Read Ese Ejja 1 Timoteo 1 Bible Online

1 Timoteo 1 - Ese Ejja bible

1 Timoteo 1

¹Timoteo, eyaya esohui tehueaña mi que miquea ebajji. Eya Pabo, Jesosa Quitoja esohui huohuijji. Jamaya Eyacuiñajjiya, Jesosa Quitohua peaꞌai eya huoojea canaje. Eyacuiñajjiya esejaya mimishi cuana cuijea jeyojeyo caꞌyonaje. Jesosa Quitohua eseya baꞌe tiitii mee cajeꞌyo onijje, esejaya ejjashahuabaquiꞌyojji quea pame jayojja.

²Timoteo, miya ecuea ebacua ejja jayojja poani Jesosa nijje jjapeequianijo. Jamajjeya eyaya esohui tehueaña mi que. Eyacuiñajji esejaya Chii ai eyajo ani; Jesosa Quito eseja Emeshi Mese nei poani peaꞌai. ¡Ohuaya miya cajaahuana cahua quea pame nee! ¡Mijo cajjashahuabaquiꞌyahua quea pame nee peaꞌai! ¡Miya quea bei nee capo mee cahua peaꞌai! ¡Esohui eꞌe nei pojjeama aꞌa shajjaꞌajjajji!

³Timoteo, ecuea esohui minijje Masenonia meshi yasijje poquianijo jama eyaya huohuije oꞌoya baꞌa: ¡Epeso cuiñajjijo nequicue! Jamajjeya miyaya pea esohui huohuijji cuana huoojeacue jama baꞌa: —Esohui eꞌe nei pojjeama Jesosajo ¡aꞌa huohui oꞌoyajji! Esohui eꞌe nei pojjeama cuana, esohui quea huiso etiiquianaja peaꞌai ¡aꞌa shajjaꞌajjajji!

⁴Ma esohui cuanajo jjashahuabaqui majje dejja cuana mimicuiajeanobiajea cani cuaa. Jamajjeya ¡oya cuana eꞌe jojo nei Jesosaja epeejji cuana ca ca jjabahuejja neineiqui meecue! ¡Aꞌa oe esohui quea quehua shajjaꞌajjajji!

⁵Eꞌe, Eyacuiñajjija esohuijo esohui huohuijji cuana jjashahuabaqui majje mimishi a sa poꞌyo ajja poani. Quea jjashahuabaqui pame poani peaꞌai. Jamajjeya Jesosaja esohui eꞌe jojo nei jama acanijo peaꞌai pea cuana eꞌe jojo nei quea jea nee acajeꞌyo.

⁶Jamaya po ajja esohui huohuijji shaja. Jamajjeya oya cuana esohui quea jaꞌa pojjeamajo mimimimiani.

⁷Moisesija esohui etehueꞌyojo huohui sa poani. Ma esohui ojaya ba jjima; quea quehua ojaya. Jamatii mimi neineiani esohui huohuijji shaja cuana.

⁸Jamaya esejaya eba baꞌa: Moisesija esohui etehueꞌyo cuana quea pame nee. ¿Apiojji acuae Moisesiya esohui tehue ca poa? Quea jjashahuabaqui jaꞌa po majje ca oe ¡Moiseija esohui etehueꞌyo jayojjaya jama acue!

⁹¡Bacue oe! Eyacuiñajjiya Moisesi esohui tehue mee ca poa dejja quea pame tecueajji pojjeama. Cho, tehue mee canaje shajjamaꞌ cuana tecueajji. Dejja shajjamaꞌ jama poani baꞌa: Esohui etehueꞌyo jayojja jama aꞌajja; emeshi meseja esohui jama a sa po ajja peaꞌai; Eyacuiñajji shajjaꞌajja sa po ajja; quea tai baꞌyani; quea jjashahuabaqui tai poani; Eyacuiñajjijo jjashahuabaqui ajja; oja chii quecuajji poani; oja nae quecuajji poani; pea cuana quecuajji poani peaꞌai.

¹⁰Eꞌe, shajjamaꞌ cuana pea cojjojji poani; pea dejja see huejja cojjojji poani; pea epona so cojjojji poani; peaja ebacua sii majje quiajji poani; pea jeameejji poani; siajjepojji poani; oya esohui pajeaꞌyojji poani; peaja esohuijo siajje poani peaꞌai; Eyacuiñajjija esohui etehueꞌyo jama po ajja peaꞌai.

¹¹Eꞌe, jiquio Moisesija etehueꞌyo Eyacuiñajjija esohui quea pame nee nee. Maya eya Eyacuiñajjiya huohui meesahua cani. Oya quea caꞌa nee nee; oe nei quea pame nee nee eya jaahuana cani, Eyacuiñajjiya. Eyaya Jesosa Quito bihuiaña ohua sohuihuohui meesahua caniya jjejojo

¹²Esejaya Emeshi Mese neija, Jesosa Quitoja eba ojaya esohui pajeaꞌyo ajja tii tii, eya. Jamajjeya ohuaya eya huoojea caꞌyonaje ojaya esohui huohuiya. Jamajjeya eyaya Jesosa Quito bihuiaña ohua sohuihuohui meesahua caniya jjejojo.

¹³Yahuajo aje eya Jesosa nijje mimijajiꞌyonaje, ojo quea tai miminaje, ojaya epeejji cuana iña meeꞌyonaje ejeanobiajeajji. Jamatii, eya jjashahuabaqui jjimahua, oya ecuea ba jjimahuajo, Jesosa Quito ejo quea tecue jjashahuaba tiitiiquiꞌyo ajja poanaje, de;

¹⁴ejo quea pame nee jjashahuabaquinaje de, esejaya Emeshi Mese nei, Jesosa Quito. Jamajoya jjeya eya ojaya epeejji nei poani; ohuaya eya quea jea nee nee acani, de.

¹⁵¡Bacue jiquio esohui eꞌe nei nei, quea pame nee poani! Ojjaña cuaa caba neinei cahua jama baꞌa: Jesosa Quito jiquio meshi yasijje poeyanaje ojjaña cuanaja mimishi cuana cuijeaꞌyohua. Eya jamaya jjashahuabaquiani baꞌa: Ojjaña dejja cuana quea mimishi pishana; eya ca ca quea mimishi nee nee poanaje.

¹⁶Jamatii Jesosa Quito ejo quea pame nee jjashahuabaquinaje, de. Jamajjeya oya enijje tecueꞌama poanijo, pea cuaa ba cani oya tecueꞌama enijje, oya tecueꞌama dejja mimishi cuana nijje, ca onijje jjapeequiꞌyajo. Baꞌe tiitii mee cajeꞌyo Eyacuiñajji nijje.

¹⁷¡Emeshi Mese nei ejjashajjaꞌajjaqui! ¡Ejjabihuia tiitiiqui peaꞌai! Eyacuiñajji ese huoojeajji poani nequi tiitiijeꞌyo. Eꞌe, oe nei nei Eyacuiñajji yani; pea chamaꞌ. Jamajjeya oya dejja cuanaja ecojja bajji pojjeama. Jamaya capoahua. Jamaya pea cuana cahuohui cahua Timoteohua

¹⁸Eꞌe Timoteo, miya ecue bacua ejja jayojja jama poani. Jamajje eyaya miya huoojeaña ecuea esohui huohuiya pea esohui huohuijji cuana huasijje. Yahuajo pishana pea cuaa miya huohui canaje jama baꞌa: —Timoteo, quijje miya esohui huohuijji quea pame nee nee poajeꞌyo —acanaje cuaa miya. Jamajjeya ¡esohui eꞌe jojo nei janobajjima nei huohuicue quea bihui nee, dejja quea caꞌa jayojjaa!

¹⁹¡Eyacuiñajjija esohui eꞌe nei shahuaba neineicue! ¡Quea jaꞌa nee baꞌecue eꞌe jojo nei ojaya esohui jayojja jama! Beca cuana jama a sa poꞌyo ajja jjejojo poquiquehuaꞌyonaje. Jamajjeya aemaꞌ nei nei jayojja jama poanaje. Esohui eꞌe jojo nei pajea caꞌyonaje, Jesosa Quitoja.

²⁰Jamaya poanaje dejja bajjani Imeneo, Anejano cuanaya. Jamajje eyaya oya cuana cajaa aꞌyonaje. ¡Edosiquiaa canapa cahua! Jamajjeya ¡oya cuana cajjabahuejjaquiahua Eyacuiñajji nijje emimijaji pajeaꞌyojji!