Read Ese Ejja 2 Corintios 6 Bible Online

2 Corintios 6 - Ese Ejja bible

2 Corintios 6

¹Eꞌe, ecuaaya Eyacuiñajji nijjeya ojjaña huasijje esohui quea pame nee Jesosajo huohuiaña. Jamajjeya ecuaaya miquiana huohui neineiaña jama baꞌa: —¡Eyacuiñajjija esohui shajjaꞌajja majje jamaya pocue! ¡Aꞌa shajjamaꞌ pojji! Shajjamaꞌ cuana ebaꞌe meejji pojjeama eyajo Jesosa nijje.

²¡Eyacuiñajjija esohui shajjaꞌajjacue! Yahuajo nei nei ohuaya tehue mee ca poa jama baꞌa:“Jjeya nei miquianaya enijje mimiani miquiana mimishi cuijeaꞌyojji. Eyaya miquianaya shajjaꞌajjanaje. Enijje mimianijo, eyaya miquianaya baꞌe tiitii meejeꞌyo peaꞌai”. Jamaya Eyacuiñajjija esohui yahuajo nei etehueꞌyo poa. ¡Bacue oe! Jjeyahua nei Eyacuiñajji miquiana shajjaꞌajja sa poani. Jjeya nei ohuaya miquianaya baꞌe tiitii mee sa acani ojaya epeejji nei nei epojji. Pabo quea nee nee poanaje

³Ecuaaya Jesosaja esohui jayojja jama atiitiiaña quea jaꞌa nee. Jamajjeya ojjañaa ecuana ba majje Jesosaja esohui shajjaꞌajja cajeꞌyo. Jamaya ameemee ajja baꞌa: —Eꞌe de, Jesosaja epeejji cuana quea mimishi nee poani. Jamajjeya ecuana ojaya epeejji po sa po ajja —jama siajje pomeya epojji pojjeama.

⁴Chojja. Ecuana ba majje ojjañaa caba cahua ecuana Eyacuiñajjijo quea pame nee chacochacoani jamatii onaa napa caniya tii. Quea pame nee po tiitiiani. Eꞌe, onaaya ecuana quea nee po mee cani, ecuana niñeba cani, Jesosa nijje jjapeequianijo ebaꞌejji quea camaja poani pea cuana quea mimishi poanijo.

⁵Maaya ecuana cuia majamaja canaje, jeanobiajea majamaja canaje, ecuana nijje quea quene nee po majje quea huiso jjachichaquinaje. Ecuana cojja neijo nequi majje janobajjima mimipanajajinaje. Ecuana quea camaja chacochaco majje cahui jjima tii aninaje. Quea shoe po majamajanaje peaꞌai. Jamatii ecuanaaya esohui quea pame Jesosajo huohui majamajaña, hueaꞌama nei nei ecuana poani.

⁶Mimishiꞌama nei nei baꞌyani peaꞌai. Eꞌe, ecuana chacochacoani Jesosajo quea pame nee. Quea huiso esohui Jesosaja ecuanaja eba quea jaꞌa nee. Ecuana quenequene cuaji ajja pea cuana nijje. Quea bei poani. Dejja taiꞌama poani. Edojjoshahua Pameya quea pame nee ameesahua cani peaꞌai. Pea cuana ecuanaja quea jea nee poani eꞌe jojo nei peaꞌai. Jamajjeya ojjañaa ba cani ecuana Jesosa Quitoja echacojji quea jaꞌa nee.

⁷Ecuanaja esohui eꞌe jojo nei poani. Eyacuiñajjiya huohui meesahua canijo ecuanaja esohui quea jaꞌa nee poani. Eyacuiñajjija emimishi cuijeaꞌyo jjejojo ecuana baꞌyani quea jaꞌa. Jamajjeya ecuaaya eshahuaja epeejji cuana mimicuiajeanobiajeaña esohui eꞌe nei mimi majje. Eyacuiñajjiya ameesahua canijo esohui eꞌe nei mimiani tii.

⁸Cuanaya eya quea pame nee poanijo jamaya cuana poani baꞌa: —Pabo quea pame nee poani. Beca cuana jama poani baꞌa: —Pabo ecuea botiꞌama, Jesosaja esohui huohuijjijojo. Pea cuana ca ca jama poani baꞌa: —Paboja esohui quea jaꞌa nee. Beca cuana ca jama poani baꞌa: —Chojja, Paboja esohui shajjaꞌajja sa po ajja ca iña. Pea cuaa ca jama sajaꞌame acani baꞌa: —Pabo Eyacuiñajjija esohui huohuijji quea jaꞌa nee. —Chojja, Pabo esohui huohuijji nisho. Oya siajje pojji —jama eya niñebameya acani cuaa.

⁹—Pabo ecuea eba. Ohuaya quea pame nee huohui cani —beca cuana poani. Pea cuana ca jama poani baꞌa: —¿Ae shai poani Pabo? Oya ecuea ba jjima —poani. Pea cuaa eya cuiajea sa acani. Jamatii eya eshe nequi, manoꞌyo jjima. Niñeba majje eya cuia canaje cuaa. Jamatii Eyacuiñajjiya jaahuana canaje jjejojo eya manoꞌyo jjima.

¹⁰Quea huiso epeejji nisho poanajejo, eya quea yeno poani. Jamatii Eyacuiñajjiya eya quea bihui nee po mee cani. Eya aemaꞌ poanaje peaꞌai. Jamatii ecuea esohui shajjaꞌajja majje quea huiso Jesosaja epeejji poani, quea pame baꞌyani. Eꞌe, Jesosaja epeejji poanijo eseya quea aquiana huiso nee nee jayojja. Jiquio meshijo baꞌyanijo ca ca eya eꞌaquiana mese pojjeama. Jamatii Jesosaja epeejji poanijo ecuea quea huiso aquiana yani eyajo.

¹¹Ecuea epeejji cuana Conitojo baꞌe, eyaya ojjaña ecuea ejjashahuabaquijji huohuiaña quea jaꞌa nee miquiana huasijje miquianaya ecuea quea jea nee nee poanijo.

¹²Eꞌe, miquiana nijje jjapee neineiquiani, miquiana quea jea nee nee poanijo. Miquianaya ca ca enijje jjapee neineiqui sa poꞌyo ajja.

¹³Jamajjeya epeejji cuana, ecuea esohui miquiana huasijje jama baꞌa: —¡Jiquio ecua miya ecuea quea jea nee nee jamaya oe eya acue miquiaaya! ¡Enijje jjapee neineiquicue! —eya poani. ¡Dejja mimishi nijje aꞌa jjapee neineiquijji!

¹⁴Miquianaya Jesosaja epeejji cuana poanijo ¡aꞌa nequijji Jesosaja epeejji pojjeama cuana nijje! ¡Ojaya epeejji cuana jayojja aꞌa pojji! Jesosaja ejjashahuabaquijji Edosiquiana neija ejjashahuabaquijji jama pojjeama. Pea oya, de. Jesosaja esohui quea jaꞌa nee cuaquijiji jayojja. Edosiquiana neiya ca ca quea mimishi nee nee, quea tai nee nee acani. Ojee nequi ajja Jesosaja epeejji Edosiquianaja epeejji nijje. Pea oya, de.

¹⁵Jesosa Quitoja ejjashahuabaquijji quea pame nee nee. Edosiquianaja ca ca quea tai. Pea ojaya, de. Jesosa Quitoja epeejji cuanaja ejjashahuabaquijji quea pame. Ojaya epeejji pojjeama cuanaja ejjashahuabaquijji ca ca quea tai. Pea ojaya, de.

¹⁶Eyacuiñajjija equi yasijje Jesosaja epeejji cuana dobiquiani ojee Eyacuiñajji bihuiaa, eyacuiñajji nisho bihuiaa pojjeama. Maya quea tai. Cuanaya Jesosaja epeejji cuana huasijje Eyacuiñajji dobiquinaje. Jamajjeya eshahuaja epeejji cuana nijje jjapeequi meemee ajja. Yahuajo nei Eyacuiñajjiya esohui huohui mee ca poa ojaya epeejji cuana huasijje jama baꞌa:“Miquianaya ecuea huapa pojjeama cuana poanijo, eya miquiana huasijje dobiquiani, miquiana nijje jjapee tiitiiquiani peaꞌai. Eꞌe, eya oe nei miquea Eyacuiñajji. Miquianaya jaahuana tiitiiaña peaꞌai. Miquiana ecuea epeejji cuana poani”. Jamaya pea esohui etehueꞌyo poa peaꞌai baꞌa:

¹⁷“Jamajjeya ¡ecuea epeejji pojjeama cuana nijje aꞌa jjapee tiitiiquijji! ¡Enijje nei oe jjapee tiitiiquicue! ¡Aꞌa quea mimishi pojji! Jamajjeya eyaya miquianaya baꞌe meejeꞌyo enijje.

¹⁸Cuanaya eya miquianajaya Chii nei poaje. Miquianaya ecuea ebacua piona cuana, ecuea ebacua ejja cuana poajeꞌyo peaꞌai. Eyaya mi jaahuanajji quea caꞌa neeya jamaya aña”. Jamaya Eyacuiñajjiya yahuajo nei huohui ca poa.