Read Ese Ejja 1 Timoteo 3 Bible Online

1 Timoteo 3 - Ese Ejja bible

1 Timoteo 3

¹Timoteo, ¡pea esohui shajjaꞌajjacue! Jiquio esohui eꞌe nei, baꞌa: Dejja cuana Jesosaja epeejji cuana jaahuana sa poanijo, jamaya quea pame nee.

²Eꞌe Timoteo, jamajjeya miyaya Jesosaja epeejji jaahuanajji epojji jama huohuicue baꞌa: —¡Quea pame nee baꞌecue! Jamajjeya peaa miya etecueajji pojjeama. ¡Ehuanase oe nei huanacue! ¡Quea jaꞌa nee jjashahuabaquicue, yajjajjaꞌama! Jamajjeya quea mimishi baꞌe ajja. ¡Quea pame nee peaꞌai baꞌecue pea cuana nijje! ¡Jjapeequicue pea cuana nijje! ¡Quea jaꞌa nee Eyacuiñajjija esohui huohuicue!

³¡Ecahuishi, ejjisese quea sese nee nee aꞌa ishijji! ¡Aꞌa jjacuiaquijji! Cho. ¡Quea bei pocue ojjaña nijje! ¡Aꞌa quea tecue pojji! ¡Aꞌa quea bejjo huiso sa pojji!

⁴Ojjaña cuana miquea equijo baꞌe jaahuanacue jama baꞌa: ¡Miquea ebacua cuana miquea esohui jayojja jama po meecue! ¡Jjashajjaꞌajjaqui meecue peaꞌai! —jamaya Jesosaja epeejji jaahuanajji epojji acue, Timoteo.

⁵Eꞌe, Jesosaja epeejji jaahuanajjiya ojjaña cuana ojaya equijo baꞌe jaahuanahuana ajjajo Jesosaja epeejji cuana jaahuana ajja peaꞌai poaje.

⁶Timoteo, ¡Jesosaja epeejji jjeya nei jjapeequi aꞌa huoojeajji Jesosaja epeejji jaahuanaa! Oya shajjamaꞌ po chanaꞌ; quea jaꞌa huohui ajja. Jamajjeya Eyacuiñajjiya oya tecuea ca chanaꞌ. Jamaya Eyacuiñajjiya Edosiquiana shajjamaꞌ poanijo tecueajea caꞌyonaje yahuajo nei nei.

⁷Eꞌe, Jesosaja epeejji jaahuanajji quea huiso shequiajajo jjapeequiani cabaꞌeyahua quea pame nee. Jamajjeya Jesosaja epeejji pojjeama cuaa ojo huohui caje jama baꞌa: —Eꞌe, oya dejja quea pame nee poani tii. Oya quea tai poajo ca ca pea cuaa oya tecueajea cajeꞌyo. Edosiquianaa pea cuana onijje mimijaji mee ca chanaꞌ, dasia ca chanaꞌ. Jamajjeya onaa tecuea cajje quea yeno po majje quea mimishi po chanaꞌ. Jesosaja epeejjija ebaꞌesahuajji cuana jamaya capoahua

⁸Timoteo, ¡Jesosaja epeejjija ebaꞌesahuajji cuana babacaquicue! Jama acue cuana baꞌa: —¡Quea jaꞌa nee baꞌecue! ¡Eꞌe jojo nei nei mimicue! ¡Aꞌa quea huiso ishijji, aꞌa huoojji! ¡Aꞌa quea dejja tai pojji! ¡Aꞌa edasiajji pojji peaꞌai!

⁹¡Ojjaña Eyacuiñajjija esohui eꞌe nei jama atiitiicue quea jaꞌa nee! Yahuajo ma esohui Eyacuiñajjija dejja cuana ba meesahua jjima; jjeya ba mee cani quea huiso —jamaya oya cuana acue, Timoteo.

¹⁰Cuanaya ¡Jesosaja epeejjija ebaꞌesahuajji cuana babaca jjimahua oya ba neineicue! ¡Oya jjabahuejjaqui meecue peaꞌai! ¡Quea pame nee poanijo, oya huoojeacue Jesosaja epeejji baꞌesahuaa!

¹¹Jesosaja epeejjija ebaꞌesahuajji cuanaja ehuanase cuanaya jama acue baꞌa, Timoteo: —¡Quea jaꞌa nee baꞌecue, epona! ¡Aꞌa quea mimijjequijea pojji! ¡Aꞌa ishiꞌishijji! ¡Jesosaja epeejji cuana baꞌe meesahuacue; nishehuiꞌama pocue! —jamaya miyaya oya cuana acue, Timoteo.

¹²Eꞌe Timoteo, Jesosaja epeejjija ebaꞌesahuajji babaca majje oya cuana jiquio jama acue baꞌa: —¡Oe ehuanase huanacue! ¡Miquea ebacua cuana, ojjaña miquea equijo baꞌe peaꞌai jaahuanacue quea jaꞌa nee!

¹³Eꞌe, miyaya quea jaꞌa nee Jesosaja epeejji baꞌesahuañajo, onaaya miya ojjañaa shajjaꞌajja caje quea bihui nee. Jesosa Quitoja esohui bichoꞌama nei huohuime aje, ¡quea jaꞌa nee acue! Eꞌe Timoteo, ¡Jesosaja epeejji quea pame nee babacacue Jesosaja epeejji baꞌesahuajji! Jamaya apoa. Eyacuiñajjija equijo ojaya epeejji jamaya capoahua

¹⁴Timoteo, jiquio pea esohui cuana eyaya tehueaña mi que. Eya mi baa poqui sa poani quijje pishana.

¹⁵Eꞌe pojjaꞌa jjeya eya epoquijji pojjeama mi que. Jamajjeya eyaya mi que esohui tehueaña mi huohuijji achajja Jesosaja epeejji cuana poaje soꞌo quea pame nee epojji. Ecuea esohui etehueꞌyojo miyaya ba meeje cuana. Eꞌe, Eyacuiñajji ca ca enequi eshe tii tii. Ojaya epeejji cuana ojjaña meshijo baꞌyani. Oya cuana Eyacuiñajjija huapa pojjeama jayojja jama poani. Ojaya esohui eꞌe nei ojjaña cuana ba meesahua cani, Eyacuiñajjiya.

¹⁶Jamaya eꞌe jojo nei baꞌa: Eyacuiñajjija esohui eꞌe nei, quea pame nee nee. Ma esohui yahuajo ojaya ba mee jjima poa. Jjeya ojaya esohuijo eseya quea jaꞌa nee baꞌejeꞌyo. Jamaya ojaya esohui Jesosa Quitoja baꞌa:“Eyacuiñajji jiquio meshi yasijje poeyanaje; dejja jayojjaya yamijji baꞌya poa. Edojjoshahua Pameya huohui canaje quea pame nee oya. Eyacuiñajjija esohuidojojji cuaa oya ba canaje. Ojaya epeejji cuaa ojo huohui canaje Jodio pojjeama cuana huasijje. Quea huiso dejja cuaa ojjaña meshi cuanajo oja sohui shajjaꞌajja majje jjabahuejjaqui caꞌyonaje. Quijje Eyacuiñajjiya oya jjequisohua caꞌyonaje eya huasijje”. Jamaya yahuajo nei Isaiaa tehue ca poa.