Read Ese Ejja Colosenses 4 Bible Online

Colosenses 4 - Ese Ejja bible

Colosenses 4

¹Ojjaña echacomeejji cuaa, ¡shajjaꞌajjacue mo oe! Miquea echacojji cuana miquea yajjijo chacochacoani ¡sosequiacue oya huiso tii! ¡Oya cuana oe jaahuanacue quea pame nee epojji! ¡Aꞌa pajeaꞌyojji miquea Emeshi Mese neiya eyajo aniya miya ba tiitii cani! Pea cuana Pabohua niñesheꞌa cani

²Epeejji cuana, ¡mimi majamajacue Eyacuiñajji nijje ojjaña pojjajo! ¡Hueaꞌama mimicue! ¡Oya oe bihuiacue onijje mimianijo!

³¡Eyacuiñajji nijje oe ojee mimicue ecuanajoya peaꞌai! Jamajjeya ohuaya ecuana huohui meesahua tiitii cajeꞌyo esohui pame nee Jesosa Quitoja, ma onajaya yahuajo ba jjima. Ma esohui eya huohuiajoya, dejja mimishi cuaa eya iña majje jeanobiajea caꞌyonaje.

⁴Jamatii miquianaya ejo Eyacuiñajji nijje mimianijo, ohuaya eya Jesosa Quitoja esohui huohui meesahua cajeꞌyo quea jaꞌa nee.

⁵Jesosa Quitoja epeejji pojjeama cuana nijje mimianijo ¡jjashahuaba neineiquicue quea jaꞌa nee! ¡Quea pame nee oe ona nijje po tiitiicue peaꞌai!

⁶¡Quea bei, quea jaꞌa nee peaꞌai mimicue Jesosa Quitoja epeejji pojjeama cuana nijje! ¡Jjashahuaba neineiquicue onijje mimi jjimahuajo! Jamajjeya onaya Jesosa Quito ba meesahuajeꞌyo. Pabohua quea bihui nee esohui tehue canaje pea cuana huasijje

⁷Dejja Tiquico bajjani Jesosaja epeejji, e jayojjaya Jesosajo chacochacoani, ecuanajaya quea jea nee nee. Ohuaya eya chacosahua caꞌyonaje Jesosa Quitojo quea pame nee peaꞌai. Ohuaya miquianaya huohui cañaquije jiquiojo e baꞌyanijo.

⁸Eyaya oya huoojeaje miquiana huasijje e huohuiya. Ojaya esohui ecuanajo shajjaꞌajja majje ¡quea bihui nee pocue!

⁹Tiquico nijje Onesimo poquije. Oya ecuana jayojjaya Jesosaja epeejji quea pame nee peaꞌai. Yahuajo oya miquianajaya cuiñajjijo baꞌya poa. Ojjaña jiquiojo onaa acani huohui caje miquiana huasijje, Onesimohua.

¹⁰Anitaco enijje ejeyoꞌyo nequi ejjajeanobiaquijji equijo. Ohuaya miquianaya huohuiꞌajja cani jama baꞌa: —¿Achajja acuae quiana soꞌo? —ojaya ebajji. Macosohua peaꞌai huohuiꞌajja cani: —¿Achajja acuae quiana soꞌo, de, ecuanajaya ebajji? Oya Macoso Benabeja jjoꞌyaseja bacua ejja. Miquiana que poquiyajo, ¡oya jaahuanacue quea pame nee! Jamaya eyaya miquianaya huohuinaje yahuajo.

¹¹Jesosa Josoto yani peaꞌai. Ohuaya huohuiꞌajja cani peaꞌaiya: —¿Achajja acuae nequiana soꞌo, ecuanajaya ebajji? Jiquiojo pea beca peejjima Jodio cuana Jesosaja epeejji yani. Ohuaya eya chaco meesahua cani quea pame nee Eyacuiñajjija yajjijo, esejaya Emeshi Mese neija yajjijo. Pea Jodio cuanaja enijje chaco jjima, de.

¹²Epapasi cuanaya yani enijje. Ohuaya peaꞌai esohui quea bihui nee huohui cani miquiana que. Yahuajo oya miquiana nijje baꞌya poa peaꞌai. Jesosa Quitoja yajjijo chaco cani ohuaya. Janobajjima nei mimi tiitiiani Eyacuiñajji nijje miquianajo jama baꞌa: —Eyacuiñajji, ¡miyaya ojjaña Conosajo baꞌe cuana Jesosa Quito nijje jjapeequi meesahuacue quea jaꞌa nee! ¡Miquea esohuijo eꞌe jojo nei oya cuana jjabahuejjaqui meesahuacue! ¡Miquea esohui jama baꞌe tiitii meesahuacue, Eyacuiñajji! —jamaya Epapasi mimiani Eyacuiñajji nijje miquianajo.

¹³Eꞌe, Epapasi mimi tiitiiani Eyacuiñajji nijje miquiana jaahuanajji. Quea huesha cuiñajji yasijje Jesosaja epeejji cuana Naonisea cuiñajjijo baꞌe yasijje, Jienaponi cuiñajjijo baꞌe peaꞌai yasijje Eyacuiñajji nijje mimi tiitiiani, Epapasi. Jamaya eyaya oya baña.

¹⁴Ecuanajaya epeejji quea pame nee Noca bajjani yani jiquiojo. Oya eshicuijjiquiajji, de. Dejja Demasi bajjani yani peaꞌai. Ohuaya esohui quea bihui nee huoojea cani miquiana huasijje.

¹⁵¡Ecuanajaya esohui quea bihui nee huohuiquicue Jesosaja epeejji nei cuana huasijje Naoniseajo baꞌe yasijje! ¡Epona Nema bajjani oe huohuicue! ¡Ojaya epeejji cuanaya peaꞌai huohuicue, joya oja equi yasijje jjachachaquiani Eyacuiñajjija esohui baa!

¹⁶Eꞌe, jiquio ecuea esohui etehueꞌyo ba neinei majje ¡huohuiquicue Jesosaja epeejji cuana huasijje Naoniseajo baꞌe yasijje! Majoya ohuaya miquianaya quia caje oꞌoya pea esohui etehueꞌyo, ma eyaya ebionei tehuenaje o que. ¡Ma esohui shajjaꞌajjacue, ojjañaa miquiaaya!

¹⁷Pea dejja Aquipo bajjani huohuicue ecuea esohui jama baꞌa: —Eyacuiñajjiya miya huoojea caꞌyonaje ojo chacohua. Jamajjeya ¡chacocue quea pame nee ojo! ¡Ojjaña joya ecua ohuaya huohui cani jamaya oe acue!

¹⁸Eyaya ca eya jiquio esohui quea bihui nee tehueꞌyonaje. Dejja cuanaja eya pichojeaꞌyo jjima; eya ejeyoꞌyo tii nequi. ¡Aꞌa eya pajeaꞌyojji! ¡Eyacuiñajjiya miquianaya cajaahuana tiitii cahua quea pame nee! Mahuiso. Eya Pabo bajjani esohui tehuejji. Apoa.