeama, de. Miya Jodio. Jodio etii cuaa, Jodio Eyacuiñajji nijje emimijji etii cuaaya miya iña majje jjequi canaje e que. Jamajjeya ¡huohuicue mo! ¿Ae poanaje miya? ¿Yajjajje acuae minijje quea quene nee nee poani cuana? —Pinatohua huohuiꞌajja canaje.

³⁶Jesosaa oya sajaꞌa canaje jama baꞌa: —Eꞌe, eya Emeshi Mese. Jamatii pea emeshi mese jama pojjeama eya. Jiquio meshi cuanajo dejja cuana huoojeaꞌyojji pojjeama. Eya jiquiojo emeshi mese poani jojjemo ecuea echacojjiya Jodio etii nijje jjaquecuaquime, Jodio etii cuaa e iña mee cajo —Jesosa poanaje.

³⁷—Jamajjeya miya emeshi mese poani, Jesosa. ¿Aꞌa eꞌe? —Pinato poanaje. —Eꞌe, eya Emeshi Mese poani, miyaya eya eꞌe jojo nei aña —Jesosa poanaje—. Eya eyajo ani meshi yasijje poeyanaje. Cuayanaje ojjaña cuana Eyacuiñajjija esohui eꞌe nei ba meeya. Ojjaña joya esohui eꞌe nei jayojja jama a sa poaniya ecuea esohui shajjaꞌajja cani —Jesosa poanaje.

³⁸—¡Dee! Esohui eꞌe nei chamaꞌ pojjaꞌa —Pinato poanaje. Majoya oya esecue yasijje cuayaqui oꞌoyanaje Jodio etii cuana nijje mimi oꞌoyaa. Jama poanaje baꞌa: —Eyaya Jesosaja esohui shajjaꞌajjanaje. Oya ca ca quea tai pojjeama, mimishiꞌama, de —Pinato poanaje—.

³⁹Jamajjeya jjeya miquianaya ojee ijjiaꞌijjiaje esohuidojojjiya yahuajo nei etiiquianaja ebacua cuana cuiaꞌyo jjima acaꞌya poa shejo. Ojjaña shequiaja jiquio shejo eyaya oe Jodio dejja ejeanobiajaa huoojeacuayajeaꞌyaña miquianaya quea bihui nee epojji. Jamajjeya ¿eꞌe pojjaꞌa eyaya Jodio cuanaja Emeshi Mese Jesosa bajjani pichojeaꞌyajo, Jodio cuana quea bihui nee nee poaje? —Pinato poanaje.

⁴⁰Jodio etii cuaa Pinato sajaꞌa canaje quea tecueya: —¡Chojja! ¡Aꞌa jja oe Jesosa pichojeaꞌyojji! ¡Mashamaꞌ jja oe pichojeaꞌyocue! —janobajjima nei taaanaje Jodio etii cuana. Mashamaꞌ aje oe siipojji quea mas e poan aje.