Read Ese Ejja Romanos 14 Bible Online

Romanos 14 - Ese Ejja bible

Romanos 14

¹Jesosaja epeejji cuana, miquianaaya pojjaꞌa Eyacuiñajjija esohui quea jaꞌa nee baña. Jesosaja epeejji beca cuana ca ca quea jjashahuabaqui jaꞌa pishana. ¡Jamatii onijje jjapeequicue quea bei! ¡Aꞌa mimicuiajeanobiajeajji ojaya esohui quea quehuajo!

²Eꞌe, miquianaya beca cuana jjashahuabaquiani jama baꞌa: —Ojjaña noe cuana caꞌijjiahua, jamatii onaaya baꞌehuana canaje ecuiquiaja eꞌijjiajji nisho. Ecuaaya ijjiaꞌyajo Eyacuiñajji ecuana nijje quea quene pojjeama poaje —jamaya beca cuana poani. Jamajjeya noe ijjiaña, ojjaña. Beca cuana ca ca jama poani baꞌa: —Chojja, ¡noe ma onaaya ecuiquiaja eꞌijjiaꞌyojji nisho baꞌehuana canaje aꞌa ijjiajji! Ma eseya ijjiajo Eyacuiñajji quea quene poaje ese nijje —jama posoya acani. Jamajjeya acuijjajja cuana, bobi ebanaꞌyo peaꞌai ijjia cani; noe ijjiaꞌyo jjima acani quea meteya jjejojo.

³Noe ijjiajji cuana, ¡aꞌa jama pojji pea cuana nijje baꞌa: —¿Apiojji acuae miquianaaya acuijjajja, ebanaꞌyo oopana ijjiaña, noe ijjia ajja soꞌo? Chojja. ¡Aꞌa quea mete pojji! —aꞌa jamaya ajji! Oya jayojja noe ijjia ajja cuana, ¡aꞌa pea cuana nijje jama pojji baꞌa: —Miquianaaya aje oe noe ijjiaña. ¿Apiojji? Eyacuiñajji quea quene po chanaꞌ, de —aꞌa jamaya ajji! ¡Bacue! Eyacuiñajjiya noe ijjiajji cuana peaꞌai ojaya bacua cuana po mee canaje. Jamajjeya ¡aꞌa jamaya pea cuana nijje mimijji!

⁴Eꞌe, miquianaya noe ijjia ajja jjejojo mimimimiani. Eyaya miquianaya huohuiaña jama baꞌa: Eyacuiñajji ona huoojeajji poani, miquianaya pojjeama. Jamajjeya ¡aꞌa mimijajijji! Eyacuiñajji ona huoojeajji poanijo ohuaya ohuaye nei jama acaje baꞌa: —Eꞌe, miquianaya quea pame nee baꞌyani —Eyacuiñajjiya acaje. Quea jaꞌa baꞌe ajjajo ca ca: —Chojja, ¡aꞌa jamaya ajji! Quea tai —Eyacuiñajjiya acaje. Eyacuiñajji ese huoojeajji quea caꞌa poanijo, ohuaya eseya quea caꞌa po mee cani ojaya ejjashahuabaquijji jayojja jama ebaꞌejji.

⁵Cuanaya beca cuana jama poani baꞌa: —Beca epojja cuana Eyacuiñajji bihuiajji. ¡Ma epojja cuanajo aꞌa chacojji! Pea cuana ca ca jama poani baꞌa: —Ojjaña epojja oya jayojjaya, pea epojja jayojjaya. ¡Eyacuiñajji bihuiacue ojjaña pojjajo! —oya cuana poani. Jamajjeya ¡aꞌa pea nijje mimijji ache epojjajo chaco cajji! ¡Miquea ejjashahuabaquiꞌyojji epojja cuanajo jayojja jama acue! Pea cuana ojaya ejjashahuabaquijji jayojja jama caꞌa cahua peaꞌai epojja cuanajo.

⁶Eꞌe, Emeshi Mese neija esohui jayojja jama baꞌe sa poani miquianaya, ojjaña. Beca cuana quea huiso epojja cuanajo chacochaco ajja Eyacuiñajji bihuia poani jjejojo. Pea cuana ca ca oe pea epojjajo jayojjaya jama acani, oya jayojjaya. Noe ijjiajji cuaa esejaya Emeshi Mese nei bihuia cani. Ijjiaꞌijjia jjimahua Eyacuiñajji nijje mimiani jama baꞌa: —Eyacuiñajji, ecue Chii ai, eyaya miya bihuiaña noejo. Noe ijjia pojjimaꞌ cuaa esejaya Emeshi Mese nei bihuia cani peaꞌai jama baꞌa: —Eyacuiñajji, ecue Chii ai, eyaya miya bihuiaña jiquio bobijo, acuijjajjajo, esoꞌ cuanajo, ebanoꞌyojo cuanaya. Eꞌe, miyaya ojjaña tii meesahuaꞌyonaje —jamaya acani ohuaya.

⁷Jamajjeya ¡aꞌa esejaya ebaꞌejjijo, eseya sañajo jjashahuaba tiitiiquijji! Eseya eshe nequijo ca ca Jesosaja esohui jayojja jama cabaꞌyahua. Manoꞌyajo peaꞌai eseya Jesosaa jaahuana cajeꞌyo. Eseya ojaya tii poajeꞌyo.

⁸Eꞌe, eshe nequiya eseyaya Emeshi Mese nei Jesosaja esohui jayojja aña. Manoꞌyo majje onijje baꞌe tiitiijeꞌyo. Jamajjeya eshe nequi, manoꞌyajo peaꞌai ohuaya eseya jaahuana cani; ese huoojeajji poani tii tii oya.

⁹Jesosa manoꞌyo majje shequi oꞌoyanaje ese jaahuanajji epojji. Jamajjeya ese eshe nequi, manoꞌyajo peaꞌai oya, Jesosa esejaya Emeshi Mese nei poani tii tii.

¹⁰Jesosaja epeejji poani ojjaña eseya. Jamajoya ¿apiojji acuaeya Jesosaja epeejji quea jaꞌa nee nijje jjamimicuiajea nobiajeaquiani soꞌo? Cuanaya epeejji quea jaꞌa nee poaniya, ¿apiojji miquianaaya Jesosaja epeejji cuana niñebaña soꞌo? Oya Jesosaja epeejji peaꞌai. ¡Aꞌa pajeaꞌyojji quijje eseya ojjaña nequije Eyacuiñajji nequi cojja nei! Ohuaya huohui caje jama baꞌa: —Eꞌe jamaya, miyaya quea pame anaje —acajeꞌyo. Quea pame pojjeama añajo ca ca pea nijje jama poaje baꞌa: —Chojja, miya quea mimishi poanaje —acajeꞌyo Eyacuiñajjiya.

¹¹Eyacuiñajjija esohui etehueꞌyo jama poani baꞌa:“Eya Eyacuiñajji eshe tii tii nequi. Jamajjeya eꞌe jojo nei ojjañaa e cojja nei nequi majje, ecuiꞌoshajjajo nequioque majje eya bihuia caje jama baꞌa: —Miya ca ca oe Eyacuiñajji quea caꞌa nee, quea pame nee enequi tii tii —ojjaña poaje”. Jamaya esohui etehueꞌyo poani.

¹²Jamajjeya eꞌe jojo nei o cojja nei nequiajo, Eyacuiñajjiya eseya ojjaña huohuiꞌajja caje esejaya ebaꞌeꞌyojjijo. Quea jaꞌa baꞌenajeya eseyaya oya sajaꞌajeꞌyo quea bihui. Quea jaꞌa pojjeama baꞌenajeya ca ca quea mete sajaꞌajeꞌyo. ¡Ona quea mimishi po meejji aꞌa pojji!

¹³Eꞌe, Eyacuiñajjijo quea pame nee chacoañajo ¡ojaya pea epeejji cuana aꞌa niñebajji! Chojja, ¡jama acue baꞌa: —Jesosaja epeejji quea jjashahuabaqui jaꞌa po jjima ecuea ebaꞌejji ba majje quea mimishi po chanaꞌ. Jamajjeya eyaya maya eꞌamajajji pojjeama oya quea mimishi, quea mete nee epo meejji pojjeama —jamaya pocue!

¹⁴Esejaya Emeshi Mese neiya eya ba meesahua canaje jama baꞌa: Noe ma onaja baꞌehuanaqui ecuiquiaja eꞌijjiajji nisho eseya ijjiajo, Eyacuiñajji ese nijje quea quene pojjeama poani. Pea bobi eseya ijjiajo, jamaya peaꞌai poani. Jamatii Jesosaja epeejji beca cuana quea jjashahuabaqui jaꞌa pishana jama poani baꞌa: —Ma noe, bobi peaꞌai eseya ijjiajo, Eyacuiñajji quea quene poaje ese nijje —jama posoya acanijo, ohuaya maya ijjia jjima caꞌa cahua. Eꞌe, jamaya jjashahuabaquianijo ijjia majje oya quea mimishi poani.

¹⁵Miquianaya, noe ijjiajji cuana, ¡jjashahuabaquicue Jesosaja pea epeejji cuanajo, ma acuijjajja oopana ijjiajjijo! Jamajjeya miya noe ijjiajji ba majje ohuaya ijjia peaꞌai ca chanaꞌ, mi jayojjaya poaje. Jamatii oya cuana quea mete jjashahuabaquije jama baꞌa: —¡Dee! Eyaya eshahuaja bobi ijjianaje. Eyacuiñajji enijje quea quene poaje —jamaya jjashahuabaqui majje Jesosaja epeejji quea mimishi po chanaꞌ. Jamajoya jama acue baꞌa: ¡Jesosaja pea epeejji cuana quea jea acue! Oya caꞌaꞌama; quea mimishi po oꞌoya mee chanaꞌ. Jesosa onajo manoꞌyonaje peaꞌai. Jamajjeya ¡oya cuana jaahuanacue!

¹⁶Miquianaya jjashahuabaquiani pojjaꞌa jama baꞌa: —Eyaya jamaya aña, quea jaꞌa nee aña. Jesosaja epeejji quea jaꞌa pojjeama jjashahuabaquiani mi ba majje jama poani baꞌa: —Chojja, jamaya quea mimishi, quea tai —poso acani. Jamajjeya ohua jamaya huohui canijo, ¡aꞌa oe jamaya amajajji, jamatii miquianaya quea jaꞌa jjashahuabaquiani!

¹⁷Bobijo, eꞌishijji peaꞌaijo jjashahuabaquianijo pojjeama eseya Eyacuiñajji yasijje, ojjaña huoojeaꞌyojji poani yasijje poquijeꞌyo. Chojja. Quea jaꞌa nee, quea bihui nee, quea bei nee peaꞌai cabaꞌyahua Edojjoshahua Pameya eseya baꞌe meesahua canijo.

¹⁸Eꞌe, jamaya Jesosa Quito nijje baꞌyanijo Eyacuiñajjiya eseya huohui caje jama baꞌa: —Eꞌe, jamaya quea pame. Cuanaya ojjañaa mijo huohui caje jama baꞌa: —Oya Jesosa Quitoja epeejji quea jaꞌa nee nee poani —acaje.

¹⁹Jamajjeya ¡jjashahuaba tiitiiquicue ojjaña Jesosaja epeejji cuana nijje quea bei nee ebaꞌejji! ¡Pea Jesosaja epeejji cuana quea jaꞌa po meesahuacue peaꞌai!

²⁰¡Aꞌa noe ijjiajji ecuiquiaja eꞌijjiajji nisho onaja baꞌehuana baꞌe! Quea mete oya cuana poaje. Eyacuiñajji onijje quea quene poani posojo ma bobijo onaya quea mete poanijo, ¡aꞌa ijjia majajji! Jamatii Eyacuiñajjija pana ojjaña bobi quea pame. Jamatii ma bobi miya ijjiajo onaya quea mete po mee chanaꞌ, quea mimishi po oꞌoya mee chanaꞌ.

²¹Eꞌe, eꞌe pojjaꞌa Jesosaja pea epeejji quea mimishi poaje miyaya ma bobi ijjiaña, acuijjajja na biso nei pojjaꞌa ishiaña ba majje. Eꞌe pojjaꞌa mi ba majjeya ohuaya quea mimishi acaje oꞌoya. Jamajjeya ¡aꞌa jamaya amajajji! Oya quea mimishi po oꞌoya chanaꞌ.

²²Jamajjeya ¡aꞌa Jesosaja pea epeejji cuana nijje jjamimicuiajea nobiajeaquijji bobi cuanajo, ebaꞌe meejji cuanajo peaꞌai! ¡Jjashahuaba neineiqui majje quea pame nee nee acue! ¡Jesosaja epeejji cuana quea pame ameesahuacue peaꞌai! Jamaya poanijo ojjaña Jesosaja epeejji quea bihui nee capoahua. Jesosaja epeejji quea mimishi po mee cani o ba majje ca ca cajjashahuabaquiahua jama baꞌa: —Chojja, eya ona mimishi pomeejji poani. Jamaya eya quea tai poani.

²³Eꞌe pojjaꞌa Jesosaja epeejji jjashahuabaquiani jama baꞌa: —Eꞌe pojjaꞌa jiquio bobi eya ijjiañajo, Eyacuiñajji enijje quea quene poaje —poani. Jamajjeya jamatii ijjia cajo, Eyacuiñajji onijje quea quene poaje. Eꞌe, ¡jjashahuaba neineiquicue Eyacuiñajjija esohui jayojja jama yajji! Ebaꞌe quea mimishi miquea eba. Jamajjeya ¡aꞌa jamaya ajji! ¡Eꞌe jojo nei quea pame nee pocue!