Read Ese Ejja Filipenses 1 Bible Online

Filipenses 1 - Ese Ejja bible

Filipenses 1

¹Ecuanaya bajjani Pabo, Timoteo peaꞌai. Ecuanaya Jesosa Quitoja echacojji cuana ojaya yajjijo. Ecuaaya esohui tehueaña ojjaña miquiana huasijje, Eyacuiñajjija epeejji cuana Pinipo cuiñajjijo baꞌe yasijje, Eyacuiñajjija esohui huohuijji cuana huasijje, o pejjejje caꞌajji yasijje peaꞌai tehueaña ecuaaya.

²Eyacuiñajji ecuanaja Chii ai. Jesosa Quito ecuanaja Emeshi Mese nei. Ohuaya miquianaya cajaahuana cahua quea pame nee. Mimishi cuana cuijeaꞌyo majje quea bei capo mee caꞌyahua peaꞌai. Pabo Eyacuiñajji nijje mimiani Jesosa Quitoja epeejjijo

³Miquianajo jjashahuabaquiꞌyo majje ecuanaja Eyacuiñajji bihuia tiitiiaña.

⁴Yahuajo Jesosa Quitoja esohui shajjaꞌajja jeahuajo miquianaaya eya esohui huohui meesahuaꞌyonaje, jjeya nei peaꞌai. Jamajjeya eya Eyacuiñajji nijje miquianajo mimi tiitiianijo quea bihui nee poani.

⁶Ecuea eba eꞌe jojo nei Eyacuiñajjiya miquianaya ojaya esohui jama baꞌe meesahua coo caꞌya poa yahuajo. Jesosa Quitoja epeejji quea caꞌa pishana po mee caꞌyonaje. Jjeya quea caꞌa nee pishana po mee caꞌyani. Quijje ca ca Jesosa Quito poe oꞌoyajo ohuaya miquianaya quea caꞌa nee nee baꞌe tiitii mee cajeꞌyo eyajo onijje.

⁷Eya miquianajo jjashahuaba tiitiiquiani miquiana quea jea nee neejojo. Jamaya quea pame. Eꞌe de, eyaya Jesosa Quitoja esohui janobajjima nei huohuiañajo, miquiaaya eya huohui meesahuanaje. Eꞌe, dejja cuanaja eya iña jjimahuajo, jeanobiajea cajo peaꞌai, miquianaaya aquiana ebaꞌe meesahuajji huoojeanaje e que.

⁸Jesosa Quitohua miquianaya quea jea nee acani, jamaya eyaya miquianaya aña. Jamajjeya miquianaya eyaya baqui sa aña, de. Eyacuiñajjija eba eya eꞌe jojo nei mimiani.

⁹Eya mimiani Eyacuiñajji nijje miquianajo jama baꞌa: —Eyacuiñajji, Jesosa Quitoja epeejji cuaa pea epeejji cuana quea jea pishana acani. ¡Oya cuana pea cuana quea jea nee nee ameecue, miyaya! ¡Quea huiso mijo ba meesahuacue peaꞌai! ¡Quea jjashahuabaqui jaꞌa nee po meecue peaꞌai quea pame nee ebaꞌejji, mimishiꞌama!

¹⁰Jamajjeya Quitohua poe oꞌoya majje oya cuana etecueajji pojjeama.

¹¹Eꞌe Eyacuiñajji, Jesosa Quito onijje baꞌyanijo, ohuaya ojaya epeejji cuana quea pame nee baꞌe meesahua cani mijo. Jesosaja epeejji cuaa quea pame nee acanijo, dejja cuaa miya bihuia cajeꞌyo. Ojjañaa ba caje miya, Eyacuiñajji ca ca oe quea caꞌa nee nee, quea pame nee nee peaꞌai poani —jamaya eya, Pabo mimiani Eyacuiñajji nijje miquianajo, Pinipo meshijo baꞌejo. Jesosa Quito ecue yami dojjojo nequi

¹²Ecuea epeejji cuana, ¡bacue jiquio esohui! Dejja cuaa eya iña majje quea huesha dojo canaje jeanobiaa. Quea camaja ejo poanaje. Jamatii, pea meshi cuana huasijje pea dejja quea huiso cuana huasijje Jesosa Quitoja esohui huohuiꞌyonaje eyaya. Jamaya quea pame nee.

¹³Eꞌe, eya jiquiacua ye canaje cuaa emeshi meseja ejjaquecuaquijji quea huiso huasijje, pea cuana emeshi meseja equi quea quemojo baꞌe yasijje. Onaaya ba canaje eya emeꞌ jeyoꞌyo nequi Jesosa Quitoja esohui huohuijjijojo onaja jeyoꞌyo.

¹⁴Eya jiquiojo nequianijo, beshahua nei ojjaña Jesosa Quitoja epeejji cuana onijje jjapee neineiquiani eꞌe jojo nei. Jjeya ca ca onaaya janobajjima nei Eyacuiñajjija esohui huohui cani meteꞌama.

¹⁵Jesosa Quitoja epeejji cuaa, oe pojji cuaa Jesosaja esohui huohui cani ejo quea quene poaniya jjejojo. Jjamimicuiajea nobiajeaqui sa poani peaꞌai. Beca cuana ca, cho. Jesosa Quitojo mimiani quea bihui nee, quea bei peaꞌai.

¹⁶Ohuaya Jesosa Quito, eya peaꞌai quea jea nee acanijo huohui cani. Onajaya eba Eyacuiñajjiya eya huoojea caꞌyonaje Jesosa Quitoja esohui huohuiya. Janobajjima nei huohuiañajo, pea cuaa ba caje Jesosa Quitoja esohui eꞌe nei. Pea cuaa enijje quea bei pojjeamaa, Jesosa Quitoja esohui huohui cani quea tecue, emaimaijji jayojja. Ma dejja cuaaya aje oe pea cuana eya pajea meeꞌyo sa acani, onijje jjapeequi meeꞌyo sa acani. Eya ejeyoꞌyo nequijo quea camaja pishana. Ohuaya eya quea camaja nee nee po mee sa acani.

¹⁸Eꞌe de, beca dejja cuaa quea tecue nee huohui cani. Pea cuaa quea bei huohui cani. ¿Apiojji shai Jesosa Quitojo huohui cani? Jamatii, Jesosa Quitojo huohui canijo, eya quea bihui nee nee.

¹⁹Eꞌe, miquianaya ejo mimiani Eyacuiñajji nijje; Jesosa Quitohua, Edojjoshahua Pameya peaꞌai eya quea caꞌa po mee cani quea pame nee. Jamajoya quijje eya quea pame nee baꞌejeꞌyo. Jamaya ecuea eba. Jamajjeya eya quea bihui nee po tiitiijeꞌyo.

²⁰Eya jjashahuaba tiitiiquiani Jesosa Quitojo echacojji. Jesosa Quitojo chaco sa neinei poani quea pame nee nee. Jamajjeya eya bichoꞌama ecuea ebaꞌejjijo. Eꞌe, jjeyahua nei, quijje peaꞌai eya eshe nequi baꞌe sa poani Quito nijje meteꞌama nei. Eshe nequije pojjaꞌa; quecua cajeꞌyo cuaa pojjaꞌa. Jamatii. Eya quea pame, meteꞌama baꞌyanijo, pea cuaa Quito bihuia cajeꞌyo.

²¹Eya jjashahuabaquiani jama baꞌa: —Eya eshe nequianijo, Jesosa Quito ecue eyamijo nequi. Quijje, manoꞌyo majje eya onijje baꞌejeꞌyo eyajo quea pame nee nee. Jiquiojo ca ca quea pame pishana eya baꞌyani.

²²Eꞌe de, jiquio meshijo baꞌyanijo eyaya Jesosa Quitoja esohui huohuijeꞌyo pea cuana huasijje. ¿Achejo shai baꞌe sa poani eya jjeya? Jiquiojo pojjaꞌa. Eyajo Jesosa Quito nijje pojjaꞌa. Cuaꞌa de.

²³Jjeyahua nei jiquio meshijo baꞌe sa neinei poani eya. ¿Achejo shai? Eyajo Jesosa Quito nijje ebaꞌejji ca ca oe eꞌe jojo nei ecuea quea pame nee nee.

²⁴Jamatii, eya jiquio meshijo baꞌe tiitiianijo, quea pame nee poaje miquianaya.

²⁵Eꞌe nei jamaya ecuea ejjashahuabaquiꞌyojji. Eꞌe, eya baꞌejeꞌyo jiquio meshijo. Jamaya ecuea eba. Eya miquiana nijje nequije Jesosa Quitoja epeejji quea caꞌa nee epo meesahuajji, quea bihui nee Jesosa Quito ba meesahuajji peaꞌai. Jamaya eꞌe jojo nei.

²⁶Jamajjeya miquianaaya Jesosa Quito bihuiajeꞌyo eꞌe jojo nei enijje quijje e miquiana que poquiyajo.

²⁷Eꞌe, eya epoquijji pojjeama pojjaꞌa miquiana baa; baquije pojjaꞌa mi baꞌajjaa. ¡Jamatii! Esohui quea pame nee Jesosa Quitojo miquianajaya eba. Jamajjeya ¡jamaya baꞌecue quea jaꞌa nee! Jamajjeya eyaya shajjaꞌajjaje miquianaya Jesosa Quitoja epeejji cuana ojee quea caꞌa nee baꞌyani. Ojee janobajjima nei huohuiaña Eyacuiñajjija esohui Jesosa Quitojo peaꞌai.

²⁸Dejja mimishi cuaa miquianaya napa cajo, ¡aꞌa oe quea mete pojji! Chojja, miya ca ca meteꞌama tiitii anianijo, ma dejja mimishi cuaa ba caje jama baꞌa: Quijje Eyacuiñajjiya oya cuana napa tiitii cajeꞌyo cuaquijo. Oya cuana ba mee caje peaꞌai miquianaya ca ca baꞌe tiitii mee cajeꞌyo eyajo, ohuaya.

²⁹Eꞌe, Eyacuiñajjiya miquianaya jjapeequi meesahua cani Jesosa Quito nijje. Pea cuana, cho. Jamaya peaꞌai baꞌa: Jesosa Quito nijje baꞌyanijo, pea cuaa miquianaya napa caje. Jamaya Eyacuiñajjija eba. Eꞌe, ohuaya miquianaya nahue caje peaa napa cajo. ¡Jamatii quea bihui pocue!

³⁰¡Jjeya miquianaya, e jayojjaya janobajjima nei eshahuaja epeejji cuana jeabichajeacue! Eꞌe, jjeyahua nei eyaya jamaya Jesosa Quitojo huohuiaña tii. Jamaya miquea eba.