Read Ese Ejja 1 Timoteo 4 Bible Online

1 Timoteo 4 - Ese Ejja bible

1 Timoteo 4

¹Timoteo, pea esohui eyaya huohuije esohui huohuijji nishojo. Yahuajo nei Edojjoshahua Pameya huohui ca poa jama baꞌa: —Quijje Jesosa Quito poe oꞌoya jjimahuajo, Eyacuiñajjija esohuijo jjabahuejjaqui majje beca cuaa ojaya esohui jayojja jama apajea cajeꞌyo. Eshahua cuana shajjaꞌajja caje. Eshahuaja esohui tai cuana jayojja jama acaje. Eshahua cuana aje oe jjadasiaquijji, de.

²Ojaya esohui eꞌe nei pojjeama. Eshahua cuaa beca dejja cuana siajje po mee cani. Jamajjeya ma dejja cuana siajje po majje bichoꞌama poani.

³Jama siajje pome poani baꞌa: —¡Eponajo aꞌa jjahuanaquijji! ¡Aꞌa beca bobi cuana ijjiajji; quea ajja coma! ¡Eshahuaa cuia caje! —poani.

⁴Chojja. Eyacuiñajjiya ojjaña bobi cuana pana caꞌya poa eꞌijjiajji; quea pame nee. Jamajjeya Jesosaja epeejji cuaa esohui eꞌe nei ba majje, Eyacuiñajji bobijo bihuia majje peaꞌai ojjaña bobi quea pame cuana caꞌijjia cahua.

⁵Jamajjeya Eyacuiñajji nijje mimi majje, ojaya esohui mimi majje peaꞌai quea jaji nee caꞌijjia cahua bobi cuana. ¡Jesosaja echacojji quea pame nee pocue!

⁶Timoteo, pea esohui eyaya tehueaña mi que Jesosa Quitoja jama baꞌa: ¡Esohui cuana ojo Jesosaja epeejji cuana huasijje huohui majamajacue miyaya! Jamajjeya oya cuana baꞌe meesahuaje quea pame nee. ¡Eyacuiñajjija esohui eꞌe nei cuana ba huichaꞌa huichaꞌacue! Miya ojaya esohui huohuijji quea jaꞌa nee poaje peaꞌai. Ma esohui eꞌe nei Jesosa Quitojo yahuajo shajjaꞌajja majje jamaya ahuichaꞌaꞌyonaje miyaya, Timoteo.

⁷¡Etiiquianaja esohui quea quehua aꞌa shajjaꞌajjajji, Eyacuiñajjija esohui cuana jayojja jama pojjeama! Onaajaya esohuiya quea pame baꞌe mee nisho cani. ¡Aꞌa jamaya pojji! Timoteo, ¡miyaya oe Eyacuiñajjija esohui jayojja jama amajamajacue!

⁸Jamaya acue baꞌa: Chaco tiitii majje miquea eyami quea caꞌa poaje. Jamaya quea pame pishana. Eyacuiñajjija esohui jayojja jama atiitii majje ojaya epeejji quea jaꞌa poaje. Jamaya quea pame nee nee. Jamaya poanijo Eyacuiñajjiya miya jjeyahua nei quea pame nee baꞌe mee caje; manoꞌyajo, baꞌe tiitii mee cajeꞌyo eyajo peaꞌai.

⁹Eꞌe, jiquio esohui eꞌe nei nei. Jamajjeya ¡ojjañaa cashajjaꞌajja tiitii cahua!

¹⁰Jamajoya Eyacuiñajjija esohui eꞌe nei poanijo ecuana janobajjima nei Jesosaja epeejji cuanajo chacochacoani. Pea ecuana nijje janobajjima mimijajiani. Jamatii Eyacuiñajji eshe yani; o epoe oꞌoyajjijo ecuaaya ishoaꞌajjaña. Ohuaya ojjaña onijje jjapeequi meeꞌyo sa acani. Ojjaña joya eꞌe jojo nei poani ohuaya mimishi cuijea cajeꞌyo.

¹¹Jamajjeya ¡jiquio esohui cuana huohui neineicue! ¡Ojjaña cuana jjabahuejjaqui meecue miyaya, Timoteo! ¡Quea pame nee baꞌecue, Timoteo!

¹²Timoteo, miya edejja shoꞌi pishana poani. Jamatii pea cuaa miquea esohui cashajjaꞌajja cahua. Jamajjeya ¡quea jaꞌa nee Jesosa Quitojo mimicue, miya! ¡Quea jaji nee oe pocue! ¡Pea cuana quea jea nee acue! ¡Eyacuiñajji nijje jjapee tiitiiquicue eꞌe jojo nei! ¡Ojaya epeejji nei nei pocue! ¡Quea jjashahuabaqui jaꞌa nee oe pocue peaꞌai! Jamajjeya ojjaña Jesosaja epeejji cuana mi jayojjaya poaje. Quea pame nee nee acajeꞌyo cuaa.

¹³Eya, Pabo poeje quijje pishana mi baa. E poe jjimahuajo, ¡Eyacuiñajjija esohui huohuicue ojjaña joya Jesosaja epeejji ejjachichaqui ani yasijje! ¡Ojjaña cuana jjabahuejjaqui meesahuacue; Jesosaja esohui ba meesahuacue peaꞌai!

¹⁴Yahuajo Jesosaja epeejji etii cuaa miya huoojea sa poanijo mijo huohui canaje jama baꞌa: —Timoteo quijje esohui huohuijji quea pame nee poajeꞌyo. Jamajjeya onaa huoojea cajje miya Eyacuiñajjiya esohui huohui meesahua canaje. ¡Maya aꞌa pajeaꞌyojji! ¡Jamaya po tiitiicue Eyacuiñajjijo!

¹⁵Jamajjeya ¡Eyacuiñajjija esohui ba neineicue! ¡Ojaya esohuijo jjashahuaba tiitiiquicue peaꞌai! Jamajjeya ojjañaa miya ba caje jjeya esohui ba neineiꞌyonaje; yahuajo miquea bajea jjima poanaje.

¹⁶Eꞌe, ¡miquea esohui jayojja jama baꞌe tiitiicue quea pame nee! ¡Esohui eꞌe nei huohui huichaꞌa huichaꞌacue! Jamajjeya miya poquiquehua ajja eshahuaja ejiojji tai yasijje. Pea cuana miquea esohui shajjaꞌajja majje cuaqui yasijje epoquiꞌyojji pojjeama peaꞌai.