Read Ese Ejja 2 Corintios 13 Bible Online

2 Corintios 13 - Ese Ejja bible

2 Corintios 13

¹Yahuajo eya miquiana huasijje poquinaje becanejjijji peaꞌai poquime poanaje. Jjeya eya poquije oꞌoya miquiana baa. Jamajjeya ¡bacue! Eyacuiñajjija esohui yahuajo etehueꞌyo jama poa baꞌa:“Oe dejja peajo maimaiani ¡aꞌa shajjaꞌajjajji! ¡Becaa, pea beca peejjimaa oya jayojja huohui cajo, shajjaꞌajjacue!” Jamaya tehue ca poa yahuajo nei.

²Jamajjeya jjeya eya miquiana huasijje poquije oꞌoya pea beca peejjima poquime epojji. Yahuajo miquiana nijje nequiya eyaya huohuinaje jama baꞌa: —Ojjaña joya quea mimishi po tiitiiani, joya jjeya nei quea mimishi poani peaꞌai eyaya tecueajea neineije poe oꞌoya majje —jamaya eyaya jjeya miquianaya huohui oꞌoyaña.

³Eꞌe, Jesosa Quitohua eya huoojea canaje miquiana huasijje ojaya esohui huohuiya. Ohuaya eya huoojea cani miquiana jjabahuejjaqui meejji peaꞌai. Joya miquiana nijje baꞌe quea mimishi poani tii tii quea nee nee po mee cajeꞌyo, ohuaya.

⁴¡Bacue! Dejja maseya Jesosa yahuajo nei acui ecueataꞌapeejo me cacajea cajje oya manoꞌyonaje. Jesosaja ca ca oya cuana jeabichajea jjima. Jamatii Eyacuiñajjiya quea caꞌa nee nee poaniya Jesosa shequi mee ca oꞌoyanaje; quea caꞌa nee nee baꞌe tiitii mee cani. Yahuajo Jesosa caꞌaꞌama jayojja poa. Jamaya peaꞌai eya caꞌaꞌama. Jamatii Jesosaa eya quea jaꞌa nee ojaya esohui huohui meesahua cani miquiana jjabahuejjaqui meejji.

⁵¡Jjashahuabaquicue! ¿Aꞌa Jesosaja esohui jayojja jama aña miquianaaya? Jesosa Quito miquiana nijje yani. ¿Aꞌa miquianajaya ba jjima? Jesosa miquiana nijje pojjeama ca miquianaya ojaya epeejji nishojo, de.

⁶Eya ca ca iña Jesosaja esohui huohuijji eꞌe jojo nei.

⁷Jamajjeya eya Eyacuiñajji nijje mimiani miquiana mimishi pajea meesahuajji jama baꞌa: —Eyacuiñajji, ¡miquea epeejji cuana Conitojo baꞌe mimishiꞌama nei baꞌe meesahuacue! —eya poani. Eya jama jjashahuabaqui ajja baꞌa: —Jesosaja epeejji Conitojo baꞌeca mimishiꞌama baꞌe ba majje pea cuaa eya bihuia caje, esohui huohuijji nei —jamaya eya po ajja. Chojja, miquianaaya eya Eyacuiñajjija huoojea pojjeama poso aña; esohui huohuijji nisho poso aña; jamatii eya Eyacuiñajji nijje mimiani miquianaya ojaya epeejji quea jaꞌa nee ebaꞌe meesahuajji.

⁸Eꞌe, dejjaja Eyacuiñajjija esohui eꞌe nei ehuoojea pajea meeꞌyojji pojjeama ojjaña huasijje. Jamajjeya ecuea esohui eꞌe jojo nei, siajje pojjeama.

⁹Jamajjeya miquianaya quea pame, mimishiꞌama baꞌe ba majje eya quea bihui nee poaje. Jamajjeya miquianaya etecueajji pojjeama, jamatii tecuea jjimajo eya Eyacuiñajjija huoojeaꞌyo quea jaꞌa nee pojjeama poso aña. Jamajjeya eya Eyacuiñajji nijje mimiani miquianajo jama baꞌa: —Eyacuiñajji, ¡miquea epeejji cuana quea jaꞌa nee nee baꞌe meesahuacue oe! —eya poani.

¹⁰Jamajoya miquiana huasijje poqui jjimahuaa eyaya esohui tehueaña miquianajaya mimishi epajeaꞌyojji. Eꞌe, eya Eyacuiñajjija huoojeaꞌyo esohui huohuijji, miquiana jjabahuejjaqui meejji. Eyacuiñajjija eya huoojea jjima miquiana janobajjima nei tecueajeaa quea yeno nee nee epo meejji. Chojja, ohuaya eya huoojea canaje miquiana quea jaꞌa nee baꞌe meesahuaa. Jamajjeya mi ba majje eyaya miquianaya etecueajeajji pojjeama mimishiꞌama ba majje.

¹¹Mahuiso ecuea esohui. Esohui oe yejje nei etehueꞌyo Ecuea epeejji cuana, ¡quea bihui nee pocue! ¡Shajjaꞌajjacue ecuea esohui! ¡Jama acue! ¡Jjashahuaba neineiquicue quea jaꞌa nee nee ebaꞌejji! ¡Ojee Jesosa nijje jjapeequicue! ¡Quea bei nee pocue! Jamaya poajo, Eyacuiñajjiya minijje ani tiitiijeꞌyo. Miquianaya ojaya quea jea nee nee. Oya ca ca oe quea bei nee nee.

¹²¡Ojjaña Jesosaja epeejji nijje mimicue quea bei!

¹³Ojjaña enijje nequiya miquianaya huohuiꞌajja cani jama baꞌa: —¿Achajja acuae nequiana soꞌo? —onajaya ebajji.

¹⁴¡Esejaya Emeshi Mese nei Jesosa Quitohua miquianaya cajaahuana cahua! Eyacuiñajjija miquianaya quea jea nee. ¡Onijje cabaꞌe tiitii mee cahua! ¡Edojjoshahua Pame miquiana nijje cajjapeequiahua tii tii! Mahuiso. Eyaya, Pabohua jiquio esohui tehueꞌyonaje. Apoa.