Read Ese Ejja Romanos 3 Bible Online

Romanos 3 - Ese Ejja bible

Romanos 3

¹Jodio cuana, ¿aꞌa miquianaya jjashahuabaquiani? Jama baꞌa: —Eyacuiñajjiya Jodio pojjeama cuana ojaya epeejji nei po mee cani ecuana jayojjaya. Jamajjeya ¿apiojji acuae etiiquianaja ehuohuiꞌyo jayojja jama cuiishasha jehuisejjajeaña? ¿Aꞌa Jodio pojjeama epojji quea pame nee nee, Jodio epojji quea pame pishana? —miquianaya pojjaꞌa jamaya poani.

²Quea pame nee Jodio epojji. ¡Bacue! Eyacuiñajjiya eseya Jodio cuana yahuajo nei nei ojaya esohui etehueꞌyo ba mee ca poa, ba majje pea cuana huasijje ehuohuiꞌyojji peaꞌai.

³Eꞌe, Eyacuiñajjiya esejaya etiiquiana Amajama bajjani huohui ca poa jama baꞌa: —Eyaya mique osecua cuana quijje nei nei baꞌeje quea pame nee nee ajeꞌyo; ecuea esohui quea pame jayojja jama ajeꞌyo —Eyacuiñajji poa. —Esejaya etiiquiana Eyacuiñajjija esohuijo shajjamaꞌ poajo, ¿aꞌa Eyacuiñajjiya ojaya esohui pajea cajeꞌyo pojjaꞌa? ¿Aꞌa jamaya yajji pojjeama pojjaꞌa? —miquianaya poani pojjaꞌa.

⁴¡Chojja de! Dejja cuana siajje poani, ojjaña. Eyacuiñajji ca ca siajje po ajja nei nei. Ma ecua ohua huohui canaje jayojjaya ohuaya acajeꞌyo. Ojaya esohui yahuajo nei etehueꞌyo jama poa baꞌa:“Eyacuiñajji, miyaya ca ca oe esohui eꞌe nei huohuiaña tii tii. Miquea ejjashahuabaquiꞌyojji ba majje ojjañaa ba caje miya eꞌe jojo nei poani, siajje po ajja nei nei”. Jamaya Eyacuiñajjija esohui yahuajo nei tehue ca poa.

⁵Jodio cuana, miquianaya jjashahuabaquiani quea quehua, de; jamaya poso nequiana jjabaquiani baꞌa: —Ecuana quea mimishi poanijo, ojjañaa Eyacuiñajji bihuia caje jama baꞌa: “Eyacuiñajji oe nei quea jaꞌa nee poani, oe nei quea pame”. Jamajjeya ¿apiojji shai Eyacuiñajjiya ecuana quea nee nee po mee cajeꞌyo quea mimishi poanijo? —jamaya miquianaya Eyacuiñajji ba po jjima jayojja jama jjashahuabaquiani, quea quehua.

⁶Chojja Jodio cuana, jamaya pojjeama. Jamaya eꞌe nei poa jojjemo Eyacuiñajjiya mimishi cuana tecuea jjima acaꞌyome. Eyacuiñajjiya eꞌe nei nei acani tii tii. Eꞌe jojo nei ojjaña shajjamaꞌ cuana ohuaya quea nee nee po mee cajeꞌyo mimishi poani sosejje.

⁷Jamatii miquianaya quea quehua jjashahuabaquiani jama peaꞌai baꞌa: —E siajje poanijo pea cuaa Eyacuiñajji bihuia cani jama baꞌa: “Eyacuiñajji oe nei siajje po ajja nei nei” acaje cuaa. Jamajjeya ¿apiojji shai Eyacuiñajjiya eya quea nee nee po mee cajeꞌyo siajje poanijo? —miquianaya aje jja oe jamaya poani.

⁸Cho, jamaya pojjeama. Jamaya eꞌe nei poa jojjemo, ca ca e siajje poanijo pea cuaa Eyacuiñajji bihuia cani ecuana siajjepojji pome. Eꞌe, beca cuaa aje oe eya niñeba cani jama baꞌa: —Pabohua aje jja oe jamaya huohui cani baꞌa: “¡Quea mimishi oe pocue pea cuana quea pame nee ebaꞌe meesahuajji!” —onaaya jama eya niñebameya acani. Cho, eya jamaya po ajja. ¡Jamaya niñeba canijo, Eyacuiñajjiya oya cuana quea nee nee capo mee cahua, de! Eyacuiñajjiya ojjaña cuana ba cani shajjamaꞌ jayojja

⁹Jodio pojjeama cuana shajjamaꞌ nei nei poani. ¿Aꞌa Jodio cuana shajjamaꞌ pishana? Chojja, Jodio cuana Jodio pojjeama cuana jayojjaya jama poani. Ojjaña shajjamaꞌ nei nei peaꞌai poani.

¹⁰Eyacuiñajjija esohui yahuajo nei nei Dabiya tehue ca poa jama baꞌa:“Ecuea esohui jayojja jama aꞌajja ojjaña cuaa. Chamaꞌ joya quea pame poani.

¹¹Ecuea esohui eꞌe nei ba sa po ajjajo ojaya ba jjima ecuea ejjashahuabaquiꞌyojji. Oya cuana e ba sa poꞌyo ajja peaꞌai.

¹²Chojja, oya cuana eshahua nijje poani, enijje jjapeequi ajja quea mimishi jjejojo. Shajjamaꞌ jjejojo quea pame po ajja ojjaña cuana.

¹³Ojjañaa esohui quea tai nee nee acani. Quea tai nee nee ojjañaja esohui, aquiana quea ihui jayojja. Ojjaña siajjepojji peaꞌai, siajje popajeaꞌyo ajja peaꞌai. Ojjaña mimijajijji poani peaꞌai. Quea tai nee nee ojjaña poani. Jiquio ecua peyo se naa quea nee nee po mee cani jayojja jama ojjaña cuaa onaya quea yeno po mee cani.

¹⁴Ojjaña quea tecue nee nee poani, panajajiani peaꞌai.

¹⁵Oya cuana quenequene cuaji majje jjaquecuaquiani.

¹⁶Oya cuana aje oe ona quea mimishi pomeejji poani; ojjaña quea yeno nee nee po mee cani.

¹⁷Ojjaña quea bei baꞌe ajja tii tii.

¹⁸Ejo jjashahuabaqui ajja tii tii, jjashajjaꞌajjaqui ajja peaꞌai”. Jamaya Eyacuiñajjiya yahuajo nei tehue mee ca poa.

¹⁹Jamatii esejaya eba Jodio cuana jama siajje poani baꞌa: —Eyacuiñajjija esohui Moisesija etehueꞌyo jayojja jama ecuanaaya aña. Jamatii Eyacuiñajjiya Jodio cuana jama acani baꞌa: —Miquianaya aje oe ecuea esohui ba majje jama aꞌajja. Shajja huejjamaꞌ jayojja miquianaya poani. Jamajjeya Eyacuiñajjiya ojjaña cuana quea nee nee po mee cajeꞌyo; Jodio cuana, Jodio pojjeama cuana peaꞌai quea jeca poajeꞌyo, quea mete poajeꞌyo shajjamaꞌ poani jjejojo.

²⁰Eꞌe, Eyacuiñajjija esohui Moisesija etehueꞌyo ba majje ojjaña cuana jama poaje baꞌa: —Eꞌe, eya shajjamaꞌ jayojja jama poani —ojjaña poaje. Jamajjeya Eyacuiñajji ojjaña nijje mimi ajja jama baꞌa: —Miquianaaya ecuea esohui etehueꞌyo jayojja jama eꞌe jojo nei aña. Jamajjeya miya quea pame nee nee —jamaya mimi ajja Eyacuiñajji. Chojja, ojjaña shajjamaꞌ poani, ojjaña tii. Jesosa nijje eꞌe jojo nei jjapeequianijo Eyacuiñajjiya esejaya mimishi cuijea cajeꞌyo

²¹Yahuajo nei nei Eyacuiñajjija esohui huohuijjiya, Moisesiya peaꞌai jama sohuihuohuime aca poa baꞌa: “Ojjaña joya eꞌe jojo nei onijje jjapeequiani Eyacuiñajjiya quea boejea po mee cajeꞌyo” yahuajo jama huohuimeya aca poa. Jamatii ojjaña jjashahuabaquinaje Eyacuiñajjiya ojjañaja mimishi cuijea cajeꞌyo Moisesija esohui etehueꞌyo jayojja jama añajo poso.

²²Eꞌe, Eyacuiñajjiya esejaya mimishi cuana cuijea cani jama huohuime amajje baꞌa: —Ecuea eba Jesosa Quitohua ecuea mimishi cuijea cajeꞌyo. Eya onijje jjapeequijeꞌyo. Eꞌe, Jodio cuana Jodio pojjeama jayojjaya jama acajeꞌyo Eyacuiñajjiya.

²³Ojjaña cuana ojjaña meshijo baꞌe quea mimishi nee poani. Jamajjeya Eyacuiñajji ojjaña cuana nijje quea bihui pojjeama, o jayojja jama po ajjajojo.

²⁴Jamatii Eyacuiñajji quea pame nee nee. Ojjaña quea jea nee acanijo ojjaña shajjamaꞌ cuanaja mimishi cuijeaꞌyo majje ojjaña ba cani mimishiꞌama. Jamaya Eyacuiñajjiya acani Jesosa Quito ojjaña cuanaja mimishi cuijeaꞌyojji sosejje manoꞌyonajejo.

²⁵Eꞌe, Jesosa Quito esejaya mimishijo manoꞌyonaje; ojaya enaꞌ cuayaquinaje. Jamajjeya ojjaña eseya jama mimianijo baꞌa: —Jesosa Quito manoꞌyonaje ecuea mimishijo —jamaya poanijo, Eyacuiñajjiya esejaya mimishi cuijeaꞌyo majje eseya ba cani mimishiꞌama. Eꞌe, Eyacuiñajjiya Jesosa ba ca poa ñajjajja equecuaꞌyo jayojja, ma ona mimishi cuana nijje quea bei nee epojji. Eyacuiñajjiya oya Jesosa Quito mano mee caꞌya poajo, ojjaña ba mee cani oya eꞌe jojo nei quea pame poani. Eyacuiñajji jama poani baꞌa: —Mimishi cuana sosequiaꞌyojji oe dejja camanoquiꞌyahua. Yahuajo nei nei Jesosa manoꞌyo jjimahuajo ojjaña cuana shajjamaꞌ poa. Jamatii Eyacuiñajjiya ishoa canaje; mimishi cuijeaꞌyo jjima acanaje Jesosa manoꞌyo jjimahuajo. Jamajjeya Jesosa manoꞌyo jjimahuajo, dejja mimishi cuana jjashahuaba quehuaqui canaje jama baꞌa: —Eyacuiñajjiya pajea caꞌyonaje ecuanajaya mimishi cuana jamatii pojjaꞌa —poanaje. Jjeya ca ca Jesosa Quito manoꞌyonaje mimishi cuijeaꞌyojji sosejje. Jamajjeya Jesosa manoꞌyajo, Eyacuiñajjiya ojjaña ba mee can(...)

²⁶Jjeya peaꞌai Eyacuiñajjiya esejaya mimishi cuana cuijea caꞌyani Jesosa nijje jjapeequianijo. Jamajjeya ohuaya ojjaña ba mee cani oya quea pame nee nee poanijo Jesosaja epeejji cuanaja mimishi cuana cuijea caꞌyani. Eyacuiñajji jama poani baꞌa: —Jesosa miquea mimishijo manoꞌyonajejo, eyaya miquianaya baña mimishiꞌama —Eyacuiñajji poani. Jesosa nijje jjapeequianijo ca ca oe Eyacuiñajjiya eseya ba cani emimishi cuijeaꞌyo

²⁷Eseya jama po ajja baꞌa: —Eyaya ca eya Moisesija etehueya jayojja jama añajo, Eyacuiñajjiya eya mimishi cuijea caꞌyonaje —eseya jamaya po ca ajja nei nei.

²⁸Jamajjeya esejaya eba jama baꞌa: Jesosaja epeejji nei poanijo ca ca oe Eyacuiñajjiya eseya ba cani emimishi cuijeaꞌyo, quea pame. Jamajjeya Moisesija etehueꞌyo jayojja jama baꞌyanijo pojjeama mimishi cuijea caꞌyani Eyacuiñajjiya. Chojja, shajjamaꞌ ojjaña poani; chamaꞌ joya Moisesija etehueꞌyo jayojja jama baꞌyani tii.

²⁹Jodio cuana, eyaya miquianaya huohuiꞌajjaña jama baꞌa: —¿Aꞌa Eyacuiñajjiya Jodio cuanaja mimishi cuijea cani, Jodio pojjeama cuanaja mimishi cuijea sa po ajja pojjaꞌa? Chojja. Jamaya pojjeama. Eyacuiñajjiya ojjañaja mimishi cuijea cani Jesosa nijje jjapeequianijo.

³⁰Ohuaya ojjaña acani oya jayojjaya Jodio cuana, Jodio pojjeama cuana peaꞌai. Jamajjeya Jesosa nijje jjapeequianijo, Eyacuiñajjiya eseya ba cani emimishi cuijeaꞌyo, Jodio pojjeama cuana peaꞌai, de.

³¹Jamajjeya eseya, Jodio cuana Jesosa nijje jjapeequianijo, ¿aꞌa Eyacuiñajjija esohui etehueꞌyo jayojja jama caꞌapajeaꞌyahua? Chojja de. Jesosaja epeejji poanijo ca ca eseyaya ojaya esohui jayojja jama ejjaꞌaqui o quea bihui nee epo meejji.